Responsive Ad Slot

Hmasawnna Thar | 12 May, 2015

Tuesday, May 12, 2015

/ Published by VIRTHLI
Tuolsung:
Free Mega Eye  Camp nei
CCPur:  Zani zingkar khan District Health Society,National Program for Control of  Blindness/CCPur huoihawtnain  Free Mega  Eye Camp nei a nih. Hi huna hin mit tienga harsatna nei tam tak in an pan a. Mit harsatna nei hai Dr Chiin Guite, Eye Specialist le Chingnu, Opthalmologist han an en a, Mit nauleng var (cataract) case 10 an hmu. Mit­nauleng var hmudawk hai hi District Hospital OT­ah a thlawnin operation thaw ning a ta, Imphal­a inthawk Doctor iemanizat Operation thaw dingin hung an tih.


NEICCYA 16th Biennial Conference
CCPur: North East India Christian Council Youth Assembly (NEICCYA) 16th Biennial Conference chu May 15­17, 2015 inkar sung khin “OUT OF THE COMFORT ZONE” ti thupui hmangin Salvaton Army (TSAY­IET), Temple Square, Aizawl, Mizoram­ah um a tih. May 15, 2015, 6:30PM in Rev.  Zosangliana Colney, President, NEICC in Inaugural message hril a ta, Main speaker  chu UBS Pune Principal hlui  Rev. Dr Leaderwell Pohsngap ning a tih. Veledictory message Rev. Jessai L. Neitham, Presient, NEICCYA; Dr Biakchungnunga, BCM in “Social Media & Christian Youth” ti thupui hmangin paper present bawk a tih. Conference sung hin India hmarsak states haia inthawk Choirs le hlasakthiem dang dang han hla sak an tih.

HSA in Class XII pass hai a lawmpui
CCPur: HSA CCPur Jt. Hqrts  chun Council of Higher Secondary Education Manipur (CoHSEM) huoihawtna hnuoia Higher Secondary School Leaving Certificate (HSLC) Examination, 2015­a hlawtlingna chang HSA member hai chu an hlawtlingna a lawmpui thu a puong a, hmatieng hlawtlingna insang lem chang pei dingin ditsakna an hlan. Chun, tuta tuma hlawtlingna chang lo hai khawm lunghnuol el lova hlawtlingna chang ngei dinga hma pu dingin Tv.Lalthanzau, Vice President, HSA CCPur Jt. Hqrts. chun infuiin a thlamuon.

Bu a fakpui tawl
CCPur : Tv. Joseph R. Joute, Director, For One Life, Asia chun, Hmar Martyrs’ Trophy Organising  Board (HMARTOB) hai chu hnam ta dinga an inrimna le an inpekzona lawmum a ti leiin May 10, 2015 khan Pu Lalhrietzing  Famhoite, Chairman, HMARTOB chengna inah Ui thatin bu a fakpui tawl. Hi thua hin HMARTOB chun Chanchinbu fethlengin Tv. Joseph R. Joute kuoma lawmthu a hril.

Tribe Certificate thuah meeting
CCPur :  May 13, 2015, 11:00AM khin BRGF  Resource Centre, DC’s Office, Churachandpur­ah Tribe/Domicile/Income etc. certificates chungchangah meeting nei ning a tih.

HPC(D) in Press Release an siem
CCPur : John F. Hmar, Information & Publicity Secretary, HPC(D), General Headquarters, Sinlung in May 9, 2015 a Press Release a siema chun hieng a hnuoia thu hai hi zieklang a nih:

Hmar People’s Convention (Democratic) chun HNA cadre Mr Chalrothang (39) s/o  (L) Lalsonlien of Khawmawi/Parbung thina le inzawm hin keini kuthnung ngei a ni thu kan puong a. Mr Chalro hi HNA cadre a ni leia kutthlak kan ni nawh a, ama Mr  Chalro hi Security Forces haiin hming thatna dinga hmangruoa an hmang hlak, informer a ni lei a nih. Vawi tam tak HPC(D) Operational Area (s) sungah Assam  Rifles hai thuoi lutin, kan inkulna ni dinga a i ringhai chu Operation a neipui hlak a chu, vawisun ni chen hin a la hlawtling thei naw a nih.
    
Mr Chalro hi HPC(D) chun a enthlak zing hlak a. Inruithei (damdawi) thaw hlak a ni lei hin, sawrkar sipai kuomah an ruina ding a ni phawt chun  mani hnam ngei khawm zawr hlak mi a nih. Hieng ang mi hi a ni lei hin HPC(D) chun tawngbau ngei khawma a thil ching ditumlo tak hi tawpsan dingin dawthei takin a hril ta hlak a. Amiruokchu, a thilthaw (inruithei) hin a thunun hlak leiin, tawpsan  ta nekin zuol tieng a pan thet thet a. Tulaia Mizoram Issues le inzawm ringawt khawma inring zinga um a tul laia, pawl ta dinga  hnawksak umah an chang tak leiin kan nuomnaw tak a chunga kutthlak chu thaw makmaw a hung  ni ta a nih.
            
Hi thil tlung le inzawm hin tu pawl khawma thubuoi siem thei naw’ng an tih ti kan inhriettirin kan ngen nghal a nih.

DIO­ah Vit. A le Hepatitis ­B vaccine
CCPur: District Immunization Office (DIO), CCPur­a chun naupang kum khat le a chenve­ kum 5 inkar chen hai ta ding Vitamin A le Hepatitis B Vaccine a hungtlung ta a, nu­le­pa han ngaiven thei ning a tih tiin ei thu dawngna chun a hril.

3rd Hmar Martyrs Badminton  Tourney
CCPur: Sinlung Badminton Association (SBA) chun May 14­15, 2015 inkar sung khin Muolvaiphei Community Hall, CCPur­ah 3rd Hmar Martyrs’ Badminton Tournament, 2015 huoihawt an tih. Single Open le Double Open haia dinga Entry Fee  Rs. 200/­ (Single) le Rs. 300/­ (Double) ning a tih.  Inhnikna nei hai chun Parate Enterprise, Lighthouse Lane, Sielmat, CCPur­ah Entry form lak thei ning a tih. Entry form  hi May 13, 2015 chenin peklut thei ning a ta, thu chieng lem Contact Nos. : 9774213120, 8413 014 931 haia hriet thei ni bawk a tih.

ZEO Office­ah donation box
CCPUr: Kuki Women Organisation for Human Rights (KWOHR) GHQ chun Nepal­a Simkhawlei inhning leia  harsatna tuortu hai thangpuina dinga “CCPur for Nepal” ti hming chawiin ZEO/CCPur Office­ah Donation Box/Charity Box 1 an sie. ZEO CCpur chun, Office thawktu hai chau ni lovin ZEO hnuoia teaching staff hai chu donation box­ah thawlawm thlak tawl seng dingin a ngen.

ADC inthlangna hung um dingah mi 51 an inhnukdawk;
CCPur a inthawk mi 19 an inhnukdawk
Imphal/CCPUr:  June 1, 2015 a Manipur tlangram biela ADCs 6 haia inthlangna hung u m dinga Candidate inhnukdawk nuomhai ta dinga inhnukdawk theina hun tawpna tak chu zani 3PM kha a ni a, mi 51 an inhnukdawk leiin seats 134 inchu dingin candidates 496 an um niin ei thu dawngna chun a hril. Seats 144 uma seats 10 haia chun khingtu um lovin candidate pakhat seng chau an u m leia inthlangna hi seats 134 a nei ding a  nih.
    
CCPur District­a inthawka Nomination paper file 115 hai laia mi 19 in an nomination paper file an hnukkir a. Hi lei hin ADC/CCPur seats 24 inchu dinga candidate umzat chu 96 an nih.
    
Nomination hnukkir hai chu­ Henglep Sub­Division­a 2­Leimatak MDC biela inthawk R. David Chiru (Ind);  CCPur Sub­Division sunga 1­Khousabung MDC biel­a inthawk P. Soiliankhom Vaiphei (Ind); Thangkhopao Haokip (Ind); 12­Lanva MDC biela inthawk Jangdouthong (Ind); 15­Hiangtam Lamka a inthawk Kamsuanlun (Ind); Nengsuanmang (Ind); Thondouthang (Ind); 18­Zenhang Lamka a inthawk V. Daikhenmang (Ind); Singngat Sub­Divison­a 23­Muallum­a inthawk Letsei (Ind) le P. Thangpu (Ind); Thanlon Sub Dibision sunga 5­Thanlon biela inthawk H. Ginlallian Simte (Ind); Lenpu (Ind); M. Jamkhothang Haokip (Ind); 20­Sagang bielah Leivon Thangrengchung Kom (Ind); 22­Haopi Range­ah SN John (Ind); Lallunkam (Ind); S. Minboi Vaiphei (Ind); Thiankhanlian (Ind); K.William Vaiphei (Ind) hai an nih.

Headline:
CoHSEM hnuoia Higher Secondary Examination, 2015 result puong: A pumpuia pass percentage 61.11
CCPur: Council of Higher Secondary Education Manipur (CoHSEM) hnuoia Higher Secondary  School Leaving Certificate Examination, 2015 ( Class XII/HSSLC) result chu zanikhan puonglang a ni a, a pumpuia pass percentage 61.11 a nih. Kum 2014 nekin pass percentage an hnuoi lem. Ni kuma pass pass percentage chu 76.89 a nih. Government Higher Secondary Schools le College hai nekin Private Higher Secondary School le Colleges han an thaw \ha lem. Private Schools le Colleges hai pass percentage 68.34 a ni laiin Govenment Schools le Colleges hai  pass percentage chu 45.78 a nih.
    
Candidates 24742 an exam a, 15120 an hlawtling. Pasal le nuhmei ngirhmun an thlau bek naw a, pasal 7791 an pasi a, nuhmei passsed zat chu 7228 a nih.
    
Arts Stream­ah candidates 5958 an exam a, 5838 an passed a, Science stream­ah 18,570 an exam a, 18,401 an passed a, Commerce Stream­ah candidates 518 an exam a, 503 an passed.
    
Districtwise a pass percentage chu­ Thoubal District 80.06%; Tamenglong District 73.93%; Churachandpur District 72.70%; Imphal West District 65.44%; Ukhrul District 56.84%; Chandel  District 49.49%; Imphal East District 49.15%; Senapati District 44.82% le Bishnupur District 40.43% a nih.
    
Churachandpur District a Colleges le Higher Secondary Schools hai ngirhmun chu hiengang hi a nih.­ Bethany Christian Hr. Sec. School­ah Arts ah mi 66 an exam a, mi 35 an qualified a, pass percentage 53.03, Science­ah 26 an exam a, 4 an qualified a, pass PC 15.38; Don Bosco Hr. Sec. School Arts­ah 138 an exam a, 135 an qualified a, pass PC 97.83, Science­ah mi 153 an exam a, 121 an qualified a, pass percentage 79.08; Ebenezer Academy­ah Arts ah 47 an exam a, 33 an qualified a, Pass PC 70.21 a ni a, Science­ah 28 an exam a, 6 an qualified a, Pass PC 21.43; Lamka College­ah Arts ah mi 32 an exam a, 14 an qualified a, pass PC 43.75; Rayburn College Arts­ah 345 an exam a, 290 an qualified a, pass PC 84.06, Science­ah 227 an exam a, 168 an qualified a, pass PC 74.01 le Commerce­ah 51 an exam a, 44 an qualified a, pass PC 86.27; Rengkai Govt. Hr. Sec. School­ah Arts 111 an exam a, 76 an qualified a, pass PC 68.47 le Science­ah 52 an exam a, 8 an qualified a, pass PC 15. 38%; Sielmat Christian Hr. Sec. School Arts­ah 76 an exdam a, 76 an qualified a, pass PC 100% le Science­ah 158 an exam a, 120 an qualified a, pass PC 75.95; VK Tawna College Arts 142 an exam a, 115 an qualified a, pass PC 80.99,  Science­ah 131 an exam a, 28 an qualified a, pass PC 21.37; Vision Academy Arts­ah 56 an exam a, 56 an qualified a pass PC 100, Science­ah 36 an exam a, 24 an pass a, pass PC 66.67; Vungzagen Hr. Sec. School  Arts ah mi 7 an exam a, 2 an qualified a, pass PC 28.57 le Science­ah 1 a exam a, a failed a, pass PC 0 le Young Pillar College Arts­ah 81 an exam a, 77 an qualified a, pass PC 95.06 le Science­ah 36 an exam a, 22 an qualified a, pass PC 61.11 a nih.
            
Churachandpur District sunga Colleges le School hai  Pass percentage chu Bethany 42.39%; Don Bosco  87.97%; Ebenezer 52%; Lamka College 43.75%; Rayburn College 80.58%;  Rengkai Govt.  51.53%; SCHSS 83.76%; VK Tawna 52.38%; Vision Academy 86.96%; Vungzagen 25%; Young Pillar 84.62% a nih. Exam po po 2000, a qualified po 1454 le a pumpuia pass percentage chu 72.70 a nih.

Nuhmei 2 Heroin fun 41 leh man
Imphal: Anti­Drug Coordinating Committee, Imphal East  chun zani 7AM khan nuhmei 2 Heroin funte 41 leh Khumithok hmuna an man a, an venga inthawk hnawtdawk dingin hi Committee chun an rel.

Mithiruong 2 hmu a nih
Imphal: Zanikhan hmun pahniah mithiruong 2 hmu a nih. Leisang Hideen ah zani zing dar 8 khan pasal pakhat thisa le thu ta em em el hmu a ni a, JNIMS Morgue­ah sie a nih. Chun, zani 11AM vel khan Telingpati a Imphal Vadungah Md. Sanakham  (20) s/o (L) Satar of Borayangbi chu a thisaa hmu a ni bawk.

SP mum an inentir lei niin
Imphal: VDF ni lai W. Dinesh kha Tata Truck  chawl dinga an ti, a chawl naw leia a hnawtnaa thina tuok a ninaw a; Activa a chuong pasal 2 han hmusit taka SP mum an inhmutir hnunga an tlan leia man tuma a hnawtnaah electric post a baw fuk pal leia thi a ni lem a nih tiin General Secretary, All Manipur VDF Welfare Association chun zanikhan thusuok an siem.

May 12 ah NPF in poll campaign
Imphal: Manipur­a ADC election hung um ding le inzawmin NPF chun zinga khin Manipur NPF  Unit Office, Senapati­ah Official Election Campaign nei tan an tih. Hi huna hin Nagaland CM T.R. Zeliang, NPF President Dr Shurhozelie Leizeitsu, NPF Ministers le MLAs hai an hung thang ding niin NPF Campaign Committee in­Charge, Neiba Kronu chun a hril.

PG Course (MD) inchuk thei a nih
Imphal: Directorate of Health Services, Manipur chun  Biochemistry, Pathology, Microbiology le Pharmacoloty haia Post Graduate (PG) Course (MD) inchuk ding mi a dit a, hnina 22­05­2015 chena lak thei le fill up zovin hi ni ma 5PM chenin peklut thei ning a tih.  Counselling 25/5/2015, 10:30AM­4PM  chen Medical  Board Room, Directorate of Health Services, Lamphelpat, Imphal­ah  nei ning a tih.

Computer typing test nei hun ding
Imphal: High Court of Manipur hnuoia LDA/LDC  sin lakna dinga Written Test result insuo a ni ta a, a tling hai ta dingin May 23, 2015 le May 24, 2015 haiah Computer Typing test nei ning a tih tiin Registrar, High Court of Manipur chun inhriettirna a siem.

Bibles For The World mawphurna Rev. John L Pudaite kutah inhlan
New Delhi: Bibles For The World (BFW) mawphurna chu Dr. Rochunga Pudaite le a ruolnu Dr. Lalrimawi Pudaite haiin an naupa naupang lem Rev. John Lalnunsang Pudaite kutah tuta thlabul khan Marriott Hotel, Colorado Springs, Colorado,USA hmunah inhlanna (installation service) puithu takin an nei. Hi hun a hin BFW Board Member le Staff hai kimtakin an thang bak a, organisation lientak tak le mi pawimaw hieng Dr. Wayne Pederson, President, Reach Beyond, Dr. Gordon Loux, Global Ambassador and Founding President, Prison Fellowship International, Dr. Gary A. Cook, President, Dallas Baptist University, Senator Larry Salmon hai bakah Pu Tlangval (Watkin Roberts) a naupa Dr. Paul Roberts hai nupa khawm Canada a inthawkin an hung thang.
    
India a inthawk khawma Philosopher le ziektu inlar tak el Dr. Vishal Mangalwadi, Dr. Jacob Pudiate, Principal Trinity College & Seminary hai nupa le­ Pu C. Thant Khobung, Director Development, PMS hai khawm an zu thang bawk a nih. Hienghai bak a hin Pu Rochung nau hai, mo hai le an tu hai kimtakin an thang bawk.
    
Pu John le a u Paul Rozarlien haiin an nu le pa Hmar Thangsuo Puon insiltirna an neia, a zana Pu Rochung hai nupa kum 60 deuthaw an rawngbawlna lawmna ruoi­thena (Legacy Celebration/ Legacy Banquet) nei a ni nghal bawk. Hi programme a hin mi fiel bik a um hai 200 lai fekhawm a nih. Hi zan hin Pu Rochung sapram a a fe tir 1957 a Dr. Bob (Robert) Pearce, Founder, World Vision le an inbiekna video screen lientak a inentirna nei a nih. Chun, fiel a um hung theilo thenkhat hieng Pat Boone, Singer le Hollywood actor, Marilee Pearce Dunker, Dr. Bob Pierce a naunu hai chibai bukna khawm inentir a ni bawk. Hi huna ahin khawvel hmun hrang hrang a Bibles for the World rawngbawlna thlalak hai khawm in entir a ni bawk.
 ­(Virthli @ input from Pu CThan Khawbung)

NSCN(IM) pakhat thangin mi 3 ralthuom leh man
Imphal:  NSCN(IM) cadre pakhat thangsain pasal 3 11­Assam Rifles han May 9, 2015 khan Moreh ah ralthuom leh an man. Mana um hai laia pahnihai chu unau an ni a, chuonghai chu Thenkholal (49) le Letkhothang (36) hai an ni a, an ina inthawk Revolver 1 le hand grenade 1 hmu a nih tiin Police chun an hril. Chun, mana um NSCN(IM) cadre chu Champoulung Gangmei (27) of Bongaijang, Tamenglong District a ni a, a kuta inthawk 9mm Pistol 1 le a mu 2 man a nih.

Lungphu chawla thi an tam lem
Mumbai: Maoist/Naxalites  helpawlhai chetna biela duty CRPF hai chu Maoist/Naxalites helpawlhai that nekin lungphu chawla thi an tam lem niin Maharashtra Minister of state for Home, Haribhai Chaudhary chun Congress thuoitu, Motilal Vohra indawnna siem a dawnnaah a hril. Kum 5 liemta (January, 2009­December, 2014) sung khan lungphu chawlin CRPF 642 an thi a, Malaria leiin  CRPF 108 an thi a, beidawnga mani le mani inthat CRPF 228 an um a, Maoist/Naxalites beina leia thi chu 323 an nih tiin Haribhai Chaudhary chun a hril.

J.Jayalalitha a  CM nawk el thei
Bengaluru/Chennai:  AIADMK thuoitu lu tak J. Jayalalitha chu zanikhan Karnataka High Court in thiem an changtir ta leiin Tamil Nadu CM a hung ni nawk el theia hril a nih. Ama le inruola kum 4 lungin intang dinga thiemnaw inchangtir hai khawm thiem inchangtir an ni nawk tah.

NLFT cadres 3 an inpe
Agartala:  May 9, 2015 khan NLFT Deputy Chief of Army Staff, Atharababu Halam, Major Uttam Kumar Jamatiya le Corporal, Mohan Debbarma hai chu Pistol 2, China siem Grenade 1 le silaimu thahnemtawk tak leh K. Nagraj, Director General of Police (DGP), Tripura kutah an inpe tiin Uttam Kumar Bhowmick, SP(Police Control), Agartala chun a hril.

Bus eksidenah mi 15 an thi
Udhampur: Jammu & Kashmir a Udhampur district a Morati belt an ti hmuna zanikhan Bus pakhat a eksiden a, lamthlang tieng rawlah an letthla a, a sunga chuong mi 15 an thi a, mi 20 an hliem a, hliem hai laia 6 an hliem inrik hle a, GMC Hospital panpui an nih.

DTC Driver vuok hlum a nih
New Delhi:  May 10, 2015 zing dar 9:30 vel khan DTC Bus in Mundka, West Delhi ah Bike a sut pal a, DTC Bus Driver Ashok Kumar (42) of Jhajjar, Haryana chu Bike a chuong han an vuok hrawn a,  Bus a chuong le a hmutu hai chun an en rintawt a, a theltu an um naw leiin Ashok Kumar hi an vuok hlum der. Delhi sawrkar chun mithi sunghai zangnadawmna Rs. 5,00,000 pek  dingin a puong.

Punjab­ah ‘Plastic naute’ a pieng
Amritsar:  Punjab­ah “Plastic baby” a  pieng a, hi naute hi May 8, 2015 khan Guru Nanak Dev Medical College & Hospital a Doctors han an enfel. Hi naute hi rubber doll  a ang a, a hmai le a hmel chu Nga hmel a put a, a mit  le a hner hai a sen inlar hle a, a nu nene a nek thei nawh tiin a enkawltu Doctor han an hril. Hiengang nautehai hi scientifically chun “Collodian babies” tia inbuk le ko an nih. Naute nu hi Amritsar a inthawka km. 240 a hla, Rajasansi, Amritsar district a cheng a nih. Hi naute vun hi rul phuhlip angin a um a, naute pieng nuoi 6 peiah hiengang naute hi pakhat an pieng ang chau a nih tiin  Doctors han an hril.

Nuhmei minister in loneitu pasalin a nei
Waynad:  Kerala state a Congress thuoina hnuoia United Democratic Front (UDF) sawrkara nuhmei minister umsun P.K. Jayalakshmi chun May 10, 2015 khan Hindu tribal danin loneitu pasalin a nei. A pasal hming chu  C.A. Anilkumar a nih. Inneina hunser le molawmnaah Kerala CM Oommen Chandy, selkaltu pawl thuoitu, V.S. Achuthanandan,  Speaker N. Sakthan le ministers hai an thang. Ms P.K. Jayalakshmi hi Kerala Minister of Welfare of Scheduled Tribes and Youth Affairs chel lai a nih. Thangkhat liemta khawm khan Communist thuoitu le Kerala a nuhmei minister KR  Gowri chun mi naran el T.V. Thomas chu pasalin a lo nita bawk a nih.

CBSE hnuoia Class X&XII result
New Delhi: Central Board of Secondary Education (CBSE) hnuoia Class X&XII Examination, 2015 result chu haptakar thar le thla tawp tieng puonglang ni dingin  CBSE thusuok chun a hril.  Class X result chu May 19, 2015 le  Class XII result chu May 27 or 28, 2015 haiah puonglang ni dingin CBSE thusuok chun a hril. Class XII result hi phase 2 or 3 a insuo dinga ti a nih. Class X ah mi 13,73,853 an exam a, class XII ah mi 10,40,368 an exam a nih.

UPSC member dingin Pradeep
New Delhi:  UPSC member dingin Educationist Pradeep Kumar Joshi ruot a nih. Tuhin chu UPSC members 10 an tling ta a, members um ding zat an kim ta a nih.
----------------------------------------------------------------------------------------------------------------
VAWISUN THUPUI
Inhning lovin ei beisei thuring hi pawm tlat ei tiu; thutiemtu chu ring a um sih a. Chun, hmangai le thilthawa inchawktho tuo dingin inngaituo seng ei tiu. ­ Hebrai 10:23­24

Editorial
Sinthaw hlaw indik tak
Mihriem ei hung pieng suoka, hring le dama ei um pei chun, dam le hringa ei um a, ei khawsa pei theina ding chun fak ding, dawn ding, sil le bil, puonthuo, bur le bel, in le lo, sum le pai, dit le mamaw chi tum tum, a hrila hril seng ruol lo ding ei nei a ngai a. Chuong thil hai po po ei nei theina ding chun sin ei thaw a tul tlat a nih. Sin hi Pathienin ei damsunga  thaw dinga a mi lo ruot peksa a nih. Ei dam le ei hring theina ding chun inrim taka sin ei thaw hmasa phawt a tul a nih. Nu le pa hai lo thawsuok sa ro tam tak khawm  nei inla, ei thaw zui pei naw chun, ei hmangzo huna bek lo thei lova sin thawa ei hmusuok ve a tul tho tho ding a nih ti chu a chieng sa a nih.
    
Sinthaw hi Pathiena inthawka ei thaw dinga ruot, a zilna le ei ta dinga phurrik le rinum nisienlakhawm, sinthawtu, tam tak thawsuok a, iengkim nei thei  hai hin chu inzaumna le ropuina an hlaw rawp a nih. Thil tha thaw ding hi hril hril inlakhawm, a thawa thaw a um naw chun a tak an chang thei der nawh. Sinthaw thang lo chun iengkhawm hi a hlensuok thei der si naw a.
    
Tuta hmaa ei pi le puhai, ei nu le pa hai hun lai khan chu Zohnathlak hai lai chun sinthaw hi nitin khawsak le nunphung tak a ni leiin tukhawma rinum an ti naw a; hrisel  nawna le bawrsawmna leia sinthaw tha thei lo ni dam kha inzakum an ti em em hlak a nih. Sinthaw tul a um khawma tlangval ina um ching chu nuizat ruk le endawng an ni hlak a, tu khawmin makpa ding khawma an dit ngai nawh.
    
Tulai ruok hin chu mi han lekha an hung thiem a, tienlai angin inrim taka kut sin thaw kher lo khawmin fak an hung hmu thei ta a. Chu khawm chu a tlangpuiin Offie a sin thaw, sumdawng le dawrkai sin hai an nih. Hieng sin hai khawm hi miin taima taka a thaw naw a, dawngda taka a umsan rawp chun a hlawsam el hlak. Sin hi dawngda taka thaw chi a ni nawh. Upa han inrim taka sinthawtu han fak an hmu a, dawngda taka thawtu han mihai hmusit le endawng an hlaw hlak an lo ti hi tuchen hin a lan khel nawzing a nih. Thaw raktu han rak an fak a, thaw dawltu han dawl an fak hlak an lo ti a nih.
    
Nitin el hin mani zawn sengah hin thaw ding le thaw thei ei nei seng. Sungkuo ta dinga fakzawngtu la ni tham lo hai khawmin nakie tienga an fakzawngna dingah an inpuochain nitin inchuknain haiah an inbur ve tlat a ngai tho a nih. Chuongang peiin nu le pa han sungkuo ta dinga taima taka an thaw laiin an sunzawm ve thei dingin naupang han lekha inchuk le an thaw ve thei sin chi hran hran lo thaw vein, a hung inbelkhawm chu hlawtlingna le hlimtlangna a hung ni hlak. Chu zet chu sinthaw hlaw indik tak le ropui em em el a nih.
            
Hieng sinthaw hlaw indik tak hmu le changna ding hin sungkuo inthuruol a tul a, sungkuo a inthuruol thei hai hi mi inhnarum an ni el chau ni lovin mihai inza le ngaihlut an hlaw hlak. Sungkuo inthuruol  ni thei seng dinga naupangtea inthawk puitling chen han mani thaw thei tawk thaw hi rin der lo ding a nih.


Don't Miss
© all rights reserved
made with by Simon L Infimate