Aizawl, May 13, 2015 (Virthli News): Vawisun khan Chief Judicial Magistrate, Aizawl District Court chun HPC (D) Chairman H.Zosangbera, Deputy Army Chief Bieknung le mi dang mi pahni Alex JL Hmar le LS Hmar hai manna ding ansuo. Hieng mi pali hai hi Mizoram Police in an man ta hnung bail a suok an ni a, Court in inlang ding a ti huna an inlang ta nawa, anni bailtu hai khawm'n bail bond an chawi vawng ta leiin anni hi manna ding hi insuo thar nawk a nih. H. Zosangbera le Bieknung hai hi kum 2012 khan man an lo ni taa, Alex JS Hmar le LS Hmar hai khawm hi Police in an lo man ta bawk a nih. Police in hun tiem sungin Court ah Chargesheet an thelut hman naw leiin Court in CrPC 167 thangsanin an suo a, amiruokchu inlang hun dinga an inlang ngai ta naw nih.

April 26 a Mizoram Police han an man Lalropuia Famhoite, Norbar Sanate le Ngurthantluanga Sanate hai khawm vawisun khan Court ah an inlang nawka, Magistrate indawnna chu Pu Lalropui Famhoite chun dawn in H. Zosangbera le Bieknung hai chu Manipur ah an um a ringthu a hrila March thla khan an pahni hi Rengkaiah a hmu thu hrilin chu hnung chun an umna a hriet thei ta naw thu a hril. March 28 a Zokhawthieng bula MLA lambunna kha a hrietpui naw thu a hril nawn a, Kum 2013 a bail insuo ani hnungin HPC (D) ah an hmang ta naw thu, mi vauna le pawisa khawn haia khawm a thang ve ngai naw thu  le a hminga pawisakhawn an lo um khawma a hrietpui naw thu a hril bawk a nih. An chung thu hi Court chun tuta thla ni 27 khin a ngaituo nawk ding a nih.

Post a Comment

Powered by Blogger.