Aizawl, May 12, 2015  (Virthli News): Mizoram Pradesh Congress Commitee (MPCC) chun vawisun khan thusuok siem'n Congress Sawrkar-ah Police kut khuopde ani naw thu an tarlanga, Mizoram-ah HPC (D) han harsatna dang dang siemin, khawn lui tax le inthlang dinga mipui suk thlabar in harsatna an siem hlak thu le Dt. 28 March 2015 a Zokhawthieng bula Mizoram MLA hai lambunin anni vengtu police pathum (3) an kaphlum a, 6 hai an kap hliem a, MLA inzaum tak hai khawm thlabar takin an siem a nih tiin an hril.

HPC (D) hai thil thaw a hin Congress sawrkar Pu Lal Thanhawla kehruoi chun hiengang thil indiknaw thawtu hai hi dan ang a, an chunga action lak a ni thei na dingin hrat takin hma a lak mek thu an hrila, MLA hai lambunna a, mawphurtu tak HC Mawlsawmkima chu Mizoram Police han man an tumna lamah a man silai a hmet puok hmasa leiin kaphlum a ni thu an tarlang bawk.

Congress sawrkarna hnuoiah chun police hai kut khupde a ni naw zie le Home Minister hrat le huoisen tak Pu R. Lalzirliana enkawlna hnuoiah police hai khawm'n hrat tak le huoisen takin sin an thaw thei a nih ti chu an lang chieng hle thu an hril.

MNF-in sawrkarna an chang lai, 1998 - 2008 sung khan hel kutah police suongum tak tak hai le civilian mi thenkhat han an hringna hlutak an lo chan nuol ta a. MNF kum 10 (sawm) sawrkar sung khan hel hai kutah Force mi 19(sawmpakuo) le civil mi 17(sawmpasari) in an hringna hlutak an chan niin an tarlang sa bawk. Hiengzat zet hin an hringna hel kuta chan um hai sienkhawm, MNF in kum 10 an sawrkar sung khan hel hai an bei letna iengkhawm hril ding a um naw thu le bei let nekin police hai kut chu an khuopde pek tlat an ni thu le hel hai trainingna hmun a dingin a hmang hiel lem a nih tiin Congress thusuok chun a tarlang a nih.

Congress Sawrkarna hnuoiah inremna le muongna umsien an nuom tak thu le HPC (D) hai le khawm dawkawn kila inremna zawng zing a ni a, amiruokchu anni tieng harsatna a um leiin inbiekna sunzawm thei ani ta nawa, hienglai zing hin Mizoram ralmuongna suksiet zawnga an che zing leiin sawrkar chun thapui a suo naw thei ta nawh tiin thusok an siemna chun a tarlang a nih.

Post a Comment

Powered by Blogger.