Tuolsung:
Vangaitlang  lampui black­top \an mek
CCPur: Vangai tlangdung lamlien siem meka um chu tuhin Black­top­a siemna dingin hmangruo, khawl, Road Roller, Lung hernawina (stone Crusher) le a \ul dang danghai phurlut mek a nih. Pastor  Lal\anpui in Pathien kuoma \awng\aina a nei pek zovin Engineer le Contractor­hai chun biel tieng an pan. Khawvel boruok le fur ruotui  tlak leia harsatna a um naw chun Pathien le bieltu MLA Pu Dr Chaltonlien Amo zarin lampui \ha ei nei vat veisei a nih tiin Pu Glory Wilson, Secretary, Tipaimukh Kendra Congress Committee a inthawk ei thu dawngna chun a hril. Chun,Tuiruong leilak daw meka um sin thaw dan le a ngirhmun enfel dingin Addl. Chief  Engineer le Suptd. Engineer hai khawm a hmuna zu enfel dingin  fe vat  tang an tih tiin ei thu dawngna chun a hril bawk.


Tiddim Road keklienna dinga survey zo a ni tah: P.  Tonsing
CCPur:  Zani zantieng 1:30PM khan Health Minister Pu Phungzathang Tonsing chun Beaulahlane­ah YPA Central Lamka Hall a hawng a, Pastor Letzathang Guite, Local Pastor, EBCC Central lamka in \awng\aina in an hlan. Hi huna hin Pu Lunminthang Haokip, DC, CCPur chu guest of honour in a \hang.
    

Minister chun, thil\ha hai entawna ching pei ding, a \hanaw hai hnawl pei ding, chingdan thleng ngai hai khawvel hmasawn dungzuia ei thleng pei ngam a \ul tiin a hril. BJP inrawina hnuoia Central sawrkarin Kristien sakhuo kal zawnga hma a hung lak chu  na a ti thu a hril. Khuga Dam­a tui tam tak a um a, khawpui sunga tui supply­na dinga pipe man dingin CM in Rs. 2 crore a sanction thu, Lamka TD Block khawm block pahni N. Lamka TD Block le Tualnuamah Lanva TD Block bawl zo a nit a a,  April 24, 2015 in Manipur CM in hawng a tih tiin minister chun a hril.
    
Tidim Road lampui keklienna dingin Keisampat­Bishnupur­Moirang­CCPur­Khuga Dam chen survey zo a nita a, lampui keklienna dingin sum a lut rawn ding leiin Cabinet­ah putlut nisienkhawm sawrkarin sum le paiah harsatna a nei bakah CCPur district. A ram feet sq. 1 ah sawrkarin compensaton Rs. 25  dinga a bituk chu Rs. 300 ni dinga revise thaw mek a nih. District Hospital khawm khum 100 a inthawk khum 200­a upgrade a ni a, sawtnawte hnunga Children Ward building thar bawl ning a tih. CCCPur District­a Medical College a um theina dingin process a fe mek a, thil \ul hai sawrkar thlungpui kuoma peklut a nitah tiin Minister chun a hril.
     
DC, CCPur chun, lampui bula in bawltu han tuta inthawk kum 50/100 thlir a, mipui \hatna ding a ni leiin lungril lien tak puta, lampui hnai taluoa In bawl lo dingin a ngena, ei hmasawnna ding  le mipui ta dinga thil\ha a ni phawt chun  lungril lien tak put dingin  mipui hai a ngen.

ADC  Chairman in Showroom a hawng
CCPur: CCPur district­a TVS 2­Wheeler show room hmasatak ‘Tete Auto Service, Tiddim Road, Hmuia  Veng­ah zani 2:00PM khan Mr Langkhanpau Guite, Chairman, ADCC chun a hawng a, Rev. F. Laldawngliana chun Pathien kuoma \awng\ainain an hlan. TVS­2wheeler showroom hawng theia a um chu lawmum a ti thu Langkhanpau Guite chun a hril.


One Day Photo Exhibition
CCPur: Zanikhan District Information Officer, CCPur huoihawtnain YPA Hall, Hiangtam Lamka­ah ‘One  Day Photo Exhibition and 5 Days Interpersonal Communication Campaign’ hawng  le nei \an a nih. Hi husner hi Pu Lunminthang Haokip, IAS, DC CCPur le Pu Somorjit Salam, MCS, Director, IPR, Survey  & Settlement han an uop ve.
    
DC chun, DIPR hi  sawrkarin Development scheme tum tum a thaw hai mipui  hmua pholanglangtu  department pawimaw tak a ni thu; DIPR chu DC office­a NIC fethelngin govt. Activities hai  thlalak thun pei dingin an fui. A thua ziek el nekin a thlalak hi mipuiin an hrietthiem lem tiin a hril bawk.
    
2nd Session a chun Ms Joicy, PO, DRDA/ CCPur in ‘Income Generation & Poverty Elevation” ti thupui hmangin thu a hril a, Khumi Gangte, Dist.Intervention Coordinator, SSA/CCPur chun Education  chungthu le Dr Lalzarzolien, MO chun Health chungthuah thuhrilna an nei.

Saiip puon sila suol thupha \awng\ai ruolna
CCPur: Ei khawtlang, ei ram le hnam ta dinga Saiip puon sila suol thuphachawi \awng\ai ruolna programme siem a ni a, inhnikna nei taphawt  \hang dingin Ms May Rose chun fielna a siem. April 19, 2015, 12:30PM in Sielmat  field; April 20, 2015, 7:00PM in Lamka, Senvon  Drugs dawr tuol; April 23, 2015, 12:30PM in Khawmawi Ramthar thlanmuol; April 27, 2015, 7:00PM  in Saidan (Notice Board lai) le April 30, 2015, 7:00PM in Thingchom (field) haia nei ning a tih.

3­Day Non Residental SMC training
CCPur:  Zani 11:00AM khan Synod Hall, IB Road, CCPur­ah SSA­RTE/CCPur hnuoia Community Mobilization huoihawtnain “3­Days Non Residential SMC training 2014­15” \an a ni a. Training hi T. Goukhomang, ZEO, CCPur in a hawng.
    
Right to Education (RTE)  um hma khan khawpui  puotienga um  nu­le­pa  han mani nau hai school inkaitir neka sin inthawtir an nuom lem a, sienkhawm RTE a hung um china inthawk nu le pa han nauhai lekha inchuk an hung ngaipawimaw \an thu ZEO chun a hril a, Nu le pa mawl tak tak  hai education pawimawna hrilhrietna kawnga  School Management Committee  han mawphurna lien tak an nei thu   a hril.

Headline:
Union Home Ministry in CBI insuitir a nuom  nawh: O.Ibobi Singh
Imphal: Zanikhan Manipur Pradesh Congress Committee (MPCC) in Congress Bhavan, B.T. Road, Imphal­ah  Dr B.R. Ambedkar piengchampha a vawi 124­na an lawm a, hi huna hin Manipur  CM O.Ibobi Singh le Dy. CM Gaikhangam hai khawm \hangin thu an hril. VDF pawl thil ngen hi thil awm le  pek chi a nih. Amiruokchu, Manipur sawrkarin sum harsatna nasa tak a tuok a,  State sarwkarin an thil ngen  tuela thaw pek thei ngirhmuna a um naw a, an thil ngen hi an hlawtling ding chun an la nghak a \ul a nih. Chun, bandh le Economic Blockade thaw nekin sawrkar leh inbieka thil rel fel le inhrietthiemna nei a \ul a nih tiin Pu O.Ibobi Singh chun hi huna hin a hril.
    
December, 2014 a Tombisana High School lo ni hlak compound sunga mithiru iemanizat  chodawk a nina thua khan Manipur Cabinet meeting in CBI insuitir  dinga a rel angin Union Home Ministry  kuomah   CBI or Agency pakhat insuitir ni  raw seh tiin ziek meuin lekha a pek a. Amiruokchu, Union Home Ministry chun CBI insuitir a remti naw thu ziekin an mi hung  hril. State sawrkar  chun hi thu hi CBI insuitir a nuomnaw a ninaw a, insuitir a nuom. Tukhawm hin NGO han Agency pakhat po po insuitir ni raw seh tia sawrkar thlungpui kuoma an ngen  a ni chun, state sawrkarin a \ulna taphawta thlawpin \hangpui a tih tiin Pu O.Ibobi Singh chun a hril.
    
Hi thua hin a hmain Families of Involuntary Disappeared Association, Manipur (FIDAM) le Human Rights Alert (HRA) han Public Interest Litigation (PIL) Manipur High Court­ah an lo file ta a nih. Hi thua hin Manipur sawrkar chun CBI insuitir dingin  sawrkar thlungpui le CBI thuneituhai kuomah December 29, 2014f khan ngenna a siem ta a nih. Hi thua  state sawrkar ngenna ngaisak a ninawna thuah High Court of Manipur chun CBI kuomah Legal Notice a pek.

A thi taa ngai  le raw tahnung damin
Imphal: Thi taa ngai le a ruong  raw hiel  ta Konthoujam Naobi Devi (19) d/o Konthoujam Ongbi Kunjarani Devi of Tentha Marongband, Thoubal District chu a psal thar Tekcham Sanahal (30), s/o  Inaobi of Keibi Heikak Mapal hai chu Nongdam Tangkhul Village, Ukhrul District­ah dama hmu nawk an nih. Naobi Devi hi August 18, 2011­a  inhmang le August 22, 2011­a a pasal Laishram Chaoba in Thoubal police­a a report a nih. Hi hnung ni 3 zova nuhmei thisa ruong hmu a ni a, hi mithi hi Naobi Devi nu Kunjarani Devi in a  a nih tia a lak le an raw ta a nih. Chun, mipui lungsen in Laishram Chaoba le a  tarpupa hai chu tuolthattu tia intuma an in an raw le an kahwsunga inthawka an hnawtdawk an nih. Hi  thudik hi Khunai Kanba Apunba Meira Paibi Lup in an hriet le inruolin Naobi le a pasal bakah Naobi nu hai chu an va man a, Thoubal Police station­ah an peklut.

1st MR Rifleman ama le ama an kap hlum
Imphal: Zani hmasa zan dar 10:30 vel khan 1st Manipur Rifles a Rifleman Laita Wanoireng Aimol (30), Kakching Polie station huop sunga um Unapal village chu a duty­na hmuna a silai chawi laiin ama le ama an kap hlum. Ama hi Manipur DGP hlui Yumnam Joykumar personal Guard lo ni hlak, tuta Yumnam Joykumar chengna in, Naoremthong, Imphal West vengtu (house guard)  a la um, a barrack sunga inkap hlum niin ei thu dawngna chun a hril.

Social  Welfare Minister inban dingin
Imphal: Janata Dal (U), Manipur chun Old Age Pension sum semna thuah thaw suol a nei leiin Manipur Social Welfare  Minister A.K. Mirabhai chu inban ding le Dr W. Rangitabeli Devi, Director, Social Welfare  chu a sina inthawk suspend annawleh sawnhmang dingin an ngen.

Mass Casual Leave lak an tum
Imphal: All Manipur Trade Unions’ Council (AMTUC) le All Manipur Goverment Employees’ Organisation (AMGEO) a Joint Administrative Council (JAC) chun  State sawrkarin an thil ngen hai April 25, 2015 chena a sukpuitling peknaw chun April 27­29, 2015 inkar sung Mass Casual Leave an lak ding niin L. Kuber Meetei, Publicity  Secretary, JAC chun thusuok a siem.

Hlaw le pension la \hang lo ding
Imphal:  State Plan, CSS/CPS, Non­Plan etc hnuoia Fund hrim hrim laksuok khap hmak a nih tia Order um sienkhawm; sawrkar thawktuhai le pensioner­hai  pension sum, loan thungna, interest pekna le power inchawkna hai chu huopsa naw nih tiin Vineet Joshi, Commissioner (Finance), Govt. of Manipur chun April 13, 2015 khan Order an suo.

Others:
HPC(D) \huoitu 3 man an nih
Aizawl: Zani 11:05vel khan Mizoram Police han  Ramnagar, Silchar, Cachar district,  Assam­ah HPC(D) S/S Army Chief Lalropuia  Famhoite (47) s/o Rimawia, Saikawt, CCPur, Manipur; S/S  Finance Secretary, Norbar Sanate (46) s/o (L) Khupa, Hmarkhawlien, Cachar District,  Assam le S/S Pvt. Ngurthantluanga Sanate (29) s/o Siemlien, Ngurte, CCPur, Manipur hai chu Mizoram Police han an man niin ei thu dawngna  chun a zieklang.

Agra hmuna Biekin pakhat suksiet
Agra: Zani zingkar inhma tak khan tu ti hrietlo han St. Mary’s Church, Agra Cantonment, Pratabpura area sunga mi chu an suksiet a, Rakabganj Police Station­ah Police  han case an registered. Hi Biekin huong sunga milim 2 le a Gate pui tak hai suksiet a nih. Agra area sunga Christians han Biekin suksetuhai chungah action la dingin sawrkar an ngen. Thla hlui khawm khan West Bengal ah Nun (pitar) pakhat suollui le a pawisa lakpek a nih. Chun, March 14, 2015 khan Jabalpur, Madhya Pradesh ah  Christian­hai inkhawmpui lai sukbuoi an ni a, hi thil tlung le inzawm hin mi 6 man an ni a, siekhawm a hnungah insuo nawk an nih.

Rahul Gandhi a hungtlung tah
New Delhi: Ni 56 zet chawl hmanga ramdanga  an zin hmang hnungin AICC Vice President, Rahul Gandhi chu Thai  Airways in Bangkok a inthawk zani 11:15AM khan New Delhi a hungtlung tah. AICC President le a nu Sonia Gandhi hai chu sun dar 12 in an In, Tughlaq Road an hungtlung a, hi hnung met hin a farnu Priyanka Gandhi a tlung ve.  Feb. 23, 20156 khan Congress chun  chawl a lak thu an puong a. A um naw sung hin a chungthu le a chanchin chi tum tuma hril le chanchinbu haia zieklang a ni hlak.

RBI  Governor in that dinga vauna
Mumbai: Reserve Bank of India (RBI) Governor Raghuram Rajan  chun Islamic  State in Iraq and  Syria (ISIS) pawla inthawk that dinga vauna email in a hmu nia hril a nih. Hi thu hi Mumbai  Police hnuoia Cyber Crime Investigation Cell (CCIC) pawlin thudik a ni le ninaw an suizui mek. Police ruok chun hi email hi a tehlem a ni el dim ti ring dan an nei a, sienkhawm thudik hriet suok ngei tumin uluk takin suizuina  sin an thaw.

NE bielah Mini­Secretariat Camp
Aizawl: India hmarsak biela states 8 um haiah a bat batin thla tin ni 4­5 sung aw ding Mini Secretariat Camp  huoihawt ning a ta, Aizawlah May thla khin hi Camp hi buotsai ning a tih tiin zani hmasa zan khan Union Minister of State for Development of North Eastern Region (DoNER) Jitendra Singh chun  Aizawla Press Conference huna a hril. Delhi le Aizawl  inkara direct flight a fe theina dingin Ministry of Civil Aviation, DGCA le Private airlines hai hung indawrpui ka tih tiin a hril bawk.

Agni­III missile hlawtling taka ensin
Hyderaqbad: Zani zingkar dar 9:52 khan Strategic Forces Command (SFC) chun Wheeler Island, Odisha Coast a inthawk hlawtling takin Agni­III Missile chu ensinnaa kapsuok a nih. Agni­III Missile hin km. 3,000  neka hla a kap phak bakah nuclear ralthuom \hangsain thil 1.5 tonnes a rik a phur thei a nih. Hi Missile hi hmang thei dinga Armed Forces kuta peksuok ta a nih.

Delhi­Dimapur daily flight hawng
Dimapur: Zani hmasa khan Nagaland CM T.R. Zeliang in Delhi le Dimapur inkara service ding IndiGo flight a hawng. Hi vuongna hi Delhi a in\anin Kolkata sirin Dimapur a hung pan hlak ding a nih. Hi hunsera hin Imtiwapang, MLA le IndiGo President, Aditya Ghosh hai an \hang. Hi Vuongna serviec \an hin NE biela IndiGo in a service a hawng belsa pei ding  a nih ti thu a lo tiem ta a sukdik  a nih tin Aditya Ghosh chun a hril.

Nepal PM hlui Surya Bahadur  Thapa a thi
Gurgaon: Nepal Prime Minister term 5 zet lo chel tah Surya Bahadur Thapa (87) chu zanikhan Medanta Hospital, Gurgaon ah damnawna leiin a thi. Thapa hi March 29,  2015 a inthawka Medanta Hospitala admit a nih.  Lal (Kings) pathum hun sung, term 5 zet Nepal PM a ni a, a political career hi kum 52 chuong a nih. Kum 1966 a  kha PM sin hi a chel \an a nih.

|huoihmanga um mi 11 laia 5 insuo
Bhubaneswar: April 13, 2015 zana Maoist helpawl han Odisha state a Malkangiri district sunga Mathili khuoa inthawka mi 11 an \huoihmanghai laia mi 5 hai chu dam le himin zani zingkar khan an hung insuo a, midang 6 hai chu an chanchin hriet a la ni nawh tiin Sanjeev Marik, DGP, Odisha in zanita Bhubaneswar hmuna Chanchinbumihai an pawlpui huna a hril.
-----------------------------------------------------------------------------------
VAWISUN THUPUI
Ringna leia lunginsietnaa sandam in ni sih a, chu khawm chu nangnia inthawka suok a ni nawh a, Pathien thilpek a nih.  Ephesi 2:8

Editorial:
Tar Pension le Tar hai
Ramchangkang­a chun Tar hai hi a enkawlna hmun bika siem haia \ha taka enkawl an ni hlak a. India rama ruok chu Tar enkawlna hmun mumal tak ei la nei nawh. Chuong laizing chun eini Zohnathlak hai chun  mani nu le pa amani, annawleh tar hai a enkawlna hmun (home) a sie chu ei ditdan  a ni ring a um lem nawh. Tar hai ngirhmun dawmsangna dingin India rama kum 1995­a India Independence Day huna Prime Minister in a lo puong ta angin National Social Assistance Programme (NSAP) hnuoia  National Old Age Pension Scheme (NOAPS) hnuoiah Tar kum 60  le a chungtieng  hai kuoma pension sum a sem hlak a, hi baka hin  kum 80 le a chungtieng hai kuomah kum iemanizat liemtaa inthawk khan pension sum mi pakhatah thlatin 500  a lo pek ta bawk. Chuongang pei chun Manipur sawrkar khawmin a state sawrkar  hnuoiah kum iemanichen liemtaa inthawk khan Manipur Old Age Pension Scheme (MOAP) hnuoia tar pension sum a lo pek ve ta bawk. 
     
Social Welfare  Department, Manipur chun tulai hin District tinah Manipur Old Age Pension  Scheme (MOAP) hnuoia beneficiaries hai kuomah  Pension sum a sem mek a.  April 15, 2015 nia 1st Manipur Rifles Ground, Imphal  hmuna Tar pension sum semnaa chun  Pitar kum 69 mi Mrs Irengbam Purnimashi  w/o (L) Kalachand of Khagempali Panthak Ningom Leirak chu nisa hnuoia  a pension sum la ve dinga an tlar ve huna khaw hre lo a um le  thisena an luok leiin damzo lovin a thi der el a, lungsiet a umin lungril a tawk hle. |halai le  tleirawl hai hman nisa hnuoia um  harsa ei ti lai zingin  hienganga tar pension la dinga nisa lum hnuoia Tar  ruol kokhawm vet hi thil\ha a ni am ti hi sawrkarin a ngaituo nawn nuom a um takzet. Tuta hma khan Tar pension latu hai popo account hawnga, an account chita inthawk an pension sum an laksuok dingin sawrkar chun  hma a lak a. |henkhat Account hawng lo an um leia Account hawng ta hai khawm a reng a ram a nisa lum hnuoia  ko khawma sem kher hi iem a \ulna. Account hawng ta hai chu an Account­a thun pek sienla, a la hawng lo  hai po kokhawm el sienla annawleh an in chita fein sem el sienla ti chu mi tam tak ngaidan a nih.
      
Pension sum la dinga intlar pakhatin nisa lum   tuor lova a thipui el hi Social Welfare Department le state sawrkar ta ding chun ngaimaw tham a tling hle a nih. Tar pension la dinga nisa lum hnuoia kum upa tak tak, a \hen lem chu  khawmuol hmu duk dak thei ta lo dam an nitawl a, en an harsa hle hlak. Tar pension sum semna kawnga thil fel lo tak a um hlak leia mani kher a hmuna fe a lak dinga sawrkar in hma a hung lak a nih ti chu mitin hriet a nih. Chuong laizing chun, hriselna an chennaw zie hriein  sawrkar le department hin  a sem dan lampui dang dap sien nuom a um hle. Mihriem hai hi la tar ding seng ei ni a, tuta Tar hai ngirhmun hi ei ngirhmun a la hung ni ve ding a nih. Hi lei hin an harsatna le an ngirhmun sawrkarin a hrietthiem  a \ul a, chuongang bawkin mimal tin khawmin tar hai hlutna, inzaumna hai hi a thar taka hre a, mani neka upa hai inzana chang hre a, tar hai hi hmangai le duot taka enkawl ding ei nizie  ei hriet thar a, chuongang taka  ei um nuom a um hle. 
      
|hatlai le ei vanglaini haia chun a tuel khawm hi tar thei ding le chau thei dinga inngaina le suongtuona ei nei phak ngai meu nawh. Pathienin mihriem dam kum dinga a mi lo bituk pek khawm ei Bible­a ei hmu dan chun kum 70 a ni a, hratna leiin kum 80 khawm a ni thei; ti ziek a nih. Pathienin mihriem dam kum dinga a mi ruot pek chanve khawm dam zo lo lova tam tak muol ei liem mek laiin a \hen tam tak Pathienin mihriem dam kum a mi lo ruot pek pel zaka  hring le dama um khawm ei um bawk. Ei fak le dawn le ei boruok pal izirin kum upa rak lo khawm hi tar taka um thei ngai a ni a, hi lei hin  mihriem hai hi ei hriselna an chennaw hle hlak. Pieng hun, naupang hun le \hatlai hun a um ang bawkin Tar hun khawm ei nei ding a nih ti hi mitin, a bik takin \halai han ei hriet nuom a um. 
    
UN General Assembly chun Upa/Tar hai ta dingin December, 1990­a resolution a lo siem ta angin  Khawvel pumpuiah October 1 chu kumtin International Day of the Elder Perssons (Upa hai ni) in hmang a lo nita a, ei rama khawm ei hmang hlak. Hi thil hi tar hai hlutna le inzaumna vawnghim le  duot le hmangai taka enkawl an \ul zie  khawvelin a hriet  leia hmanga hung um a nih. Upa le tar hai hih nam rohlu an ni a, hi lei hin mivar le changkang phawt chun an nu le pa le upa hai hi an chawimawiin an inza thiemin an enkawl thiem hlak. Hi lei hin var le thiem ei inti a ni chun Tar hai hi ei rohlu tak anga ei enkawl chu ei thaw dan ding a nih. Sawrkar khawmin Tar hai  sawmdawlna le enkawlna kawnga hma nasa nawk zuolin la sienla, Pension sum pekdawk el hi dittawk lovin, a sem na kawnga tar hai hmakhuo ngainain lampui \halem dap sien nuom a um. Sum khawm hi hunbi nei deua sem dan ngaituo sien ti chu Pension sum latu hai duthusam a nih.




Post a Comment

Powered by Blogger.