Tuolsung
TN Haokip Meritorious Award sem
CCPUR: Zani 11:00AM khan V. Vengnuom Community Hall, CCPur­ah T.N. Haokip Foundation huoihawtnain 11th Meritorious Award semna hun hmang a nih. Hi huna hin  khuollienin Kh. Debendro,MLA a thang a,Lunminthang Haokip, IAS, DC, CCPur le  Vanllallien Haokip, Principal, Salt Brook School, Tuibuong hai guest of honour le special guest in an thang a, Award dawngtu hai Rev. Onkhomang Touthang, HQ Area Pastor, ECA in tawng­taipekna a nei.
    
All Round topper chu Miss Nemneichoi Baite d/o Jamkholen of B. Phaicham (St Mary’s H/S) a ni a, lawmmanin Rs.20,000 + memento+ certificate a dawng a; St Mary’s H/S a inthawk D. Lamthiensei s/o D. Henpao of K.Salbung chun Maths­ ah Marks 91 hmuin Maths topper  a ni a, lawmmanin Rs.15,000+memento+certificate a dawng. St Mary’s H/S a inthawk Miss Nengboithem d/o S. Demkholun of K.Salbung chun Science­ah marks 89 hmuin Science subject topper lawmman Rs.15,000+ memento+ certificate inhlan a nih. Chun, Saikot A/C sunga ‘School of theYear 2015’ award chu Salt Brook School, Laizon Veng, Tuibuong kuoma inhlan a ni a, lawmmanin Rs.10,000+ memento+ certifcate  inhlan an nih.
   
Tukuma Award dawngtu mi 3 hai Manipur Rifles, Cultivator le Carpentry background an ni thu Pu T.N. Haokip chun hi huna thu a hrilna huna a hril a. Pathien ti hi varna bul a nih ti theinghil ngai lo ding le an future chu an kuta um a ni thu a hril.
    
DC, CCPur chun development ei ti hi education­a um a ni a, education hin mi sin a pek rawn thei tak a nih. Milien­milal hai khawm hi insung inhawi taka intan an ni ngainaw thu, mi ropui le hlawtling ni dingin education chau ni lovin Pathien hriet khawm a pawimaw tia hrilin Pathien hre zing dingin inchuklaihai an fui.
    
Khuollien chun, lekha inchukna ei ngaipawimaw ang hin environment khawm ei ngaipawimaw a tul thu hrilin student hai chu thing pahni bek phun seng dingin a ngen. Kum liemta haia Manipur state lumna chu 30 degree Celsius a ni laiin tuhin 34 degree Celsius a tlung ta a, student han hma ei laknaw a ni chun ei ram a la hung lum zuol pei ding a nih tiin a hril a. Award dawng thei dinga nasa nawk zuola thang la dingin student hai an fui.

Nau nei hai sum pedawk seng dingin
CCPUR:  Dr Thangchinkhup, CMO/ Dist. Mission Director, DHS/CCPur chun, Public Private Partnership (PPP) Accredited private hospital pali (4)­ Sielmat Christion Hospital, Sielmat ; Lamka Nursing Home, IB Road; Nazareth Hospital, opposite CCpur Collge le People Health Foundation, Gangpimual hai chu Janani Suraksha Yojana (JSY) hnuoia June 1, 2015 a inthawk an hospital chita nuhmei naunei hai kuomah sum pe dingin an hriettir. JSY payment hih hieng private hospital Managers le DHS, Core Committee members han meeting an nei huna an rel a nih.

Transport Allowance sem
CCPUR: Zani 11:30AM khan District Project Officer, SSA­RTE/CCPur district under Inclusive Education for Disabled (IED) huoihawtnain Hill Town a IED Resource Centre­ah Disabled person hai kuomah Transports Allowance sem a nih. Hi huna hin T. Goukhomang, ZEO/CCPur chun transport allowance student pakhat pei kuomah Rs. 2,500/­ an hlan. Block tum tum haia Disabled transport allowance la lalo han June 8, 2015 in Reading certificate le Passport photo copy 1 chawiin lak thei ning a tih.


Medical Verification nei
CCPUR: Zani zingkar 11:00AM khan DYASO/CCPur huoihawtnain Hiangtam Lamka Community Hall­ah District Level Inter School Under 14&17yrs Boys Subroto Mukherjee  Football Tournament um ding le inzawmin Dr Lamuan le Dr Liangoumuan han Tournament­a thang ding school tum tuma mi hai Medical verification an nei. June 4, 2015, 11AM in Under 14yrs  a schools 10 le Under 17yrs a thang ding hai Medical Verification thaw nawk ning a tih tiin DYASO/CCPur chun a hril.

Headline:Imphal

Ex­Ministers le Ex­MLAs BJP zawm hai hi ‘Artui da, keu thei talo ang an nih’ : Gaikhangam
IMPHAL: Manipur Deputy Chief Minister le Home Minister bakah Manipur Pradesh Congress Committee (MPCC) President ni bawk Gaikhangam chun zanikhan Congress Bhavan, B.T. Road, Imphal­ah Chanchinbumihai an hmupui. Hi huna thu a hrilnaa chun, Manipur­a Ex­Ministers le Ex­MLAs BJP zawm hai hi “Artui da, keu thei ta lo ang an nih” tiin a hril tawl. Manipur a Trinamool Congress MLAs 3, tulai hnaia disqualified a um Joykishan, Bishwajit le O.Lukhoi hai khawm an biel haiah BJP ticket in byelection hung um nawk huna ngir nawk an beisei leiin BJP an zawm a, sienkhawm an beisei ang ni tanaw nihai tiin a hril.
    
ADC Election huna Booth Capture, tharum insuona, inthuoihmangna, invauna le thil indiklo tam takel a tlung chu pawi a ti thu le a dem thu a hril. NSCN(IM) chu a lang­a­changa hung suokin Naga People’s Front (NPF) candidate­hai an thlawp hin thil ditum lo tam takel an tlun pha a nih tiin Gaikhangam chun a hril. Free & Fair election um sienla chu ADCs 6 haia inthlangna haia hin Congress hrat filawr an tih. Hieng sa khawm hin ADCs 4 haiah hratna chang an tih tiin Gaikhangam chun a hril.
            
UPA sawrkar huna khan Manipur sawrkarin Special Category state ei nina hnukkir  dingin UPA sawrkarah report le hnina a siem leia Manipur State Special status category a sie a nina hlip a hung ni pha a nih tia Th. Chaoba, President, BJP Manipur in a hril hi thukhel a nih. A finfiena ding a nei le a hriet a ni chun, hi thua hin White Paper phawrlang raw seh. Manipur Special Status category hlip pek a nina thuah hin Th. Chaoba hi comment petu ding (authority) an nawh. Hi thu hril theitu chu Central­a concerned minister a nih tiin Gaikhangam chun a hril.

INC canidate an vote naw leiin vuok
IMPHAL: KRA ni dinga ringhla le Army uniform anga inthuomhai chu June 2, 2015 zan dar 6:30 vel khan Lhungjang khawsungah an va lut a, pasal 9 ramhnuoiah an thuoi a, ‘INC candidate in vote nawh’ tiin  an vuok hrep tawl niin a ke pahni haia hliemna inrik tak tuok Mangcha Khongsai (40) s/o Lungkhothang Khongsai of Lhungjang chun a hril. Vok hliema um hai hi  Kuki Christian Hospital, Dewlahland ah enkawl mek an nih. Hliem dang hai chu­ Paul (45) s/o Otkhohen; Hemminchon (18) s/o Paul Khongsai; Lunjamang (22) s/o Jamkhomang; Thangmin Khongsai s/o Lammang; Paugoumang (21) s/o (L) Lamkholun; Mangtinlen (18) s/o Lalthang Doungel; Lalthang (40) s/o Paulin Doungel le Thangminlun (25) s/o Thanghao of Lhungjang village, Saikul Block, Sadar Hills, Senapati district hai niin a hril.

Works Minister in a phum
IMPHAL: Manipur Works Minister Kh. Ratankumar in zanikhan Swambung leilak dawna ding lungphumna a nei. Hi leilak hi metres 68 a sei, metres 10 a lien ding le thla 10 sunga zo hman dinga riruong a nih. Leilak bawlzona dinga sum hmang dinga riruong chu Rs. 12 crore a nih tiin Works Minister chun a hril.

Manipur Assembly Session June 26­ah
IMPHAL: Zani hmasa zan khan State Cabinet meeting nei a ni a, 11th Manipur Assembly Session chu June 26, 2015­ July 10, 2015 inkar sunga inthung dinga Governor inkotir ding, Dzuko Valley ramri buoi chingfel ding, tu kuma CBSE hnuoia Class X&XII exam thei lo hai ta dinga July, 2015 sunga Special Exam BSEM le CoHSEM hai inhuoihawttir ding tihai rel a nih tiin State Govt. Spokesman le CAF&PD le Education Minister M. Okendro Singh chun a hril.

RRM in Environment Day Awareness
IMPHAL: Royal Riders Manipur (RRM) chun June 5, 2015 khin World Environment Day le inzawmin ‘7th Mahousa Ima Ningsing Tha’ thla khat sung aw environment day celebration  hmangin Imphal khawpui sunga rally neiin environment thuah awareness buotsai an tih. Rally hi Dy. CM Gaikhangam in DM College CAmpus­ah zantieng 2PM in vailiem a tih.

Others:
A nau nuhmei 2 Well­ah peilutin a that
RAIPUR: Chhattisgarh state a Balod District sunga Fadaradih village a cheng Chandradev Kongera (32) chun June 1, 2015 khan a nau nuhmeite pahni, Madhuri (9) le Puja (4) hai chu Well sungah peithlain a that. Kongera hi Police han an man a, thu an indawnnaa chun, nau pasal a dit leia hi thil hi a thaw niin a hril. Nau pasal a dit a, a nuhmeiin nau dang nei nawk a nuom tanaw a, an nau nuhmei 2 hai a that chun a nuhmeiin nau nei nawk a nuom a ring leia hi thil hi a thaw el niin Kongera hin Police hai a hril.

Commerce le Aviation Secy. thar
NEW DELHI: Zani hmasa khan sawrkar thlungpui chun Union Commerce Secretary thar ding le Civil Aviation Secretary thar ding a ruot. Union Commerce Secretary thar dingin Special Secretary, Dept. of Telecommunication chel lai Rita A. Teota a ruot. Teoatia hi 1981 batch IAS Officer, Gujarat cadre a nih. Civil Aviation Secretary thar dingin Special Secretary (Power) ni lai Rajeev Nayan Choubey ruot a nih. Choubey hi 1981 batch IAS Officer, Tamil Nadu cadre a nih.

Saipum PMS School­ah Pathien thua hlimna
SAIPUM: June 2 le 3, 2015 hai khan Saipum, Sinlung Hills, Mizoram­a PMS School­a chun student hai lai Pathien thua hlimna nasa tak a tlung a, student hai chun class khawm la hlei thei lovin Pathien inpak le tawngtaiin hun an hmang niin ei thu dawngna chun a hril.(Virthli)

Kut nei lovin Class X a passed
DIBRUGARH: A piengtira inthawka kut nei lo, Princy Gogoi (16) of Sonari, Sivasagar district, Assam chun tu kuma Assam Board hnuoia Class X exam a khan Marks 268 (44.6%) hmuin third division­ah a passed. Second divison­a pass na dingin mark 2 chau a bak. Ms Princy hi Class V an chuka inthawk Sonari Jatiya Vidyalaya a kai tan a ni a, Answer scripts chu a ke le keparhai hmangin a ziek hlak tiin an Headmastress, Mamoni Tinikuria chun a hril.

June 10 chena puonglang lo dingin
NEW DELHI: Supreme Court chun May 3, 2015 a Central Board of Secondary Education (CBSE) huoihawtna hnuoia All India Pre­Medical Test (AIPMT) result chu June 10, 2015 chenah la puonglang lo dingin CBSE an hriettir. Hi exam hi a felfai tawk nawh tia CBSE huoihawtna hnuoia pre­medical test hi cancel dinga ngentu an um leia result hi la puonglang lo dinga ti a nih.

A ke hmangin motor a khal
INDORE: Kut nei ta lo Vikram Agnihotri (44) chun a ke hmangin Car hnesaw taka a khal theizie June 2, 2015 khan Regional Transport Office, Indore, Madhya Pradesh­ah an entir. Driving licence a ngen a, sienkhawm thuneitu han an la pek nawh. Vikram hi kum 7 mi a ni laiin electric in a man a, a kut pahni tanbawng tul khawpa siet a tuok leia a kut pahni hai tanbawng pek a nih. A kehai hmangin motor a khal thei bakah lekha a ziek thei a, bu khawm a ke ma hmangin a fak thei.

Odisha­ah IAF vuongna tuoksiet a tuok
BHUBANESWAR: Zanikhan Odisha state a Mayurbhanj district sunga Kudarsahi village bulah Indian Air Force (IAF) Vuongna Hawk A­3492 tuoksiet a tuok a, leilet lai a tla thla a, mihriem thi le hliem an um nawh. Hi vuongna khaltu Pilots pahnihai khawm dam le himin an inchawmdawk hman.

Myanmar sawrkarin a hung inhlan let
AIZAWL: Sakhuona thil (UID programme) ti leia Myanmar­a lut, Champhai Tlangsam venga sungkuo 4 haia inthawka mi 19 hai laia 18 hai chu Myanmar sawrkarin Mizoram­ah a hung inhlan let a, zani zingkar khan Champhai DC H. Lalengmawia in Indo­Myanmar Border  Trade Point, Zokhawthar hmuna a lo dawngsawng.

Mizoram Police han Meth mum 50,000 leh pasal 4 leh an man
AIZAWL:  June 1, 2015 zan dar 11 vel khan Mizoram Police han Aizawlah Myanmar mi 2 thangsain pasal 4 hai chu Methamphetamine mum 50,000, Rs. 1.5 crore manhu leh an man. Chun, May 30, 2015 khawm khan Mizoram Police han Thingdawl, Mizorama khawm pasal pahni chu Methamphetamine mum 58,800, Rs. 1.76 crore manhu leh an lo man ta bawk. Chun, May 27, 2015 khan Police han Aizawlah “party Drug” tia ko drug mum 14,000, Rs. 42 lakh manhu leh pasal 2 an man.

Bomb kg. 9 zeta rik hmu
TURA: June 2, 2015, 2:30PM vel khan South Garo Hills Police han GNLA pawlin an kam ni dinga ringhla remote control bomb pakhat, kg. 9 zeta rik chu Chokpot­Tura Road­a Daji Badima hmuna an dapdawk. Hi bomb kamtu GNLA cadre Krenish M. Sangma of Derdamgre village man a ni a, an commander le explosive expert Hedeo alias Callopa in a pek niin a hril.

Canada Visa tehlem siemtu man
AHMEDABAD: Tulai hnai el khan Sardarnagar Police han Canada Visa tehlem siemtu, Sandeep Barot (43) chu Naroda a Hotel pakhat a inthawk Canada Visa le Visa ticket leh an man. S Andeep Barot chun Visa pakhatah Rs. 13 lakh peiin Mansoor of Mumbai kuomah inthawk an chawk a, Rs. 15­20 lakh in a zawr hlak niin Police kuomah an puong.

President Belarus­ah an zin
MINSK:  India President Pranab Mukherjee chu ni 2 sung cham dingin June 2, 2015 zan khan Minsk, Belarus a tlung. India President­hai laia Belarus a inzin hmasa tak chu Pranab Mukherjee a nih. Zani hmasa zantieng khan Pranab Mukherjee in Uppsala University, Stockholm ah thu a hril. A thuhril thupui chu “Tagore and Gandhi: do they have contemporary relevance for global peace” ti a nih.
-------------------------------------------------------------------------------------------------------
VAWISUN THUPUI
Tu chunga khawm kut innghat thut naw la, mi dang suolnahaia chun thang bawk naw; insukthieng zing rawh. 1 Timothe 5:22

Editorial: Intumtuona

State Election Commission huoihawtnain June 1, 2015 khan Autonomous District Council (ADC) 6­ Chandel, Churachandpur, Sadar Hills, Senapati, Ukhrul le Tamenglong ADC haiah buoina le harsatna tam tak karah inthlangna ei nei a. Sawrkarin ni khata election hi zofel dingin riruong a siem a, nisienlakhawm Polling station thenkhata buoina suok leiin zofel thei lovin a u m a. Tuhin Polling station thahnemtawk takah inthlangthat (repoll) ei hmabak a, state sawrkar le candidate thenkhat hai ta dingin sum seng a dabawl pha ta ding a ni leiin thil pawi takel a nih. Ei vote thlak nuom dan le ei thil thaw nuom dan hai hi Pathien tak le hring bietuhai thaw dan dinga inhme le tha ei ti zawng a ni am ti hi chik taka ei ngaituo vang vang nuom a um.
    
Candidate thenkhat chet dan khawm hi ngaituo chet chet dinga tha hlie hlie a nih. Ram le hnam thuoituhai chet dan ding angin ei che am? Ei thil thaw dan hi thiltha le indik a ni am tihai hi candidates han ngaituo chet chet hai sienla nuom a um. Candidate takhai hmana tharum insuona, thil indiklo thaw le mani hamthatna ding a ni phawt chun tia dan kala chet pawi an tinaw chun voter­hai lem chun pawisak an neinaw ding hrim a nih. Hi lei hin ram le hnam thuoitu ngirhmuna um, candidate­hai hin hotu le thuoitu an nina hi inzatlak le entawntlaka an siem nuom a um hle.
    
Vote neitu mipui tiengpang khawm ei u m dan le ei chet dan hai hi ei ennawn le ei inbi chieng nuom a um. Khawvela la um ei ni a, canidate ei ditzawng chu inang vawng thei ngai naw nih. Candidate ei tan, ei dit le thlawp nuom zawng an ang naw lei ela hmelma ena inen el ding ei ni nawh. Ei candidate ditzawnghai ei tan le thangpui dan haia hin a chintawk ei nei le ei hriet a tul a nih. Thil iengkim el ku hi a huntawk ei hriet naw chun ei inlaichinna le ei inunauna hai chen a suksiet pha thei ding a nih. A tling tling hai hi ei thuoitu dinga pawm thiem theina lungril ei put a tul bawk.
    
Thlangtlinga um hai khawma election lai khan a mi vote nawh, a mi thlawn nawh, a mi kaltu a nih ti lungril put der lova mipui thuoitu le mipui aiaw dinga thlangtling ka nih tia election hun laia thil tlung hai kha hriezing ta lo a an theinghil hmak nuom a um. Hi hi thuoitu puitinghai um dan ding a nih. Election huna hin chu ei inkhing ding hrim a nih. Inkhing an um naw hlak chun inthlangna a um thei si nawh. Football inkhelna haia khawm team le team an inkhing a, a hrat lem an um hlak. Inthlangna a khawm candidate­hai inkhing an ta, a tling le a tling naw an um ngei ding a nih. Hi thil hi khawvel fe dan tlangpui le a kalhmang a nih.
    
Inthlangna ei hang neizo a. Intumtuona nasa tak a hung um a, a la um pei ding niin an lang. Candidate tum tum le Political party hran hran hai intumtuona hai hi mipui ta ding chun tu’m a thiem lem, tu’m a thiemnaw lem, tu’m an dik lem, tu’m an diknaw lem ti hai hriet a harsa hle.   An dik lem le a thiem lem nia inhrilfiena hin umzie a nei bek bek naw ding niin an lang. Free and Fair election um sienla chu intumtuona hai hi um naw ni a, lungawi takin ei um tlang seng ring a um. Free and fair election a ni nawh ti suklangtu chu repoll nei a tul bakah candidate le political party tum tum hai laia intumtuona nasa tak a hung um hai hi an nih.
           
Intumtuona hi Churachandpur district sunga chau a um naw a; Chandel, Tamenglong, Ukhrul, Senapati le Sadar Hills ADC sung haia khawm a um vawng. A tha bik ei um naw a, ei inang tlang vawng a nih. ADC election umna hai hi Kristien hai chengna le an ram ti thei a ni a, sienkhawm kristienhai um dan dinga hril ang chun ei um tawl nawh. Kristien­hai um dan ding le thaw dan dinga hril angin ADC election hi um sienla chu intumtuona le inhrilfiena hai hi um naw nih. Ringnawtu han ADC election­a ei khawsak dan le ei thil thaw dan hi an hung hmuin an hung hriet ve vawng a, iengtin tak am an mi ngai ding chu! Inzakum takel a nih.

Post a Comment

Powered by Blogger.