Aizawl a bomb sukpuok na le inzawma man hai insuo, State sawrkar in High Court ah khing a tum

Lt. Col (Retd) ZS Zuala in, Bomb i suksiet

Aizawl, May 12, 2015 (Virthli News): Aizawl hmun tum tuma bomb sukpuokna le inzawma kum liemtah August 2014 a man H D Lalhmangaiha le Lalringthanga hai chu Court in alo insuo fel tah. H D Lalhmangaiha hi Mizoram Hmar Welfare Committee (MHWC) ah Assistant Secretary a ni a, Lalringthanga hi Muoltluong, Dipucherra, Cachar district mi a nih.

H D Lalhmangaiha le Lalringthanga hai hi Aizawl khawpui hmun 5 zet - Assembly Building, Parliamentary Secretary for Home Lt.Col (retd) ZS Zuala compound le tumhni Sinlung Hills Development Council Chairman Hmingchungnunga in haia bomb sukpuoka, hliem tuok le lakh tam tak man hmangruo suksiet a umna le inzawma August 2014 a Mizoram Police haiin an man a ni a, man anni hnungin Court ah HPC-D hai inthaw tir ngei niin an inpuong a nih.

Anni pahni hi vawisun khan Aizawl District Court chun technical ground ah thiem inchang tir in a lo insuo zalen tah an nih.

March 24 khan Additional District and Sessions Court Judge chun insuo dingin a tia amiruokchu District Magistrate in case pahni an neina - Section 3 of the Explosive Substances Act (causing explosion endangering life or property) and IPC 120 B (criminal conspiracy) ah chargesheet le prosecution sanction a pek naw leiin an suok nawk nawa hril a ni a, District Magistrate Dr Franklin Laltinkhuma chun prosecution sanction hi a hnawl naw thu hrilin hi le inzawm hin a lo pek dai tah thu a hril.

Public Prosecutor R C Thanga chun State IGP le Aizawl SP kuoma an case le inzawm hin High Court a appeal nawkna dingin lekha a pek thu a hril langa, Supreme Court ruling pahni thangsanin insuo tah ni hai sien khawm prosecution sanction chu a hnunga la file nawk thei ani thu a hril. State sawrkar chun appeal nawkna ding'n iengkhawm ala file nawa chu High Court ah State sawrkar chun insuo zalena an umna hi ala khing tum niin ei thu dawngna chun a hril.