Tuolsung:
CM in SDO/BDO offices 4, TD Block office 2  le Power Sub station a hawng ding
CCPUR:  Manipur Chief Minister O.Ibobi Singh chu April 24, 2015 khin CCPur district­ah hung a ta,  khuolliena thangin Samulamlan, Sangaikot, Saikot, Lanva, New Lamka, Tuibuong le Kholmun ground haiah SDO/ BDO Offices 5, TD Block Office 1 le Power Sub­Station hai hawng a tih. Hieng SDO/BDO Offices hawng ding haia hin Pu Gaikhangam, Dy. CM chu functional President in thang a ta,  Guest of Honours in  Phungzathang Tonsing (Minister, HEalth & FW, GAD, CADA); Thangso Baite, MP (Lok Sabha); Vungzagin Valte, Parliamentary Secretary (HOrt. & SC/CADA); Dr Chaltonlien Amo, Chairman, HAC; T. Manga Vaiphei, Chairman, MTDC; T.N. Haokip, MLA, Saikawt le Ginsuanhau, MLA singngat hai chu Guest of Honour in thang an tih.
    
CM in SDO/BDO office building a hawng ding hai chu­ SDO/BDO Office building, Samulamlan, SDO/BDO Office building, Sangaikot;  33/11KV Power Sub­Station, Sangaikot; SDO/BDO office building, Saikawt; SDO/BDO office, Tuibuong le TD Block Office building, Lanva le TD Block office building, New Lamka hai an nih.
    
Kholmun Ground­a hin public meeting um a ta, hi huna hin Guest of Honour, Functional President le Chief Guest han thuhrina nei an tih.
            
Prog. dungzuiin April 24, 2015, 8:30AM in Samulamlan; 9:50AM in Sangaikot;10:30AM in Saikawt; 11:30AM in Lanva; 12:10PM in New Lamka haiah office hawngna um a ta, 1:30PM in DC Bungalow ah bu fang a ta, hi zoa Tuibuong­a office building a hawng zovin Kholmun ground­ah public meeting hi a um ding a nih.

AR le Police  han 1 inruithei leh an man
CCPUR: April 19, 2015 zanril lai khan 7­Assam Rifles le Police thangruol han Mandop Leikai, Hiangtam Lamka hmuna Md. Lakib Ali (24) s/o Md. Tayab Ali chu Inruithei leh an man niin Police thusuok chun a hril. A kuta inthawka inruithei mana um hai lai Nitrosun mum 380; Vitral  mum 19; SP le RP mum 1230 a thang a, a suma sutin Rs.40000/­ chuong manhu a nih. Police chun FIR No.38(4) 2015 CCP­PS U/S 21 (C) ND & PS Act  an registered­ a,  thu indawnna an nei mek.

Full power­a neina dinga  hma a lak ding thu
CCPUR: 18­Zenhang Lamka biela MDC ngir tum P. Khamkhanthuam, BA, LLB chun zani zantieng 1PM khan  Beaulahlane, Central Lamka­a a chengnainah tuolsung  chanchinbu reporter hai an hmupui a, MDC ngir a tum thu a hril a. Tuta Autonomous district Council fe danah  Autonomy um lovin  a hminga Dist. Council mei mei, Govt in Dept. 26 ah power 30% vel a pek a, thuneina pumhlum neia a function theina dinga hma a lak ding thu a hril.

DC rawiin DLOs han meeting an nei
CCPUR:  April 24, 2015 nia  CM O.Ibobi Singh CCPur­a a hung ding le inzawmin zani sun dar 11:30 khan DC Office­a BRGF Resource Centre­ah DC CCPur inrawinain  District Level Officers han joint meeting an nei.  Hi huna hin  CM  program detail DC office­a inthawk semdawk ding, BDO le MDC haile inrawntuoa  function neina hmun hall arrangement siem ding; EE/PWD in Samulamlan­Saikawt inkar lampui siet zuolna hmun hai a siem tha ding,  EE/PHED in tui  dawn ding tiengpang maw a phur ding; CMO/Medical Dept. in function hmuna First Aid team a sie ding, DLO hai le VVIP  povin  DC Bungalow­ah lunch an fak ding,  DC, CCPur in April 22& 23, 2015 haiah  function neina hmun ding hai inspection a thaw ding ti le  SP/CCPur in security arrangement a thaw ding ti thu hai relin an hriltlang.

Drugs Abuse thuah Orientation hawng
CCPUR:  Mr S. Khaikhopau Ngaihte, MCS, BO HQ, DC Office chun zani zingkar 10:30AM khan SSPP Complex, Bungmual­ah LRRC in Thanlon le Singngat area­a khuo 7 haia Survey on Drugs Abuse a dinga ‘One Day Orientation program” a hawng.
    
S. Khaikhopau chun, thil thaw ding hrim hrimin survey thaw hmasa lova sin thaw thei a ninaw thu a hril a, survey thaw tuma um chu lawmum a ti thu hrilin, survey thawna ding khuo 7 haia VA, Philanthropic Orgn., Tribe leaders  hai chu LRRC volunteers hai lo thlawp dingin a ngen a, Survey copy chu District Administration kuoma khawm pe dingin a ngen.
    
LRRC a mi 14 hai chun April 23­30, 2015 inkar sung khin inruithei thuah Kangkap, Mualnuam; Songtal; Sinzawl; Kaihlam, Bukpi le  Thanlon khuo haiah survey an thaw ding a nih.

Mitvar bun lovin  Chanchinbu a la tiem thei
CCPUR:  Pi Kungi Famhoite (98) w/o  (L)  Germlien Famhoite of Saikawt, Tuithaphai­a cheng mek chun  mitvar (spectacle) bun lovin lekha a tiem thei a,  Chanchinbu  Hmasawnna Thar khawm mitvar hmang lovin a la tiem thei. Amiruokchu, changsuola a malru a suktliek leia nuom anga a ke a hmang thei tanaw leiin khumbeta umin  nitin hun a hmang mek. Ama hi Hmasawnna Thar Chanchinbu ngaina em em tu ni bawk.  (LRS)


HPC(D) in Press Release an insuo
CCPUR: April 16, 2015 a Mr Lalropui Famhoite, Army Chief; Mr Norbar Sanate, Finance Secretary le Ngurthantluanga Sanate hai Mizoram Police han an manna lei hin HPC(D) chu zamse naw ni a; India danpui hnuoia a thil ngen Autonoumous  District Council unclear 6th Schedule ngenna  chai chuong  bawk naw ni a; Mizoram sawrkarin HPC(D) man rem thei angin inhril hlak sienkhawm, Mizorama hnam mala tam tak an ni leiin man rem chuong ngai naw nih. Hmar hnam thil dit, ngena um hi  hmu a ni hmakhat HPC(D) hi to tawk tawk naw ni a, a thiltuma ngir tlatin hmatieng fepui a tih. In manna chau ni lo, thina chen tuok ngam, hnam  le ram ta dinga inpe an nih. An rinum tuorna hin ra tha, inpumkhatna le inthuruolna tha lem hung intlun a tih. Mana um hai hi  hnam thil (issue) a man an nih ti hi theinghil ngai nawng ei tiu. Mr Ngurthantluanga Sanate (29) s/o  Siemlien, Ngurte, CCPur hi HPC(D) a ni naw a, civil mi a nih. HPC(D) chun Mizoram sawrkar thangpuituhai a hriet a, an thlalak khawm a kawl a, HPC(D) kutah an inpek vat phut an nih. Mizoram sawrkar ta dinga hmalatu le enthlatu suizui a ni a, a thilthaw a tawpsan naw leh a chungah action lak ning a tih. Demand Area a VC inthlangna dinga ngenna siema um zawmtuhai chungah lawmthu kan hril tiin  20­4­2015 nia John F. Hmar, Secy., Inf. & Publicity, HPC(D) General Headquarters, Sinlung in Press Release a siema chun a hril.

Headline:
Zanikhan Ar le Varak 1031 that le phum hmang an nih
IMPHAL:  Lamphelpat a ICAR a Poultry Unit­ah Bird Flu tia ko le hrietlar Avian Influenza (H5N1) a um ti National Institute of  High  Security Animal Diseases, Bhopal, Madhya Pradesh ah finfie a ni ta tiin Pu P.C. Lawmkunga, Chief Secretary chun Media hai a hril bakah official Notification an suo tah. ICAR le a se vel km. 1 a inthawk km. 10 huom sung chu infected zone/Surveilance Zone a puong a ni a, hi area huop sunga hin Ar, Varak le Artui phurlut le phursuok bakah zawr khap a nih tiin Chief Secretary Notification­ah a thang.
    
Arsa, Varaksa le Artui zawr, Ar vai le sie khap hmak a ni thu zanikhan District Magistrate, Imphal West chun Order an suo. Hi order hi thla 3 sunga dinga puong phawt a nih tiin  District  Magistrate, Imphal West Order chun  a zieklang.
            
Bird Blu hri inleng mek laka inveng dan le dona tiengpanga hmalatu ding­in Rapid Response Team (RRT) 10 indin a ni ta a; tu taka Bird  Flu hri inlengna hi ICAR  complex le Central School area sung a ni a, hi biela hin  Ar le Varak thatna sin chu zanikhan tan le tha taka phum an nih. Hi thil thawnaa hin Veterinaary Doctors, Veterinary Field Assistants, Veterinary Attendants, Revenue team, Police le RRT hai an thang a, zani (20/4/2015)  khan Ar le Varak 1031 chuong that le phum hmang an nih tiin Dr N. Rajendra Singh, Director, Veterinary and Animal Husbandary, Govt. of Manipur chun a hril. Vety & AH Department chun Control Room a hawng ta a, 24x7 sung hawng ning a ta,  Bird Flu le inzawma report ding nei, indawn nuom nei le chanchin hre nuom han Telephone Nos. 0385­2450224, 9436890393 le 90892644 haiah indawn thei zing a nih tiin Dr N. Rajendro chun a hril. Ar/Varak neituhai kuoma zangnadawmna pek an ni ding thu Dr Rajendro chun a hril a, sienkhawm pek dingzat ruok chu sukfel a la ni nawh tiin a hril.

Inter­State Road haiah darkar 72 bandh
IMPHAL: Zani zanrila inthawk khan inter­state road haiah JAC of All Manipur Hill Districts Contract  Basis Teachers’ Association chun an thil ngen nawrnain darkar 72 bandh an thaw tan ding niin thusuok an siem. Hi bandh hi ANSAM, KSO General HQ le TYCM han an thlawp niin JAC, AMHDCBTA chun an hril.(UNA)

Grenade pakhat chodawk a nih
IMPHAL: Zanikhan Singjamei Police station huop sunga Naran Konjin Mamang Leikai hmuna Pukhri ding chonaah Hand Grenade pakhat chodawk a nih. Police­ah hi thu hi report pek a ni a, Manipur Police a bomb expert han an va lak a, pawitawk lovin leilet  bula an va sukpuok.

Thu indawn dingin Police han mi 15
IMPHAL: Zani zingkar dar 8:30 vela inthawk khan Imphal West Police Commando hnuoia City Police, Bazar Unit han Paona Bazar biel sungah dappui an thaw a, an nina hrietchienglo mi 15 thu indawn chieng dingin Police station­ah an thuoi niin Police thusuok chun a hril.

Catholic school hai hawng nawk
IMPHAL: DESAM,  AMSU le Parents body thangruola an hmalaknain thla khat zet khara um ta Catholic School­hai chu zanita inthawk khan hawng nawk an ni tah. Catholic Schools 5 khara um hai hin class tha lema an lak pei le stuents kai khawm an hung pung pei beisei a nih tiin DESAM chun an hril.

ATCF in April 29­ah general Strike
IMPHAL: All Tribal Chief Forum (ATCF) Manipur chun April 29, 2015 zanril­a inthawk  khin darkar 24 sung General Strike an tum niin  ei thu dawngna chun a hril. Mahatma  Gandhi National Rural Employement Gurantee Scheme (MGNREGS) fe dana an lungawinaw inentirnaa General Strike hi thaw an tum niin an hril.

Vai pakhat kap hliem a nih
IMPHAL: Aprl 19, 2015 zantieng dar 4:30 vel khan Bijoy Govinda  Temple, Sagolband bulah tu ti hrietlo han Phul Babu Rai (30) s/o Krishna Chandra Rai of  Sitamari, Bihar tuta Uripok Khoisnam Leikai­a Cement Dawr siem chu cycle­a a chuong lai a hnungah an kap a, silaimu chu a awm changtiengpang sirah a fe thleng a, RIMS panpui a nih. Tuta hma khan  an pawl hrillang lo han sum an lo ngen ta hlak  niin Babu  Rai hin a hril.

Others:
Central Jail, Aizawlah sielut an nih
AIZAWL: HPC (D) Army Chief Lalropui Famhoite thanga HPC(D) cadres 3 mana um hai chu zanikhan Central Jail­ah sielut an ni tah tiin  Police thusuok chun a hril. Hieng mi 3 hai hi May 1, 2015 khin Court hmaah inngirtir nawk ni dingin ei thu dawngna chun a hril. Zanikhan Court hmaah inlangtir an ni a, March 28, 2015 a Mizoram Police lambunnaah an thang naw thu an hril. Kan cadres hai chu an area sungah an active a, an inrawl el thei, sienkhawm kei ni chu direct in kan inrawl nawh. Pending case ingzam ka nei ka hriet nawh. Kan Commanders han an thua an thaw a ni thei. Hi thua hin information pek ka ni nawh. Ka hriselnaw leiin active takin kan rawl ta nawh tiin Famhoite chun Court hmaah a hril tiin ei thu dawngna chun a hril.

HPC(D) leh inbiek ninaw nih: R. Lalzirliana
AIZAWL: Ringzo dinga an um naw leiin HPC(D)  pawl chu Mizoram sawrkarin inbiekpui a tum ta nawh tiin Mizoram Home Minister R. Lalzirliana chun a hril. Inbiekna sunzawm nawk a ni theian dingin  Silchar­ah an Chairman, Zosangbera indawrpui dingin palai tir an ni a, March 19, 2015 in Silchar­ah an inbiek a, hi indawrtuona ni 9 a liemna char, March 28, 2015 in kan Police­hai an lambun a, Police 3 an kap hlum a, hi lei hin HPC(D) chu dan puoa hnawl dingin Mizoram sawrkarin a rel ta a nih tiin Lalzirliana chun a hril (PTI)

CEC sin Nasim  Zaidi in a chel tan
NEW DELHI: Chief Election Commissioner (CEC), H.S. Brahma chu April 18, 2015 khan a sina inthawk a pension ta leiin Dr Nasim Zaidi chun April 20, 2015 a inthawk khan Chief Election Commissioner sin a chel tan tah. Dr Nasim Zaidi hi 1976 batch IAS Officer a ni a, August 7, 2012 a inthawka Election Commission of India (ECI) sin lo chel ta le Chief  Election Commissioner 20­na a nih.

CPI(M)  Secretary Gen. tharin Yechury
NEW DELHI: April 19, 2015 khan CPI(M) politburo member, Sitaram Yechury chu CPI(M) General Secretary thar dinga thlang a nih. Sitaram Yechury hi CPI(M) General Secretary pangana a ni a, a term chu kum 3 sung ding a ni a, Prakash Karat a thlak thleng ding a nih. Chun, CPI(M) politburo members thar 4 thlang an ni a, chuonghai chu, Hannan Mollah, Mohd. Salim, Subhasini Ali le G. Ramakrishnan hai an nih.

NDFB (S) hotulien pakhat man a nih
GUWAHATI: Zani hmasa zan khan Assam state a Kokrajhar district sunga Chetnaguri hmuna Police le Army han Joint Operation an thaw huna NDFB(S) a an hotulien pakhat, Samar Basumatary alias Sana chu 7.65mm Pistol pakhat, a mu 3, hand grenade 1 le hmangruo dang hai leh an man niin Defence spokesman chun a hril. Saman Basumatary hi NDFB(S) a Platoon Commander (Chirang) a ni a, kum 2010­2013 inkar sunga Myanmar a training hang zo tah, December 23, 2014 a Adivasi hai thatnaa thang ve niin ei thu dawngna chun a hril.

BTC Chief dingin Hagrama Mohilary
KOKRAJHAR: April 19, 2015 khan Hagrama Mohilary chun  Bodoland Territorial Council (BTC) Chief dingin Assam Chief Secretary, Jitesh Khosla hmaah sesamna a nei. Ama le inruol hin Bodoland People’s Front (BPF) thuoitu, BTC members a thlangtling mi 13, Mrityunjoy Narzary, Rajib Brahma, Daneswar  Goyary,  Alindra Kumar Moshahaary, Shyam  Sundi, Laushrao Daimary, Jagadish Sarkar, Bonjar Daimary, Ansumwi Khungur Boro, Deven Boro, Ganesh Kachary han Executive Member (EM) dingin sesamna an nei. Hi hunsera hin Assam  Governor  P.B. Acharya Dr A. Roy, Principal  Secy, BTC, milien le milal dang dang hai an thang.

Yemen a Indian Embassy Djibouti­ah sawn
NEW DELHI:  Tulaia Yemen rama buoina  um mek le inzawma Sanaa khawpuia Indian Embassy chu Djibouti hmuna sawn  a ni  tah tiin  External Affairs minister Sushma Swaraj chun zanikhan Lok Sabha an hriettir. Yemen rama buoina tlung mek le inzawm hin India chun ‘Raahat’ operation hnuoiah India mi 4,741 le ramdang mi 1,947 an rengin 6,688 hai chu Vuongna le Lawng hmangin Yemen rama inthawk a thuoisuok tiin Sushma Swaraj chun a hril. Sanaa hmuna Indian Embassy hi  April 15, 2015 a kha Djibouti hmuna sawn ni tain Sushma chun a hril a, buoina boruok an kieng hmapo chu hi lai hmun hi  Embassy a hmang  ni dingin a hril bawk.

A nauhai chawmna dingin a Kal zawr a tum
AHMEDABAD: Gujarat a nupa tuokkhat, Rameshbhai Nandwana (34) le a nuhmei Pragna Ben (30) hai chun nau 4 an nei a, chuhai laia 3 hai chun fak an du taluo leiin chawm harsa an ti hle. Rameshbhai Nandwana (34) chun a beidawngin a Kal zawr hiel a nuom thu a hril. An nauhai 4 laia 3, Nandwana (5) chu 34kg, Anisha (3) chu kg. 48 a rik le Harish, thla 18 mi chu 15kg a rik a nih. Hieng naute 3 hai hin khawp an nei naw a, pek zat zat an fak zo pei el a, sunnithlaka an fak ding le an dawn ding buoipui  chu ka nitin sin a nih tiin an nu Pragna Ben chun a hril. An nauhai hi an thau taluo leia lawn thei lo le tho thei lova um an nih.

SF han Maoist 8 an man
MUZAFFARPUR:  Security Fores hai chun zanikhan Bihar­a Muzaffarpur district­ah Maoist cadre 8 an man bakah country made rifles 2 le pressure cooker bomb pahni security forces han dapdawkin an mansa bawk. CRPF, STF le district Police han Suhasi village­a dappui an thawna huna Maoist hai le hin an inkaptuo a,  chu huna Maoist cadre 8 hai hi man an nih.

Smack Rs. 51 lakh manhu leh man
MAHARAJGANJ: Zani hmasa zan khan SSB han Kaushal Kumar (32) chu Thuthibari hmuna Smack 255 grams, Rs. 51 lakh manhu leh an man niin B.K. Bankhoti, Commandant, SSB chun a hril. Thuthibari hi Maharajganj district, Uttar Pradesh huop sunga um a nih.

Jeep eksiden­ah mi 6 an thi
BAGESHWAR: Zanikhan Uttarakhand­a Bageshwar district­ah  Jeep pakhat chu changsuolin  rawlah a tlanliem a, a sunga chuong mi 6 an thi bakah midang 5 na takin an hliem. Hliem hai hi  Bageshwar district hospital panpui an nih.  Jeep hi Haldwani a inthawk Bageshwar pana tlan a nih.

Yemen rama inbeituonaah mi 85 thi
ADEN: April 18, 2015 a inthawka Yemen rama helpawlhai le sawrkar tantuhai inbeituonaah mi 85 zetin thina an tuok niin tuolsung mihai le damdawiin a thawk doctors han an hril. Sawrkar  thlawptuhai (Pro­Government Forces) hai hi Saudi sipai han an thuoi a ni a, indona Vuongna hmangin an khingpui hai hi an bei a nih. Helpawl le sipaihai inbeituona hi March 26, 2015 a inthawka tan a nih.

JMM Working President dingin Hemant
JAMSHEDPUR: Sibhu  Soren chu Jharkhand Mukti Morcha (JMM) President ding le Jharkhand CM hlui, Hemant Soren chu JMM Working President  dingin JMM 10th Central Convention chun lungruol takin an thlangtling. Working President hi Party in tul a ti leia siem thar a nih tiin Suprio Bhattacharya, General Secretary, JMM chun a hril. Sibhu  Soren hi JMM President  dinga term 8 zet a zawna thlangtlinga a umna a ni tah.

China President Pakistan­ah an zin
ISLAMABAD:  Chinese President Xi Jinping chu ni 2 sung cham dingin zanita inthawk khan Pakistan­ah an zin.  Xi Jinping hi  Pakistan President Mamnoon Hussain, PM Nawaz Sharif, Federal ministers le services chiefs 3 han an lo tuok. Xi Jinping hin dollar 46 billion­a sumdawngna ding a puong beisei a nih.
-------------------------------------------------------------------------------------------------------
VAWISUN THUPUI
Lalpa, nangin ritlonahai in chik chun, Aw Lalpa, tu am ngir an ti leh? Nisienlakhawm, i kuomah ngaidamna a um a nih, |iha i um theina dingin.   ­Sâm 130:3­4

Editorial:
Bird Flu natna hri
Swine Flu natna hri inleng leia Manipur mihai lungril inhawi lo taka ei la um lai zingin tuhin Bird Flu natna hri Manpur­ah an leng nawk ngei ti finfie nawk a ni tah. Bird Flu hi Manipur ta ding chun thil thar a ninaw a, kum 2007 khawm khan a lo tuok ta a nih. Hi lei hin an veng dan le an enkawl dan kawnga chun Veterinary and Animal Husbandary Department, Manipur hnuoia thawk Doctors han experience an nei tha le an thiem ngei ring a um. Hi lei hin Bird Flu natna hri laka chun titthawng taluo ding umin an lang nawh. Hi baka hin invengna sin an thaw tan nghal ta leiin thil lawmum takel a nih.
      
Ei state a Bird Flu natna hri inleng hi titthawng  ding a la ninaw chu a tha pa tak  chu invenglawk ding ti hrietzing ding a nih. Sukdamna nekin invenglawkna hi a tha lem ti thu kha hriezingin mani hriet le thei ang anga inveng hi ei mawphurna a nih. Swine Flu le Bird  Flu hai hi rama um le in a ei vai ran haia inthawka intan le inkai thei a nih ti ruok chu hrie a, fak le dawn, thokang le thilhring hai lakah  ei inveng fimkhur a tul.  Zal huna thosilen zar that, fak le dawna fimkhur ding le fak ei nei ding chun fak hmaa kut fai taka sawp hi invengna tha pakhat a nih.
      
Kum 2007 a  Chingmeirong Area sunga Bird  Flu natna hri inleng huna khan Ar le Varak tam tak that a, phum hmang an ni ang bawkin Artui le Varak tui hai po po khawm suksieta phum an ni a. Ei ran doctor­hai  hmalakna leiin kha huna khan Bird  Flu natna hri leia thina tuok em ei um nawh. Hi natna hi mihriem thina thei natna a ni ve leiin ei inveng fimkhur hle  chu a tul a nih. Swine Flu  natna hri laka ruok chun mi 2 laiin thina an tuok pha a nih ti kha hrie zingin tuta Bird Flu  natna hri inleng hi ngaitha  chi ninaw nih. Inveng fimkhur chu a damdawi tha tak a nih.
      
National Institute of High Security Animal  Diseases,  Bhopal, Madhya Pradesh chun Lamphelpat a ICAR a Poultry Unit ah “Bird Flu” tia hrietlar Avian Influenza (H5N1) natna hri a um ngei  a nih ti finfiena (confirmed) a nei tah. Hi lei hin ICAR le a se vela km. 1 a inthawk km. 10 huop  sung chu Infected Zone/Surveilance Zone in a puong a, hi area huop sunga Ar, Varak le Artui/Varaktui phurlut le phurdawk bakah zawr khap hmak a ni thu Chief Secretary, Pu. P.C Lawmkunga chun official Notification an suo ta a nih. Hi baka hin Ar, Varak le Artui/Varaktui um po po chu that le suksieta phum hmang vawng dingin thusuok a siem ta a nih.
      
Ar, Varak, Artui le Varaktui neituhai sawrkarin zangnadawmna a pek ding thu Manipur Chief Secretary official Notification a hin zieklang a ni a. Hi thil hi a taka sukpuitling  ni ta sienla nuom a um. Kum 2007 a Chingmeirong Area sunga Bird Flu inleng tum khan Ar le Varak neihai zangnadawmna pek ding ti an ni a, sienkhawm pek vawng an ninaw leiin harsatna nasa tak a tlung a, Manipur a Chanchinbu haia Advertisement insuo man (bill) khawm tuchen hin pek lovin a la um a nih. Khangang  khan chu ei State sarwkarin thaw tanaw sienla nuom a um.
           
Manipur­ah Bird Flu natna hri an leng ti hriet a ni le inruol hin Ar Farm nei le Ar a sumdawngtuhai chun an  Ar neisa hai an thupruk tan nawk ta leiin Arsa a hung vang nawk ding chau  ni lovin a man nasa takin a hung kaisang nawk ding niin an lang. Hiengang thil hi a tlung nawna  ding khawmin ei state sawrkarin thang la ve ngei sienla nuom a um. Thil tha lo le indiklo hi chu do ngam ei tiu.

Post a Comment

Powered by Blogger.