-Lalnunthang Songate

April ni 13 – 15, 2015 sung khan Hmarbiel Pastor Organisation thuoitu haiin Pherzawl, Taithu le Tinsuong khuo hai kanna an nei. Pherzawl ICI biekinah, tu pawl, kha pawl ti um lovin mipui inkhawmna nei a ni a, mipui fekhawm an thahnem hle. Mipui fe khawm po hih 300 chuong ni a hriet a nih. Hi huna hin Rev. Hrangchunghnung in HPO thiltumhai mipui hrilhrietna a nei a, Rev. Lalruotsang in Pathien thu tak puongin rawngbawlna a nei.

aithu khuo a hin EFCI biekinah mipui 200 chuong fe khawmin inkhawmna nei a nih. Hi huna hin Rev. Hrangchunghnung bawkin HPO thiltum hril hrietna a nei zovin Rev. Lalrohlu in Pathien thu tak puongin rawngbawlna a nei ve thung a nih. Taithu kanna nei a ni huna hi Taithu VA haiin HPO thuoitu hai chuh thlaithleng an buotsai pek a, hlim taka awt tlang a nih.

Tul le remchanga hriet a ni leiin, program induonga thang sa lo, Tinsuong khuo khawm an kan nghal a. Tinsuonga sikul 4 um hai kanna neiin hlawtling taka naupang hai lekha an inchuk theina dingin tawngtaina nei. HPO thuoitu haiin sikul naupang hai chithlum an sem bawk a nih.


Tulaia siem mek, JT Road to NH – 150 (Tuiruong fethlenga Patpuihmun le Taithu inkar lampui) khawm HPO thuoitu haiin enna an nei. Tuiruong leilak daw meka um khawm a hmun ngeiah an en a, Rev. Lalrohlu in leilak le lampui siem meka um chuh a hun taka zo a ni theina dingin Pathien kuomah tawngtaina a nei nghal bawk. Sinthawtu hai chu mani ta ang taka thaw seng dingin a ngen a, tawngtaiah a san zing hlak ding thu a hril sa bawk. Leilak daw sin thawtu hai lai Hmarmi tam tak khawm an thang nghe nghe a nih. Rev. Hrangchunghnung khawma tawngtaina a nei zovin hi lampui le leilak sawrtu ding hai chu a biel mipui an tho an ni leiin thahnemngai tak le indik taka sin thaw dingin sinthawthu hai an fui tawl a. Hieng ang thil ropui siem theina dinga hmalatu Pu Chaltonlien Amo, MLA le mi dang dang hai kuoma lawmthu a hril bawk a nih.

HPO hi Hmarbiela kohran thuoitu (Pastorhai) haiin lunginruol taka May ni 10, 2014 an lo indin a nih. Hung tlung ding April 21 – 23, 2015 sung hin Senvon khuoah ‘Wholistic Development’ ti thupuia hmangin HPO in Seminar buotsai a tih. Hi seminar hin Hmarbiel sunga Pastor hai District Standing Committee a Chairman le Secretary hai po po thang an tih. Hi seminar hih ICDP, RPC NEI in a sengso po po a tum (sponsor) vawng ding a nih.

Post a Comment

Powered by Blogger.