Martyrs’  Day Flag le T­Shirt  inchawk thei dinga  zo a ni tah
CCPUR:  Tukum State Level Hmar Martyrs’Day­cum ­The 12th Hmar Martyrs’ Football Trophy le inzawma khawvel pumpuia Hmar hai po poin Hmar Martyrs’ Day Flag inang vawnga ei khai tlang seng theina dinga Hmar Martyrs’ Day Celebration Organising Board (HMARTOB) in hun iemanichena inthawka a lo buoipui Flag le T­Shirt hai chu inchawk thei dinga zo a ni tah. Mawphurtu dinga ruot han an hung zawr huna thahnemngaia  in tinin lo inchaw seng  dingin HMARTOB chun inhriettirna le ngenna a siem. Flag hi mawphurtu ding bika ruot han an hung zawr ding a ni a, T­Shirt ruok hi chu Downtown Grafix, Lighthouse Lane­ah a dit hai ta dinga inchawk thei ning a tih tiin Alan Famhoite, Media & Publicity i/c, HMARTOB chun inhriettirna a siem.

CJWO  in Bomb puok dodalnain Sit in Protest
CCPUR: Churachandpur Joint Women Organisation (CJWO) chun April 12, 2015 (Pathienni) zingkara Lighthouse bula bomb puok  an ditnaw le demzie suklangnain April 15, 2015 (vawisun) a sit­in­protest nei dingin an rel.  Hiengang bomb puok hi CCPur khawpui sunga a tlung nawk ta nawna dinga mitin lo thlawp seng dingin CJWO  chun ngenna an siem. Sit­in­Protest hi 10:30AM­1:00PM inkar nei ding a ni a, hi hun sung hin Dawr nei hai chu an dawr hai khara thlawp dinga ngennin inhriettirna an siem a, sit in protest­a thang  dingin mitin an fiel bawk.

One Day Photo Exhitibion
CCPUR: District Information Officer (DIO), Churachandpur huoihawtnain April 16, 2015, 11:00AM a inthawk khin YPA Hall, Hiangtam Lamka, CCPur­ah ‘One Day  Photo Exhibition and 5 Days Interpersonal  Communication Campaign” um a tih. Pu Lunminthang Haokip, IAS, DC, CCPur khuollien ning a ta, Pu Somorjit  Salam, MCS, Director (IPR/Survey & Settlement) functional President, Pu T.K. Simte, MCS, Asst. Commissioner to DC, CCPur Guest of honour  le Md. Zahir Uddin Shah, Retired MCS special Guest in thang an tih.

Tuibuong Block Chief Assn. Election nei
CCPUR: Zanikhan Tuibuong Block sunga khuo lal (Chiefs) hai chunk um 2015­15 sunga an pawl thuoitu ding thlangna an nei. Hi huna hin Letkam Haokip, Chief of Kholmun  chu Chairman ding le Thangboi Baite, of Khomunnom chu Secretary dingin an thlangtling. Mr Letkam chun, Revenue nekin Hill  Rights a lien lem thu hrilin  sum­le­pai dit leia ram le lo hai zawr mei mei lova humhal dingin an fui. Chandel, Ukhrul, Tamenglong le Senapati district haiah Revenue village pakhat khawm a um naw a, chu lai zing chun non­Naga tribal hai umna Moreh, Tengnoupal le CCPur district  haia khuo 149 chuong revenue a lut a ni thu a hril. 



22­Haopi Range­ah J.Thangluai in MDC
CCPUR: Mr James Thangluai chun  MDC election hung um dinga hin 22­Haopi Range constituency­ah ngir ve a tum a, hi le inzawm hin zanikhan Buallian lal inah zani 8:00AM khan malsawm tawngtaina pekna le inhmukhawmna hun hmang a ni a, Rev. (retd) Kamkhozam in tawngtaipekna a nei. Mr James Thangluai chun mipui ta dinga theitawpa sin thaw a nuom leia MDC ngir tum a ni thu, thlangtling a ni chun  fund/scheme tum tum haia hmu ding indik tak han an hmu theina dinga hma a lak ding thu, Education system hnuoiah Haopi biela Free education a ni ding ang taka a function theina dinga hma lak ding, biel sunga PHC le PHSC hai ennawn a, siemthat ding, a biel sunga  mass & media introduce a, sukhrat dan ngaituo ding ti le a a thil tum dang dang hai a hril.

Office hai chawl vawng
CCPUR: Zani April 14, 2015 kha Cheiraoba State Holiday a ni leiin Manipur state sawrkar hnuoia Offices hai chu khar vawng an nih. CCPur District­a khawm Cheiraoba chawl leiin Govt. Offices hai bakah private institution hai khawm an chawl tawl. Chun zanikhan India constitution lo induongtu Dr B.R. Ambedkar  piengchampha vawi 124­na a ni leiin National holiday a ni bawk a nih.

ZYA Haopi Block hawng
CCPUR: Zani 11:00AM khan Phaibem khuoah ZYA Haopi Block hawngna nei a ni a, thuoitu thar han intiemkamna an nei bawk. Hi huna hin Langkhanpau Guite, Chairman, ADCC khuollinein a thang a, Chief host in bieltu MDC S. Minboi Vaiphei; Guest of Honours in M.Gouzamang Guite, EM; Lal Hossan, EM; Genneikhup Vaiphei, EM/; Kamsuanlun, EM le  H.Mangchinkhup, EM hai an thang a, Special Invitees in MDCs iemanizat an thang.

Headline:
VDF hai thil ngen hi thil awm a nih; sawrkarin la ngaituo pek a tih­ O.Ibobi Singh
IMPHAL: Zanikhan MPCC huoihawtnain Congress Bhavan, Imphal­ah Father of the Indian Constitution Dr Bhimrao Ramji  Ambedkar piengchampha a vawi124­na inser a nih. Dr Ambedkar inzanain a limah CM, Dy. CM, Ministers, MPCC thuoituhai le Congress mi le sa han par an inhlan tawl. Hi hun hmangnaa hin Chanchinbumi han Chief Minister Pu O.Ibobi Singh an inhmupui a bawk.  Pu O.Ibobi Singh chun Catholic School­hai khara a um chu a ngaimaw thu a hril. Student­hai  lekha inchukna a sukbahla nawna dingin School khartuhai le School thuneituhai chu inbierem a, an hma thei anga School­hai hawng dingin a ngen.
    
Hi huna Chanchinbumihai thu indawnna dawnin, VDF hai thil ngen hi thil awm a ni a, sawrkarin la ngaituo pek a tih tiin Pu O.Ibobi Singh chun a hril. Thil hi nuom dan dana thaw zung zung thei a ninaw a, ngaituo ding le thil tul a tam hle bakah an thil ngen hlaw sukpung hi sum seng tulna a ni leiin sawrkarin thil a thawna dinga hin  hun a lak a tul a, chuleiin VDF pawl khawma an lo hrietthiem a tul a nih tiin a hril.
    
Chun, Deputy Chief Minister le Home Minister Pu Gaikhangam  sawrkar kuoma thil ngen le nawr an nei changa pawl tum tum han bandh le economic Blockade hmangruoa an hmang hlak hi an dik nawh tia hrilin pawl tum tum hai chu bandh le economic blockade thaw an tum chu  thul dingin a ngen. Chun, thil hrim hrim  hi inbieknaa chingfel thei a ni leiin, bandh le blockade thaw hmasa loa sawrkar  le inbiek dan lampui zawng hmasa lem ding a nih tiin Gaikhangam chun a hril.
            
Hieng laizing hin All Manipur VDF Welfare Association (AMVDFWA) chun zani zanrila intahwk khan darkar 24  sung aw ding General Strike an thaw tan. An General Strike thaw hin Media, Medical Services, sakhuona thil le emergency thil hai chu a huom sa naw ding niin an hril. General Strike an thaw zo hnugna State sawrkarin a la ngaisak naw rawp chun April 16, 2015 zanrila inthawk darkar 48 sung National  Highways haiah Economic Blockade an thaw ding thu an puonglang bawk.

Police hai silai hmetpuok leiin mi 4 an hliem
IMPHAL: March 28, 2015 a inthawka a umna chin hriet lova inhmang Thangjam Kelvin (16), s/o Th. Premjit of Ukhongsang Mamang Leikai chu zanikhan Ngariyan tlangah a thisaa hmu a nih. Kelvin hi Human Resource Development School, Ghari­a Class­IX inchuklai a nih. Tuolthattu hi Police in an kawl ti thuah mipui lungsen  hai le Police  hai an innawr buoi a, Police han mipui hnawtdarna dinga silai an hmetpuok leiin nupui 3 thangsain mi 4 an hliem a, a hliemna deu nupui pahni hai chu District Hospital, Thoubal panpui an nih. Chun, zantieng khan mipui lungsenin Ukhongsang Village a tuolthattu nia intum chengna in an raw ut vawng.

Kangmei suokin In 1 a kang
IMPHAL: Zani zing dar 10:30 vel khan Singjamei Top Leikai, Imphal West District­ah kangmei a suok a, In pakhat a kang a, Fire Brigade le tuolsung mi hai thangruolin kangmei hi an thel a, sienkhawm a Choka chu a kang fai rit. Kangmei hi Gas (LPG) a inthawka intan niin ei thu dawngna chun a hril.

Union Sports Minister a hung inzin ding
IMPHAL: Union Minister for sports and Youth Affairs (Independent Charge), Sarbananda Sonowal chu hungtlung ding May 3, 2015 khin Imphal­ah hung inzin a ta, Manipur  State Games, 2015 chu Polo Ground ah hawng a tih. Manipur State Games, 2015 hi May 9, 2015 chena nei dinga riruong a nih.
Others:

Amit Shah NE­ah an zinkuol ding
AIZAWL: BJP National President Amit Shah chu NE bielah inzin kuol a tum. April 16, 2015 in Aizawl tlung a ta, April 17, 2015 in  Kohima pan a ta, April 18, 2015 in Imphal tung a ta, hi ni hin Imphal suoksanin New Delhi pan a ta; April 20, 2015 in New Delhi­a inthawk Gangtok hungtlung nawk a ta, hi ni hin Shillong sir a ta, April 22, 2015 in Itanagar pan a ta, April 24, 2015 in Guwahati pan a ta, hi ni hin  Rajasthan panin Guwahati suoksan a ta, April 26, 2015 in Guwahati  hungkir nawk a ta, Guwahati a inthawk Tripura pan a tih tiin Chalngura Zahau, Vice President,  BJP, Mizoram Unit chun a hril.

HPC(D) demand area sunga hming pelut um lo
AIZAWL: April 30, 2015 a Mizorama Village Council inthlangna dinga hming peklut theina hun tawpna tak chu zani hmasa kha a lo ni tah. HPC (D) chun hi inthlangnaa hin tukhawm ngir lo dinga inhriettirna an siem leiin HPC (D) Demand  Area sunga khuo 24 haia chun VC inthlangnaa thang dinga hming pelut tukhawm an um nawh tiin ei thu dawngna chun a hril.

State tin inralring dingin
NEW DELHI: India rama khawpui tum tum haiah helpawlhai an che el thei tia Intelligence report a um leiin state tin sawrkarhai chu terrorist­hai chetna ding laka lo inveng le lo inralring seng dingin sawrkar thlungpui chun inhriettirna a siem.

Rajasthan in DA 6% in a sukpung
JAIPUR: Rajasthan state sawrkar chun a hnuoia thawktuhai Dearness Allowance (DA) 6% in a sukpung. DA pungna hi January 1, 2015 a inthawka tiem tan ning a ta, sawrkar thawktu nuoi 8 vel le pensioners 3.5 lakh velin an hamthatpui ding a nih. A hmaa sawrkar thawktuhai DA hmu chu 107% a ni a, tuhin 113% a hung nita ding a nih. January, 2015­March, 2015 inkara DA pung chu thawktuhai General Pension Fund (GPF) ah sielut ning a ta, April 1, 2015 a inthawka an DA pung chu a pawisaa pek ning a tih tiin official thusuok chun a hril.

B.R. Ambedkar piengchampha inser
WOKHA/KOHIMA: Father of the Indian Constitution, Dr Bhimrao Ramji Ambedkar piengchampha a vawi 124­na chu zanikhan India ram pumpuiah ursun taka inser a nih. Zanikhan parliament Central Hall­a Dr B.R. Ambedkar piengchampha hi inser a ni a, hi huna hin President, Shri Pranab Mukherjee, Vice President, Mohd. Hamid Ansari,  Union Home Minister, Shri Rajnath Singh, PM hlui Dr. Manmohan Singh Finance Minister Arun Jaitley, Science & Technology minister  Harsh Vardhan, Lok Sabha Dy. Speaker M. Thambi Purai, Dy. Chairman Rajya  Sabha, P.J. Kurien, Ghulam Nabi Azad le Lok Sabha a  Ethics Committee Chairperson L.K. Advani, AICC President  le milien milal tam tak an thang.

Assam Congress MLA Rumi Nath man
SILCHAR: Zani zing dar 7 vel khan Assam Police han Rumi Nath chu a chengna MLA Hostel a inthawk an man a, Dispur Police station ah sie a nih. Ama hi Pan­India Auto theft gang case le inzawma man a nih.  Rumi Nath hi Car inrukna le inzawmin U/S 120(B), 420, 2012 of the IPC haia case siem khum, Borkhola A/C, Cachar district, Assam a inthawka MLA a thlangtling a nih.

BSF han Punjab border­ah  Heroin kg. 20 an man
CHANDIGARH:  Border Security Forces chun zanikhan Pakistan le inrina India ram sung Ferozepur sector­ah Heroin kg. 20, international market rate­ah Rs. 100 crore manhu ding dapdawkin an man. Hi baka hin BSF chun  Spanish siem Pistol 1le China siem Pistol 1 le a mu 17 bakah Mobile phone 2 le Pakistan SIM Cards  dapdawkin an man bawk. BSF chun, hi lai hmuna hin India rama  Heroin hung phurlut tum an um ti report an dawng a, chu le inzawma dappui an thawnaa hieng Heroin le ralthuom hai hi an dapdawk a nih. Heroin­a sumdawngtu (smugglers) hai ruok chu  an tlan hmang hman. BSF chun tukum sung hin  Heroin kg. 138 chuong le ralthuom 8 an man ta niin official thusuok chun a hril.

SC/ST post ruok hai sukbit vat ning a tih: Kejriwal
NEW DELHI:  Delhi Chief Minister Arvind Kejriwal chun, Delhi sawrkar hnuoia Scheduled Caste (SC) le Scheduled Tribe (ST) hai ta dinga seat huol (reserved)­a um hluotu um lova ruok hai chu sukbit vat ni tang an tih tiin zanita Dr  B.R. Ambedkar piengchampha 125­na le inzawma zanita Delhi Assembly­a thu a hrilna huna a hril. Delhi­a SC/ST certificates lak harsatna thua complaint um le inzawmin Mr Kejriwal chun, SC/ST certificates lakna dinga thaw dan chu awlsam lema siem a ni ding thu a hril bawk. Mr Kejriwal le Delhi Assembly Speaker Ram Niwas Goel hai chun zanikhan Delhi Assembly­a Dr Ambedkar limah inzanain par an inhlan. Delhi Dy. CM Manish Sisodia  chun AAP SC/ St Wing Stal, Parliament street­a hun hmangnaah par an hlan ve thung.

Tata Sumo eksiden­ah mi 6 an thi
WOKHA/KOHIMA: Zani hmasa khan Dimapur a inthawka Wokha pana tlan Tata Sumo pakhat Topazulu hmuna a eksiden a, lamthlang tieng feet 2000 vela insangah an hlum thla a, a sunga chuong mi 6 an thi a, midang 2 an hliem. Tata Sumo NL­06T­0456 hin mi 11 a phur nia hril a nih.

Jarkhand­ah NFS Act July 1 a inthawk
RANCHI: June 1, 2015 a inthawka Jarkhand State a National Food Security Act (NFSA)  hmang ding ti chu remchangnawna a la um leiin  July 1, 2015 a inthawk tan ning a tih tiin Jharkhand Food, Public Distribution and  Consumer Affairs Minister, Saryu Ray chun zani hmasa khan Press Conference­ah a hril.

Ar 1.5 lakh that dinga thupek insuo
HYDERABAD: Andhra Pradesh­a chun Hyderabad khawpuia inthawk km. 50 vela hla Ranga Reddy district­a Thoroor village­a Ar Farm pakhata chun H5N1 avian influenza leiin Arte 5 an thi a, hi le inzawm hin Ar thina Farm a inthawk km. 1 biel sunga   Ar 1.5 lakh hai chu that dinga thupek (Order) insuo a nih. Ar thatna sinthawtu ding hin Veterinary staff 250 ruot an nih. Mihriem­a kai/invawi ruok chu an la um naw niin district official thusuok chun a hril.

Vawisun PM Canada a tlung ding
OTTAWA: India Prime Minister Narendra Modi chu hlawtling taka France le Germany ram haiah an zin zo hnungin Canada a pan a, vawituk hin Ottawa khawpui tlung a ta, Canada PM  Stephen Harper leh inbiekna nei an tih tiin Mr Vishnu Prakash, India High Commissioner to Canada chun a hril. Fak le dawn, sumdawngna le thil dang dang haiah India le Canada inlaichinna hi Modi hung inzin hin a hma neka a sukhrat le a siem tha beisei a nih tiin Mr Vishnu Prakash chun a hril.

Mihai thuhne thei hai lai Modi le Kejriwal
NEW YORK: Time Magazine  in khawvela mihai va thuhne thei em em 100 a thlangsuokhai lai India PM  Narendra Modi le Delhi CM Arvind Kejriwal hai an thang ve. Russia President Vladimir Putin chu tu kuma hnena changtu (Time 100 readers’ poll winner) a nih. Midang inlang phakhai chu, Hillary Clinton, Dalai Lama, Emma Watson, Malala Youfsafzai, Pope Francis, Barack Obama, Michelle Obama, Mark Zuckerberg, Apple CEO Tim Cook,  Xi Jinping, Kanye West, Oprah Winfrey, Benjamin Netanyahu le Yahoo CEO Marisa Mayer hai an nih. Lady Gaga, Rihana le Tylor Swift  hai chu a hmu insang top 5 chena an thang phak.

Siberia rama ramkang leiin mi 15 an thi tah
MOSCOW: Southern Siberia rama chun tulai hin ramkang nasa takel a tlung a,  ramkang hin mi 15 zet a kang hlum ta bakah mi 468 in hliemna an tuok a, hliem hai laia 77 hai chu  Khakassia hmuna hospital­a admit le enkawl mek an nih. Ramkang hin ran 3,700 vel a kang hlum ta bawk niin ei thu dawngna chun a hril. Kum 2010­a  Moscow hmuna ramkang leiin mi 60 a kang hlum bakah In 3,000 a lo kangsiet ta bawk.

Dharamshala  Constituency­ah CCTV
DHARAMSHALA: Himachal Pradesh­a Dharamsala Assembly Constituency pumpui chu darkar 24 sung (24/7) CCTV camera surveilance  hnuoia sie tum a ni thu Himachal Pradesh Urban Development minister Sudhir Sharma chun a hril. Hi thila dinga sinthawna chu May, 2015 a inthawk tan le thla ruk sunga zo dinga ti a ni a, hi thila dinga sum seng ding hin crores iemanizat a lut ding a nih. Sukpuitling a ni pha chun India ram pumpuia constituency sunga lampui tin deuthawa CCTV inbun­a um hmasatak a ni ding a nih.  Mr Sudhir  Sharma hi hi constituency­a  MLA ni lai mek a nih.
-------------------------------------------------------------------------------------------

VAWISUN THUPUI
Lalpa i Pathien chu i lungvar po poin, i thlarau po poin, i lungril po poin, i hratna po poin i hmangai ding a nih,’ ti hi.                                     ­Marka 12:30

Editorial:
Nawrna, nuorna, bandh le blockade hai hi

Manipur sawrkar hnuoia thawk Department hran hrana thawktuhai bakah pawl hran hran han sawrkar lakah thil ngen neiin an lo nuor ta hlak. Tulai khawm hin a nuor mek le a la nuor pei ding khawm an la um mek. Hieng nuorna nei tahai, a nuor mek le a la hung nuor pei ding hai hin nuorna san tha tak an nei hlak a, chu chu, sawrkar hotu han “kan thaw ding an nawm, in thil ngen sukpuitling pek kan ti cheu” tia thutiem an lo neipui hlak lei a ni rawp hlak. Nuorna neihai hin nuor san an nei hlak. Hi lei hin sawrkarin nuorna neihai hi ngaisak lova a um el chu thil indik ni bik naw nih.
     
Tulai khawm hin VDF pawl state sawrkar lakah thil ngen neiin an nuor mek a. An thil ngen state sawrkarin a ngaisak naw leia lungawi lovin April 14, 2015 zanrila inthawk April 15, 2015 chen dai ding darkar 24 sung General Stike thaw an tum thu an puonglang. Hi hun sunga an thil ngen state sawrkarin a ngaisak naw rawp chun April 15, 2015 a inthawk darkar 48 sung National Highways haiah Economic Blockade an thaw ding thu an puong a. Hi chau hi a la ni naw a, ATSUM chun June 14, 2015 chena an Charter of demands hai state sawrkarin a sukpuitling pek naw chun national Project sinthawnahai thangsain lampui kharna June 14, 2015 a inthawk an nei tan ding thu an puonglang.
     
Vawi iemanizat sawrkar hotuhai leh inbiekna an nei a, Memorandum of Understanding (MoU) le Agreements hiel khawm an lo ziek hlak. Amiruokchu, sawrkarin MoU le Agreements an ziek hai hi a sukpuitling thei ta ngai si naw leia nuorna, nawrna, bandh, general strike le economic blockade ti hai hi thaw a hung ni hlak. Hieng a ni lei hin sawrkarin a thaw thei lo ding thil hi chu thaw dingin thu intiemkam ngainaw sienla, MoU le Agreements hai hi ziekpui ngainaw sienla chu ei rama hin hieng lawm lawm hin  bandh le blockade hi a um naw el thei a nih.

Nuorna, nawrna, bandh le blockade hung umna san pakhat chu politician­hai hin inlalna an dit taluona lamah an dik le an diknaw, a tha le tha naw khawm ngaituo chieng hmasa lovin hma an lak lei niin an lang. Nunghakin tlangval a thlem a, tlangvalin ngaituo chieng hmasa lovin, “aw” liem put a, hun a hung liem pei a, “sawn man”  a chawi lem ta ang elin, an hril a, an thaw thei lo ding chen chen an hrilin an intiem a, a hnungah an thu hril le an thutiem an hlen thei ta ngai si naw leiin harsatna nasa tak an tuok pha hlak. Sawrkar hotuhai buoina le harsatna el chau ni lovin, sawrkar inumtirtuhai, sawrkar  thawktu ruoitu ‘mipui’ hai ta ding chenin buoina le harsatna a nih ti hi ei hrietin ei hmu thiem thei hlak am aw?

Nuorna,  nawrna, bandh le blockade hai hi culture pakhatin ei nei der ta hi a pawi hle. Ni dang lai khan chu ei culture a ni ngai der nawh. Thangthar han Culture hiela ei hung nei ta hi a pawizie hrie a, hiengang fe dan le thaw dan (culture) hi thil tha a ni thei naw leiin bansan dan ei ngaituo nuom a um. Thiltha lo chu hnawla bansan pei el ding a nih. Thiltha hai ruok chu entawn zung zung a, ei culture a laklut ngei ngei ding a nih. Hienganga ngaituona ei nei thei naw chun retheina khurah a mi la keilut ding a nih.

Chun, nuorna le nawrna ei neisan hi a tlangpuiin, mipui, ram le hnam ta dingin ni hlak sienla nuom a um. Nuorna le nawrna thenkhat hai hi chu mani hmasielna lei a nih. Ram le hnam hmangaina lungril (patroitism) an lang phak nawh. Kan lal phawt chun, thawkna ka nei pha phawt chun, ka hlaw a tam phawt chun, ka ngirhmun a tha tawk phawt chun tihai bak hi chu ei thluokah hin a um phak nawh. Lungawi lo le a nuor ding tak chu mipuihai hi ei ninaw maw? Nuor le nawr san nei tha tak ding chu mipuihai ei nih.

Post a Comment

Powered by Blogger.