Tuolsung:
Headline:
ADC CCPur­a seats 24 inchu dinga nomination paper file mi 113
Mi 3 in Imphal­a inthawk nomination paper an file
CCPUR: June 1, 2015 nia Manipur­a Autonomous District Councils 6 haia MDC Election hung um dinga Nomination paper file theina hun nuhnung tak chu zani (May 6, 2015) a ni a. Churachandpur district­a chun MDC seats 24 inchu dingin zanikhan mi 79 in Nomination paper an file nawk leiin seats 24 inchu dinga Nomination paper file chu an rengin mi 113 an nih. Zanita Nomination paper file hai laia 3 hai chun Imphal hmuna inthawka Nomination paper an file a nih. Imphal hmuna Nomination paper file hai chu 21­Sangaikot  MDC ni lai mek Tongkai Baite in hi biela dingin INC ticket in nomination a file a,  T. Samuel chun 18­­Zenhang Lamka­ah BJP ticket in nomination paper a file bakah 13­Kholmun biela dingin Thangkhomang Haokip in BJP ticket in nomination paper a file.
   
Nomination paper file­­ a um hai enfelna Scrutiny chu CCPur­­a nei lovin vawisun (May 7, 2015) hin Imphal West­­a Lamphelpat DC Office­ah Scrutiny thaw ni dingin ei thu dawngna chun a hril.
 
Tukum ADC election dinga hin CCPur district­a chun intending candidate tam lem mi 88 in Independent in Nomination Paper an file a, 7 in INC ticket, mi 16 in BJP ; LJP le NPP ticket in mi 1 ve vein  nomination paper an file. ADC/CCPur­a Chairman ni lai mek Congress Ticket­a 10­Tuivai biela MDC dinga thlangtling Langkhanpau Guite meu khawmin Independent a ngir dingin 10­Tuivai bielah nomination paper a file.

CCPur ADC biel­a Nonination Paper file hai chu hieng a hnuoia hai hi an nih:­
 
1­KHOUSABUNG
Letkhomang (INC)
Thangkhopao Haokip (Ind)
P. Soiliankhom Vaiphei (Ind)
Thangkhomang (Ind)
Seilenmang (Ind)

2­ LEIMATAK
Demmang Haokip- ( Ind & INC)
Henminthang-BJP
David Chiru- (Ind)

3­ HENGLEP 
Paolal Haokip- INC
Thenkhohau- BJP

4­ CHONGKHOJOU
Hauneilal- BJP
Benlian -(Ind)
T. Liansang- (Ind)
Genneikhup-(Ind)

5­ THANLON
P.Khamsanglian -(Ind)
Jamchinthang- (Ind)
H.Jamkhanpau Simte- (Ind)
H.Ginlallian Simte-(Ind)
M. Jamkhothang Haokip-(Ind)
Lalkim- BJP

6­ PARBUNG
Lalthathang-(Ind)
Laropieng Hmar-(Ind)
Lalhmangpui Fimate- (Ind)
Lathavel- (Ind)

7­ VANGAI
Lalhmingthang- BJP
Laltlangmawi- (Ind)
Lal Hossan-(Ind)

8­ SENVAWN
Jehovah Malsawm-(Ind)
Lalvullien- (Ind)
Ngurlamthang-(Ind)
JS Pudaite- BJP
Lalditsang- (Ind)

9­ NGAZAM
T. Paukhanlian-(Ind)
H. Pauzalal- (Ind)
Khupzatawn Valte-(Ind)
Niang Mary-(Ind)
M. Ginzapau Guite-(Ind)

10­ TUIVAI
Langkhanpau Guite-(Ind)
Kailal Suantak- (Ind)

11­ LUNGTHUL
G. Suanchinpau- (Ind)
Lamkhanmang- (Ind)
Ginzamuan- BJP
Zamlunmung- (Ind)

12­ LANVA
L. Tualkhanhau- (Ind)
G. Thangchinlian- (Ind)
Pum Khen Cin- (Ind)
Jangdouthang- (Ind)
T.Thanga Tonsing- BJP
T. Khaikhomang- (Ind)
S. Kapkhanmuan- (Ind)

13­ KHOMUN
Khaipao Haokip- INC
Thangkhomang Haokip- BJP

14­ TUIBUONG
Paokholal Haokip- (Ind)
Ngamhao Touthang- INC

15­ HIANGTAM LAMKA
G. Thangkhosuanmung-(Ind)
Thawndouthang-(Ind)
Nengsuanmang-(Ind)
Khamliankhup Lianzaw-BJP
Kamsuanlun- (Ind)

16­ NEW LAMKA WEST
K. Chinkhansuan (Ind)
Nianglian- (Ind)
Ginthianlal- (Ind)
H.Thangzamuan- (Ind)
H. Mangchinkhup-(Ind)
Chintuahlian- (Ind)

17­ NEW LAMKA EAST
Donglian- (Ind)
LK Mung Ngaihte- (Ind)
Tombing Elwin-(Ind)
M.Gouzamang Guite-(Ind)
Daikhenmang @ DK Mang- BJP

18­ ZENHANG LAMKA
P. Khamkhanthuam- (Ind)
Lalzahau Samte- (Ind)
K.Ginkhozam- LJP
V.Chinkhenpau-(Ind)
T.Pumzanang- (Ind)
V. Khaikhanmung-(Ind)
V.Daikhenmang- (Ind)
T. Samuel- BJP

19­ SAIKOT
Rammawi-BJP
Darsiemlien Rounguol- (Ind)
Lalhrillien- (Ind)

20­ SAGANG
Emboi Serto- Ind
Leivon Thangrengchung Kom - (Ind)
M.Rekhupsong Kom- BJP
KC Chonsei- INC
Gasmani- (Ind)

21­ SANGAIKOT
Pumtulthang- (Ind)
Tongkhokai Baite- INC
22­ HAOPI RANGE
Thiankhanlian- (Ind)
P. Kamkholal -(Ind)
Lalminthang Misao-BJP
Lallunkam- (Ind)
K.William Vaiphei-(Ind)
SN John- (Ind)
S.Minboi Vaiphei-(Ind)
T.Zamkholun Khongsai- NPP
Haukhanthang- (Ind)

23­ MUALLUM
T.Thangpu- (Ind)
Zaneiching @ Grace Zamnu- Ind
Chinsuanlam-(Ind)
Pauminlianthang-(Ind)
P.Thangkhanlun-(Ind)
Minlian- (Ind)
Letsei- (Ind)
Thangkhenhang-(Ind)
S.Chinsuanlian- BJP

24­ SINGNGAT
Khamchinmang-(Ind)
Hausuanthang-(Ind)
Pumkhanmang-(Ind)
Thangkhongam Taithu- (Ind)
P.Sianzadong- (Ind)
Nengchinlam-(Ind)

Class XII inchuklai an khai hlum
CCPUR: Police­a inthawk ei thu dawngnain a hril danin Zani zingkar 6:00AM khan Salem Veng­a  mi in hluoa um Don Bosco Hr. Sec. School­a Class XII inchuklai Joseph Thangzalen Luphou (19) s/o Holkholun Luphou of Tengnoupal, Chandel District chu a chengna room sungah inkhai hlum saa hmu a nih. A ruong hi Police han District Hospital, CCPur Morgue­a an sie hnungin Doctor le Police han Postmortem an thaw a. Hi zo hin a sung hai kuoma pekdawk a ni a, KKL Complex, IB Road a inthawk KKL in mithiruong hi an phurdawk. CCPUr Police chun hi thua hin UD case No. 3/CCP­PS U/S 174 CrPC registered an registered.

HPC(D) in Press Release an siem
CCPUR: May 6, 2015 nia John F. Hmar, Information & Publicity, HPC(D), General Headquarters, Sinlung in Press Release a siema chun hieng a hnuoia thu hai hi zieklang a nih:
 
Hmar People’s Convention (Democratic) chun May 3, 2015 zana Patpuihmuna thil tlung kha pawi kan ti takzet a. Kan cadre laia pakhat Mr Ruola s/o Remthanga of Saipum, Mizoram chun HPC(D) silai a ruka lo la dawkin, tlan hmang tum chun Tuiruonga Leilak daw tuma sinthaw mek (labours) laia mi pahni Pu Lalbieklien Sinate (39) s/o Lalbuonthang, Salem Veng, CCPur le Tv. Darlienthang Hrangchal s/o Tlangkhumvel, Lungthulien hai nunrawng taka silaia a kap hlum an nina chungthuah pawi kan tiin lusun sungkuo hai kan tuorpui takzet. Chun, hliem tuok Tv Lala Famhoite s/o Pana Famhoite le Elisa Chawnghmunte s/o Pastor Hrangdang, Sielmat haiin vangduoina an tuok hi pawi kan tih. HPC(D) chun a thi sungkuo hai kan thei ang tawka zangnadawmna pek le a hliem hai inenkawlna ding chu a mawphurna a nih.
 
Ring naw ang taka kan cadre pakhatin pawl inphatsana (deserted) kan kuta inthawka a ruka tlan suokin hieng ang thil ditum lo tak an tlungtir el hi pawi kan ti takzet a. Mr Ruola hi man nghal a nih a, a phu tawk hremna CAPITAL PUNISHMENT pek a nih.
 
Vangaitlang le Taithu ram tienga J.T. Road­a leilak siemna le inzawma Electric Department a sinthawtuhai le Contractor hrim hrim HPC(D) chun theida na le hmelmakna iengkhawm a nei naw a. An sinthaw hai zo vat hi mipui hmakhuo ngaina leiin a dit lem a nih ti mipui hriet dingin kan puong a, an hmat tienga an sinthaw hai sunzawm  nawk nghal dingin kan ngen bawk a nih. Mimal le pawl tuelkhawm hieng sinthawtuhai sukbuoi zawng le inthi an lo  um a ni chun a tul angin HPC(D) in an chungchang bawzui a tih.
 
Mi tukhawm hi thil le inzawma thu belchieng dawllo le mi lung khel zawng tawngbau mawi lo Newspaper le Social Networking Site­a insuo lo dingin inhriettir in nih. Ram le hnam ta dinga kan hmalakna kawnga hin mipui mitkham zawnga kal kan penna a lo um pal a ni khawmin indemtuo el lova, thurawn mi pe lem dingin kan ngen bawk cheu a nih.

Blood Donation Camp an huoihawt
CCPUR: STC, BSF chun tukum an Golden Jubilee lawmna le inzawma Civic Action Program fethlengin YMA Chiengkawn Branch le Dist. Hospital Blood Bank hai le thangruolin zanikhan Chiengkonpang Community Hall­ah Blood Donation Camp an huoihawt. Hi camp hi UC Azarika, DIG, STC/BSF in a hawng. Hi huna in STC/BSF a inthawk mi 21 in thisen Unit khat (1) seng an pek a, Blood Bank, District Hospital chun a tul le pawimaw hai hmang thei dingin an kawl.

Orphanage home haiah an sem
CCPUR: ZYA GHQ in Assembly­cum­Election, 2015 le inzawma May 1, 2015 zana 17th ZYA Raising Day­cum­Musical Nite nei huna Donation/Charity Box hmanga thawlawm an hmu hai chu zanikhan Orphanage Home tum tum kuoma an sem.

CDSA­a Registration
CCPUR: Churachandpur District Sports Association (CDSA) hnuoia 2015­16 Fresh/ Registration/ Renewal thaw nuom club hai ta dingin 6­31 May, 2015 inkar sung ngaiven thei le Inter­District and Inter ­Club transfer period chu 1st­7th June le 8­15th June, 2015 ning a tih.

Health Minister in District Hospital a sir
CCPUR: Health Minister Phungzathang Tonsing chu zani 12:00 vel khan CCPur­ah a hung a,   Children Ward hlui chu Engineering Team hai leh an enfel. Children Ward building hi tuta kar sunga thiek dar a, building thar bawl ni dingin ei thu dawngna chun a hril. Hi baka hin minister chun HQ Veng­a 1st IRB umna hmun Medical College bawlna dingin a enfel.


Missionary Day chawl
CCPUR: Vawisun Missionary Day chawl a ni leiin MHJU hnuoia tuolsung nitin Chanchinbu Office hai khar ning a tih. Hi lei hin May 8, 2015 in Hmasawnna Thar thangsain tuolsung nitin chanchinbu hai suok naw ni a, May 9, 2015 a inthawk hung suok nawk an tih. CCPur District sunga chun Govt. Offices le Educational Institutions hai  khawm Missionary Day leiin chawl an tih.

Imphal/Headline:
Pallel hmuna thil tlung Magisterial Enquiry thaw ding; Curfew zam zing a la nih
IMPHAL:  Zani hmasa 5­5­2015) zana pallel Laikon Leikai, Chandel District­a Lai Haraoba le inzawma lampui hraw hai tu ti hriet lo han an lo kap leia mi pakhatin thina a tuok a, mi 4 in hliemna an tuokna hmun chu zanikhan Manipur Dy CM le Home Minister ni bawk Pu Gaikhangam in a hmuna a va kan a, thil umdan a va enfel. Hi thil tlung a va kan zova Pu Gaikhangam in   Chanchinbumihai an hmupuinaa chun, Pallel a thil tlung hi Magisterial Enquiry thaw ning a ta; hi thil thawtuhai hi zingah chen man anni beisei a nih. Tuhin DIG inrawinain Police han man dingin an zawng zing a nih tiin a hril. Chun, hi thil thawtuhai an inpe theina dinga khawtlang thuoituhai chu lo thangpui dingin ngenna a siem.
 
District Administration chun Pallel hmunah hi zan la lain Curfew (Cr.PC 144) a puong nghal. Curfew hi zam zing a la nih. Pallel a thil tlung hi zan dar 9 vel nia hril a nih. Hi thil tlunga thina tuok chu Moirangthem Gopal (43) s/o (L) Gourachandra of Pallel Mayai Leilai a nih. Mipui lungsenin hi zan hin Pallel Police Station an hlukhum a, lungin an deng leiin Police  ASI, N. Rajmani (24) chu a luah an deng hliem bakah Sentry Tower an raw. Police hai khawmin mipui hnawtdarna dingin blank fire an thaw. Zani khawm khan lampuia thil raw le pungkhawm an la um leiin  a hnawt hmangna dingin Police han tear gas an kap khum.

Model Code of conduct an bawsiet
IMPHAL: ADC Election ding le inzawma Model Code of Conduct hmang a ni lai zinga Manipur­a Congress sawrkarin Cabinet meeting an nei a, an thil thaw tum hai an rel le an puonglang hi election model Code of conduct an bawsiet a nih. Hi lei hin Manipur a Congress sawrakr inban raw seh tiin BJP, Manipur President Th. Chaoba Singh in State Election Commission­ah ngenna a siem. Chun, CCPur district a Khengjang a an party candidate thuoihmang a nih tiin Th. Chaoba Singh chun a hril.

Scrutiny le Withdrawal IW DC Office­ah
IMPHAL:  ADC Election le inzawma nomination papers file a um hai Scrutiny chu vawisun 11AM­3PM inkar sungin DC, Imphal West Complex, Lamphelpat­ah nei ning a ta, candidate inhnukdawk nuomhai khawmin May 11, 2015, 3PM chenin inhnukdawk thei an tih tiin State Election Commission chun zanikhan inhriettirna a siem. Chun, nomination papers file mi 244 an um niin a hril.

World Environment  Day Celebration
IMPHAL:  Royal  Riders, Manipur le Green Revolution Society, Manipur hai thangruolin zanikhan thla khat sung hmang ding World Environment Day chu CM Pu O.Ibobi Singh in Lamyanba Sanglen, Palace Compound, Imphal­ah a hawng. Ukhrul District a Siroy Lily venghim a tul thu, tulai hnai ela Gwaltabi hmuna thil tlung le zan hmasa a Pallel hmuna thil tlung hai pawi a ti thu le thil vangduoithlak takel a nih tiin O. Ibobi Singh in thu a hrilna huna a hril.

UN Session ah Manipur ngirhmun
IMPHAL:  April 20, 2015­May 1, 2015 inkara UN Headquarters, New York a UN Permanent Forum on Indigenous Issue (UNPFII) Session 14­na­ah Centre for Research and Advocacy, Manipur palai 2, Jiten Yumnam le Ms. Pushpa Koijom han Manipur ngirhmun (armed conflict thuah) an hrillang.

Sadar Hills Bandh postponed
IMPHAL:  KSO, Sadar Hills in May 6, 2015 zanrila inthawka darkar 24 sung Sadar Hills Bandh thaw an tum chu ADC election ding leia Scrutiny thaw ding leiin May 7, 2015 zanril chenin an thul niin KSO, Sadar Hills thusuok chun a hril.

Others:
NPCC President a inthawk an ban
DIMAPUR:  Mr S.I. Jamir, President Nagaland Pradesh Congress Committee (NPCC) chun President, NPCC a ninaa inthawka an banna lekha AICC President Sonia Gandhi kuomah May 5, 2015 khan a peklut. A term tawpna ding chu thla 5 lai a la bak a nih.

June thlaah Bru­hai thuoikir tum
AIZAWL:  Mizoram sawrkar chun Mizorama inthawka Tripura­a Bru tlansie, Mizoram mi indik tak  hai chu June thla haptakar khatnaa inthawkin Mizoramah thuoikir tumin an buotsai mek a nih tiin State Core Commitee on Bru Repatriation thusuok chun a hril. Sungkuo tin Rs. 85, 000 pek ning an ta, kum 2 sung a thlawnin fak ding bufai pek ni bawk an tih tiin Lalbiakzama, Additional Secy. (Home), Govt. of  Mizoram  le DIG chun a hril. Union Home Ministry­ah  Bru­hai thuoikirna dingin Rs. 68 crore ngen a ni a, Rs. 4 crore a hung pek ta a nih tiin a hril bawk.

Delhi Transport Dept. thawktu 6 suspended
NEW DELHI:  Delhi sawrkar hnuoia  Transport Department a Enforcement Wing thawktu 5 le Delhi Transport Corporation (DTC) Driver pakhat, an rengin thawktu 6 hai chu Truck Drivers haia inthawk thamna an lak ti hriet suok a ni leiin an sin haia inthawk suspended an nih tiin Delhi Transport Minister, Gopal Rai chun a hril. Rai chun, senior official­hai chu field visit thaw ngun dingin an hriettir.

State puitling pek ninaw nih: Govt
NEW DELHI: Delhi chu state puitling pek ninaw nih tiin sawrkar thlungpui chun a hril. Aam Aadmi Party (AAP) chun Delhi chu State puitlinga hlangkai dingin sawrkar thlungpui nasa taka nawrin a ngen a nih. Sawrkar thlungpui chun Delhi UT chu state puitlinga hlangkai dingin riruong sinna khawm a nei nawh tiin Union Minister of State for Home, Haribhai Parathibhai Chaudhary chun Lok Sabha hmuna a hril.

Salman Khan kum 5 sung lungin intang dingin
MUMBAI:  Zanikhan Mumbai Session Court chun Bollywood superstar Salman Khan chu kum 2002 a ‘Hit and Run” case­ah kum 5 sung lungin intang dingin thiemnaw an changtir. September 28, 2002 zana Salman Khan in Zurui puma motor a khal leiin a eksiden a, lamlien sira zal mi pakhat a rawt hlum bakah midang 4 an hliem pha a nih. Hi case leia Salman khan hi kum 5 sung lungin intang dinga thiemnaw inchangtir a nih. Bombay High Court chun Salman Khan hi ni 2 sung interim bail a phal pek.

Baster a PM inzin ding Maoist han an boycott tum
NEW DELHI:  PM Narendra Modi chu May 9, 2015 khin Chhattisgarh state a Dantewada district sunga Baster ah inzin a tum a, Baster a an zin  huna lo boycott an tum thu Maoist helpawl han thusuok an siem. CPI(Maoist) pawl chun a biel mipuihai chu an boycott tumna hi thlawp dingin an ngen. Chhattisgarh thil hlu tam tak sawrkar thlungpuiin Corporate Companies hai kuoma zawr a tum dodalnaa PM inzin ding hi an boycott tum niin CPI(Maoist) thusuok chun a hril.

Postal thawktu 300 lai hrem an nih
NEW DELHI: Kum 2013­14 sung khan Post Office le Money Order fe thelnga pawisa Rs. 12, 241 crore thawna um hai laia  Rs. 10.9 crore zet a neitu dinghai kuomah a tlung nawh ti complaints 80,000 dawng a ni a, hi thila thangvena nei Postal department thawktu 300 hrem an nih tiin Union  Telecom Minister, Ravi Shankar Prasad chun zanikhan Lok Sabha hmuna a hril.

Sapeltu 11 that le 20 man an nih
NEW DELHI: Tuta kum fe mek sung hin Kaziranga National park huop sungah sapeltu 11 hmun hran hranah kap hlum le sapeltu mi 20 man an ni tah. Kum 2014 khan sapeltu 22 kap hlum le sapeltu 47 man an ni tah. January, 2015 a inthawk April 30, 2015 chen khan Sapeltu han Samak 9 an that ta a, kum 2014 khan 27 an that tiin Union  Environment Minister Prakash Javadekar chun Lok Sabha­ah a hril. Chun, Samak thatna cases 7 CBI kutah pek ni tain a hril bawk.

October thlaah German Chancellor Delhi­ah
AHMEDABAD: Hungtlung ding October, 2015 thla khin German Chancellor Angela Merkel chu New Delhi­ah hung inzin a ta, Ministers, Officials  le sumdawng hausa han hung zui an tih tiin  German Ambassador to India, Michael Steiner chun a hri. April thlaa India PM Narendra Modi  German rama a hang inzin tum khawm khan Modi le  Merkel  hai hin inbiekna tha taka neiin Skill  Development le Vocational Training tieng haia thangruol an remtitlang a nih.

Sawmdawlna sin thaw zing a la nih
KATHMANDU: Nepal­a Simkhawlei inhning le inzawmin sawmdawlna sin thaw zing a la nih. Sawmdawlna sin thawna hi India, China, USA le World Food Organisation han an thangpui tawl. Tuchena mihriem thina tuok chu 7652, hliem 16390 ni tain ei thu dawngna chun a hril. Indian Air Force chun sawmdawlna, puonin, blanket, damdawi, Cook House, bu le tui tonnes 520 zet Nepal a  phurtlung ta a nih.

UP­a mi 3 thuok insamin an thi
MATHURA: Uttar Pradesh­a Nagla Udai Singh village­a chun Well sukfainaah pasal pathum thuok insamin an thi. Well sunga thuok insama thi hai chu Munna (22), Kalua (18) le Veer Pal (18) hai an nih. Well hi hun sawt tak hmang ta lova um a ni a, sienkhawm tui vang leia sukfai tuma Well sunga zu lut an nih. An ruong hi Well sunga inthawk lakdawk vawng a ni tah.
_____________________________________________________________________
VAWISUN THUPUI
Tukhawm mani ta dinga hring ei ni nawh a, tukhawm mani ta dina thi ei ni bawk nawh. Ei hring chun Lalpa ta dingin ei hring a, ei thi khawmin Lalpa ta dingin ei thi a ni sih a; chuleiin, ei hring khawmin ei thi khawmin Lalpa ta ei nih. ~ Rom 14:7­8

Editorial:
Ram le mipui venghimna

Khawvel a um chun indo, inthat, inthuoihmang, insuom, inthawlui etc. hai hi chu thil tlung ding hrim an ni a, sienkhawm chuongang thil tha lo tlung thei lakah theitawp suoa ei lo inveng ve hi ei thaw ding a ni a, chuongang thila chun iengang ngirhmuna am ei um a ti hi ei insut a pawimaw hle awm ie. Thil suol thaw tum ngar ngar pawl hi an um hlak a. Sawrkar hlak chun a ram a phekin venghimtu Police le sipai a sie vawng seng si naw leiin mimal theina bakah a khawtlang ang zawng khawma mipuihai hin invengna sin hi thaw tak taka ei thaw a tul ta niin an lang. Fimkhur le thatho taka venghimna sin hi ei thaw zing tanaw chun sietna nasa lem ei la tuok pei theina ding san tam tak a um ta a nih.
 
USA thangsain khawvela ram ropui le che thei em em a ei ngaihai, venghimna sin khawm a uluk pawla hrilhai khawmin thil suol thaw tum ngar ngar hai chu an dang thei bik nawh. Khawvela ram ropui taka ngai USA a meu khawm World Trade Centre, New York khawpuia mi chu mi suol han mit khap kar el chauin an suksiet rip a, building ropui tak el chu pilvutin an chang el a ni kha! Kha thil tlung khan thil suol thaw tum hai chu dang thei an ni nawzie a suklang chieng hle.
 
Khawvela ram ropui, ram hausa le a che thei thei hai hi an ram le mipui venghimna tienga sum hmang rawn le venghimna sin uluk em em el an ni tawl. Ram le mipui venghimna dinga sum le pai, ngaituona lungril, tha le zung an seng nasat em leiin sietna nasa lem, harsatna le buoina lien lem an pumpel hlak  ning a tih ti khawm ring theiin a um. Sarwkar hrat le thil thaw thei hai hi an um mei mei naw a, an ram le an mipui hai venghimna dingin theitawp takmeu an suo tawl a nih.
 
Sawrkar um san chu ram le a mipuihai himna ding ngaituo a ni a, tuta ei ngirhmunah hin chu hi thil hi ngaipawimaw hmasak (priority) a hlaw rak naw ning a tih ti dingin ramri hrul le hmun kilkhawra hai thil ditum lo a tlung ngun ta hle. Phairam biel le Imphal khawpui sung, Police le Security Forces chi tum tum hai tama le uluk taka venghimna hmuna hai  hman thil ditum lo a tlung rawp a ni chun, ram kilkhawr Police le Security Forces hai um nawna hmun haia lem chu thil suol thaw nuomtuhai chu an zalen hle le roreltu annawleh thuneituah an thang ngei ring a um.
 
Tulai hnai ela Vangai biel le zani hmasa lai ela Pallel hmuna thil tlung hai khan mipui lungril a sukna hle ti chu a hrietu seng ei nih. Hri le hrai bakah eksiden thila thina le hliemna ei tuok chang hai  hmana ieng ei hril thei naw laia pawitawk der lo han thina hiel an hang tuok el hlak hi chu a pawi a, a tuortu insung ta ding lem chun a na taluo bek bek el a nih. Hiengang thil ditum lo hi a tlung nawk ta ngai nawna dinga ei state sawrkarin ram le mipui venghimna sin hi ngaipawimaw hmasain (priority) pe thei ngei sienla nuom a um ngei el.
 
Mipui dit chu mihriem hringna chan lo hi a nih. Hi lei hin ei state sawrkar hin ram le mipui venghimna tiengpang hi tuta hma nekin a neka nasa lemin thang la tak tak sienla ti chu an mipui hai duthusam le ngenna a nih. Ram le mipui an him naw chun hmasawnna sin chu fe hrat thei ngainaw nih.  Ram hmasawn hratna ding chun ei ramin muongna le inremna a mamaw hmasa phawt a nih. Ram buoinaah hmasawnna a um ngai naw a, a rasuok chu retheina le mihai sirde a nih.


Post a Comment

Powered by Blogger.