Tuolsung:

CMO in an sin \ha taka thaw dingin
CCPur: Dr Thangchinkhup Guite, CMO le Thangthianmuan, Dist. Consultant & DPO hai chun zani zingkar khan CMO Mini Conference Hall­ah National Vector Borne Disease Control Program/CCPur hnuoia Multi­Purpose worker (MPW) thar mi 50 hai joint meeting an neipui. MPW hai chu an sinthaw dan ding hrilhriet an ni bakah an sin \ha taka thaw seng dingin CMO chun a ngen. Ni 7 sunga Bank Account hawng seng ding, hun tiem sunga Bank Account hawng lo hai chu harsatna an tuok leh an nin maw an phur ding thu an hriettir a, tukum ruotui a tla inhma leiin mani thawkna hmun senga duty a, Water Borne Disase, Dengue outbreak um thei ding lakah inbuotsai dingin CMO chun an hriettir bawk.



SP mum 501 le Nitrosun 190 leh an man
CCPur: April 17, 2015 zantieng 3:40PM vel khan Mr Emmanuel Fimate, MPS, SDPO/CCPur inrawinain  CCPur Police hai chun Torbung  Bazar­ah CCPur district­a inruithei hung zawr hlaktu  Md. Himad Ali (34) s/o Md. Ali of Kwakta Ward No. 8, Bishnupur District an man a. A kuta inthawk SP mum 501 le Nitrosun mum 190 leh an man niin Police thusuok chun a hril. Md. Himad Ali hi zanikhan Police han CJM/CCPur hmaah an inlangtir a, FIR No. 37 (4) 2015 CCP­PS U/S 21 (C) ND & PS Act  an registered khum.

HAA GHQ inrawinain an lo tuok ding
Tui|haphai: Lelte Weekly (Mizoram) in a buotsai Lelte Award sem huna Lelte Chibil Award 2015 (Hmar) dawngtu Nk. PC Lalawmpuii @Emma Puii Pachuau d/o Pu PC Rawngbawla of Rengkai, CCPur le Manipur­a inthawka hi Award va dawngtu hai chu vawisun April 19, 2015, 1:00PM hin Hmar Artistes’ Assn. (HAA) inrawinain  Rengkai Community Hall­a innghakkhawmin lo tuok ning an ta, Khuga Dam sak Prayer Mountain, Mata khawsak lai lo va hmuok dinga programme siem a nih. Hi huna hin a nuom taphawt fekhawm le mani thei ang anga inthawk suok seng dingin HAA chun inhriettirna le ngenna a siem. Chanchin hre nuom han HAA GS  +919856957380 ­a biek paw thei ning a tih.­ LRS

CM in April 24 in TD Block 2 a hawng ding
CCPur:  Manipur CM O.Ibobi Singh chun April 24, 2015 khin New Lamka Khominthang­ah New Lamka TD Block Office le Tualnuam khuoa Lanva TD Block Office ding hawng a tih. Hi ding le inzawm hin zanikhan Lunminthang Haokip, IAS, DC, CCPur inrawinain April 20, 2015, 11:30AM khin DC Office­a BRGF Resource Centre­ah District Level Officers han joint meeting nei an tih. An zawmpui Officer hai chu hi meeting­a \hang seng dingin DC in an hriettir.

Tower siemzo leiin electric ei hmu \ha
CCPur: April 5, 2015 nia thli le ruo inthuoa a hrang le sur leia Kwakta hmuna 132/33 KV­Ningthoukhong Power Sub Station a inthawk 132/33­KV Khengjang Power Sub Station­a electric  meivar supply­tu tower 2 hai siemzo a nita leiin zani hmasa a inthawk khan 132/33­KV Ningthoukhong Power Sub Station a inthawk 132/33­ Khengjang Power Sub Station-ah electric power a hung pek thei ta leiin CCpur Dist electric meivar ei hmu \ha deu niin Electricity Deptt/CCPur a inthawk ei thu dawngna chun a hril.

In report­a Duty thaw lo dingin
CCPur: All Manipur VDF Welfare Association (AMVDFWA) chun Manipur sawrkar kuoma  an thil ngen hai nawrnaa Bandh, strike le Economic  Blockade an thaw hnung khawma Manipur sawrkarin a la ngai saknawna thuah an tuornat thu an  puong  a. Official taka  sawrkar le inbiekremna nei a ni hmakhat VDF personnel hai chu mani umna post chita in report a, tukhawma duty thaw lo ding tiin zanita thusuok an siema chun an zieklang. Police officer  khawm thawluinaa duty inthaw tir lo dingin  AMVDFWA chun  an ngen.

NGMF  Main  event Nov. 3­5 sung
CCPur: Nationwide Gospel Music Festival (NGMF) 2015 Motivational  Program a vawithumna nei zo hnunga Executive meeting chun NGMF, 2015 Main event chu November 3­5, 2015 sunga  nei dingin an rel. NGMF Main event huna hin CCPur khawpui sunga Kohran tum tum han  chi le kuonga tukhawm thlierhran lova hnam tinin a hawnpuiin Pathien inpakna huna hmang ning a tih. Hi programme hlawtling le hlim tlang taka hmang a ni theina dingin  Kohran le pawl (Organisation) tum tum hai khawmin hi programme le intuoka programme siem lo dingin NGMF Organising  Committee Gen. Sy. Lalnghaisan Intoate le T. Thangthuam, Chairman han ngenna an siem.

Hmar Film thar tlangzar ding
Tui|haphai:  Sielmat ICI K|P in hun sawt taka inthawka an lo buoipui tah “Puitlingna” ti  Hmar Film thar chu  April 21, 2015, 7:00PM khin  Rev. Lalneikhup Hmar, Secy., Fin. ICI in mitin en thei dingin tlangzar a ta, inhlanna nei nghal bawk a tih.  Film  review  Rev. H.P. Runremthang, YCO, ICI in nei a ta, hi huna hin Nk. Mariah L. Darngawn, Nk. Lawmnakim, Nk. Gloria Khawlhring  le Nk. Daisy Khawbung  hai khawmin hla sak an tih.
    
A film in suklang a tum tak chu tulai kohran, khawtlang le insunga ei khawsak dan tlangpui a ni a, director chu Tv. John Lalmalsawm Hmar a ni a, Lemchangtu tak hai chu Tv. Ramtharlawm le Nk. Vasty Lalengvar hai an nih. A film hi darkar 1 vela sei a ni a, khawvel hmun tum tuma hnam dang hai khawm lo en thei dingin sub­title sap­\awnga siem a ni bawk. mitinin hlutsak taka lo inchaw seng dingin Joshua Amo,  Secy. Film Production Committee chun ngenna a siem.

NFCH meeting nei
CCPur: Zanikhan Mr Lunminthang Haokip, DC, CCPur inrawinain National Foundation for Communal Harmony(NFCH) thuah DC Office­ah meeting nei a nih. Hi huna hin case pahni rel a ni a, case 1 finalised thawin Imphal tienga thawn dingin an rel a, case 1 chu detail repor la nghak dingin an rel.

Headline:
Fakrukna le thamna a re hmakhat NE bielah hmasawnna um thei ngainaw nih  ­ Amit  Shah
Imphal:  Zankhat riekin zanikhan  BJP National President Amit Shah, Ram Lal, National Secretary (Organisation) le National Executive Member Tapir Gao hai chu Imphal an hungtlung a, Hotel Classic, Imphal­ah an tlung. Kohma a inthawk Helicopter­a Imphal hung pan dinga ti an ni a, sienkhawm boruok um dan hrietlawk thei a ninaw leiin motor lampuiah an hung a, BJP thlawptu tam takin Senapati­ah an lo va tuok. Th. Chaoba, President,  BJP Manipur in a chengna in Utlou hmuna sunbu a lo buotsai an faktlang hnungin Hao Ground, Singjamei Chingamathak, Imphal West District an pan.
    
Hao Ground,  Singjamei Chingamathak hmuna vantlang inkhawmnaah Amit Shah chun Hindi \awng hmangin thu a hril.  Fakrukna le thamna hai a re hmakhat chu NE bielah hmasawnna um thei ngainaw nih tiin  Amit Shah chun a hril.  Sawrkar  thlungpuia inthawka sum hung hai a hmangna ding indik takah hmang a ninaw bakah a tlungna ding hmun a tlung naw a, a dawng ding han an dawng ngai nawh tiin NE biela  state 8 um hai laia state 5 a Congress sawrkarhai a dem. PM in NE hmasawnna ding a ngaipawimaw hi ngaisaklo thei lo  a nih.  NE biela states 5 haia Congress sawrkar han tribal le hnam  tlawm lem hai an ngaisak nawh tiin a dem bawk.
    
NE biel hmasawnna ding PM Narendra Modi in a ngaipawimaw hle leiin  thla tin NE bielah Cabinet ministers 3 le Union Ministers of State 5 an hung inzin hlak a nih. Tuta kum fe meka hin NE biela lampui siemna dingin sawrkar thlungpui chun budget­ah  Rs. 200 crore le Manipur Sports University indinna dingin Rs. 100 crore a sie a nih. Manipur tlangram biel haia ADC election hung um dinga hin BJP an hrat  phat chun  in mamaw le in dit angin ADCs 6 han Power & function hung nei thei an tih tiin Amit Shah chun a hril.
    
Amit Shah chun vawisun hin state BJP Unit Office huong sunga bawl Syema Prasad Mukherjee Hall le Ibudhou Shanglen hawngna nei a ta, hi zo hin  BJP \huoituhai inhmupui a ta, chu zova Imphal a suoksan nawk ding nia hril a nih.

CM in SDO Office, PS le  Bank a hawng
Imphal: Zanikhan Senapati Headquarters a SDO Office, Police Station le Bank hai Manipur CM O.Ibobi Singh in a hawng. Hi huna hin CM le Dy. CM, Ngaikhangam han thu an hril a, tlangram le phairamah inangrawngin kan sawrkarin  hmasawnna sin an thaw a, an la thaw pei ding a nih tiin an hril. Hi huna hin IFCD minister Ngamthang Haokip; Parliament Secretary Victor Keishing le MLAs pani Yamthong Haokip le Th. Shyamkumar hai khawm an \hang.

Ram Muivah le W.L. Hangsing Addl. CS­ah
Imphal: Zanita Manipur sawrkar in Order an suo dungzuiin Ram Muivah, IAS, Principal Secretary (GAD) le W.L. Hangshing, IAS, Principal Secretary (IFCD & PHED) hai pahni chu Additional Chief Secretary a inkaisangtir ve ve an nih.

AR Major an sukhliem pal
Imphal: Zani hmasa zan dar 8 vel khan 11Assam Rifles a Major S.K. Srivastaba chu Moreh hmuna a 9mm Pistol chawi lai a sukpuok pal leiin silaimu’n a deng hliem a, inrang takin 183 Military Hospital panpui a nih. A hliemna ruok chu an rik nawh.

Prof. post 5 le Asst. Prof. post 10
Imphal: National Institute of Technology (NIT), Manipur hnuoiah Professor post 5 le Assistant Professor post 10 a ruok. Hnina lekha peklut theina hun nuhnung tak  May 11, 2015 a nih. Thu chieng lem NIT, Manipur website:http://nitmanipur.ac.in ah hriet thei ning a tih.

Kangmei suokin  cheng nuoi tel man a kang
Imphal: Zani zing dar 10 vel khan Keisamthong Longjam Leirak Machin, Imphal West district­ah kangmei a suok a, Rice Mills 2, buhum tam tak, Dawr 3 le pindan pakhat a kang ut vawng. Thil a kangsiet hi cheng nuoitel manhu ni dinga hril a nih. Kangmei hi electric short  Circuit lei ni dinga an ring thu Fire Brigade  han an hril.

Others:
Press Enclave Project a dingin
Aizawl: Tulai hnaia Aizawla van zin DoNER minister Dr Jitendra Singh le BJP National President, Amit Sha han Press Enclave a hung hlawtling ngei theina dingin hma hung lang kan tih tiin MJA \huoituhai thu an tiem. Dr Jitendra Singh chun hi project file a dawkan a tlung huna a ngaipawimaw ding thu a hril a. Amit Sha chun, ‘theitawp suong ka ta, hi Project  file hi kei ngeiin DoNER Minister kutah pein lo hrilpui ka tih” tiin MJA \huoituhai a hril. Press Enclave hi chanchinbumihai chengna ding a nih.

Hotel Ashok a inthawk MPs 30 sawndawk ding
New Delhi: Delhi khawpuia Hotel Ashok a chun MPs 30 vel deuthaw  thla 8­10 vel an um ta a, sengso a tam leiin hieng MP­hai hi Hotel Ashok a inthawk state Guest House annawleh Hotel man tlawm lem haiah sawndawk ning an tih tiin sawrkar thusuok chun a hril. September, 2014 chen khan Hotel Ashok um man hi ni khatah Rs. 7,000 a ni a, tu ruok hin chu Rs. 9,000 a ni tah. Samrat Hotel le Janpath Hotel haia chun  nitin Rs. 6,000­7000 a ni a, state Guest House haia  chun ni khatah Rs. 1,000 a ni tlangpui a, an manna tak hai chu Odisha Bhawan Rs. 45 le Assam Bhavan Rs. 50 (per day) an nih. MPs han Hotel a umna man an bat hi Rs. 2025 crore vel a tling ta niin Indian Tourism Development Corporation (ITDC) thusuok chun a hril.

Rahul  in loneituhai an hmupui
New Delhi: Zanikhan  states le UTs hran hrana loneituhai chu AICC Vice President Rahul Gandhi in an hmupui. Loneitu han an mamaw le harsatna an hril hai chu uluk takin a ngaithlak pek. Vawisun hin Ramlila Maiden hmuna NDA sawrkarin Land Acquisition Bill inpuia a putlut dodalnain  Kishan Rally nei an tih. Congress party chun hi Bill hi mirethei le loneituhai dodaltu a nih tiin an hril. Kishan Rally a hin AICC President Sonia Gandhi le AICC Vice President Rahul Gandhi han thu hril an tih.

Hritlang damdawi siemna factory dapdawk
Kolkata: Zani hmasa khan India le  Bangladesh inrina bul hnai, West Bengal state a North 24­Parganas District sunga Amudia hmuna 152Bn.  BSF han dan kal le phalna nei lova hritlang damdawi (Cough Syrup) siemna (factory) an dapdawk a, Hassan Kabir Molla alias  Dimpal Molla (35) of Nabadkathi Mollapur village, Amudia manin Cough Syrup full bottles 302, bottle ruok 1,500, polishing machines 3 le a tui bottles 3, bottle sealing machine 3, wooden frame 2, cough syrup company hming le a damdawi hming inziekna stickers 110, breaker glass tube 1, damdawi tui 40 litres, thil sip chi 5 le ganja 3.4 kg dapdawkin an man. Cough Syrup hi Bangladesh a thawn lut hlak a nih.

Karnataka State­ah state hran ngenna
Bangalore: Karnataka state sunga North Karnataka biela chenghai chun ngaitha bik niin an inngai a, an state sarwkarin North karnataka a ngaisak nawh tiin North Karnataka state siem  nisienla ti dita ngentu an hung um \an tah. Karnataka state hran ngentu hai lai hin MLA pahni an \hang a, chuonghai chu, Hukkeri A/C a BJP MLA Umesh Kattti le Devarajhipparagi A/C a Congress MLA AS.  Patil Nadahalli hai an nih.

Minutes 4 sungin nau inphir 5
Houston: Haptakar liemta khan USA a Woman’s Hospital of Texas, Houston ah nupui pakhatin minutes 4 sung chauvin nau inphir 5, nuhmei vawng a nei a, an rengin an dam vawng a, nautehai  le an nu hriselna khawm a \ha tiin a nau inneitirtu Dr Alexander Reiter chun a hril. Naute 5 hai hmingin Olivia Marie, Ava Lane, Hazel Grace, Parker Kate le Riley Paige phuok pek an ni tah. Kum 2014 khan hi Hospital­a hin nau inphir pahni tuok 318 le nau inphir pathum tuok 16 an pieng. Nau inphir neitu hi Mrs Danielle Busby a ni a, a pasal hming chu Adam a ni a, a hmain nau nuhmei  pakhat an lo nei ta bawk. USA a nau inphir 5, nuhmei vawng piengsuok hmasa takna nia hril a nih.

Toll Free Telephone number
New Delhi: Union Minister for Development of North East Region (DoNER) Dr Jitendra Singh chun NE biel mihai ta dingin toll Free Telephone number hawng vat a ni ta ding thu zani hmasa khan a hril. Hi Phone number a hin phone hmang man um naw ni a, NE biel ta dinga thurawn \ha pe nuom le inhnikna nei taphawtin DoNER Ministry bie thei an ta, Nodal Officer in phone call hi a lo  dawngsawng hlak ding a nih tiin a hril. Telephone Call theina ding chu 011­23022304 niin a hril. A hmain “DoNER at Doorstep” ti DoNER hin a lo hawng ta a nih.

Pak. MSA han India Ngamantu 47 an man
Porbandar: Pakistan Maritime Security Agency (MSA) han India Ngamantu 47  le an lawng 8 hai chu Gujarat Coast a Jahu Port bulah an man a, Karachi Port tieng an \huoi niin Manish Lodhari, General Secretary, National Fish Workers Forum (NFF) chun a hril. Thal 6 liemta sung khan Pakistan chun India Ngamantu 400 le an Lawng 75 zet a man ta niin Manish Lodhari chun a hril.

Damsung lungin intang dingin
Dhanbad: Zanikhan Jharkhand State a Additional and Session Court, Dhanbad a Additional District Judge, Nikesh Kumar Sinha chun Uttar Pradesh a Balia District Board Chairman, Ramadhir Singh chu tuolthatna case ah damsung lungin intang dingin thiemnaw an changtir. Ramadhir  Singh hin Trade Union \huoitu Binod Singh a that tia intum a nih.

Afghanistan a bom poukah mi 30 thi
Kabul: Zanikhan Afghanistan rama Jalalabad khawpuia Bank branch pakhatah thichil bomb a puok a, mi 30 an thi a, midang 80 chuong an hliem. Thi le hliem hai lai hin civil mi 1, Police le paramilitary fores hai an \hang. Civil mi le vengtuhai hi an hlaw la dinga bank a fe an nih tiin official thusuok chun a hril.
---------------------------------------------------------------------------------------------------------------------

VAWISUN THUPUI
Lalpa chu inpak ro, Lalpa hming chu inpak ro; Aw nangni Lalpa siehlawhai, ama chu inpak ro; Lalpa ina ngir hlak a, Nangni ei Pathien in inhuonna sung tuollaia ngir hlakhai.      ­Sâm 135:1­2

Editorial:
Khawsak le khawthlang ramhai

Tulai khawvela mihai ngaisang, inza le entawn hai chu ram changkang, ram hausa, thil thiem hau le thil thaw thei hai an nih. Tienlaia inthawk le tuchena khawthlang ram, ei ni rawiin sap ram ei ti hai ei la ngaisang zing theina khawm a chunga ei hril hai lei a nih. Khieng thil hai po po an nei theina san chu, Pathien thu an awi a, an t aima a, an ringum a, an indik a, an tuorsel a, thil a thlawna hmu   nekin  mihai \hangpuitu le mi retheihai an sawmdawl  hlak lei a nih ti inla ei hril suol taluo ring a um nawh. Misuol nekin mi \ha, mi ringum lo nekin mi indik an tam lem tlat leia mihai entawn le ngaisang an la nizing a nih.
      
Khawthlang ramhai mi ngaisang le entawn tlak an ni ang bawkin tulai hin khawsak ramhai chu mihai ngaisang, inza le entawn an hung ni ve ta a nih. India sawrkarin “ Look East Policy” an duong suokna san hi ‘khawsak ramhai khi thlir ei tiu, entawn tlak an nih’ a tina ni ngei a tih. India chau ni lovin khawvel pumpui el hin a bik takin China hi a thlir \hup ta a nih ti a hrietu ni ve a hun tah. 
      
Khawsak ramhai hausakzie, an ram changkang dan le an taimak dan hai a hmuna hang hmu ve phak naw inlakhawm TV hmangin ei lo hmu phak ve ta a, entawntlak chu an va ni ngei de aw! An thil thaw taphawtah taima tak le ringum taka an thaw leia hung ropui, changkang le hausa an nizie khawm a chieng khawp el. Tourism le sumdawngna tienga an insangzie le an fepui danah lungril chiterek an put nawh ti ei hmu thei a, hieng hi entawntlak le ngaiven tham a tling a nih.
      
Ei hmel inangpui, pumduonga khawm ei intietpui khasak hnam le ramhai khi sap ram annawleh saphai ei ngaisang bek bek hlak ang hai nekin an nep chuong nawh ti an lang chieng a, an khawsak le an khawpui  changkang takzie hi mak takel a nih. Chun, an ni ngei khawm hin sap, mingo le milien hai hi ienga khawm an ngai bik naw a, tluk lo enin an en bik naw a, an \awng khawm an ngaisang bik naw ti an hmu thei. Khawsak ramhai hi ei pi le puhai lo umna le in\anna an ni a, an ni le ei ni rawi chu inthlau takel, hnuoi le van kar hla anga um ei ni tah. An hlawtlingna bul tak chu iem ning a ta ti hi chik taka ei ngaituo nuom a um hle.
      
Ei ram \huoituhai hi khawsak le khawthlang rama inzin hlak an ni a, sienkhawm \hanghar phana’n an hmang chuong nawh. Tuchen hin hun hmatieng ding sei tak thlirna tieng nekin thil pawn inlang, party le an biel sung bak hriet le ngaituo an nei nawh. Inthlang nawka invawr tling dan ding le party dang vuok siet tum bak hi ei politician­hai lungrilah hin a um naw mani chu aw ti theiin a um. Chuongang bawkin a mipui tam lemhai hlak chun BPL, NREGS, Contract, sawrkar sin le Minister thil  ngen bak ei lungrilah a um naw mani ti theiin a um. Hmathlir nei lo, ramdang le stae danghai khiva an um ta ti khawm hre lo, puotieng inchei nal zur, mani umnaa lungawi le thawveng em em a um, hieng hi chu iengtik am ei ram changkang a ta?
    
Khawvel tukvera dak suokin lungril thar ei put a hun tah. Ei state ku hi “Delhi Drip” a hring ei nih. Hnam inzaum ni dingin intodel a ngai, mi chawm hlawm ei ni sung chun mihai hmusit nizing ei tih. Ei sawrkar hin khawsak ram China, Thailand, Korea, Japan, Malaysia etc. haia khin study team tir sienla, sector hran hranah ei ram ta dinga thaw ve thei thil an neihai enkuolin, an hlawtlingna thuruk hang hrie chieng hai sienla nuom a um.






Post a Comment

Powered by Blogger.