Responsive Ad Slot

Hmar Inpui inrawinain hnam tum tuma thuoituhai an inhmukhawm

Friday, May 29, 2015

/ Published by VIRTHLI
CCPUR: May 28, 2015 zantieng dar 4 PM khan VTI Auditorium, Rengkai, Churachandpur ah Hmar Inpui, Gen. Hqrs. Inrawina hnuoiah Churachandpur District sunga hnam tum tum a thuoituhai fe khawmin Manipur Tlangram biel a Autonomous District Council chungchang thu le MDC/ADC Election 2015 le inzawma thil um dan hai ditkhawplo tak le chipchier takin hriltlangna an nei. “Tribe Leaders’ Interaction on the Status and Functioning of ADC (Manipur)” ti thupui hmangin ngaidan le thil um dan hai hrillang a nih a. Hi inhmukhawmna a hin Hmar Inpui (HI), Paite Tribe Council (PTC), Kuki Inpi CCPur (KIC), Gangte Tribe Union (GTU), United Zou Organisation (UZO), Simte Tribe Council (STC), Mizo Peoples’ Convention (MPC), Hmar Youth Assn. (HYA)/GHQ, Hmar Women Assn. (HWA)/GHQ, Hmar Students’ Assn. (HSA)/GHQ le hnam tum tum a thuoitu hi hun a thang dinga fielbik hai an fekhawm tawl.


Pu (Dr.) John H. Pulamte President, HI in thuhmahruoi hrilna le inkokhawmna sanhai fel fai taka hrilna hun a hmang a. Pu Lalthalien Assembly Secretary, HI in Pathien kuoma tawngtainain hun an hlan a. Chuzo chun hriltlangna hun hi nei a ni a. Hun tawpna taka khaikhawmna Pu David Buhril Gen. Secy., HI in neiin hi hun a fekhawmhai kuomah lawmthu a hril a. Ei ram le hnam thuoitu dinga mipui innghatnahai ei ni leiin ei mawphurna a lien hle a nih. A pahnam, a chawi pawl hai chenin tuta ei ADC fe dan hi bu tak khuk a khukpui chi an nawh. Resolution la passed el thei naw inla khawm iengtin a thaw dim ei ngaituo a tul a nih tiin a hril. Hunkhar tawngtaina Upa Hmangzalien Vice President, HI GHQ in a nei zoin hun suk tawp phawt a nih a. Hi zo hin HI buotsai palai fekhawmhaiin thlaithleng tuihnai tak VTI Banquet Hall ah an kiltlang.

Hmatieng peia hiengang hun hi nei rawp dinga tha an ti thu le an hmatienga Manipur a tlangmi, tawng inhre paw haiin Forum pakhat indin ngei tha an ti thuhai hi hun a palai fekhawmhai hin an hril tawl. Tutaka Manipura ADC hi Manipur a sawrkarna cheltu Cabinet in a nuom a ning a a siemfawm mei mei, innghatna tlak tak tak ni lo. Sawrkar thlungpui hrietpui le Sixth Schedule hnuoia um ni lo, Local Adjustment le Provision khawm mumal umlo a ni thuhai hril a ni a. Tlangmihai hamthatna ding ieng tak tak khawm a phursuok ding a la um thei naw thu le Fund khawm um zie um lem a a um dan ding le hmu thei dan dinghai hi hun a hin sawrkar thlungpui kuoma intlun dan ding an hrillang tawl a nih.


-LRS Puruolte|Photo: Rama Ralsun & Alan Famhoite



Don't Miss
© all rights reserved
made with by Simon L Infimate