Tuolsung
DC CCPur in ‘ASHA GHAR’ a hawng
CCPur: Mr Lunminthang Haokip, IAS, DC, CCPur chun zani zingkar 10:00AM khan District Hospital hmuna “ASHA GHAR” a hawng. Hi huna hin Medical Supdt. District Hospital, DFWO,  Dy. Medical Supdt, Dist. Hospital le District Program Manager, NHM; District Mobilizer, NHM hai  bakah ASHA worker thahnemtawk tak an thang.
   


ASHA GHAR hi tlangram tienga inthawk ASHA Worker han nuhmei naunei ding District Hospital­a an hung pui huna an riekna ding a ni a, Khum 2 sie a nih.
    
Pu Lunminthang Haokip, DC, CCPur chun, Churachandpur district hi kawng tinrengah an thangin hma a sawn ti an hriet a. ASHA worker hai chu district hming thatna vawnghim pei dinga sin thaw dingin an fui. Dr Thangchinkhup Guite, CMO/CCPur chun, District Health Mission guideline dungzuia ASHA GHAR hi hawng a ni a, Manipur­a dingin a hmasatak a la nih tiin a hril.

NEICCYA OB le Executive member  thar hai
CCPur/CCPur: May 15­17, 2015 inkar sung khan Salvation Army Temple (Church), Aizawl, Mizoram­ah North East India Christian Council Youth Assembly (NEICCYA) 16th Bienial Conference nei a nih. Hi huna hin kum 2015­17 sunga NEICCYA President dingin Rev. Eleazer Sanglyne, JSKJP Synod Mihngi; Vice President­  H. Lalthangliana, MTKP, BCM; Sercretary­ Mr P.C. Biakmuanpuia, CKTP, Mizoram Synod; Asst. Secy.­ Jimmy Laltlanmawia, SAY, Salvation Army, IET; Treasurer­ Rev. Samuel Dkhar, Church of God (M&A) le Finance Secretary dingin Rev. Salem L. Hmar, CKTP, EFCI hai thlang an nih. Chun, Executives members dingin ,o7­ Rev. Amminot T. Sohlya, JSKJP Synod Sepngi; Mr Zosiama Thianglai, KVP Biateram Synod; P/P Joseph K. Chozah, KTP, ECM; Rev. Khrawbok  Rympei, CEU Ribhoi Presbyterian Synod; P/P Mihuikam Newme, YF  Cachar Hill Tribes Synod; Elder Demmang Haokip, YF Evangelical Churches Association le Mr Bikash G. Momin, BYF, Garo Baptist Conention hai ruot an nih.
            
NEICCYA Conference­a hin Mizoram puotienga inthawk palai 223, Aizawl khawpui puotienga inthawk 83 le Aizawl khawpui sunga intahwk 102, an rengin palai 408 an thang.

Tuaitengphai­ah Free Dental Camp
CCPur: JC Dental Care chun hmun tum tuma an buotsai hnungin zanikhan Tuaitengphai khuoa Lal inah Free Dental Care/camp an buotsai nawk. Hi huna hin Ha tiengpanga harsatna nei mi 80 hai chu  Ha doctor thiem tak tak pathum­ Dr Lalrotlingi Sinate; Dr L.Helhling le Dr Deborah Sangi han an en a, Toothpase, Toothbrush le Ha ta dinga pawimaw tum tum hai a thlawnin an sem nawk. Chun hi huna hin JC Dental Care clinic­a Assistant Nk. Hrieti chun Ha enkawl dan mipui hai  hrilhrietna a nei bawk. Dr  Sangi chun sawrkar­a inthawk thangpuina an hmu leia Free Dental camp hi an thaw ni lovin, mipui kuoma ha enkawl that a pawimawzie inhriettir an nuom leia anni sum senga an buotsai a ni thu a hril a. Khaw dang dang haia khawm an la thaw nawk ding niin a hril.


Essay le Quiz Competition
CCPur: May 28, 2015 khin District Health Society/CCPur le ZEO/CCPur thangruola huoihawtnain  School 7­ Phungkhothang govt H/S; Vimala Raina H/S; Rengkai Hr Sec School; Vungzagen Hr Sec School; Lanva Model H/S; Gandhi Memorial H/S le Thangkhai govt H/S a class X student han CMO Mini­Conference Hall le Female Health Worker Training school Auditorium haiah Essay le Quiz Competition nei an tih.
    
Session­I 9AM­10AM sungin ‘Adolescence a time that Matters’ ti thupui hmangin Essay ziek inelna um a ta; 11AM­1PM inkar sungin Health thuah Quiz competition um a ta, school 7 haia inthawk student 2 pei thang an tih.
    
Session­II zantieng 2PM in lawmman semna um nghal a ta, hi huna hin Dr Thangchinkhup Guite, CMO chun thuhrilna nei bawk a tih.

Election Office le Information Centre hawng
CCPUR:  17­­New Lamka East­­a Independent candidate M. Gouzamang Guite chun zani 7:30AM khan Rengkai Bazar­ah Election Office­cum­Information Centre a hawng. Congress ticket hmu hai  khawm Independent­a ngir vawng an ni thu a hril. Chun, zanikhan 17­New Lamka East ADC biela  candidate Pu Donglian worker le supporter hai ta dingin Simveng, Khamzalam Road­ah information Centre hawng a ni bawk.

Manmasi Digest
CCPur: Manmasi Digest April & May, 2015 issue chu a suok nawk tah. Article tiem inhawi tak takel­ Kelkang harna le a dang dang tiem thei ding inchuon a ni a. Inchawka tiem ve ngei chi a nih.  A dit hai chun a zawrna dawr le Agent hai kuoma inthawk hmu thei ning a tih.

Review meeting
CCPur: DHS/CCPur huoihawtnain  May 27, 2015, 11:30AM khin Private Accredated Hospital/Clinic/Nursing Home haia Managing Director han National Health Programme sinthawna thuah review meeting nei an ta, hi huna hin DFWO/Dist. Nodal Officer (JSSK, JSY) le Dist. Programme Manager, NHM hai thang an tih.

Headline:
ADC Election zova Dzuko Valley-a ramri rin fel ning a tih- O.Ibobi  Singh
Imphal: Zanikhan Congress Bhavan, Imphal le 1st MR Banquet Hall, Imphal haia India Prime Minister hlui Rajiv Gandhi thi champha a vawi 24­na chu ursun taka inser a nih. Chun, hi ni hi India ram pumpui huopin Anti­Terrorism Day a inser a ni bawk. Zanita 1st MR Banquet Hall, Imphal­a Anti­Terrorism Day insernaah CM O.Ibobi Singh, Dy. CM Gaikhangam, Chief  Secretary P.C Lawmkunga,Shahid Ahmad, DGP Manipur, Works minister Dr Kh. Ratan Kumar, Deputy Speaker Preshaw Shimray le sawrkar thawktuhai an thang tawl.
            
Hi hunser hmang zova CM O.Ibobi Singh in Chanchinbumihai an hmupuinaa chun,Ukhrul District a Dzuko Valley a Manipur le Nagaland State hai ramri hi ADC Election zova rin fel ning a tih tiin a hril. State sawrkar chun hi ramri buoi hi a ngaimaw hle a. Nagaland sawrkar leh inbiekpawin Survey thaw ning a ta, Manipur le Nagaland inkara inter­state boundary hi rin fel ngei ning a tih. Ramri buoina chungthua hin harsatna a lo um a, sawrkar thlungpui an rawl a lo tul ding a ni khawma sawrkar thlungpui hung inrawl ngei dinga ngen ning a tih tiin O.Ibobi Singh chun a hril.

Manipur pumpui huopin darkar 24 bandh
Imphal: Nagaland­a pawl pakhat Southern Angami Naga People’s Organisation in Dzuko Valley, Manipur state huop sung an hung lak le hluo (encroached) dodalnain Mao Council chun vawizan zanril (May 22, 2015) a inthawk darkar 24 sung Manipur pumpui huopin bandh an tahw ding thu an puonglang. Hi bandh hi All Manipur United Club Organisation (AMUCO), United Committee Manipur (UCM), U nion Social Upliftment (USU), Maoist  Communist Party Manipur (MCPM) le Manipur People’s Party (MPP) hai bakah Manipur­a pawl tum tu m hai khawma an thlawp ding thu an puonglang.

Plastic a siem bufai a hung lut el thei
Imphal:  Bufai tehlem (fake rice), plastic rice tia ko bawk chu, beraw le kawlkai hai le chawkpawla siem, China rama Bazar hmun haia zawr mek chu Asia khawmuolpui, India, Indonesia le Vietnam hai thangsain a hung lut el thei niin www.shanghaiist.com chun a hril. Hiengang bufai hi Myanmar a inthawk Moreh, Manipur a khawm a hung lut inlau u m takel a nih. Hi bufai hin mihriem hriselna nasa takin a suksiet thei a, a bik takin phingpui ta dinga sietna nasa tak an tlun thei nia hril a nih. Hi bufai hi bufai tak leh an inang hlea hril a nih.

Grenade pakhat hmu a nih
Imphal: Zani zing dar 8 vel khan Lamphel Police Station huop sung, Imphal West District a um NIT Office main Gate, Takyelpat ah 36­Hand Grenade inkhaia hmu a nih. Hand Grenade hi polythene bag­a infun a nih. Police Bomb Disposal Squad team in a va lak a, pawitawknawna ding hmuna an sukpuok.

Sandalwood leh mi 2 AR han an man
Imphal:  Zani hmasa khan 20 Assam Rifles F.Coy han Imphal­Moreh Road­ah Maruti Van MN01­W4277 sukchawla an dapnaah Sandalwood le mi 2 an man a, Imphal Forest Department kutah an peklut niin Assam Rifles (AR) thusuok chun a hril. Sandalwood le man hai chu Mala Devi (40) w/o Bhakti Singh of Khongjom, Thoubal District le Letkholun Khongsai (34) s/o Jamkhomang Khongsai of Moreh Ward No. 9 hai an nih.

Imphal­Ukhrul Road bandh hlip
Imphal: KRF han sinthawtu pasal 2 an vuok hlum bakah student pakhat na taka an vuok hliem leia Imphal-­Jiribam Road a Curfew puonga um chu hlip a ni ta tiin District Magistrate, Imphal West chun thusuok a siem. Buoina siemhai le sawrkarin inbiekremna an nei ta leia Curfew hi hlip ni tain ei thu dawngna chun a hril. Chun, JAC le state sawrkar han inbiekremna an nei ta leiin Imphal-­Ukhrul Road­a bandh khawm hlip a ni tah.

NPF Office, Tangrei ah bomb a puok
Imphal:  Zani hmasa zan dar 8 vel khan Ukhrul district a Kamjong Sub­Division sunga Tangrei hmuna NPF Office­ah bomb a puok a, hi office hi a suksiet nuol a, mihriem thi le hliem ruok chu an um nawh. Bomb hi helpawlhai sukpuok ni dinga ringhla a nih.

KYKL cadre 2 man
Imphal: Zani hmasa khan 2Assam Rifles le Thoubal Police Commando thangruol han Heirok part 3 Ngarouthel Lampak hmuna KYKL cadre pahni an man niin zanita Asam Rifles thusuok chun a hril.

Others
AIADMK Legislature meeting
Chennai: Vawisun hin AIADMK Headquarters, Chennai­ah AIADMK Legislature party meeting um a ta, an Party lukhaitu tak le CM hlui Ms J. Jayalalitha chu AIADMK Legislature Party leader (CM) dingin an thlang ngei ring a nih. Tuta Tamil Nadu CM Mr Pannerselvam chu Legislature Party meeting zovah CM a ninaa inthawk inban a ta, Ms J.Jayalalitha chu May 23, 2015 khin Tamil Nadu CM thar dingin sesamna nei a tih tiin official thusuok chun a hril.

Agartala le Kolkata inkarah direct Bus
Agartala: Tuta inthawka hun sawtnawte hnungah Agartala­Kolkata via Bangladesh direct Bus service infetir tum a nih. Hi thil hi PM Narendra Modi thla thara Dhaka khawpuia an zin huna sukfel ning a tih tiin Tripura Governor thar Tathagata Roy chun a hril. Hi thil hin India le Bangladesh inkarah inlaichinna tha lem a hung intlun beisei a nih tiin Roy chun a hril.

Maoist Commander ralthuom leh an pe
Raipur: Zani hmasa khan Maoist Commander Kiran alias Sannu Potam (26) of Gangaloor, Bijapur district chu SLR 1, a magazines 2 le a mu 47 leh Inspector General of Police, Baster Region le SP, Dantewada hai hmaah an pe. Potam hi May, 2013 a Jheeram hmuna Congress thuoituhai thattu, sawrkarin luman Rs. 5,00,000 neia a puong ta hnung a nih tiin SRP Kalluri, IG, Baster Range chun a hril. Potam hi surrender­cum­Rehabilitation scheme dungzuiin a luman Rs.5 lakh thangsain  Rs. 8,00,000 pek a ni ding a nih.

Mirage­2000 hlawtling takin a tum
Mathura: Zani zingkar dar 6:40 khan Indian Air Force (IAF) Vuongna Mirage­2000 Fighter chu hlawtling takin Yamuna Expressway­ah a tum. India rama National Highway haia emergency thila  Vuongna tumnaa hmang thei a ni ding am ti fiena dinga hi thil hi thaw a nih tiin senior IAF official thusuok chun a hril. Hi thil hi IAF ta dinga hmasawnna pakhat a nih tiin IAF thusuok chun a hril.

Boruok lum tuorzo lova  thi mi 51
Hyderabad: Tulaia boruok lum taluo tuorzo naw leia Andhra Pradesh le Telangana state haiah mi 51 laiin thina an tuok pha ta nia hril a nih. Boruok lum taluo leia thina tlungna hmun hai chu, Warangal, Nalgonda, Karimnagar, Srikakulam,Visakhapatnam le Vizianagaram districts hai an nih. Telangana state ah mi 35 le Andhra Pradesh­ah mi 16, an rengin thina tuok 51 niin ei thu dawngna chun a hril.

Heroin le Pseudoephedrine man
Aizawl: May 18, 2015 zan khan Mizoram Excise and Narcotics Department han Hrangtawna (39) chu Heroin grams 10 leh an man a, lunginah an sielut. Chun, May 18, 2015 khan Khatla, Aizawlah Anti­Narcotic Squad han Lalthuama (47) chu Pseudoephedrine mum 2.3 lakh manhu vel, Myanmar a  phurlut tum niin a mantu han an hril.

GNLA Area Commander kap hlum
Shillong: Zanikhan South Garo Hills District, Meghalaya sunga Daji Adogre village­ah GNLA le Security Forces hai an inkaptuo a, GNLA Area Commander Sadam Sangma kap hlum a nih tiin A.T. Sangma, Additional Superintendent of Police, South  Garo Hills chun a hril. Kap hluma u m kuta inthawk hin INSAS Rifle 1, Pistol 1 le a mu tam tak hmu a nih.

A pasal le a sunghai 6 a raw hlum
Madurai: Pandeeswari (25) of Kumarapuram, Madurai district chun zani hmasa khan a pasal Kanan, a pa Velu (65), a nu Petchiammal (50), a farnu Suganthi (35), a farnu nauhai 3­ Sangeetha (17), Sanjeevi (12) le Vineeth (11) hai chu imu inhnik taka an zal lai khawnvartui bur khumin a raw hlum vawng niin Police chun an hril. Kanan hin a nuhmei hi kum khat zet Chennai­ah sinthawin a um hmang san a, chu lungsena chu hi thil hi a thaw nia hril a nih. Hi thil tlung le inzawm hin Police han Pandeeswari, ama piengna nu le a unaupa hai manin case an siem khum. Pandeeswari hin a pasal le a sunghai a raw zo hin puotieng kawt a kal khum a, chu hnunga a fe hmang san nia hril a nih.

Nuhmei 4 Electric in a man hlum
Itanagar: May 19, 2015 khan West Siang District, Arunachal Pradesh a electric hrui (high tension line) pakaht leilet lai a tla thla a, lo sinthaw nupui 4 a man hlum. Arunachal Pradesh CM Nabam Tuki chun hi thil tlunga thi sunghai lusunna a tuorpui thu a puong bakah thina tuok sunghai zangnadawmna Rs. 2,00,000 seng pek anni ding thu a puonglang bawk. Hi thil tlung le inzawm hin Contractor le Electric Department a thawktuhai thangsain mi 7 man le Case registered a nih tiin Mari Riba, SP, West Siang chun a hril.

Kal­a thil inbawk 5.018kg a rik a thlak a nih
New Delhi:  May 14, 2015 khan Mr K.L.Das (66) of Darbhanga Kal chu a Cancer leiin AIIMS, New Delhi­ah operation thaw a ni a, Doctors han a Kala thil inbawk 5.018kg zeta rik an at thlak. A kal changtieng chu Kal pangngai let 35 velin a lien a, Medical literature a ding chun khawvela Kal inbawk lien taka record a la nih tiin Dr M.D. Ray, Consultant, Department of Surgical Oncology, AIIMS, New Delhi chun a hril. Hi huna hin Sir Gangaram Hospital a khawm Kala thil inbawk 2.5 kg a rik at thlak a lo ni ta bawk.

Inter  Caste marriage tax Rs. 50,000 pe dingin
Katihar: Bihar state a Katihar district sunga Gogra khuo a cheng Chhotu Yadav chun an chipui (caste) ni lo hnam dang Soni Kumai of Rohia Village chu nuhmeiin a nei leiin a pasal chengna khuoah Panchayat chun hnam dang le hnam dang an innei man (inter case marriage tax) Rs. 50,000 chawi rawhai seh tiin an rel a. Hi thupek le Panchayat rorelna hi an sukpuitling naw chun hrem ding  tiin vauna khautak an pek. Hi thil hi inter caste marrage dodalnaa an thaw niin an hril. Pawisa hi ruoithena le temple bawlnaa hmang ning a tih tiin Panchayat thusuok chun a hril.

US nupui kum 24 lungin intang dingin
Washington: Queens Supreme Court Justice Gregory Lasak chun US nupui Erika Menendez (33) chu tuolthatna le inzawmin kum 24 sung lungin intang dingin thiemnaw an changtir. Menendez hin Dec. 27, 2012 khan India mi Sunando Sen (46) chu Rela inthawk a namthlak leiin Relin a rawt hlum a, hi leia kum 24 lungin intang dinga thiemnaw inchangtira um a nih.

Bombs le Helicopter Israel le Saudi hai kuomah
Washington: US chun Israel kuomah bombs le Missiles sangtel, USD 1.9 billion manhu le Saudi Arabia kuomah Seahawk Helicopters 10, USD 1.9 billion manhu bawk a zawr ding niin US State Department chun US Congress an hriettir.
-------------------------------------------------------------------------------------------------------------
VAWISUN THUPUI
Chun, milimhai kuoma inthawina thilhai thu kha chu; Ei rengin hrietna ei nei seng ti ei inhriet a. Hrietna hin chu a mi sukuong hlak a, lunginsietna ruok chun mi a siem tha hlak.  ­1 Korinth 8:1

Editorial
Manipur pumpui huopzo ni hlak sienla
Sawrkarin a khuo le tuihai hmakhuo ngaina leiin policy, programmes, scheme, project le a dang dang an duonghai hi a thanaw a um naw a, a tha thei em em el. Hieng thil hai a thaw chang hin sawrkarin Manipur pumpui huopzoin thil thawin hma la hlak sienla chu lawmum nawk zuol a tih. Greater Imphal area annawleh Manipur phairam biel sung chau huopa sawrkarin thil a thaw rawp hlak a ni chun Manipur inpumkhatna a suksiet thei ding nia an lang leiin ei state sawrkar hi a fimkhur hle ei  renga ta dinga thiltha ni ngei a tih. Chuong a ninaw chun Manipur a hnam hram hran, tawng chi tum tum le sakhuo hran hran hai inlaichinna hi a tha tieng nekin a sietna tiengpangah kakhawk nei pal a tih ti hi inlau um takel a nih.
    
Ei state  sawrkar lukhaituhai le politicians han ‘Chingmi tammi ama ta ni’ tiin thu an hril rawp hlak. Amiruokchu, state sawrkarin thil a thaw pha leh hi thu hi a theinghil hlak niin an lang. State sawrkar chun tulai hin New Initiatives of Department of Education (schools) for quality education tiin policy  thar an duong a. Hi policy thiltum hi a tha em em a, sienkhawm tlangram biel le tlangmihai a huopzo naw amani ding aw ti theiin a um.
    
Hi Policy thar dungzui hin Imphal khawpui sunga Govt. Higher Secondary Schools 8 thlangsuoka um bik haia dingin May 27, 2015 khin Directorate of Education (S) chun Common Entrance Test (CET) buotsai a tum a. Hi taka thang thei dinghai hi a tlangpuiin Manipur phairam mihai ni dingin an lang. CET a hin Manipur tlangram districts 5 a student­hai ta ding chun va thang ve chu thil harsa tak a ni ding a nih ti chu a chieng sa a nih. Hieng a ni lei hin ei state sawrkar hin tlangram District Headquarters haia khawm CET hi buotsai ve sienla thiltha a ni ngei ring a um.
    
Chun, Imphal khawpui sunga Govt. Hr. Secondary School hai chau ni lovin District tina Govt. Higher Secondary School pakhat seng bek Model Govt. Higher Secondary School dingin thlangsuok ve ngei sienla nuom a um hle. Manipur phairama chau Socio­economic a chau le hnufuol em em an um naw a, Manipur tlangram biela khawm economically backward student tam tak an um a, hieng student­hai hi private/mission schools tha haiah an kai ve phak naw a. Hi lei hin tlangram biela khawm state sawrkarin Imphal khawpuia a thaw ang bawk hin hung thaw ve sienla chu mipui lawm hleng an tih.
    
Ei state annawleh ei ram hin huopzo sawrkar a mamaw bek bek a nih. Tlangmi le phaimihai hmunkhat le u nau ei ni si chun inangrawnga hamthatna hi ei chang seng ding niawm tak a ni a, sienkhawm a ni ta ngai naw leiin pumkhata um a harsa a, tuchen hin inpumkhat nekin nangni hnam, keini pawl tiin ei lan sie hran a, ei lan se khek a ni hi! Ei state sawrkarin lungril lien tak le hmathlir hla tak a nei a tul a nih.


Ei state sawrkar hi huopzo sawrkar, huopzo policy, scheme, programme le project nei tak tak nisienla chu Manipur a cheng hnam tum tu m, \awng hran hran hmang le sakhuo tum tum zuihai hi inkhikinkhal lovin pumkhata ei ngir le ei insuikhawm thei ngei beisei a um. Iengleia ei state sungah Alternative Arrangement ngen dam, State hran dam le Autonomous State hran ngen ei um am a nia? ti hi Manipur sawrkar le Manipur mihai po poin chik taka ei ngaituo nuom a um hle. Huopzo sawrkar, huopzo  policy le huopzo development hai ei state le a mipui han ei mamaw takzet a nih. Huopzo taka thil thaw le ngaituona lungril ei nei a \ul bawk a nih.

Post a Comment

Powered by Blogger.