Responsive Ad Slot

HIENG ZAWNG HIN AW!

Wednesday, June 10, 2015

/ Published by VIRTHLI
~ VL Khawbung
                                                                                                                         
Van khuphnuoi khawvel ram a hin hnam chi tum tum le trawng chi hrang hrang hai Pathienin a lo siem a, chuong hnam tin reng hai chun parvul tum le kau râ nuom um tak ni tumin thang an lak senga; chuong hai lai chun ei hnam khawm a ralbang chuong nawh. Ram siem ding le khawvel um suonga hmun nghet nei tumin thang ei lak anih. Mani hnam puonzar hnuoiah lenga mani ro inrel tuma ei beina a chun ei tlangval tam takin hmelma doral tawng suol leiin fam dairiel changin piellei thuriet hnuiah zalin buonlei an lo changzo ta a. Chu an thisen zara chun Sinlung Hills Development Council (SHDC) ei suol dawk thei hram anih. Chu SHDC chu kum hni zo hnunga ADC a hlang kai ding ti a sorkar an tiemna khawm suk puitling lova a um leiin, vawisunni chen hin ei hnam movement chu  la fe peiin hnam tlangval tam tak ramhnuiah an la um mek zing ani ti chu mi ke pen ruola ke pen hai chun ei hriet ka ring.
     
Hnam (Tribe) pakhat eini ve na anga ei indikna ei chanvo venghim ei tuma thrang ei lakna le administrative hrana ro inrel ve ei  tumna kawngah ei unau Dulien/Lusei/Mizo trawng hmang hai chun "Mizo a lungawilo le lungril chîn, chibing lungril put ti'n an mi bei nasa hle ti khawm ei hriet. Kum1946 a inthawka Mizo Union inhniktu hai kha tuipuiral an mi kai san hnung khawm a mizo ei lan ti ta char chara vawisun chen hin inlakhran ei tum ve ngai nawh. Hi kawng thu a hin ngun taka ei ngaituo a tulin ka hriet ta tlat. Ei unau Dulien/Lusei trawng hmang hai hi mak tak el an ni a, an hnam sunga pawl um hieng YMA, MHIP, MUP in ti hai hi Police, Excise, Magistrate hai neka thu nei lem insawna, in suk lungling le MOBRULE hmanga chang nuomtu hai an ni leiin Tribe le Nation umzie khawm hi an hriet hrang bek naw ni'n an lang. Ka ngaituo chang hin "mizo" inti hai racist zie hi mak ti khawpin ka hriet ching deu deu "mizo" inti hai nekin HITLER kha a lo turu ka ring lema sienkhawm ei unau mizo inti hai hi mak ka ti ta khawp el.  Mingo thla hrang hrang hai indo zing el kei khawmtu, Temujin(Chiggis khan) khan chu a hrat theina ding ani phawt khan chu a hmelma(a chipui Borjigin tribe nilo) khawm a general ah a si nuom hiel ani kha tie! Mizo inti hai chun mani chipui unauhai ni zing si khawm umna ram dang lei le identity a danglam lei amanih, trawng a danglam leia an hmu mizo ta naw a, thlirkar lungril an mi put peka, mizo a an mi ngai ta si naw chun Hmar hnam thisen paitu le neitu hai hin iengtin am ei ngai ve a? Ieng ang lungril am ei put ve ding le? Hnam(tribe) pakhat ei ni ve na anga administrative hrana um an mi phal pek naw a, ei ngir suok ding an phal naw si chun Pathienin hnam a mi pek sukdar ding hin nangni pawl keini pawl ti'n groupism in ei la buoi zing ding a manih.? Church Leader hai khawm groupism sukbo ding le sukre ding hin chang a hun ta naw maw?                        

Hieng hin ka ngaituo hlak "kan siengna hmar hnam hmatieng sawnzai i rel naw ding maw! Thlir vel ta hnam tin reng hai chun vul zai an rel an sawn naw; tienlai nun khan chu hnam inthuruol, tlawngngai, huisen, ringum le indikna i chel hlak an naw? Hnam dang hai hnung i tawn ngai nawh. Sienkhawm tuhin chu vangkhuo sumnawi maw i chang? I van rieng ta de! Sam ang zal tho la hmar hnam vul zai rel ve ta la" ti'n.        
                                                                                
Hun le ni an liema ni le thla a hung thar peia, thanghlui mithiem hai an liem pei a, thangthar mithiem in an hung thlak pei chu ani hi. Chuong ani ta si chun darkar 24 suong hi iengtin am lungruol takin ei hmang ding leh? Ngaituo a maten ka dawn chang hin duthu kimten sam harsa ka ti hlak. Hieng a lo ni ta si chun unau! South Africa ram tung dingtu le mihang le mingo chi inthlirna sukbotu kha Nelson Mandela an naw manih? America ram tung dingtu kha Abraham Lincoln an naw a manih? India ram zalenna suol dawktu kha Mahatma Ghandhi an naw manih? Israel hai thuoi suoktu kha Mosie an naw manih? An leh Hmar hnam thuoi suoktu le tung dingtu hi tum ni tang a ta? Ei pi le pu a inthawka chanchintha mansapui bangna ei sinlung khawpui chulhnung indinthar nawk ding hin ei puon hai bat tha a, hnam san dingin sinthawna inbel a tul i ti ve ta naw maw? Hmar lanu val ruol hai tho har ei tiu. Hieng anga ei fe zing chun tuta Primary/Middle School kai mek hai hin kum10/20 hnungah ei hnam hi inlusuok san zo an tih ti inlau a um em leiin HIENG ZAWNG HIN AW! ka hung ti ta lem anih.
Don't Miss
© all rights reserved
made with by Simon L Infimate