Hmasawnna Thar | 9 April, 2015

Tuolsung :

Thli hrangin Pherzawl H/S le In 8 thli in a mutsiet

Pherzawl: March 4, 2015 Pathienni zan 10:00PM vel khan thli hrat takel a hrang a. Pherzawl Govt. High School le  mihriem chengna In 8 vel a mutsiet. Pherzawl High School building Classroom 7 chu a chung (roof) a mut hawk vawng. Chun, Examination Hall 1 a mut thluk bawk. Hi Classroom le Examination Hall a mut siet a chung (roof) hai chu hmu kim a la ni nawh. Tu hri hin Pherzawl High School­a kai hai  chu School kaina ding an la nei nawh. Chun, mihriem chengna In a mut siet hai chu Thaw\anni March 6, 2015 khan khawtlang pungkhawmin siem\hat thei umhai chu siem \hat a nih. Hi baka hin  Pherzawl High School hmangruo thei ang anga zawngkhawm le hre fel a nih. David L. Sawngate

Electric Tower tlu siem zo a nitah

CCPur: April 4, 2015 ni/zana tli le ruo inthuoa nasa taka a hrang le sur leia  Kakching line­a inthawk Khengjang Power Sub­Station power hung supplytu 132/33KV power line Tower tlu chu Electric department in an siem zo tah. Hi le inzawm hin  Khengjang Power Sub­Station­in direct­a 33/11KV New Lamka sub­station a pekna huom sunga New Lamka area­a chun zani suna inthawk khan electric meivar an hmu tah. Khengjang le Singngat/IB line inkarah power line sietna a um naw chun    Singngat/IB line  in  power a pekna biel hai khawm zani zan khan a electric var an hmu thei ta ding niin Department thusuok chun a hril.

TET Exam   Form April 15­a inthawk sem ding

CCPur:  Board of Secondary Education (BSEM) chun  Teachers  Eligibility Test (TET) Exam June 7, 2015 (Pathienni) khin huoihawt dingin a puong. Hi le inzawma   April 15, 2015  a inthawk khin  Application Form sem \an ning a ta,   Form peklut theina  hun nuhnungtak chu May 8, 2015 ning a ta,  Exam chu June 7, 2015 (Pathienni) a nei ning a tih. Exam Fee General Rs. 500/­ per single paper  (both paper Rs. 1000) ning a tih. SC/ST/Differently abled hai Rs. 400 per paper (both papers Rs. 800) ning a ta,  Form hi Imphal­a lak ding ning a tih.

DC Office­a Tribe le Income lakna dingin

CCPur: DC, CCPur Office­a inthawk Tribe/Income le document dang dang la ding hai chun  Identity proof documents (Aadhaar card, Voter card, Service/Student ID card, Indian passport, Ration card, School leaving certificate,Village Authority recommendation letter le  Electricity/Landline Telephone Bill) hai produce  a \ul a. Hieng documents hai inentir/produce ding nei lo hai kuomah chun a chunga Certificates hai hi DC Office chun an pekdawk tanaw ding a nih. Certificate laka um hai khawm record vawng nita dingin DC/CCPur chun thusuok a siem.

Manipur Old Age Pension sum sem ding

CCPur: Manipur Old Age Pension Scheme (MOAP) hnuoia (Green & Black Card Holders)  March, 2013­February, 2015 sum Rs. 4,800 (200x24 months) le MOAP (White Card Holders) October, 2013­ February, 2015 (200x17 months) Rs. 3,400/­ chu April 10, 2015, 10:30AM a inthawk khin DSWO, CCPur Office, Chiengkonpang, CCPUr­ah sem \an ning a tih tiin DSWO, CCPur chun inhriettirna a siem.

    

CCPur A/C a mi hai  April 10, 2015  April 13, 2015 in Saikawt A/C; April 15, 2015 in Singngat A/C; April 16, 2015 in Thanlon A/C; April 17, 2015 in Henglep A/C le  April 18, 2015 in Tipaimukh A/C  a mi hai sem ning a tih.

    

Sum lak huna  Card bakah passport size (color)  copies 3, Voter/Aadhar Xerox copy le Bank Account Xerox copy an chawi \ul a tih.  Aadhar Card hi a neihai ta ding a ti a nih. Damnaw le fe thei lo  hai an In sengha pek ning an tih tiin DSWO/CCpur thusuok chun a hril.

Silai Licence hnina lekha peksuok  sukchawl hri

CCPUr: Silai licence dita hni nuomhai ta dinga a hnina lekha semsuokna chu hun iemanichena dinga sukchawl hri a nih tiin zanikhan District Magistrate, Churachandpur  chun Order an suo. Application  a thilsa \ul kim lo pawm ninaw nih. Vau le in\hina leia hni hai chun Valid Land ownership Certificate, Domicile, income, Medical fitness, I­Card le passport size thlalak copies 2 an peklutsa a \ul tiin District Magistrate, CCPur Order a chun a \hangsa.

18­Zenhang Lamka biela V. Chinkhenpau

CCPUr: ADC, CCPur hnuoia MDC election hung um dinga hin Pu V. Chinkhenpau of Paradise Road, Zenhang Lamka chun 18­Zenhang Lamka ADC constituency­ah ngir a tum.  Ama hi thiemna tieng M.A. (Geography) NEHU, Rayburn College a Lecturer sin thaw lai mek, social, political le kohran thil haia inhmang mi takel a nih. T. Samuel s/o  (L) T. Gougin khawm hi biela hin ngir a tum. Hi biela ngir tuma inhril mi 8 vel an ni tah.

Security­Public Leaders Interface

CCPur: SP, CCPur hmalaknain April 10, 2015, 11:00AM­1:30PM inkar sung khin DC CCPur Office thlanga District Training Centre (DTC) HJall ah CCPur district a dinga Security le Public Leader­hai  inhmukhawmna hmasatak nei ning a tih. Thuhril tawi Pu Lunminthang Haokip, DC, CCPur le Brig R.K. Sharma, Commander 27 Sector, Assam Rifles han nei an ta, Pu Balram Singh, MPS, Addl. SP, CCPur  Moderator ninain interactive session um a ta, concluding remark Pu L. Mangkhogin Haokip, SP, CCPur in nei a tih.

Career Guidance an nei

CCPur: Zani 8AM khan SEDO chun an office, Sumkong Kaimun, Tuibuong­ah Career Guidance for Study in USA program an huoihawt. Hi huna hin 10+2 students le nu le pa hai kuomah SEDO hotu han foreign passport, visa le thil \ul dang dang hai buoipui dan ding guidance an pek.

Capping, lamp Lighting and Oath Taking

CCPur: Female Health Workers Training School, CCPur  chun Multipurpose Hall­ah April 10, 2015, 9:30AM khin Capping, lamp Lighting and Oath Taking ceremony of First Year FHW student hun hmang an tih. Hi huna hin Pu Lunminthang Haokip,, DC CCPur khuollienin \hang a ta,  functional president in Dr Thangchinkhup Guite, CMO/CCPur; Guest of honour in Dr J. SonGoukham  Samte, MS, District Hospital le Special guest in Dr V.C. Pau Tonsing, DFWO CCPur hai \hang an tih.

The 12th State Level Hmar Martyrs’ Trophy Football Opening Ceremony ropui taka nei

­Alan  Famhoite

Tui|haphai: March 7, 2015; 2PM khan Saikawt Playground ah Hmar Martyrs’ Trophy Organising Board (HMARTOB) hai hmalakna hnuoia The 12th State Level Hmar Martyrs’ Trophy Football Opening chu \an a nih. Hi hun hi Pu Lunminthang Haokip, IAS, DC, CCPur chu Chief Guest niin, Solomon L. Fimate, SDC, Tipaimukh le Upa Laldawnlien Varte, Gen. President, HYA GHQ hai chu Guest of Honour le Functional President an nih. Special Invitees in Shri Lalhossan, Executive Member, ADCC; Shri Lalhmangpui Fimate, Member, ADCC; Shri Lalhrillien, Member, ADCC; Zodingliana, Member, ADCC    hai an thang. Special Invitees hai bakah Rev. Dr. Rochunga Pudaite, Founder, Bibles for the World; Prof. Lallukhum Fimate le Balram Singh, Addtl. SP/CCPur le Hnam sunga organization tum tum thuoitu le Kuki Student Organisation(KSO) hai khawmin an hung uop a, Dr. Pudaite in Martyrs Day­a hmang hlak ding Football Net tha chi khawm a pek bawk a nih.  Guest Artiste in Nk. Christina Shakum (Platinum Star); Nk. Lalengvari Sinate; Nk. Gladys Lalparzo Sanate; Nk. Emma Lalawmpuii, Tv. Vanlalchhunga Joute le Saikawt HYA Choir haiin Hnam hla mawi tak takin mipui an inawi bawk.

    

Flag Hoisting Pu Lunminthang Haokip, IAS, DC, CCPur­in a nei a, Organising Board hai thangpuina dingin Rs 10,000/­ a pek a, chun, a office ah inhmupuia \hangpuina a thei ang ang lo thawpek dingin OB hai an tiem bawk. Thuhril tawi an nei huna Pu Haokip le Pu Solomon L. Fimate hai chun Ringumna le Taimakna a pawimaw zie uor takin an hril a. Pu Laldawnlien Varte, Gen.President, HYA GHQ chun hringna hlutzie le inza a tul zie hai a hril a, Hmar hai hi zani laia mi mi hmu ang mei mei kha ei ni ta nawh, a tâwk ei inkhaw ve det det ding an tah. Thla iemanizat a’nthawk khan hotu haiin hma nasatakin an hung lâk a, hun sawtnâwte hnungah ei hnam sunga danglamna ala hung um ding thu hai a hril a. Pawlpui (Hmar Inpui) in a ti chu a ti a nih ei ti thei hun a hung tlung ding an tah. Hmar hai hi ei Organisation nei haia inthawk survive ei tum naw a, Hnam anga survive ei tum lem ding thu hai a hril bawk.  A hril pei naa chun mipui le hotu hai kara khawm inringzona (trust) hi nei tum ei tiu tiin a hril bawk.          

     

Hi tournament a hin champion team hai chun Rs.1 Lakh dawng an ta, runners up in Rs.50,000/­ le 3rd Place team haiin Rs.20,000/­ dawng an tih. Kum dang ang naw takin tukum Hmar Martyrs’ Trophy hi State Level a ni leiin Opening Ceremony a hin mipui fekhawm an \hahnem tan hle a. A nipui ni tak May 16 lem hi chu mipui ei thahnem zuol  an ring thu Organising Board hai chun an hril a. Hun sawtnawte hnungah a nipui ni May 16­a in tina khai ding Hmar Martyrs’ Day Flag chu hung zawrsuok vat a ni ta ding thu an hrilsa bawk.   

Imphal

Headline:

Dy. CM  Gaikhangam in Police stations building bawl zo thar hai a hawng; a dang hai ADC election hmaa hawng ding

Imphal: Manipur Deputy Chief Minister le Home Minister ni bawk Pu Gaikhangam chun Police Stations 5 building  bawlzo thar hlim hai zanikhan a hawng. Zanita Police stations building 5 hawng thara um hai chu­ Chandel District a um Pallel Police Station; Thoubal District huop sunga um Yairipok Police Station; Andro Police Station le Heirok Police Station hai le Imphal East District  sunga um Nongpok Sekmai  Police station hai an nih. Hi huna hin Education minister, M. Okendro, Bira MLA, D.K. Korungthang MLA, Y. Surchandra MLA, Parliamentary Secretary Meghachandra le DGP, Sahid Ahmed hai an \hang.

    

Hi huna Pu Gaikhangam in thu a hrilnaa chun, Yairipok Police station ti lo Police stations 4 hai hi Special Plan Assistance hnuoia Rs. 3.2 crore senga  bawl an ni a, Yairipok Police station hi Annual Plan Assistance (State Goverment) hnuoia Rs. 2.15 crore senga bawl a nih. Police Stations 5 building bawl thar hawng theia a um hi ei state hmasawnna le hlawtlingna pakhat a nih. Ei State a Law & Order ngirhmun a \ha pei a, Police hai fel le an sinthaw \hat lei am annawleh helpawl han an chetna an suktlawm lei ti ruok chu hriet a ni nawh. Tlangram le hmun kilkhawr haia khawm Police Station hawng ning a tih. Chun, Bishnupur District le Imphal West District haia Police Stations  building thar bawl meka um hai khawm May thla a tlangram district a ADCs haia inthlangna nei a ni hma ngeia hawng ning an tih tiin Gaikhangam chun a hril.

            

Catholic School hai  vau le in\hina leia khara an um chu pawi a ti thu Gaikhangam chun a hril a, hieng School­hai khar dinga vauna pehai chu an thil thaw hi hlip a, inchuknainhai free zone a sie dingin a ngen. Inchuknain khara um hi kei khawma \ha ka ti naw a, midanghai khawma \ha an ti nawh. Ei student­hai  Career suksietna a ni leiin student­hai lekha inchukna le Educational Institution­hai sukbuoi zawngin che naw hram ei tiu tiin Gaikhangam chun ngenna a siem bawk.

JD(U) Manipur in BJP an sawisel

Imphal: Lok Sabha election lai khan BJP Manipur in AFSPA hlip dingin an intiem bakah BJP \huoina hnuoia Centre a NDA sawrkarin  ni 100 sunga thaw dinga an puong hai tuchen hin an la thaw nawh. An thutiem an hlen nawh tiin JD(U), Manipur chun BJP an sawisel. NDA in ni 100 sunga thaw dinga an ti hai lai Imphal­Jiribam Road siem \hat a \hangsa a, sienkhawm tuchen hin an la siem \ha nawh tiin BJP an sawisel.

Tamenglong ah bomb a puok, mi 3 an hliem

Imphal: Zani zantieng dar 3 vel khan Nungdailung, Tamenglong­ah bomb a puok a, pasal naupang kum 14 mi pakhat \hangsain mi 3 an hliem a, hliem hai laia pakhat a hliem inrik leiin Imphal tieng phur a ni a, pahni dang hai chu an hliem na nawh tiin ei thu dawngna chun a hril.

NH­2 ah min kei

Imphal: NH­2 (Imphal­Dimapur Road) a Senapati District sungah In 2 le lamlien mimin a kei siet leiin inlirthei inlawn vel han harsatna an tuok pha a, lamlien sietna lai hi siem \hat dingin Pi Jacintha Lazarus,  DC, Senapati chun State PWD an hriettir niin ei thu dawngna chun a hril

OTHERS:

Vawisuna inthawk 64th NEC Plenary session

New Delhi: Ni 2 sung aw ding 64th North Eastern Council (NEC) Plenary Session  chu New  Delhi ah \an ning a tih.  Hi Session a hin India hmarsak biela states 8  haia Governors, Chief Ministers  le officials hai \hang an tih. Manipur Governor Dr K.K. Paul; CM O.Ibobi Singh, Vivek Dewagan, Commissioner (Planning),  Govt. of Manipur; Director le  Joint Director (Planning), Govt. of Manipur hai khawm hi meetinga hin \hang an tih. Hi session hi DoNER Minsiter Dr Jitendra in hawng a ta,  kum 2015­16 sunga  NEC Annual Plan sukfel ni dinga hril a nih. Chun, hi session a hin Shillong a Manipur  Guest House  bawlna ding chungthu khawm hriltlang sa ni dingin ei thu dawngna chun a hril.

PM France, Germany le  Canada haiah

New Delhi: Prime Minister Narendra Modi chu ni 9 sung  zet thang dingin vawisuna inthawk hin inzin suok a tih. Vawisun hin New  Delhi suoksanin Paris, French pan a ta, vawisun Paris khawpui tlungin French President  Francois Hollande inhmupui a tih. PM hin Toulouse a Airbus  siemna hmun sir a tih. April 12, 2015 in Paris suoksanin German pan a ta, Honnover Messe Fair hawng a tih. April 14, 2015 in  Modi chun  Canada tlung a tih. PM ramdang inzin hi Union Ministers 5, Venkaiah Naidu, Ravishankar Prasad, Nirmala  Sitharaman, Rajiv Pratap Rudy le Piyush Goyal hai bakah Uttar Pradesh, Maharashtra Pradesh le Andhra Pradesh Chief Minister han zui an tih.

P.C. George Chief Whip a inthawka ban

Thiruvananthapuram: Kerala Government Chief Whip, P.C George chu a sina inthawk le United Democratic Front High Power Committee members  a inthawk ban a nih tiin zani hmasa  zan khan Kerala Chief Minister Oommen Chandy chun an state khawpui Thiruvanthapuram hmuna a puong. Party discipline a bawsiet lei le UDF sawrkar  kal zawnga a chet leia ban nia hril a nih.

LS le RS Session sunzawm nawk ding

New Delhi: Lok Sabha Session chu April 20, 2015 ah a thawk hnina sunzawm nawk ning a ta,  May 8, 2015 chenin  hi session hi nei ning a tih. Rajya Sabha Session a thawk hnina khawm April 23, 2015 a sunzawm nawk le May 13, 2015 chenin hi session hi nei ning a tih. Land Acquisition Bill chu Lok Sabha ah passed a ni ta a, sienkhawm NDA in Rajya Sabha ah  hi bill pasina dingin members \ulzat a neinaw leiin pasi thei lovin a um a, hi  bill hi tulaia hril hlaw takel a nih.

China le inrinaah silai 10,000 sie belsa tum

New Delhi: India le  China  inrina Arunachal Pradesh ah sipai a dabawla sie belsa ni dingin Union Home Ministry thusuok chun a hril. Tuhin ramri zulah India chun  sipai 10,000 lai a zie mek a, tuta sie belsa ding hai hi Indo­Tibetan  Border Police (ITBP) battalions 8,  sipai 10,000 umna ni dingin Home Ministry chun a hril. Chun, ramri zula hin Border outpost thar khawm 54 lai siem tum niin a hril.

Engineer Territorial Army Unit

Jammu: Army chun Jammu & Kashmir ah Engineer Territorial Army Units thar 3 indin a tum. Hi thil hi sawrkar thlungpui khawmin a remti ta a,  Units 2 chu Kashmir ah indin le Unit pakhat chu Jammu Region ah indin ning a tih. Territorial Army lak ding zat hi post 1,200 a nih tiin Colonel S.D. Goswami, PRO, Defence Wing, Northern Command chun a hril.

October­ah Angela Merkel Delhi­ah

New Delhi: October, 2015 khin German Chancellor, Angela Merkel chu New Delhi­ah a hung inzin ding a nih tiin zanikhan German Ambassador to India Michael Steiner chun New Delhi­a Chanchinbumihai an hmupui huna a hril. India PM khawm  German inzin dingin April 12, 2015 khin New Delhi suoksan a ta, Hannovar Messe, Germany­ah Business Fair hawng a tih.

Kel that khap tumna a um nawh

Mumbai:  Ka sawrkar chun Kel that khap tumna plan a nei nawh. Chanchinbu haia Kel that khawm Maharasthra  sawrkarin a khap el thei tia an zieklang hi report indiklo an dawng leia  an ziek ning a tih tiin Maharashtra Chief Minister Devendra Fadnavis chun a hril. Maharastra Advocate General Sunil Manohar khawm kan dawn a, Kel that khapna ding thu hi Court ah a hril naw thu a mi hril tiin Fadnavis  chun a hril.

HM inhnaipui kap hlum

Lucknow: Zani hmasa khan  Union Home Minister Rajnath Singh inhnaipui Arvind Singh, petrol pump neitu chu Makhsudanpatti hmuna kap hlum a nih. Airport­ah  a nuhmei a van thla a, a hungkir tieng Bike a inphur pasal 3 in a motor an hnawtzui a, Makshudanpati hmuna nangchilin an kap hlum niin A.K. Pandey, SP(Rural) chun a hril.

Induction training hun suktawi

New Delhi: IAS Officer haiin induction training haptakar 8 an nei hlak chu haptakar ruka suktawi  dinga riruong siem a ni a, hi thua hin April 24, 2015 chena a ngaidan hril dingin sawrkar  hun pek a ni a, hi hun sunga iengkhawm a  hril naw chun hi rawtna hi a pawm anga ngai ning a tih tiin Department of Personnel and Training (DoPT) thusuok chun a hril. Chun, IAS officers han training kum 2 vel an nei hlak khawm thla 6 a suktawi tum le  IAS peka um hai (confered), an pension na ding kum 1 chau bak ta hai chu induction training nei kher ta lo dingin  sawrkar thlungpui chun a rel tiin DoPT thusuok chun a hril.

Diesel motor kum 10 tling tahai khap

New Delhi:  Delhi khawpuia chun Diesel motor kum 10 le a chungtieng tling tahai chu Delhi khawpui sungah an tlan khap (ban) a ni ta tiin zani hmasa khan National Green Tribunal (NGT) chun a rel. Hi thil hi Delhi khawpuia boruok pawrche sukrena dinga  thaw a nih. Denmark, Brazil, China le  Sri Lanka ram haia khawm diesel motor hmang hi khap a nih. WHO report dungzuiin khawvela boruok pawrche nasa zuolna hmun an hril hai lai Delhi khawpui a \hangsa tiin a hril.

Auto Driver in Rs. 1.03 lakh a hmu

Chennai: Zanikhan Tamil Nadu a Auto Rickshaw Driver N. Ramesh Kumar (36)  of J.J. Nagar chun Vaidyanathan leilak bulah bag a hmu a, bag hi lain a hang hawng chun pawisafai  Rs. 1.03 lakh a lo um a, a neitu zawng dawkin a pawisa hmu hi a neitu  M.R.K. Lingam khuomah a pekkir. Bag sunga hin phone number inziek a lo um a, Ramesh chun hi phone number hi call in a neitu hi a hrietsuok thei a nih.

Ni 19 sungin Yemen ah mi 540 chuong an thi

Geneva:  Yemen rama buoina leiin March 19, 2015 a inthawk April 6, 2015 inkar, ni 19 liemta sungin mi 540 chuong an thi ta a, mi 1,700 chuong an hliem a, mi 100,000 neka tam chengna ding nei lovin an um pha ta tiin WHO Spokesman Christian Lindmier chun a hril. Thina tuokhai lai hin naupang 74 le hliemhai lai naupang 44  an \hang tiin UNICEF thusuok chun a hril.

---------------------------------------------------------------------------------------------------------

VAWISUN THUPUI

Uz rama chun mi pakhat a um a, a hming chu Job a nih; chu mipa chu mi fel le tluong  le, Pathien \i a suol nghatsan mi a nih;  ­ Job 1:1

Editorial:

A hming chau ni lovin bawzui pei ni hlak sien

December 25, 2014 nia Union Health Minister J.P. Nadda in thaw dinga a lo hawng \an ta Universal Immunization programme “Mission Indradhanush” phase khatna chu zanikhan India rama a sin thaw \an dinga hawng a lo ni tah. Phase khatna hin India ram  states le UTs tum tum a districts 201 haia thaw \an dinga  ti a nih. District 201 thlangsuoka um hai lai hin Manipur state a khawm district 4 a huom sa a. Chuong district­hai chu Churachandpur, Senapati, Tamenglong le Ukhrul hai an nih. Hi Mission a ei district a \hang sa ve leiin lawm  a um. Amiruokchu, hi mission hi a hming mei mei chau ni lova a tak ngeia thaw le bawzui a ni  theina dinga mipui le District Task Force­Immunization,  CCPur han tha tak an suo ngei nuom a um.

    

Hi mission thiltum chu naute kum 2 le a hnuoitieng mihai, invengna damdawi la kap der lo le kap nuol ta sa hai chu hmai nei lova natna hri chi 7, Hnuknatna (Diptheria), Sakawrekhriknatna (Tetanus), Zenghri (Polio), thakpher/sentut (Measles), Khulhip (Whooping Cough), Hepatitis­B le  Ngawr natna (Tuberculosis) hai laka invengna annawleh a dangna damdawi kap ding ti a nih. Hieng natna hai hi a vengna damdawi a hun tak le indik taka thaw a ni chun naute le naupang hriselna  bakah an puitling chena ding khawma dam theina le hriselna \ha tak petu a ni leiin nu le pa han ngaipawimaw zuol ngei ngei ding a nih.

    

Hieng natna chi 7 zet damdawi hai hi naute an ni lai, a bikin kum 2 le a hnuoitieng an ni lai ngeia  kap ding a nih ti hrietuhai chun  a la hrie der lo hai hril hriet hi ei mawphurna senga ei ngai a \ul a nih. A bikin thil chinchang hrie tasa nu le pa han a la hre naw hai hril hriet hi ngaitha lova a remchangna hmun taphawta hril ngei ngei ding a nih. Thei nisienla lem chu khawtina khawtlang \huoitu han hi chungthua inhril hrietna Awareness campaign hi  thaw thei seng inla nuom a um.  Sawrkar thaw ding chau a ei ngai chun thil indik ninaw ni a, a chan  le an hmang ding chu ei nihai  ei nih ti ei hriet a pawimaw hle bawk.

    

Naute le naupang ei tihai hi nakie tienga ei ram, ei hnam, ei khawtlang le ei kohran \huoitu dinghai an la ni leiin an hrisel theina ding le in\hanglienna ding hi ei ngaipawimawpui a \ul bek bek a nih. Mission Indhradhanush chun kum 2020 chenah naute kum 2 le a hnuoitieng po po hieng natna hri chi 7 hai laka invengna damdawi hi  kap vawng a tum a nih. Naute  an hrisel naw a, an dam thei naw chun sungkuo tin ta dinga harsatna nasa tak intluntu a ni leiin naute hriselna hi ngaipawimaw ding a nih. Hriselna  le dam theina hi hlimna le hausakna hai intlun theitu a nih. Hi lei hin ram changkang le hnam var han an ngaipawimaw hle a nih.

Sawrkar thlungpui le state sawrkar chi tum tum hai hin Scheme, project, mission le programme \ha tak tak an induong a, an thil induonghai hi a \ha naw a um der nawh. Amiruokchu, a sukpuitling tiengpang hi a harsa hle hlak. A tlangpuiin Scheme, project, mission le programme sawrkarin an duong hai hi a tam lem a hlawsam annawleh a zuva hlak. Hi thil hi a hming mei meia thaw le bawzuina a um nawk ta ngainaw leia hlawsam le zuva hlak  a nih.  Chuleiin, sawrkarin a thil thaw hai po po hi a hming mei mei ni lovin bawzui pei hlak sienla puitling hlak a tih.Sawrkar thlungpuiin  Scheme le project an duong hi a bupuia siem khawp ni tang a tih. NDA in sawrkarna an hung chela inthawka scheme, programme, mission le plan chi tum tum thaw dinga an puonglang ta ringawt khawm hi a hung puitling chun ei ram hi hmasawnin in\hanglien  a ta, a par le a rasuok hai chu a ram mipuihai sawr \angkai thei ding khawp ning a tih. Amiruokchu, tuchena a fe dan en chun a tam lem a hlawsam hri niin an lang. A bul hang \an lai hin chu a ri a \ha, sienkhawm damte tein a hung re a, a hung hlawsam el hlak chu a ni hi!