Tuolsung
DC inrawinain thingkak phun a nih
CCPUR: World Environment Day (WED) 2015 le inzawmin zanikhan Mr Lunminthang Haokip, IAS, DC, CCPur inrawinain IWMP team han DC, Churachandpur Office campus sungah thingkak phun a nih. Hi huna hin DRDA CCPur District Project Officer Y. Shashi Kumar le a staff hai, Integrated Watershed Development Project (IWMP) thawktu hai an thang. Tukum World Environment thupui chu “Seven Billon Dreams, One Planet, Consume with Care” ti a nih. World Environment Day 2015 hawngna le thingkak phunna DC in a nei zovin S. Khaikhopau Ngaihte, BO Hqrts, DC Ofice, CCPur bakah T. Kammuanlal Simte, AC to DC CCPur hai khawmin thingkak an phun ve a, DC Office le a sevel haiah thingkak thahnemtawk tak phun a nih.



Polling stations 15 ­ah repoll nei a ni ding
CCPUR: June 1, 2015 nia Manipur­a ADCs 6 haia MDC election nei huna thil fel lo umna le excess voting umna Polling stations haia chun vawisun June 6, 2015 hin Re­poll nei ning a tih.  Churachandpur District­a chun votes 1071 umna 20/1 Siden Changpikot Polling station (20­Sagang DCC) le Voter 377 umna 2/13 Teijang Polling Station (2­Leimatak DCC) haia chun excess voting a um leiin vawisun hin buoina suokna hmun Polling stations hai leh a ruolin re­poll um a tih. Votes chu 7AM a inthawk thlak tan ning a tih.

World Environment Day an hmang
CCPUR: FNS­ICDP/CCPur area, DD­RPC NEI chun zanikhan Jolzam Community Hall­ah World Environment Day­ 2015 an hmang. Hi huna hin khuollienin Rev. Dr V. Lalnghakthang, Gen. Secretary, RPC NEI a thang a, Functional President in Mr Joseph L. Infimate, Manager, ICDP­CCPur Area, DD­RPC NEI a thang. Hi hun hmangnaa hin thingkak phun a ni bawk.
    

Chun, zani 3­5PM inkar sung khan Misao Lhavom­ah CCCD RPC hnuoia JDC hai chun World Environment Day 2015 an hmang. Hi huna hin targeted villages (Mualkot, Mualpi, Mualsan, Sumtukphai, Tuikham, M. Lhavom, Vengnomphai, M. Shimuol, Bohlui, Saipum le Toljang Kuki) haia inthawk mi 200 chuong an fekhawm.
            

Resource person Mr T. Samuel Haokip, FC chun WED thupui “7 Billion dreams, One Planet, Consume with Care’ ti thupui hmangin thu a hril a. Environment humhalna hi Sawrkar, NGO le Pawl hai chau mawphurna a ninaw thu uor takin a hril. Hi huna hin naupang (Children Clubs) han Envinronment chungthua Poem recitation le painting competition hai an nei a, an thil ziek hai hi huna hin pholang nghal a ni bawk. Hi hunser hmangna hi nu le pa, VDC, JDC le mi dang dang han an uop bawk.

Malaria Positive 20
CCPUR: District Malaria Department, CCPur chun January­May, 2015 inkar sung khan damnaw mi 5767 hai thisen lain an enfel a, hieng hai lai hin Malaria Positive 20 an hmusuok a, chu laia 5 chu Malaria (PF) an nih.

Proof um lo hai NDC pek lo ding
CCPUR:  Electricity No Due Certificate (NDC) pekdawkna kawngah proof um lo chu NDC pek nita naw ni a, mi In hluo­a khawsa hai chun NDC lakna dinga hin an chengna khuoa Village Authority a inthawk residential certificate an peklut ngai a ta, chu bo chun No Due Certificate pekdawk ni tanaw nih tiin Dy. Gen. Manager, MSPDCL, CCPur chun inhriettirna a siem. One time no due certificate lakna dinga hin thawktu hai chun Original le Photocopies 2 an peklut tul bawk a tih tiin Dy. Gen. Manager, MSPDCL, CCPur chun a hril bawk.

Headline
Army Chief General Dalbir Singh Suhag a hung inzin;
Manipur a helpawlhai lakah Army han beipui an thlak ding
IMPHAL: Zani hamsaa helpawl han Chandel District a 6 Dogra Regiment hai an lambun leia Army 18 an thi le Army 11 an hliemna le inzawmin Chief of Army Staff General Dalbir Singh Suhag chu zanikhan Manipur­ah a hung inzin a, inlambun tlungna hmun chu a hmun ngeiah a va sir bakah IGAR (S) Headquarters Mantripukhri ah 3 Corpts Commanders le top Police officers hai an hmupui. Hi huna hin 3 Corps Commanders le top Police officials han thil umdan report an pek. Hi zo hin helpawlhai tu kdawl dan ding (operation plan) thaw dan ding chipchier takin an induong.
    
Zani hmasaa Chandel District­a helpawl han Army an lambunna a khan Army 18 le helpawl 1 an thi a, Army 11 an hliem. Army thina tuokhai ruong hu zanikhan JNIMS Morgue, Imphal­ah Postmortem thaw an nih. Thina tuok Army hai lai hin Himachal Pradesh mi 7, J&K mi 6, Karnataka, Madhya Pradesh le Punjab mi pakhat seng le Uttar Pradesh mi pahni an thang.
    
Army thina tuokhai chu­ Junior Commission Officer (JCO) Naik Subedar Ram Singh (39), Samba district; Havildar Sunil Kumar (40) of Rajouri; Havildar Randeep (39); Satpal Bhasin (40); Lance Naik Kuldeep Raj (33); Sepoy Vijaykumar (27), J&K state vawng; Havildar Prakash Chand (37); Sepoys Manoj Kumar (31), Vikas Bharadwaj, Mandi district vawng; Haivildar Rajeshkumar (39) of Bilaspur district; Lance Naik Rajneesh (36) of Kengra; Naik Ashokumar (36) of Simaur district le Sepoy Sohan Singh (26) of Sirmour district, HP state vawng; Sepoys Ram Prasad Yadav (40) of Faizabad; Jagveer Singh (26) of GB Nagar, UP mi ve ve; Sepoy Bharatshwar (32) of Belgaum, Karnataka; Sepoy (Driver) J.K. Kushwaha (39) of Madhya Pradesh le Manjit Singh (32) of Pathankot, Punjab hai an nih. Hi inlambunnaa thi helpawl chu Rajanglung Kamei @ Raja (32) s/o Alung Kamei of Noney Part­I, Tamenglong district a nih ti hriet a ni ta bawk.
    
NSCN (K), KYKL le KCP hai chun 6 Dogra Regiment hai hi anni lambun niin an hril. Army le Police hai chun Army lo lambuntuhai man tu min dappui nasa takin an thaw a, man an nei le neinaw hriet a la ni nawh.
   
Zani hamsaa New Delhi­a Union Home Minister Rajnath Singh, Union Defence Minister Manohar Parrikar, National Seurity Adviser Ajit Dovel, Army Chief General Dalbir Singh le senior officials han meeting an nei huna an rel angin Manipur­a helpawlhai chungah Army han beipui thlak an tih tiin zanita Manipur a hung inzin Army Chif General Suhag chun a puong.

Polling stations 74 ah repoll
IMPHAL: State Election Commission thusuok dungzuiin vawisun hin Manipur­a ADCs 6 biel sunga Polling stations 74 haiah repoll nei ning a tih. Repoll neina dinghai chu Churachandpur District­ah Polling stations (PS) 15, Senapati le Sadar Hills haiah PS 18 ve ve, Ukhrul district­ah PS 4, Tamenglong District­ah PS 9 le Chandel District­ah PS 10 an nih.

Tengnoupal PS­ ah Case registered
IMPHAL: Zani hmasaa Chandel Distrit a 6 Dogra Regiment hai lambunna le inzawmin Manipur Police han Tengnoupal Police station­ah case an registered niin Manipur Dy. CM Gaikhangam chun a hril. Hi thil tlung hi Manipur Governor, CM le Dy. CM han nasa taka an dem thu an puong.

Prof. Vishwanath kuoma Natl. Award inhlan a nih
IMPHAL: Manipur University­a Department of Life Sciences a Prof. Dr Waikhom Vishwanath chu zanikhan Ganga auditorium,Indira Paryavaran Bhavan, Ministry of Environment, Forest and climate change, New Delhi­a Ministry of Environment and Forest huoihawtnaa World  Environment Day hmangna huna ‘Prof E.K. Janaki Ammal National Award on fish Taxonomy­2015 inhlan a nih. Award hin sumfai Rs. 1,00,000/­, Citation, Scroll le Medallion a sawm. Fish taxonomy tienga a contribution leia award hi inhlan a nih.

TET exam 2015 June 7­-ah
IMPHAL: Teacher Eligibility Test (TET), 2015 (both paper I & II) chu June 7, 2015, 10AM­12noon le 1PM­3PM inkar haiah T.G. Higher Secondary School, Imphal­ah nei ning a tih tiin Secretary, Board of Secondary Education, Manipur chun inhriettirna a siem.

LDA/LDC Interview nei hun
IMPHAL: High Court of Manipur hnuoia LDA/LDC sin lakna dinga Interview chu June 27, 28 & 29, 2015 hai khin hi High Court hmuna hin nei ning a tih. Interview­a thang thei dinghai hming chu Court Notice board ah tardawk le http://hcmimphal.nic.in ah hmu thei a nih.

State Scholarship Exam a um ding
IMPHAL: Kum 2014­15 a dingin Directorate of Education (S), Govt. of Manipur chun Class­V & VIII hai ta dingin July 19, 2015 khin State Competitive Scholarship Exam buotsai a tih. Class V & VIII exam­a marks 60% hmu (General Category) le marks 50 (ST/SC category) hmu hai hi exam­a hin thang thei an tih. Application form le thu chieng lem ZEO or DI hai kuoma ngaiven thei le Department website:www.manipureducation.gov.in ah download thei a nih.

Medical Counselling June 8-­ah
IMPHAL: Academic Session, 2015 a JNIMS, Porompat, Imphal­a Post Graduate Courses inchuk dinga hnina pehai ta dingin June 8, 2015 khin Directorate of Health Services,Manipur, Lamphelpat­ah 11AM a inthawk Medical Counselling nei ning a tih tiin Director, Health Services, Manipur chun inhriettirna a siem.

Bike inru tum Police constable man
IMPHAL: June 4, 2015, 11AM vel khan Top Mayai Leikai, Imphal East mipui han Manipur Police Department hnuoia Police Constable sinthaw Md. Akbar Ali (28) of Keirao Makting Makha Leikai chu Pulser bike (black) inruk a tum lai an man a, Imphal East Police station­ah an peklut. Bike hi Md. Akbar Chandra (30) ta, an In compound sunga an thut a nih.

Others:
Economic blokade hlip a nih
GUWAHATI: Southern Angami Youth Organisation (SAYO), Nagaland le Mao Council, Manipur han Nagaland le Manipur inkara hun tiemchin um lova Economic Blockade an inthaw khum chu hun iemanichena dingin an hlip. Angami Public Organisation (APO), Naga Hoho le UNC hai inrawlna leia blockade hi hlip a nih.

Parbung OC in Mizoram HM a dawnlet
AIZAWL: Mizoram Home Minister R. Lalzirliana in Parbung Police Station OC Tlangthanzuol (T.T. Zuola) an tumna chu Parbung OC in a dawnlet. T.T. Zuola chun, R. Lalzirliana min tumna hi thukhel le thubelchiengdawllo a nih. Tieuliena khawm ka fe naw a, HPC (D) hai silaimu ding 500 khawm ka phur nawh. Lampui dang hrawin Aizawlah chun ka chunga Officer pakhat leh kan fe. A mi’n tum theina evidence a um chun suklang sienla, iengang inquiry khawm ka cho tiin T.T. Zuola hin a dawnlet. Chun, R. Lalzirliana chunga Defamation case a siem ding thu a hril.
    
R. Lalzirliana hin T.T. Zuola hi HPC(D) silaimu ding 500 phurtua intumin Manipur Dy. CM le Home Minister, Gaikhangam kuoma action la dingin lekha a thawn a nih.

Director, NFSM dingin Narendra Bhooshan
NEW DELHI: Senior IAS Officer Narendra Bhooshan chu Mission Director, National Food Security Mission (NFSM) dingin zanikhan ruot a nih. Bhooshan hi 1992 batch IAS Officer, Uttar Pradesh cadre a ni a, Department of Agriculture and Cooperation­a Joint Director sin chel lai mek a nih. Mission Director, NFSM sin hi July 10, 2016 chen a chel ding niin Department of Personnel and Training thusuok chun a hril. NFSM hi October, 2007­a indin tan a ni a, 12th Five Year Plan 2012-­17 chenah bu 25 million tonnes tharsuok belsa tumnaa indin a nih.

Constable sun le AK­47 lakpek
JAMMU: June 4, 2015 zan khan Jammu & Kashmir a Jammu khawpui sunga Digiana an ti hmuna Police constable Joginder Pal of Mirpur chu tu ti hrietlo han Chemte hmanga an sunhliem hnungin AK­47 Rifle a chawi lai chu lapekin an tlansan. June 3, 2015 khawm khan Sikh thalai han Gaddigarh hmuna Police Sub­Inspector, Arun Sharma an lo sun hliem ta bawk.

J.Jayalalitha in nomination a file
CHENNAI: Zanikhan Tamil Nadu CM J. Jayalalitha chun R.K. Nagar A/C byelection hung um dinga ngir dingin nomination paper a file. R.K. Nagar A/C a hin June 27, 2015 khin byelection a um ding a nih. Tondiarpet Zonal Office­ah J. Jayalalitha hin nomination paper a file a, hi office le a sevelah Police 1000 in duty tir an nih. Chun, hi lai hmuna hin Traffic Police­a Additional Commissioner 4, Joint Commissioner 3 le Deputy Commissioner of Police 12 an duty sa bawk.

Maggie ah MSG kan pawl nawh: Paul
NEW DELHI: Maggie Noodles hi fimkhur tak le khawvel pumpui huopa zui standard zuia siem, mihriem hriselna tawkpawi lo ding a nih. Maggie Noodles a hin “MSG” kan pawlsa nawh, “No MSG” ti inziekna bel khawm peihmang ning a tih tiin zanikhan Nestle Global CEO, Paul Bukke in New Delhi­a Press Conference huna a hril. Hieng laizing hin Madhya Pradesh, Kerala, Tamil Nadu, Uttar Pradesh, Delhi, Gujarat, Uttarakhand le Jammu & Kashmir hai chun Maggie Noodles an ban thu an puonglang.

IFS Officers han PM an inhmupui
NEW DELHI: Zani hmasa khan Indian Foreign Service (IFS) Officers training lai mek 25 han PM Narendra Modi an inhmupui a, an harsatna le an mamaw hai an intlun. Modi khawma an thu intlun hai a lo bawzui ding thu le India ram ta dinga thahnemngai taka sin thaw dingin a lo infui tawl. Ramdanga thawk hlak anni leiin an sinah fimkhur le titak a tulzie khawm a lo hril.

PM Dhaka khawpuiah an zin ding
NEW DELHI: Vawisun hin PM Narendra Modi chun New Delhi suoksanin Bangladesh ram khawpui tak Dhaka pan a tih. Modi chun Bangladesh PM Sheikh Hasina inhmupui a ta, India le an hmalak tlang dan ding le an ram pahnihai inlaichinna siem that zuol dan dinghai hriltlang an tih.

Headmaster le helpawla MO man
NONGSTOIN: Meghalaya state a Laishnong Secondary School, Mawlangsu a Headmaster sinthaw le HNLC a Mobilization Officer (MO) sin chelkawp Sromwell Mawdoh chu June 4, 2015 khan an School huongsungah Meghalaya Polcie han an man. Sromwell Mawdoh hi Laitkseh khaw mi, kum 2014 a HNLC zawm niin Meghalaya Police han an hril.

PM in thingkak a phun ve
NEW DELHI: Zanikha World Environment Day­a hmang a ni a. Hi ni le inzawm hin PM Narendra Modi chun a chengna in, Race Course Road, New Delhi huongsungah Kadamph thingkak a phun ve. Thingkak phun huna India mihai chu thing a tam thei ang tak phun seng dingin Modi chun a ngen. Hi hunsera hin Union Minister for Environment and Forest, Prakash Javadekar khawm a thang ve.

Ni 30 hnungah in tieng an lawi
TURA:  May 4, 2015 a Meghalaya state a helpawl um hai laia ASAK an ti han silai leh chuktuo a Dambuk Aga Village a inthawka an thuoihmang Border Area Development Organisation (BADO), Meghalaya hnuoia Junior Engineer Aladdin M. Sangma chu thuoihmanga a uma inthawk ni 30 hnungah dam, le himin an In a tlung nawk tah. A thuoihmangtu han Bangladesh ram sungah an intawmpui a, June 3, 2015 zing dar 4 vela Rongara an ti hmuna an hung insuo zalen niin M. Sangma hin a hril.

President dam takin a hungtlung
NEW DELHI: Sweden le Belarus ram haia inzin India President Pranab Mukherjee chu June 4, 2015 zan khan dam takin New Delhi a hungtlung nawk tah. India in United Nations Security Council a parmanent member ni a ngenna chu Sweden le Belarus ram han an thlawp a, United Nations Security Council (UNSC) suklien a ni huna India ngenna hi ngaituo pek a ni ngei ka beisei tiin Pranab Mukherjee chun a hril.

Congress CM­hai Sonia in an hmupui ding
NEW DELHI: AICC President Sonia Gandhi chun June 9, 2015 khin New Delhi­ah Congress sawrkarna state a Chief Minister­hai meeting neipui a ta, Narendra Modi PM nina hnuoia NDA sawrkarin iengtin am a enkai tawla ti hriltlangpui a tih. Hi meeting a hin senior Congress leaders le AICC General Secretaries hai thang veng an tih. UPA sawrkar hneban a ni hnunga Congress Chief Minister’s Conference hmasa tak ding a la nih.

Gas station puokdara thi mi 150 an tling
ACCRA: June 3, 2015 zana Ghana khawpui Accra hmuna Gas station puokdar leia kangmei rapthlak takel suok leia mihriem thina tuok chu mi 156 an tling tah niin official thusuok chun a hril. Hi thil tlunga hin In tam tak a kang a, harsatna tuorhai sawmdawlna ding le hi Gas station siem that nawknaa hmang dingin Ghana President John Dramani Mahama chun USD 12 million a sanctioned.

Suu Kyi China ramah an zin ding
BEIJING: Myanmar Opposition leader le democracy champion Aung San Suu Kyi chu June 10­14, 2015 inkar sung khin China ramah inzin a tih. Communist Party of China in National League for Democracy of Myanmar a hung fiel anga Aung San Suu Kyi hi China rama inzin ding a nih.  China ram thuoitu an hmupui ding hai ruok chu hrillang a ni nawh.
---------------------------------------------------------------------------------------------------------------------
VAWISUN THUPUI
Inhning lovin ei beisei thuring hi pawm tlat ei tiu; thutiemtu chu ring a um sih a. Chun, hmangai le thilthawa inchawktho tuo dingin inngaituo seng ei tiu. ­Hebrai 10:23­24

Editorial:
Manipur le a mipuihai hmakhuo hi

Manipur­ah himna le ralmuongna hrim hrim a um nawh ti chu zani hmasaa Chandel District sunga 6 Dogra Regiment hai helpawl han an lambun a inthawk le June 1, 2015 nia ADC election huna thil tlung chi tum tum hai khan chieng takin a tarlang. ADC election huna khan booth capture ti dam, inthuoihmangna dam, ballot box le ballot paper suksietna dam, invauna dam, pawl thenkhat candidate thlawp vote naw leia invuokna dam, thawluina hmanga vote thlakna dam le thil ditum lo tam takel a tlung a nih ti chu a hrietu seng ei nih. Thuneitu sawrkar a u m naw ang hiel a nih. Dan le thupek enkaitu le thununtu um lo angin nuom nuomin an thil thaw nuomhai chu an thaw el niin an lang.
    
Manipur a Law & Order ngirhmun hi sawrkar thlungpui khawmin a hriet el chau ni lovin Union Minister­hai ngei khawmin an mit ngeiin an hung hmu tawl. Amiruokchu, tuchen hin law & order ngirhmun siem thatna dinga hma a hung lakna hriet ding a la um nawh. Law & Order hi Central subject a ninaw a, state subject (state sawrkar mawphurna) a nih ti lei a ni dim chu maw! State sawrkar chun a enkawl zo naw a nih. Hi lei hin pa chan changa, sawrkar thlungpuiin state sawrkar hi a hung thangpui chu thil awm niin an lang.
    
Mihriemna thila khawm sungkhata nu le pa tak hai chun an nauhai ienganga suol khawm nihai sienla mihai kuomah an pek thei naw a, kan nau an ta nawh tiin an peihmang thei nawh. An nauhai chungah maw an phur naw chun mihai an muolpho naw a, a muolpho chu nu le pahai an nih. State sawrkarin law & order a thunun hne naw a, a chang chang changel raw seh tia a ngaisak naw a,a thangpui naw chun a tawpa muolpho ding chu sawrkar thlungpui tho a nih. Hi lei hin Manipur a law & order thua hin sawrkar thlungpuiin kut a hung rawl ve ngei a tul tlatin an lang.
    
Central­a BJP thuoina hnuoia NDA sawrkarin sawrkarna le rorelna a hung chela inthawk hin Manipur thangsain NE biela state sawrkarhai chun sum le pai thilah harsatna nasa tak an tuok niin an lang. A bik takin Manipur state sawrkarin harsatna a tuok zuol bik am a ni ding aw ti theiin a um. Special Category state a nina sawrkar thlungpuiin a hung hlipa inthawk, Central a inthawka schemes chi tum tum a dawng 12 hai chu ni dang angin a hung hmu tanaw phawt a, hi taka inthawk hin ei state sawrkar chun sum le pai thuah harsatna namen lo a tuok tan niin an lang.
    
Model School, tourism, police modernization, backward region fund le a dang dang hai hi ei state sawrkarin a dawng tanaw chun Manipur le a mipuihai hmakhuo hi an thim mup el niin an lang. Sawrkar thawktuhai hlaw dam hi thla tin ei state sawrkarin pe theinaw pal a tih ti khawm ku hi inlau um takel a nih. Sawrkar chun ADC term liemta dinga mi kha sum le paiin a hang vur a, MDC­hai khawsak an hawi pha a. Amiruokchu, term thara hin khangang bawk khan Manipur sawrkarin MDC­hai kha a la duot thei dim maw? Khangang kha an tanaw chun MDC ni nuoma cheng nuoitel senga MDC a ngirhai hin an MDC ngir hi an thawfuk dim maw! ti khawm hi ngaituo ve tlak a nih.
    
Tripura state cabinet meeting chun an state pumpuia AFSPA zama um chu hlip vawng dingin thutlukna a siem a. Tripura state mipuihai ta ding chun lawm a um hle a, lungril takin an inthuok huoi ring a um. Manipur hlak chu tuta ei ngirhmun enin AFSPA chu ei state pumpuia inthawk hlip thei ding ngirhmuna ei um der nawh ti chu zani hmasaa Chandel a thil tlung khan a sukchieng hle. Manipur le a mipuihai hmakhuo hi inthim takel a nih.






Post a Comment

Powered by Blogger.