By Lalnunthang Songate & Ruota Hmar
Parbung, May 19, 2015: Kum dang ang naw deuin Hmarbiel chun tu kum hnam ta dinga fam lo changtahai sunna le hrietzingna kumtin mani khuo chita lo inser hlak chu, Hmarbiel Region (khuo tin anthawk Palai hungin) a vawikhatna dingin Parbung khuo-ah ropui takin khuo dang danga inthawka hung le khawsung mi 2000 vel fekhawmin hi hunser ropui tak hi hmang a nih.

Hi hun a hin Martyrs’ Trophy Football inkhela um chun (L) Malsawmkim Hmar Team le Bungkhawpui Convention Team-in final khelin Malsawmkim Hmar Team-in Martyrs’ Trophy le Cash Rs. 20000/- , 2nd place Convention Team-in Trophy le Cash Rs. 10000/- le 3rd Place Rawvakawt Team in Rs. 5000/- an lak.

Parbung Sieli Association (nunghak) in hnam ta dinga hringna chan hai ngaihlutzie sinsiena’n kuong (Coffin) indawitakin Playground-ah an zawnlut a, pawl hrang hrangin par inhlanna le inzanna chibai an buk.

Hi huna Chief Guest Pu Lalnunthang Songate chun, mani sin hrietchieng le thawtuhai chu chawimawna le hlawtlingna an chang hlak, ti le Martyrs’ umzie, Martyrs’ a thi le Hmartar (Hmartar ati chuh: Tar kawkumrak talo hun inher vel a thi/thi ve hrim hrim, kaphlum /natna dang lei a thi/ thaw that nei lo a thi, etc tina a nih - by Lalnunthang Songate) a thi hai hlutdan inangnawzie le inthlauzie ti le mipui le thuoitu thangtlang chun thaw theinaw alo umnaw zie; Parbung khawsunga um thei ding a ei lo ngailo le Memorandums/application vawi tamtak the lut hnunga, Parbung H/S chu Hr/Sec. a hlangkai, Bank, HSLC Exam Centre Parbung ah, Navadoya Exam Centre, Hospital Extension, Ambulance, le a dang dang, Sawrkar a 2011 & 2012 kumbul laia application the lut huna nuizatthlak chauh hai chu a tak ngeiin Order a suok le hmang meka um hai hi inthuruolna lei le teireipeina a hlawtlinghai hi thil dang dang a khawm Association/ Organization thangruol chun ei la hmu vawng ding le Parbung hi hun sawtnawte hnunga Town a la ni thei tihai ngaithlak a nih.

Guest of Honuor Pu Lalchunghnung chun, ei theidan/ thiemdan an angnaw senga, ei hmazawn senga sin ringumna le takinning taka thaw chun hnena /ram ei siem hlak, ti ngaithlak na’n hun hmangzawm pei a nih.

HWA a inthawkin, hnam phatsantu ni loa, hnam chawisangtu ni ngei seng ei tiu, hnam pasaltha ti hin nuhmei khawm a kawkve a nih. Hmar nauhai mani sin indiktak thawlohai hi ei inkhawkpuia, chuongang mi ei lo um pal chun, vawisun anthawk inhnukdawk vawng el ding ti le ram le hnam sanna ding chun nuhmeihai khawm pasaltha an nih, tihai an hril.

Hi huna hin (L) Malsawmkim Hmar ralna hunser (Silent Prayer) le Hmarbiel sunga inthawkin chawimawina le inza inentirna dinginThangsuopuon 17 le sum iemani tawkin ral a nih. May Nisawm le Paruk Martyrs' Day – ti hla phuoktu Upa Lalthlansung Parbung kuomah Parbung V/A, Hnam Sipai & Org. Committee haiin chawimawina thuziek leThangsuopuon insiltirna nei a nih.

Pu Chawngthavung chun, “Hmar nauhai in sawt ni ta loin Hmar hmingpuolin AUTONOMOUS DISTRICT ei hmu tho tho ding a nih, a hun ding hi hrilchieng chat theinaw inlakhawm,” tiin a puongve.

Pu L. Tlanthang, Secy.Val-Upa Parbung chun, “Remhrietna le tumruna’n kalchawi ei tiu, Hmar hnam hmangaina inthuk tak nei lo dam ei lo um chun, intawldawk tawl dingin mipui/ thawktu/ hnam sipai/etc hai” tiin a ngen.

Kumtin Hmarbiel Region in lungruoltaka hi hunser hmang ani zawm pei theina dingin, khuotin anthawk Palai 2 pei insiemin June 2015 sung hin OB le Committee siemfel dingin relthluk ani bawk.

Hi zantieng hin ei hnam sipai haiin khawtina thuoituhai bufakpuina an nei. Ei ram siemna dingin mitin nasatak le lungruol taka hma la tlangpei dingin, tiin khaw dang danga anthawka hung hai le hun ditkhawp lo takin 2016 a intuok nawk dingin, dam takin aw ti pumin inthe dar a nih.

Post a Comment

Powered by Blogger.