Shillong, May 16, 2015 (Virthli News): Hmar Youth Association, JHQ Shillong huoihawtna hnuoia vawisun khan EFCI Centennial Hall, Demthring, Shillong hmuna Hmar Martyrs' Day puithu taka inser a nih. Tukum Martyrs'Day inserna hi kumdang nekin mipui an fekhawm thaa hall in a keng naw tieng pang a nih.

Hun hmasa tieng tulai hnaia hnam ta dinga hringna lo inhlan Malsawmkim a chanchin tlangpui ngaithlakna nei a ni a. Hi huna thuhriltu ding taka ruot Rev. Ruolneikhum Pakhuongte chun Malsawmkim in a hringna hnam ta dinga an hlan hi inpakum a ti thu le Martyr indiktak a nih tiin a hrila hnam pum huopin a maksan a nuhmei le nauhai thangpuina intina dawl hiel khawm a rawt a nih. Rev. Ruolneikhum Pakhuongte chun hnam inphatsantu le mani hnam kalzawnga hmalatu le zawrtu hai chu Hmar hnam a inthawkin hnawt ding inla khawm pawi a ti naw thu hrilin ei hnam sunga pawl dang danga (HPC(D) Chairman pawl, President Pawl le HNA ) ei inthe hi a vangduoithlak hle thu a hril bawk.

Hi huna hin hnam ta dinga hringna lo chan ta hai sunna le hrietzingna Silent prayer nei a ni bakah thuhril tawi HYA President, Hmar Inpui President, HSA President le Hmar Welfare Chairman haia inthawkin ngaithlak ani bakah Hnam hla mawi tak tak hai ngaithlak ani bawk. Shillong sunga tlawmngaina thila entawn thlak mi iemanizat hai kuoma chawimna thilpek inhlan a nih.

Programme hi hlawtling taka hmang zo a ni hnungin thingpui dawn tlang a nih.






























Post a Comment

Powered by Blogger.