Responsive Ad Slot

Hmasawnna Thar | 24 April, 2015

Friday, April 24, 2015

/ Published by VIRTHLI
Tuolsung:
Gypsy eksiden­ah mi 3 an thi, mi 4 an hliem
CCPUR:  April 22, 2015 (zani hmasa) zan dar 11:30 vel khan  CCPur Police station­a inthawka hmartieng km. 6 vela hla, Seloijang village, Tiddim Road­ah Maruti Gypsy MN01A­5616 a eksiden a, mi 3 an thi bakah midang 4 in hliemna an tuok. Mithi hai hi zani zingkar inhmatak khan Police han va lain District Hospital, CCPur Morgue­ah an sie a, Doctor le Police han an ruong post­mortem an thaw zovin mithiruong hai hi an sunghai chit kuoma pekdawk an nih. Hliem 4 hai khawm District Hospital phurlut an ni hnungin an hliem inrik leiin Imphal tienga enkawl dingin Doctor han an referred.
 


Hi motor eksiden­a thi hai chu ­ Laishram Kiran Singh (38) s/o L. Ibohal Singh of Ithai Khunou, Bishnupur Dist; Athokpam Mangijao (34) s/o (late) A.Jugindro Singh of Ithai Khunou, Bishnupur Dist. le  Salam Prafullo Singh (32) s/o Salam Ibohal Singh of Kumbi Terokhong, Bishnupur District, tuta 7th IRB a thawk lai mek hai an nih.
 
Ei thu dawngnain a hril danin  Gypsy hi Moirang pana tlan a ni a, a khaltu (driver) in a control zonaw leiin Tiddim Road lampui sira thingkung a baw leia eksiden hi tlung niin a hril a, motor khawm hi a se hne hle niin thu dawngna chun a hril.
 
Hliemna tuok mi 4 hai chu Bishnupur district­a Ithai Khunou mi vawng Driver P.Samananda (33) s/o P. Punima Singh, tuta Jiribam­a 8­Manipur Rifles  sin thaw mek; W.Aganta Singh @ Mocha (38) s/o W. Bino Singh; S. Romen Singh (30) s/o S. Thoiba Singh le  Birbal Singh (33) s/o Fulasor Singh  hai an nih. Thi le hliem hai hi an lua hliemna  an tuok deu vawng niin ei thu dawngna chun a hril. Hi thua hin FIR No. 39(4) 2015 CCP­PS U/S 279/338/427/304­IPC registered a nih.

IFCD minister in Haokip Phungpi Conference a uop
CCPUR:  Zanikhan Kholmun Playground,  CCPur­ah 55th Haokip Peoples’ Council ­cum­ 2nd Haokip Phungpi Conference 2015 hmang a nih. Hi huna hin IFCD minister Pu Ngamthang Haokip  khuollienin a thang a, Pu T.N. Haokip, MLA/Saikawt A/C le Yamthong Haokip, MLA (Saikul) hai chu functional president le special guest in an thang.
 
Pu Ngamthang Haokip chun, Pathienin Haokip hai hi mal a mi sawm leiin IAS le IPS tiemkhawp zet ei um a, hi lei hin  conference­a fekhawm mipui han Pathien malsawmna hi theinghil ngainaw mei niu tiin a hril. CCPur dist­a um ngai lo DC le  SP hai khawm Haokip an ni thu hrilin Politics­a khawm  Haokip MLA 2/3 ei tling zie chau ni lovin term hmasa a khawm Pu TN. Haokip chun full term in Cabinet a chel a, tuhin Ngamthang Haokip in full term in cabinet a chel nawk ding a nih tiin a hril.
 
Politics a hin seniority a pawimaw hle a, tuta Haokip MLA hai hi Congress party­ah ngirhmun pawimaw tak an nei thu, Pi le pu hai hming inhmang nawna dingin hming phuoka um hai tukhawmin thleng danglam tum nawng ei tiu tiin a hril bawk.
 
Pu TN. Haokip chun, unau inrem taka um hi an hawi el chau ni lovin Pathien khawmin mal a sawm  nuom  bik a nih tiin a hril. Pu Yamthong Haokip chun, Haokip han Pathien malsawmna ei dawng hai hi theinghil lova Pathien ei hriet zing a pawimaw tiin a hril.

Genneikhup in MDC ngir nawk a tum thu
CCPUR:  Pu Genneikhup Vaiphei,  EM, ADCC chun zani zantieng khan Sauliim Restaurant, N. Lamka­ah tuolsung chanchinbu reporter­hai an hmupui a, kum 5 sung  Chongkhojou Constituency­a MDC a ni hnungin tukum election khawm ngir nawk a tum thu a hril.
 
A constituency sungah khuo 39 a um a, In 185 hai kuoma  inchung ding rangva a pek ta thu,  ei ram venghimna dingin Manipur a ADC hai 6th Scheduled hnuoia a um a pawimaw thu, 6th Scheduled hnuoia a um chun ei ramin hma a sawn ding thu, 6th scheduled hnuoia ei um theina dinga hma a lak ding thu, tu el hin chu MLA  nekin MDC in a lung a lan len lem thu a hril. 6th Schedule thu hi Lok Sabha le Rajya Sabha haia khawm hrillang le survey khawm thaw a nita thu a hril a, Kuki State le Autonomous Hill state puitlingna ding khawmin 6th Schedule a pawimaw thu, zalen takin mipui han mani dit hai vote inla thlangtlinga um hai khawm lawm an ta, a tlingnaw hai khawm lawm an tih tiin  tiin a hril bawk.

Drawing & Painting competition
CCPUR: Zani zingkar khan DPO,SSA­RTE huoihawtnain Tuibuong Jr. Govt. H/S­ah “Inclusive Education’ ti thupuia hmangin  Drawing & Painting Competition nei a nih. CCPur District sunga Govt. School tum tuma Class III­VIII inchuklai 150 vel an thang. Competition hi catetory  pahni­a the a ni a, category I ah regular student, category­II ah children with Special needs hai  an nih.  May, 2015 second week vela Inclusive Sports nei huna lawmman sem ning a tih.

Israel Independence Day an hmang
CCPUR: Shavei Israel sponsored le huoihawtnain zani 10AM khan B. Vengnom Community hall­ah 67th Israel Independence  Day 2015 hmang a nih. Hi huna hin  Chief Guest in T.K Avihu Singsit, Chairman BMC (I) le Guest of Honour in T.Zebulun Haokip, Chairman B/S B.Vengnom  hai an thang.

 ZC  Secretary dingin KG Tungnung
CCPUR: Zani 11:00AM khan   Election Commission, Zomi Council huoihawtnain  Zomi Inpi, ZC Colony, N. Lamka hmuna kum 2015­16 sunga  Zomi Council sunga post tum tum cheltu ding thlangna nei a nih. Hi huna hin  General Secretary dinga mi 3 candidate um hai lai General Secretary ni lai mek  T. Khamminlun @ KG  Tungnung of Bible Hill, Rengkai chun votes 35 hmuin thlangtling a nih.  A dang hai chu uncontest­ vawng  Secretary (Finance)­ Paukhogen Gangte of Gangpimual; Secretary (Treasury)­ H.Kapchinthang of Beulahlane; Secretary (Admn. Affairs)­M.Suanminthang of N.Khaukual; Speaker ­ Jam Kho Cin of New Lamka (G) le Dy Speaker­ Thangzamang of Zion Veng, New Lamka  hai  an nih.  Thlang thar hai hi   ZC Speaker K. William in intiemkamna an neitir a,  Rev Khen P.Tombing, Chief Co­ordinator, PCI (R) in tawngtaipekna a nei.

HPC(D) in  press release an siem
CCPUR:  L. Venhim Hmar, Information & Publicity Officer HPC(D), General HQ: Sinlung in 22/4/2015 khan Press Release a siem. Chu taka chun, HPC(D) President Pu Lalhmingthang Sanate chu HRF le MAIDA haia a thang naw thu, Mizoram Congress Party le HPC(D) han kum 2008 MLA election­a a ruka thangtlang dinga thuthlung an ziek naw thu, Lalhmingthanga Mizorama a fe naw thu, kum 2014 a “Muanhlua inpuanna” tia thu insuoa um kha khel le phuokfawm a ni thu a zieklang  bakah HPC(D) Unlawful Organisation a Mizoram sawrkarin a puong tumna chu sut nawk ngei nisienla an nuom thu hai  zieklang a nih.

Headline:
Gajendra thina thuin  Parliament a nghawr; AAP in zangnadawmna Rs. 10 lakh  an pek ding
NEW DELHI:  Zani hmasaa Land Acquisition Bill dodalna a AAP han Jantar Mantar, New Delhi­a Rally an nei huna loneitu pakhat, Gajendra  inkhaihlumna thu chun zanikhan Parliament a nghawr hning nasa hle. Loneituhai harsatna hlipkieng a ni theina dingin ei rengin thangruol ei tiu. Loneitu inkhai hlumna hi ei ram pumpui ta dinga vangduoina a nih. Mihriem hringna hi a hlu em em a, thil dang iengkhawmin a thleng thei nawh.Tu pawl khawma Politics a chirhak inthenaa hmang lo ding le  suk politics lo dingin PM Narendra Modi chun Lok Sabha hmuna thu a hrilna huna ngenna a siem.
 
Union Home Minsiter  Rajnath Singh khawma hi thina hi ei ram le hnam pumpui ta dinga muolphona le thil inzakum a nih. Chuleiin tukhawma Politics thila hmangruoin hmang nawng ei tiu tiin zanita Lok Sabha hmuna thu a hrilnaah a hril. Hi thina thua hin Parliament Street Police Station­ah FIR Registered a ni ta bakah Crime Branch suizui dinga peksuok a ni tah tiin Mr Singh chun a hril.
         
Aam Aadmi party (AAP) chun Gajendra Singh sunghai chu zangnadawmna Rs. 10 lakh pek dingin an rel. Zangnadawmna chau ni lovin  Gajendra Singh sunghai chu AAP in thangpui thiena taphawtah thangpui a ta, a nauhai lekha inchukna dinga sum seng hai khawm tum a tih tiin AAP spokesman, Sanjay Singh chun a hril. Hi  hma hin Delhi Chief Minister  Arvind Kejriwal hun  Gajendra Singh thina thua hin Magisterial Inquiry thaw dingin mawphurna cheltuhai thu a pek.

Imphal:
Naga biel sungah darkar 48 bandh
IMPHAL:  Manipur­a Naga mihai chengna biel sungah April 27, 2015 zanrila inthawk April 29, 2015 zanril chen, darkar 48 sung United Naga Council (UNC) in bandh an tahw ding thu an puonglang. Manipur sawrkar enkawlna ni lo, Manipur­a Naga chenghai ta dinga Alternative Arrangement an ngenna le pending­a um Indo­Naga Political Settlement chungthu hai India sawrkarin ngaisakin sukfel vat sietnla ti narnaa bandh hi an thaw tum niin UNC Press Release chun a hril.

Khongjom Day buoina um lova hmang zo
IMPHAL:  Home Department huoihawtnain zanikhan Khongjom War Memorial, Khebaching, Thoubal­ah Khongjom Day buoina um lova hmang zo a nih. Hi huna CM O.Ibobi Singh in thu a hrilnaa chun, bandh, blockade le bomb puok haiin hmasawnna sin thawna a sukbahla pha tiin helpawlhai chu tharum insuona tapsan dingin a ngen. Ukhrul district sunga Charo Khullen Village sungah Myanmar Army hai hung lutin Manipur ram an hung lak ti hi ngaimaw a um hle a, Delhi­ah fein Defence le Home Ministry kuomah zun tlun ning a tih tiin a hril.

Ar le Varak thatna sin 90% zo
IMPHAL:  Manipur­a Bird Flu natna hri inleng leia infected  Zone­a Ar le Varak that le phum hmangna sin chu  sunzawm pei a la ni a, zani chen khan Ar le  Varak thatna sin hi 90% zo a ni ta a, hi sin hi zingah (24/4/2015) zo fel ni tang a tih tiin N. Rajendro,  Director,  Vety & AH chun a hril. Zanita hi thil thawnaa hin Ar 3,000 vel,  Varak 554, Turkey 28  that le Artui 4000 vel suksieta phum niin ei thu dawngna chun a hril. Chun,  Ar le Varak thatna bakah Artui suksietna leia zangnadawmna pek ding zat chu hriet thei vat ni ta dingin Dr Rajendro chun a hril.

Thil tam tak a suksiet
IMPHAL:  Zani hmasa zana thlipui hrat tak hrang khan mihriem chiengna In, Ran in, electric hrui le ban tam tak a mut siet bakah thingkung tam tak a mut tluk a, mihriem thi le hliem an um thu ruok chu hriet a ni naw a, Thoubal a chun Bawng pakhatin a thi pha.

Others:
NE­ah bawng that khap ninaw nih: Ram Madhav
SHILLONG:  Ram Madhav, BJP National General Secretary chun, NE bielah Bawng that khap ninaw nih tiin zan hmasaa Shillong hmuna chanchinbumihai an hmupuinaah a hril. Bawng that khapna hi hun sawt taka inthawka hmang a ni ta a, sienkhawm sawrkar thlungpui chun NE bielah bawng that khap tumna hrim a nei naw a, khap ni ngai bawk naw nih. State thenkhata Bawng that khapna dan hmanga um hi la ennawn nawk ning a tih tiin Ram Madhav chun a hril.

Tekin Rallianthanga a deng hlum
AIZAWL:  April 21, 2015 zantieng khan Rallianthanga (47) h/o Neihliani of Baktawng Dawrveng, Mizoram chu Tekin a deng hlum. Rallianthanga hi James Lalrohlun Hmar lo tu bang ding Silpauline an zar laia Tekin a deng hlum a nih. A bula um Lalrohlun Hmar chu a tu a inthawk a tla thla leiin an tet hliem a, an bula um ve tho Lalrohlun Hmar nuhmei ruok chu iengkhawm a ti nawh.

BSNL in zan huna unlimited   free call
NEW DELHI: Bharat Sanchar Nigam Limited (BSNL) chun  May 1, 2015 a inthawk khin  zan dar 9PM­ 7:00AM inkar sung unlimited free call introduce a tum. Hi thil hi  Landline telephone hmangtu an tam theina dinga thaw a tum a ni a, zan dar 9 le zingkar dar 7 inkar sungin  India ram pumpuia Landline to landline le  BSNL mobile phones haia hi facility hi a um ding niin company thusuok chun a hril. Hi scheme hin  India ram sunga khawpui le tlangram biel haia mi hai a huom vawng ding a ni a, a fee  (charges) um lovin hmang thei a ni ding a nih.

A nuhmei lu chawiin Police station­ah an pe
COIMBATORE:  Zani hmasa (April 22, 2015)  khan Chinnapparaj (49) of  Narayanachettipalayam ) nia inhril chun a nuhmei thatin a ring a tan a, a nuhmei lu hi chawiin Vadakkipaalayam Police station­ah a van pe (surrendered). Mr Chinnapparaj chun a nuhmei Selvi chu pasal dang leh a ringhla leia hiengang thil hi a thaw ni dinga an ring thu Police chun an hril. Selvi le Chinnapparaj hai hin nau pahni an nei ta a,  Chinnapparaj hin a nuhmei hi Tuikurluk(coconut) khawina chem hmanga a nuhmei ring hi a tan niin R. Ponnaiah, Police Sub­Inspector chun a hril. Chinnapparaj hi Coimbator Central Jail­a thun a nitah.

NSCN(R) le GoI han Ceasefire
DIMAPUR:  NSCN (Reformation) le Government  of India (GoI) hai chun Ceasefire Agreement an ziek ding nia hril a nih. Sawrkar thlungpui chun, a hmaa NSCN(K) designated camp dinga a bawl Phuktong Camp, Mon district, Nagaland chu NSCN(R)  kuoma pek a remti ta niin  Lt. Gen. N.K. Singh, Chairman, Ceasefire Monitoring Group (CFMG) chun a hril. NSCN(R) hi India sawrkar le Ceasefire agreement thlawp le zui pawl an nih.

BSF han mi 3 detonators 132 leh an man
SHILLONG:  Zani hmasa khan Coal India Complex, Jadi market, South Garo Hills district a duty BSF han Nangalbibra hmuna dappui an thawnaah pasal 3, Zakir Hussain (45) of Dhubri, Assam; Abdul Bashid (27) le Basriddin Rehman (37), West Garo Hills hai chu Electronic Detonators 132 leh an man a, Police kutah an pek.

Kani Rs. 10 lakh manhu an man
KOHIMA:  Zani hmasa khan Nagaland Excise Department hnuoia Mobile Squad pawlin Patkai  College leilak bulah Zadimo Resu chu Kani Rs. 10 lakh manhu leh an man a, Under Section 8 of NDPS Act, 1985 le Under Section 17 of NDPS Act, 1985 hmangin case registered khum a nih tiin Ghokiho Yeptho, Superintendent, Excise & Prohibition,  Nagaland chun a hril.

Thina tuok sunghai Rs. 4 lakh seng
PATNA:  April 21, 2015 zana ruo, thli le riel hai inthuoa Bihar state a District tum tum, Purnia, Madhepura, Saharsa, Madhubani, Samastipur le Darbhanga hai a nuoi leia mi 65 thi sunghai kuoma zangnadawmna Rs. 4,00,000 seng pek ning an tih tiin Bihar  CM Nitish Kumar chun a puonglang. Mi 100 vel an hliem a, hliem inrik an tam leiin mihriem thi hi an la pung belsa ring  a nih tiin official thusuok chun a hril.

India Ngamantu 12 man an nih
KANYAKUMARI:  British Coast Guard han Diego Garcia hmuna India Ngamantu 12 hai chu an Ngamanna len le GPS equipment hai leh tuta hma deu khan an man tiin B. Justin Antony,  Tamil Nadu Fisherman  Development Trust President chun zanikhan a hril. ‘Dan kala kan tuipuia Nga an hung man leia kan man a nih" tiin  British  Coast Guard thusuok chun a hril.

Congress Convenor dingin Vincent H. Pala
NEW DELHI:  India hmarsak biela states 8 um hai laia states 5, Meghalaya, Assam, Manipur, Mizoram le Arunachal Pradesh haia Congress Convenor in­charge dingin Shillong MP Vincent H Pala ruot a nih tiin AICC thusuok chun a hril.

Mi 3 damsung lungin intang dingin
GUWAHATI:  Zani hmasa khan Morigaon district & Session Judge, Ikramul Hussain chun tuolthattu mi 3,  Mohan  Teran, Sanjoy Chandra le  Bhim Das hai chu damsung lungin intang dingin thiemnaw an changir. Hieng mi 3 hai hi July 1, 2011 a Class­IX inchuklai Arup Dutta, s/o Anu  Dutta of Jagi  Road, near Guwahati thuoihmanga thattu a intum an nih.

Sakeipui pakhatin kum 8 sungin te 22
BHOPAL:  Pench Tiger Reserve Forest,  Madhya Pradesh a Sakeipui pakhat, Colarwali an ti chun kum 8 sungin te vawiruk a nei ta a, tuchena  te a neita chu an rengin 22 an tling tah. Tulai hnai el khan te 4 a nei thar. Collarwali hin te a nei ngun hle a, a te nei vawinganaa mihai khawm kum 2 an  la tling nawh tiin Alok Kumar, Director, Pench Tiger  Reserve  chun a hril.

Naute pieng zo hlim  Rs. 25,000 a zawr
JALPAIGURI:  West Bengal stae a Monynaguri hospital­ah April 18, 2015 khan Salma Begum w/o  Bulbul Haq  chun nuhmei naute a nei a, April 19, 2015 in Hospital­a inthawk an suok a, hi ni hin a pasal Bulbul Haq chun an naute hi Rs. 25,000 in Zirtirtu, Partha Biswa kuomah a zawr niin Police Officer in a hril. Bulbul Hq in  a naute a zawr theina dinga thangpuitu Netajipara Primary School,  Dhupguri a Atul  Basak chu Police han an man ta a, Bulbul Haq ruok chu a tlan hmang leiin man a la ni nawh. Hi thu hi naute nu Salma Begum in Police­a report a peka inthawka hriet suok a nih tiin Avaru Ravindranath, SP, Jalpaiguri chun a hril. Bulbul Haq hi  nitina inhlawfaa fakzawng, an rethei hle leia an naunu hi a zawr niin ei thu dawngna chun a hril.

Mi 3 kum 1 sung lungin intang dingin
TRICHY:  July 29, 2008 a Josephy  Eye Hospital a Free Eye  Camp neina huna mit nauleng (cateract surgeries) operation thawnaa mi 60 zet mit an del pha leiin Dr  C.A. Nelson Jesudasan, Dr P. Ashok le Mr Christopher Thomas, Chief Administrative Officer hai chu kum 1 seng lungin intang dingin CJM Court in thiemnaw an changtir tawl. Chun, an mit at siet peka um hai chu  zangnadawmna Rs. 2.28 lakh ­ 5.75 lakh chen pe dingin Court chun a rel.
--------------------------------------------------------------------
VAWISUN THUPUI
Israel thlahai, Lalpa thu chu ngai ta u; Hi rama hin thutak le lunginsietna le Pathien hrietna a um naw leiin, Lalpa chun ram hluotuhai hekna ding a nei.  Hosea 4:1

Editorial:
Thil hlui le Museum ngaihlut nachang hriet
Hnam var le ram changkang taphawtin thil hlui an ngaihlu a, an humhal hlak. Ei rama hin ei thil hluihai hi hmu ding a tlawm ta hle a, humhalna chang ei  hang hriet meu chun a lo inhnu taluo tieng a lo ni ta ti inla ei hril suol taluo ring a um nawh. Ei pi le pu hai thil lo hmang hlak tam takel a hmel hmu ding um ta lo, thangtharhai kuoma hrilfie hlei thei ta lo tam tak a um ta a nih. Khang thil hai kha thil hlui siekhawmna Museum ah lo sie tha pei inla chu harsatna um der lovin tuta thangthar le thang la hung thar pei dinghai ta ding khawma thil tangkai  tak a ni ngei ring a um. Hi lei hin thil hlui ei nei le ei hmu hai hrim hrim Museum ah sie tha pei ta inla nuom a um.
 
Tuta ei state Museum a ei sie le neisun tienlai pi le puhai sulhnung  inlangtir theitu hai khawm hi inhlut nachang ei la hriet tawk naw hle niin an lang a, hi tiengpanga hin nu le pa hai, zirtirtuhai, khawtlang, ram le hnam thuoituhai khawmin ei nauhai, inchuklaihai  le thangtharhai ei thuoihar a pawimaw a, chu ding chun hma la tan thei inla nuom a um.
 
Museum a thil hlui siea um hai hi thangtharhai ta ding chun hmu nuomum an ni tanaw el thei. Amiruokchu, thil hluihai hlutna hi hril inla chu an ngaihluin, ngaipawimawna chang an hung hriet pha thei ngei ring a um. Inchuknain neituhai khawmin museum en dingin an student­hai  hi excursion in fepui hlak hai sienla chu thil hlui le museum ngainatna chang le a hlutzie hriein an hung ngaipawimaw pha thei ngei  ring a um. Thiemna, varna le hrietna suknghettu dingin thil hlui hai mit ngeia hmu hi thil tangkai tak a ni leiin museum en hi thawpui hlak ding a nih.
 
Museum a thil um hai hi en le thlir liem el chi a ninaw a, history ei inchuk hlak hai mit ngeia namnghetna hmun a ni leiin museum hi a hlu em em a, a la hung hlu  pei ding a nih. Museum a tienlai thil hlui siekhawm hai hi mit ngeia ei hmu ruolin iem an na ti dam, ienganga hmang am a na ti dam, ieng hun laia hmang am ti dam, tu ham a hmangtu ti dam, iem a tangkaina ti dam ei hriet thei a, nakawra hriet nekin mit ngeia a taka hmu hin hrietna a sukchiengin a sukdet bik hlak. Zirtirtuhai lecture ngaithlak kher lo khawmin mita ei hmu hin thil tam tak ei hriet belsa thei hlak a nih.
 
Chun, Museum a ei thil hlui siekhawm hai hi an thlalak le an chanchin tawi kim takin tawng tum tuma ziekna lekhabute (booklet) hi Museum va sirtu han awlsam taka an chanchin an hriet theina dingin siem thei nisienla  nuom a um hle el. Hi thil thawna ding hin sum le pai a ngai a, sienkhawm  hi thil hi museum ei sawr tangkai zuol lemna ding a ni leiin thil tangkai dinga chun sum ei seng ngam el ding a nih. Hiengang ei thaw naw chun museum ei ngaipawimaw tawk naw tina ning a tih.

         
Thil hlui hai chau ni lovin ei ram le hnam ta dinga mihrang lo liem ta hai chanchin ziekna le an lim hai hi tribe tum tum hai khawm hin a booklet in nei thei seng inla chu ei hnam chawisangtu le mihai hriet hlawna a hung ni thei ngei ring a um. Ei ram le hnam ta dinga mihrang pasal tha le nu tha tam takhai chanchin hriet ta lo dinga a um el ding hi a pawi takzet. Chuleiin, mithiem le lekha ziektu han an chanchin ziekna lekhabu dam hi buotsai hai sienla nuom a um hle.
Don't Miss
© all rights reserved
made with by Simon L Infimate