~ JC Lallawmsang

Thutlunghlui bu ei en chun maichâm inziekna hmu ding tamtak a um, maichâm chu suol inthawinaa hmang hlak ania, maichâm siem ding chun lung an remkhâwma a chungah thinghai bil in, chu chungah chun râwhmang ding thil chu sie hlak anih, chuongchun maichâmah chun mei an sit hlak, rawhmang thil inhlân a kâng theina dingin.

Lalpa’n Hmar hnam maichâm Senvawn khuoa a hung sit var hi, vawisûna ei khawsak dân en hin, a chawk ta naw hiel am ani aw…! thi mang loin a âi a de rien rien ti thei dingin ringna mit chun ei hmu seng, Lalpa beiseina ei phursuok zo naw leia lungawinawna kut chu ei tuor mêk ti chu hril ngâilo a hmutu seng ei nih. Ei khawsak dân hin Lalpa’n a lo lâwm naw ding hrim anih.

Hnam khat ni ve di’n Pathienin Hmar hnam khawm a min din vea, chu el khêlah chun, hnam dang hai nêk hin a mi Hmangai zuol bȋk am ani aw? ti thei ding in an lang, (ei ṭhlirna tukver hang hawng chin met inla) ei zonau chanpui lai ngêia khawm ei chêngna Senvawn khuo chu chanchinṭha bâwmrâng innghatnaa hung hmangin Hmar hnam chunga maichâm chu a hung indin anih a, Hnam dang hai in Hmar ṭawng hmang mûmal thei loa an um laia eini Hmar hai ruok chuh, hnam dang hai ṭawng ngêi khawm ani ang taka hmang thei dingin leili ṭhatak hai dam a mi pêk nâwka, chu ngêi chun ei sir le vêl unau lai a chanchinṭha hril dartu dinga a mi ruotna chu a suk chieng hle, ei kuta malsawmna a sie hi iengtinam ei hmang ti ruok chu mani sengah loin dawn chieng ding thilah sie lem ei tih. Lalpa’n ei Hmar hnam chungah beiseina (expectation) lientak a nei hi a lunginzingna siemtu el chau am antah?

Ka khuo nghat a tâwi lei am chu ka hriet nawh, kei ka khuo hmu phâk ve chinah chun Hmar hai inbûmna Tipaimukh constuency Hmar biel, Vangai biel tieng ngha veng venga duthu ka sâm pui hlak ania, tulai chu hnam ropui le hnam hmasâwn ei ti hai chu politics khawvêlah thuneituhai kha an hung ni ta peia. Chu ruol chun eini Hmarhai ngêi khawm ṭhang nasataka lain politics kawngah Hnam ṭhuoi changkângtu ding ei beiseina leiin, ṭhuoitu ṭha nia ei I hriet hai ta ding in ṭhang ei lâk nasa thei hle, chu chu vote zawng ei ti hlak kha anih. Hi thu ka ngaituo hin lung ana thei hle, Lalpa Pathienin a rawngbâwltu dinga a mi thlanghai in khawvêl rawng ei bâwl san el am anta? Ei in ring naw kar hin MLA hai rawng ei bâwl lo ni zing a ti aw khai….! “inkhatpa MLA vote zawnga election hun laia in tina tlan kuol sup sup hai hi Lalpa chanchinṭha hrila invâk kuol vawng ni lem inla chu Lalpa hin ei ring neka tam hin mal misâwm ngêi a tih” Vote for Congress, vote for BJP etc. ei tihai nêk hin ei ṭul chu VOTE FOR KRISTA ti hi antah. Ei ṭul chu eini nêk in Lalpa’n a hriet lem sia, ṭhuoituṭha neitu khawm Lalpa ani, Lalpa lâwm zâwng thaw ei ṭul, “ei chungah hin Lalpa a lâwm chun Ram chu ei ta anih” “ka chungah Lalpa lâwmna chu ka hrâtna anih”

Election political party pakhat a inthawk party danga insawn thei dinga mihai inhmin theina (convincing power) ei nei hai dâm hi thilpêk ropui tak anih, Mihriem naran in a nei zen zen thil nilo anih. Mihai party inhnikna hman thlak thleng thei khawpa ṭawngbau thiemna ei nei chun Krista ram lâkna ding a hriemhrei ṭha tâwp ani ding anih. Suol tuipuia pil hai van lampuia ṭhuoilûtna hmangruo ngêiin hang hmang inla chuh, theina petu Lalpa chun thei nâwk zuolna pe ngêi a tih. Ei kuta Lalpa’n thilṭha a min kawltir hi ei sukpungin a lâwm zâwng thawna in ei hmang chie am leh? Mani sengah lo in dawn ei tiu khai.

Hmar pasal ṭawngkam ka lo hriet in lâr ve êm êm hlak “Hmar thisen hi chu a ṭha anih”, “Hmar hai chu huoisen hnam ei nih” ti hai, ieng thil am ni tâng a ta, huoisen eiin ti na hai chuh? Hmar thisen ṭhatna chu ieng hi’m ni tâng ata? Hnam huoisena insâl ei ni si chun, chu huoisenna chu Lalpa ta ding anih, Pathien in mi dâwizep a dit nawa mi huoisen a zâwng anih.

Hmar mipui in Lalpa ditnaw zâwnga a khawsakna tam tak um sienkhawm hril râwna ṭha el thei ei ni chuong nawh a, ei ṭhat naw zie le ei chauna hai in hril hriet a ṭhat lai zingin, lunghnuolna zâwnga lo lâk khawm awl tak anih, sienkhawm lunghnuol ding ei ni nawh. “suol inhrietna hi a huntâwk nawh a, suol inhrietna khêla simna kha ani a hlu tak chuh”

Maichâm thiltum tak chu inthâwinna anih, Lalpa’n ei hnam chunga maichâm a rem naa a lung rem chu nang le kei ei nih, a lungrem hai an bûm naw chun maichâm chu suol inthâwinna maichâm ni thei dingin ngȋr suok zo naw nia, râwhmang thil kângtu ding; thlarau meiser chun kâng ding a nei naw bawk ding anih. Ei hnam suolna hi inthâwina maichâmah inkângtir ani naw chun iengtinam maichâm chu chawk hrim a ta? “Maichâm chuh suol ei bukrawn po le a chawk insangin maichâm anina a phursuok chau” ani lem sia. Pathien thlaraumeiser insit thara ei um nâwk theina ding chun maichâm bulṭhut a lungrem nang le kei, thlarauthienghlima insuikhâwmin um ei tiu, chuongchun ei hnam suksuolna hai chu maichâma inhlânfai ani theina dingin.

Hebraihai 12: 4- 8 “Suol doin thisen suok khawpin in la ṭhang nawh a, 5 infûina thu, nâuhai kâwk anga kâwkna chêu kha in lo theinghil tah ani maw? Ka nau, Lalpa thunnuna chu ngâinêp naw la, a kâwka I umin inthlada bawk naw rawh; 6 Lalpa chun a Hmangai chu a thunnun hlaka nâu a ilâwm ta phawt chu a vuok hlak I sawnnaw, ti hi 7 in tuor hi Nangni thununna ding anih; nauhai chunga thaw angin Pathienin in chunga a thaw a ni hi; Pa thunun naw nau tu am a um hlaka. 8 Nau po po I hlaw hlak thununna chu hlaw loa in um chun, nau tak ni loin, sawn in ni, a ni ding anih.” BSI

Lunghnuol ding ei ni nawh, Lalpa a inthawk thununna ei la hlaw ani chun a mi Hmangai hle a tina anih. Thununna khêlah hin lam ṭhuomhni chauin a ṭhea, Pakhat chuh malsawmna lam ani a, pakhat nâwk chu hremna lam anih. insira kir hai ta dingin Malsawmna, lûlul/kâwmaw insuoa kir nuom lo ta dingin hremna. Ei tuorna, ei harsatna hin Lal hmêl hlie naw raw seh, ama kuom ei pan hnaia a hmêl ei hmufie nâwk zuolna’n hmang ei tiu. “Lâwmna nia Lalpa ei hrietfûk ngainaw chu awlsam tak thil anih, sienkhawm harsatna tuok lai meua Lalpa panna châng hre lo chu ei pilna an thûk hle anih” chu ngirhmuna ngir chu tamtak ei um anih, entirna pakhat chau hang siem inla, eg: a nau in pâwlsâwm a pass thei ta dal ela Pathien kuoma thlûklûtpui nêkin khawlai school headmaster kuomah mani pâwlsâwm certificate a va hni lem ta dai. Chu chu ngêi chun ringumna eiin hmang hle, inchûklai tluong taka inchûk pâwl hai ta ding khawma thafânna boin lunghnuol awl tak anih. Ei hlâwkna ding thil ei ngaituo a ṭha hle lai zingin, ei thing phûr khan mi huon a va del siet ding kha in lau zing pum in.

Hmar hnam hi ei pi le pu hai nungchang an’thawk en khawma mi tlawmngai hnam, zaidawthei mi, lungriltluong etc. ei hril uor deu el di’m, mi ṭhatak hnam ei ni ti inla? Anih, hril uor khawm ani chuong naw mizieṭha hnam hrim ei nih, sienkhawm hun hungin herin mizie le khawsak dân hai a hung inthlak danglam ta hle, ringum, tlawmngai, zaidawthei hnam ei ti hlak kha tulai ruok chu a letling thapa khawsa anga hmu thei in ei um tah. Asan iem ni tang a ta? Ka hnam chanpui hai, a san chu iengdang khawm annaw, ei mizie sie rêng lei anni nawh. Mi ṭha tak tak mi thlêmtu suol hung hrâng ei do zo ngai naw lei mei mei a misuol anga in lang ei hung ni ta lem hlak. Ei ringumna hung sukse dingin thamna sum a hung hrângin do lêtna châng ei hriet naw lei dam, lungril tluongtak mi ei nina satan in mi hnena ding dang a hriet tlâwt naw leiin zu, damdawi dam a mi vai rui in suol lamah a mi ṭhuoi lut nâwk na dam, ka unau, Hmar hai hi mi ṭhatak hnam ei nih Pathien meu khawma a lâwm hle leiin Hmar khuo ngêiah chanchinṭha a hung tir lut ani kha. Chu ngei chun Satan lung a khei anih kha, Pathienin hnam a hne ta hai chu Setanin a lalram di’n an chu pui nâwk ta char char anih.

Thlêmna a hrât ei ti chun andik hle anih, ei nuomna zâwng taka thlêm in ei um hlak leiin do a harsa hlak anih, amiruokchu a hrât lem Pathien ei hmang naw chun iengtinam hne thei hrim ei ta?
“Thlêmna chu hrat hle sienkhawm a hrât lem chu Pathien hring ei I biek Pa hi anih” ti hi theinghil ngai naw mei niu. “Setanin Pathien a hne theina kawng khat chau a um chu chu a Hmangai hai thlêmthlûk pêk anih”. ‘Hmar’ Pathien a i lâwm hnam hai Suol in a hung suksiet el hi Setanin Pathien a hnena hmun chu anih. “Setan rawiin hârmei anin khû, Lal Krista nau ang a lo ṭap hlak” hârmei eiin khûk na hai chuh thamna sum ei lak, ruithei ei hnenawna hai, ei duâmna dam etc. hai po po ku kha ani hlak. Eiin diknâwna le ei thiemnâwna hai hi Hmar thisen huoisenna ei ti kha insuoa, Pathien kuomah ei thluklût pui ngam nâwk pha pha a dingin Lalpa chun a malsawmna a mi vur nâwk dingin a mi lo nghâk zing anih.

Ka Unau, kei le nangin ei ṭan naw chun tu I nam ṭan a ta? Ei hnam in malsawmna a dawng ding hi hnam dang hai mi pêk ding aninawa an ṭhatna leia ei dawng ding khawm ani bawk nawh. Nang le kei a innghat anih, a chien a lien insit naw mei nih, Mimal maichâm an’thawk ṭanin Sungkuo Maichâm, sungkuo anthawk in khawtlâng maichâm, khawtlâng an’thawk in hnam, chuongchun suol hi, ei phâkna chen chenah chawkrala a um theina dingin Lalpa maichâm eiin din pei ding anih. Ei hnam maichâm chu ṭiekdar ta lo ni sienkhawm indinthar nâwk ei tiu. Lalpa’n iengkim a thaw thei ani ti ring zing pum khan. Setan angsung an’thawk Lalpa Pathienin a mi kohrana, chu ruol chun suol, itthiekna, inhmêlmakna, duâmna, hlêprûkna, rinngumnawna … etc. hai po po an’thawk a mi kohran sa ding ei nih, nisienlakhawm hmangaina, inlaichinna, thuhnuoirawlna, lunginsietna, zaidawtheina, awmnêmna, indikna….. etc. hai an’thawk ruok hin chu Lalpa’n mi kohran naw nia, eiin kohran ding khawm ni naw raw seh. Unau, I thlarau dawng chanpui, Lalpa I biek in angpui, ana I ti anga na ti ve thei etc. hai an’thawk eiin kohran el hi Lalpa in a lâwm thei chie di’m maw?

“Ei suksuolna hi Pathien lungsietna nêkin a lien teu nawh” Ienganga suolna inthûkah lo pil ta ni in la khawm, lungsȋr a kir hai ta dingin Lalpa Pathienin inhawng naw lai a nei nawh. Beisei bo rêta ei um hun chen kher kher nghâk naw’ng ei tiu, hmar sunga organization dang dang le ei thuneitu hai hin Hmar hnam indin thar di’n ṭhang nasataka la in a bei zing, sienkhawm sir le vel a suol hrângna a hrât ta rêng rêng lei hin thilṭha khawm a zukin per suok el thei ta nawh. Ei Mihriem tumdan le ei plan haiin, maichâm lungrem a mi kei bum thei tanaw chun iem law’ng ei ta? Innghatna ding dang ei nei ta nawh Thlarauthienghlima chau naw chun mi kei bûm thei naw nih. Thlarauthienghlim chun Pahnam, pawl, chu chu kha kha a nei ve nawh. Thlarauthienghlim ngêi hi anih ei thil nei in ruol tak chuh. Pahnam, pâwl etc. haia inlaichinna siem ei tum ani chun, chu inlaichinna chun ṭiekni la ngêi ngêi a tih, (mihriem thang in a dei naw pha pha) sienkhawm thlarauthienghlim ruok chun hmangaina, inunauna, inthuruolna hai chu a ra suok ngêi ding ani sia.

Iengpo khawm nisienla, taksa hlutna ramah hin hnam dang ei lo phaknawna a lo um ani khawma thlarau kawnga bêk hin ei hnebân ding anih. Hebraihai: 12:1 “chuongchun, chuong ang lâwma tam thilirtuhaiin sumpui anga an mi’n huol khup lei chun, mi sukriktu ta phawt le mi khuoptu suol chu the thlain, ei hma intlansieknaa hin sel takin tlan ei tiu.” Thlaraua intlansiekna hi Pathien a mi ditsak na tak chu anih. Chu ding chun, Hmar hnam Pathienin mal a sawm nuom ani tih hre zingiin, ei nina, umna hmun sengah, theitawp suo tla’ng ei tiu. Thlaraua intlansik eini tih hmei loin.

Lalpa maichâm in din thar ei tiu.
Hmar inlalna ding ram ei buoipui hma hin Pathien inlalna ram hai ni phawt ei tiu.

Download Mp3 Sermon:
http://yourlisten.com/player/director/17339386.mp3

Visit Gospel Today Facebook Page: https://www.facebook.com/GospelToday?ref=bookmarks

Visit Gospel Today Facebook Group:
https://www.facebook.com/groups/Gospelmail/

E-mail Contact: jclallawmsang@gmail.com
Website: www.gospeltoday.co.in
Mob: 09552026004

Post a Comment

Powered by Blogger.