Tuolsung:
Kangvai Model Village thuah  meeting nei
CCPUR:  April 30, 2015, 11:00AM khan DC Office­a Resource Centre­ah DC CCPur inrawinain Kangvai Model Village thua Sansad Adarshg Gramin Yojana (SAGY) hnuoia District Level Committee meeting nei a nih. Hi huna hin Village Development Plan siemna dingin Kangvai khuoa  Govt. Office um haia Department tum tum han May 2, 2015 chena DC kuoma an peklut ding, hi ni hin Kangvai khuoa meeting nei nawk ning a tih. Kangvai Model Village ding thua department tinin document pawimaw le tul an peklut hai hi May 15, 2015 chenin Ministry of  Rural Development and Public Relation kuom a tlung ngei a tul a nih. Meeting huna hin Secretariat a inthawk Nodal officer iemanizat han power point presentation an nei.

AR han UNLF cadre 1 an man
CCPUR: April 29, 2015, zantieng 2:45PM vel khan 7­Assam Rifles han Thengra Leirak hmuna  UNLF Cadre pakhat Khumanthem Ibom @ Ramananda @ Khourangba (30) s/o Kh Tomba Singh of Thengra Leirak an man niin Police thusuok chun a hril. Assam Rifle han Imphal Police kuta an peklut hnungin CCPur Police chun case hi lasawngin FIR No. 42 (4)2015 CCP­PS U/S 20 UA (P) A. Act  an registered.

DC in Speed Breaker  hai ladawk dingin an hriettir
CCPUR: Mr Lunminthang Haokip, IAS, DC/CCPur chun May 8, 2015 chenah Vajing (PWD/NHD­III), Sielmat (PWD/NHD­III), Salt Brook School, Tuibuong ((PWD/NHD­III), Mission Road ((PWD/CCPur), Centre Road (PWD/CCpur), Zomi Colony (PWD/CCPur), Red Cross Road (PWD/CCPur), D. Phailian (80 RCC BRTF, Bungmual), Mary Kom Road, CFC Tuibuong & 27 Sector AR gate (PWD/CCPur) le Khawmawi/Bethel (PWD/NHD­III) lampuia Speed breaker hai  ladawk dingin concerned department hai an hriettir.
 
Mipui tienga inthawk speed breaker  thua complaint tam tak um leia DC/CCPur in Speed Breaker hai hi la dawk dinga EE/PWD, CCPur EE/NHD­II, Imphal le OC 80RCC, BRTF, Bungmual hai an hriettir a nih.

Court­in a rel angin Jail­a thun
CCPUR:  April 20, 2015 zana Nitrosun mum 380, Vitral mum 19, SP le RP mum1230 le 7­Assam Rifles le Police han an man Lakib Ali (24) s/o  Md. Tayab Ali of Mandop Leikai chu Police han Court hmaah an inlangtir nawk a. Court in Jail intang dinga a chungthu a rel angin Jail­a thun a nitah.

EM in Culvert siemthat a hawng
CCPUR:  Bieltu MDC H. Mangchinkhup, EM chun zanikhan Bethlehem Baptist Church, New Lamka bula Culvert sie a pawisa  senga a siemthat chu zani zingkar khan a hawng. H. Mangchinkhup chun, tulai tak ADC/CCPur­ah fund a um naw a, sienkhawm khawsung mipui hai harsatna hriea Culvert hi ama sum senga a siem a ni thu a hril.

Chanchinbu Office-hai khar ding
CCPUR: Vawisun hi May Day (Labours  Day) a ni leiin kum dang ang bawkin MHJU hnuoia tuolsung nitin Chanchinbu office­hai khar ning a tih. Hi lei hin Hmasawnna Thar thangsain MHJU hnuoia tuolsung nitin Chanchinbu hai chu May 2, 2015 in hung suok naw ni hai. Sawrkar Offices le Institutions hai khawm General Holiday leiin khar ning an tih. Chun, Imphal khawpuia inthawka suok nitin Chanchinbu Office­hai khawm vawisun hin khar ning an tih.

Headline:
ADC 6 haia ding Election Notification  zanikhan insuo a nih
IMPHAL:  Zanikhan State Election Commission, Manipur chun Manipur­a Autonomous District Council (ADCs) paruk haia ding Election Notification an suo. Election Code of Conduct khawm  zanita inthawk khan hmang tan nghal a nih. Hi Notification dungzui hin in candidate nuom han May 6, 2015 chenin Nomination paper file thei an ta, Scrutiny May 7, 2015 ah nei ning a ta, candidate inhnukdawk nuom han May 11, 2015 chenin inhnukdawk thei an tih. Inthlangna June 1, 2015 zing dar 7 a inthawk zantieng dar 4:30 chenin nei an ta, repoll nei a tul leh June 6, 2015 ah nei ning a ta, votes tla hai June 10, 2015 a tiem le result puong nghal ning a ta, inthlangna thil le inzawma a tul hai po po June 17, 2015 chenah zo fel ning a tih.
 
Inthlangna nei ding ADCs 6 hai chu­ ADC, CCPur; ADC, Sadar Hills; ADC Senapati; ADC Chandel; ADC Tamenglong le ADC Ukhrul hai an nih. ADC pakhatah MDC seats 24 pei a um a, a renga seats umzat chu 144 a nih. ADCs 6 haiah votersx 6,88,410 an um a; ADC CCPur hnuoiah voters 1,81,494;  Sadar Hills ADC ah voters 96,688; ADC  Senapati ah voters 1,35,395; ADC Ukhrul ah voters 1,01,492; ADC Chandel ah voters 87,619 le ADC TAmenglong ah voters 85,722 an um.
 
Polling Stations 1,163 hawng ning a ta. ADC CCPur hnuoiah Polling Stations 290; ADC Senapati ah 168, Sadar Hills­ah 172; Tamenglong­ah 165; Chandel ah 144 le Ukhrul ah 206 polling stations hawng ning a tih.
         
ADC Election hi zalen, thienghlim le ralmuong taka nei a ni theina dinga mipui le pawl tum tum hai chu thangpuina pe seng le thlawp dingin Pi Th. Chitra  Devi,  Secretary, State Election Commission chun ngenna a siem. Hi inthlangna ding le inzawm hin all Political party meeting chu may 2, 2015, 2PM in State Election Commission Office­ah nei ning a tih tiin Pi Th. Chitra Devi chun a hril.  District tina DC­hai le ADC, Kangpokpi hai chu  Election officer dinga ruot an nih. (UNA)

Bus eksiden­ah mi 8 an hliem
SENAPATI: Zani zingkar 10AM vel khan Imphal pana hung tlan passenger bus MN04­A­4547 chu  Sadar Hills district sunga Keithelmanbi le Bongmol khuo inkarah changsuolin a eksiden a, Bus a chuong mi 8 an hliem. Eksiden tuok Bus hi All Tribal Chief Forum, Manipur in bandh an thaw leiin passenger Bus thenkhat Kangpokpi Police hai vengna hnuoia Imphal hung  pan laia mi a nih. Hliem hai laia 4 chu nuhmei an ni a, inrang takin CHC Kangpokpi panpui an ni a, a hnungin RIMS Hospital, Imphal panpui dingin Docor han an referred.

Utlou Weavers’ Coop.  Society in  Award
IMPHAL:  Zanikhan D.S. Kothari Hall, DRDO Bhavan, New Delhi ah Union Minister of State for  Agriculture, Mohanbhai Kalyanjibhai Kundariya chun National Cooperative Development Corporation Award for Cooperative Excellence, 2014 semna a nei a. Utlou Weavers Cooperative  Society Limited, Bishnupur District, Manipur chun Bennial Award for Cooperative Excellence, 2014 a dawng. Hi Award hi Henglem Debala Devi, Secretary le Hanglem Ionebala Devi, Executive Member, Utlou Weavers Cooperative Society Limited, Bishnupur hai kutah inhlan a nih.

PHC 2 ah 24x7 Service tan
IMPHAL:  Zanita inthawk khan Charangpat PHC le Khoirom PHC, Wangkhem A/C, Thoubal district sungah District Health Society, Thoubal hmalaknain 24x7 service thaw tan a nih. Hi service hi K. Meghachandra  Singh, Parliamentary Secretary (MI & IPR) in a hawng. Hi service hlawtlingna ding chun a biel mipui le hieng PHC pahni haia thawktuhai an thangruol a tul a nih tiin K. Meghachandra Singh in thuhrilna a nei huna a hril.

AMWJU Election nei a ni ding
IMPHAL:  Vawisun hin Manipur Press Club, Imphal­ah All Manipur Working Journalist’s Union (AMWJU) Election 1PM­4PM inkar sungin nei ning a ta, President le Executive Members 6 thlang ning a tih. Hi election neina dinga thil tul hai sukfel vawng a ni ta tiin Returning Officer, Salam Bharatbhusan chun a hril.

Others:
Nepal thangpuina dingin MP in Rs. 5 crore
BHOPAL: Nepal­a simkhawlei inhning rapthlak tak a tlung leia harsatna tuor hai thangpuina dingin Madhya Pradesh State sawrkar chun Prime Minister’s National Relief  Fund ah  Rs. 5 crore  pek ding, Puonin 1,500 le ready to eat food tons 180 pek dingin a puong. Puonin le Ready to eat food hai hi thawndawk thei nghal dinga siem relsa vawng a nih tiin state sawrkar thusuok chun a hril.

Ni 5 liem hnungah dama sansuok
KATHMANDU: Nepal rama simkhawlei an hninga inthawk ni 5 zet liem hnungin Mr Pemba Tamang (18) chu American Disaster Response Team  han  Kathmandu khawpuia building sawng 7 chim hnuoia inthawk an sansuok. Thi huomin sansuokna sin hi kan thaw a nih tiin American Disaster Response Team a Police officer, Basnet le US Agency for International Development­a an thuoitu tak Andrew Owera hai chun an hril.

Hmun 10 ah nuclear project
NEW DELHI:  Sawrkar thlungpui chun India ram state hran hran a hmun 10 ah Nuclear projects thar 10 indin a tum tiin Union Minister of State, PMO, Jitendra Singh chun zanikhan Lok Sabha­ah a hril. Nuclear power project thar 10 indinna ding hai lai Gorakhpur, Haryana, Chutka le  Bhimpur, Madhya Pradesh, Kaiga, Karnataka le Mahi Banswara,  Rajasthan hai a thangsa.

Joint secretaries thar 19 ruot
NEW DELHI: Sawrkar thlungpui chun April 29, 2015 zan khan ministries hran hrana Joint Secretaries thar 19 zet  a ruot thar. Thla 11 liemta khan Joint Secretary level 171  a lak thar (appointed). UPA sawrkara khan thla 11 sungin Joint Secretaries 84 lak an nih tiin senior Government official thusuok chun a hril.

Thing manto Rs. 75 lakh manhu man
CHENNAI:  Zani hmasa khan Jafferkhanpet­a Carrom Board siemna dawr pakhatah thing manto (Red Sanders) tonnes 3 zeta rik, Rs. 75 lakh manhu le a neitu Vishal Kumar hai chu Central Crime Branch (CB) Police han an man. Hieng thing hai hi Gunny bag 14 sunga thun le Carom Board siemna dawr sunga thupruk a nih tiin Police chun an hril. Hieng thinghai hi Carom Board anga siema sumdawngnaa hmang a tum niin a neitu chun a hril. Hi thing hi kg. 1 ah Rs. 2,500 peia an chawk niin  Vishal Kumar chun a hril.

NBSE hnuoia HSLC & HSSLC result
KOHIMA:  Nagaland Board of Secondary Education (NBSE) hnuoia HSLC & HSSLC Examination, 2015 result chu zanikhan puonglang a ni tah. HSLC a chun a pumpuia pass percentage 63.05 a ni a, HSSLC a chun a pumpuia pass percentage Arts ah 69.91; Commerce ah 66.86 le  Science­ah 90.16 a nih.

Motor inbawah mi 11 thi, mi 29 hliem
BALOD: Zani 2AM vel khan Chhattisgarh a Balod district a Armurkasa  khuo bulah molawma fe hai chuongna Van le Tractor Trolley an inbaw a, mi 11 an thi a, mi 29 an hliem a, hliem hai laia 5 an inrik hle niin SP, Balod district chun a hril. Van driver zu an rui leia motor eksiden hi tlung niin  Police chun an hril.

Rahul  Gandhi in Padyatra a tan
NEW DELHI:  Zani hmasaa inthawk khan AICC Vice President Rahul Gandhi in Maharashtra state a  Vidarbha  Region­ah “Padyatra” a thaw tan. April 28, 2015 zan khan Nagpur a tlung a, zani zingkar inhma tak khan Nagpur suoksanin Gunj a pan. Kelawnga biel a fangnaa hin lampui sir haiah a ngainatu han Rahul Gandhi hi an lo tuok tawl a, ama khawma an biekpui pei. Gunj  khuo hi Amravati town a inthawk km. 5 vela hla a ni a, Gunj le khawte dang 5 Rahul hin a sir ta a, loneitu lei bat hau leia beidawnga mani le mani inthat sungkuohai inhmupui tawl a tih.  Rahul Gandhi hi Madhya Pradesh  Congress Committee President  Ashok Chavan in a zui.

Congress in inban dingin an ngen
NEW DELHI:  Zanikhan Delhi ah Congress pawl chu Delhi khawpuiah an pungkhawm a, Delhi Law Minister Jitender Tomar degree certificate chu a tehlem a ni leiin Law Minister a ninaa inthawk inban raw seh tiin ngenna siemin an khek. Kawtthlera pungkhawm Congress mi le sa hai hnawtdarna dingin Water cannons  kap a nih. Zani hmasa khawm khan  BJP mi le sa han hiengang bawk hin Delhi CM Arvind Kejriwal office tuolah dodalna le Delhi Law minister ban dinga phutna an nei.

RS­-ah NCP in Land Ordinance kalzawngin
MUMBAI: Land Ordinance siem that a ninaw chun Rajya Sabha­ah Nationalist Congress Party (NCP) chun a kalzawngin vote peng a tih tiin NCP President Sharad Pawar in Mumbai­a chanchinbumihai an hmupui huna a hril. Lok Sabha chun hi Ordinance hi a pasi ta a nih. Centre le state sawrkar han loneituhai an thangpui zo tawk naw leia mani le mani inthatna hai chen a tlung a nih tiin Pawar chun sawrkar thlungpui an tum.

Nitish  Kumar in a thlakhat hlaw  a thawlawm
PATNA: Bihar Chief Minister Nitish Kumar chun tulai hnaia Bihar­a simkhawlei inhning leia  harsatna tuortu hai sawmdawlna dingin a thlakhat hlaw zanikhan a thawlawm. Mr Nitish Kumar chun Rs. 1 lakh cheque chu Secretary in­charge, Chief Minister Relief Fund, Chanchal Kumar kutah an hlan. Nitish Kumar chun a ministers le midang dang hai khawm  simkhawlei inhning leia harsatna tuortuhai sawmdawlna dinga sum thawlawm dingin a ngen tawl. Tulai hnaia Bihar­a simkhawlei inhning­a khan Bihar­ah mi 58 zetin thina an tuok a nih. Nitish Kumar chun zani ma khan Nepal­a simkhawlei inhning leia harsatna tuortuhai ta dingin relief material a thawn bawk.

Lungin intang hun  kum 7 a ni ta ding
NEW DELHI: Prevention of Corruption (Amendment) Bill, 2013 dungzui chun Corruption leia thiemnaw inchangtira um hai lungin intang hun ding chu kum 7 a ni ta ding a nih. A hma chun an intang hun hi kum 5 a ni a, siem that a nia inthawk chun  lungin intang hun hi kum 2 a suksei a ni leiin, Corruption leia lungin intang  hun ding hi kum 7 a hung ni ta ding a nih.  Chun, a tlawm takah thla 6 lungin intang ding ti khawm kum 3 intang ding tia suksei a nih. Prevention of  Corruption (Amendment) Bill, 2013 hi Lok Sabha in a passed ta bakah  April 29, 2015 a Union Cabinet meeting khawmin a pawmpui ta a; Rajya  Sabha ah hi bill hi pendinga la um a nih.

Kaziranga­ah dan lova sapeltu 4 kap hlum an nih
GUWAHATI: Assam rama  Kaziranga National Park a chun forest guard le Special Task Force han  dan lova sapeltu mi 4 an kap hlum.  Kaziranga National park a hin dan lova sapeltu mi 7 an um ti report an dawng leiin forest guard le STF hai hin Park sunga Agratoli range­ah dappui an thaw a, chu huna inkaptuonaa mi 4 hai hi an kap hlum an nih. Kap hluma um hai chu Karpung Pegu, Jit Doley, Brown Mili le Yusuf Ali  hai an ni a, inkaptuona hmuna hin .303 rifle,  silencer 2, silaimu 10, silaimu bawm ruok 8 le fak thei thenkhat dapdawkin an man. Inkaptuona hi zani hmasa zantienga tlung a ni a, mithi hai ruong hi zani zingkara hmu an nih. Tukum sung hin KNP sungah  Samak 9 kap hlum an ni ta bakah dan lova sapeltu(samak kap tu) mi 20 kap hlum an ni ta a, mi 22 man an ni ta bawk.

Maharashtra a bawngsa khapna la hmang zui pei ding
MUMBAI:  March 4, 2015 a inthawka Maharashtra a bawngsa  zawr le bawng that khapna hmang tana um chu la hmangzui pei a ni ding a nih. Hi khapna hlip dinga hnina chu zani hmasa khan Bombay High Court in cheltang a remti naw leia  hmangzui pei a ni ding a nih. Hi khapna dungzuia Court in thiemnaw an changtir bawngsa fa, zawr le that hai chu kum 5 chen lungin intangtir thei le Rs. 10,000 inchawitir thei ding ti a nih.

Pak. Court in kum 25 intang dingin
ISLAMABAD:  Kum 2012­ a Pakistan child rights activist Malala Yousafzai that tuma a lua na taka kap hliemnaa inrawlna nei  Pakistan Taliban  mi 4 hai chu zanikhan Pakistan anti­terrorism court chun kum 25 lungin intang dingin thiemnaw an changtir. Tehreek­i­Taliban Pakistan (TTP) chun  Malala kha anni pawl  kap niin an puong a nih. Malala kap hliemnaa inrawl mi 10 hai chu Sept. 2014 khan  man an nih.

Russia vanboruok­lawng thunun thei ta lo
WASHINGTON: International Space Station (ISS) hai fak ding, dawn ding, thautui le hmangruo kg. 2721.5 (6,000 pounds) chu thunun thei lovin (out of control) in van boruokah a um mek a, ieng huna mani chu hnuoiah a hung tla thla ding niin Media repors le NASA chun an hril. Vanboruok lawng hi hnuoiah a hung tla thla naw khawma a puokdar ding niin scientist­hai chun an hril.
------------------------------------------------------------------------------------------
VAWISUN THUPUI
Israel thlahai suolna, i chunga kan suolna thupa ka chawi sung hin i na lo sit la; i mit lo meng la, i siehlaw tawngtaina, i kuoma a sun a zana i siehlaw Israel thlahai ka ngenpekna hi lo ngaithlapek la; kei le ka pa sunghai chu kan lo suol ta sih a. ~ Nehemia 1:6

Editorial:
Ei bawse tlang an naw  mani?

Khawvela ei um sung hin fak le dawn, sil le bil, puonthuo, chengna ding in, tangka sum, inlirthei, hmun le hmang, ro thil, dit le mamaw hril senglo  mitinin ei nei seng a. Ei dit le mamawhai hi ei damsung chun ei neizo naw ding a nih.  Amiruokchu, mihai nei ang le mihai khawsak anga khawsak ei nuom leiin ei thaw nuom der lo le ei hril nuom lo hai khawm ei hriet naw karin ei lo thawin ei lo hril hlak. Tha famkim, indik famkim, ringum famkim le zawm famkim hi a harsa hle a, ei thaw thei naw tlang a ni hi! Mamaw, dit, inhnar le duamna hai leiin dan le dun khawm ei bawse hlak.
 
Mahajon pakhat chun drugs zawrhai a nghawk thu le a hmu peinaw thu a hril zek  el a. Drugs zawrhai chu hnam, khawtlang le kohran hai chenin ensan hai sienla a nuom thu, dem le inthiemnaw an umzie hai a hril pei a. A thu hril ding a hril zo chun; an leh nang khawm sawrkar  thil khapin i sumdawng a, i hung hausa a, Mahajon chen i hung ni ta a. An leh i thil thaw kha thil indik le tha a ni bik naw a. Drugs zawrhai dem thei le hmusit thei bik i ni am ? ka ti chun a to vung vung a. A ni ngei luo ie, mihriemhai ku hi a bawse tlang seng ei nih’ a hung ti ta a. Hi tawngbau hin ngaituona sei tak a mi pek a, hi thu  “Ei bawse tlang an naw mani ? ti hi ka hung ziek pha ta a nih.
 
Drugs zawr, kutdaw le nawchizawr hai hi an nuom leia zawr le thaw chu an ni ring a um der nawh. Rethei taluotna lei dam, vangduoina lei dam le thaw suol nei lei dama hiengang sina fakzawng an ni el thei ti dam lungrilah a hung inlang ur ur a. Hiengang  mihai  ei inthiemnaw ang bawkin an ni khawm an inthiem naw thei. Fel le tha anga inlang Kohran thuoituhai, Kohran member­hai, mithiem le mivar, milien, milal le mi ropui hai khawm hin suksuol le bawsiet an nei ve tho ti inla ei hril suol bek bek ring a um nawh. Hieng a ni lei hin a tha famkim ei um naw a, ei bawse tlang an naw mani?
 
Ei rama hin indikna hi vadungpui angin luong huou huou sienla ei nuom a, inlangtlang sawrkar  dam ei dit a, a taka ruok chun ei hlat hle niin an lang. Tulaia inlangtlang ei ti hi “ dan ang mei meia thaw, hmu le hriet thei vawng” ni lovin, “dan lo anga thil thaw hriet le hmu thei vawng inlangtlang” a ni deu tak ta awm ie. Inlangtlang  heu huoua thil thaw nekin mihai hriet lo le hmu lo dinga an thup thei ang tak, a ruk a rala thil thaw nuomhai ei ni ta an naw mani ti theiin ei khawsa a ni deu tawl ta niin an lang.
 
Sawrkar sinthaw, ministers, MLA, Officer lien le a khawsa theihai, corruption, thamna le thil indiklo  inthawtirtu chu mipui ei nih. Anni khat ela hiengang thil hai hi thaw thei an ni nawh. Thenkhat lem chu an nuom naw sa saa ei peklut leia thamna fa dam le ei nawrlui tlat leia corruption thaw dam an ni hlak. A tha bik le an dik bik ei um naw a, ei bawse tlang chu a ni takel.
         
Ei sin hmuna ding, ei pawisa hmuna ding, ei tangkaipui ding, ngirhmun insang lem le khawsakna inhawi lema ei um theina ding a ni phawt chun thil indiknaw  le suol khawm nisienla, hnar, thaw lo le  lak lo a tum khawma ei tum sin naw a, a bawin ei baw lem tawl a nih. Hiengang kawnga fihlim hmak chu ei rama hin tlawmterek  ning an tih. Um der naw ni hai ti ngam chi chu ninaw nih. Mi indik, mi ringum le mifel tlawmte hai leiin ei la dam a, ei la khawsa thei tawl a nih. Mi indik, mi ringum le mifel hai hi inza le ngaisang um takel, entawntlak an nih.


Post a Comment

Powered by Blogger.