Local:
NERPAP Special Campaign nei
CCPur: Zani 11:00AM­4:00PM inkar khan 59­CCPur A/C le 59­Saikawt A/C haia Polling Station tinah Electoral Photo Identity Card (EPIC) le Aadhar Number thlungzawmna ding “National Electoral Roll Purification and Authentication Programme (NERPAP)” Special Campaign nei a nih. Hi huna hin Voters hai chun mani polling station chitah BLO hai kutah EPIC le Aadhar Card photocopies an peklut tawl. Electoral Roll le Aadhar Card­a hming ziekdan inanglo, Date of birth inang lo hai sukdikna dingin DC Office­ah form lak a ngai leiin mi tam tak an buoi pha.


VDF han  April 14 zanril­a inthawk General Strike
CCPur: All Manipur VDF Welfare Association (AMVDFWA) chun sawrkar kuoma an thil ngen hai sawrkarin a sukpuitling naw leia April 10, 2015 a General Strike thaw an tum chu Cheiraoba leiin April 14, 2015 zanril­a inthawk April 15, 2015 inkar sung General Strike thaw dingin an rel niin zanita AMVDFWA in thusuok an siema chun an zieklang. General STrike hin Medical,Water Supply,  Fire Service le Student hai  huom naw nia, a dang chu a huom vawng ding niin thusuok chun a hril.  April 15, 2015 zanril chena  sawrkarin  an thil ngen a la ngaisak naw rawp a ni chun General Strike hi Economic Blockade in a zawm nghal ding  niin thusuok chun a hril a. An harsatna hrea mipui hai chu an hmalakna hi thlawp dingin mitin an ngen a, mimal le pawl khawm nisien,  a bawsetu hai chunga ieng thil a tlung khawmin Association in mawphur naw nih tiin S. Rabi  Singh, Gen. Secy. AMVDFWA  in thusuok a siema chun an zieklang.
    
VDF hai hi Manipur sawrkarin Police/security hai law & order enkawlpuitu dinga a lo indin a ni a, tuhin VDF personnel 10,500 an um mek a, state sawrkar chun  VDF hai hi thla hlaw Rs. 4,000/­ bakah ration money Rs. 1,000/­ a rengin Rs. 5,000 thla tin a pek  a nih.
            
Thla 3 sung training a pek hnungin  Police hai thlawptua kawng iengkima a hmang an ni a. An sin a rik leia an thla hlaw  Rs. 4,000/­ chau a pek  chu sukpung  le an ngirhmun siem\ha pek dingin  sawrkar an ngen a, sienkhawm an ngenna sawrkarin a sukpuitling peknaw leia General Strike hi thaw an tum a nih.

7­AR han KNA cadre 2 an man
CCPur: Police­a inthawk ei thu dawngnain a hril danin April 11, 2015, 3:15PM vel khan 7­Assam  Rifles han Old Bazar­ah KNA cadre pahni Lunkholal (40) s/o Seilkholun of Leijang le Seiminthang (30) s/o Lhukhomang of Leijang hai an man a, an kuta inthawk 7.65 mm pistol 1, mazagine 1 le  a mu 1, Mobile handset (Nokia) 2 le Rs.322/­ dapdawkin an man a, Imphal Police kutah an peklut. CCPur Police chun Imphal Police­a inthawk case hi lasawngin FIR No. 35 (4) 2015 CCP­PS U/S 384/400 IPC & 25 (1­C) A. Act  an registered. CCPur Police chun CJM, CCPUr hmaah an inlangtir a,  CJM/CCPur chun April 16, 2015 chen Police Custody­a la um phawt dingin a rel.

OC thar in charge a lak
CCPur: OC, CCPur Police Station thar dinga hung sawn Inspector N. Thangzamuan chun zanikhan  Inspector M.A. Salam kuta inthawk OC, CCPur PS charge a lak a, zanita inthawk khan sin a \an nghal. N. Thangzamuan hi CID Special Branch a inthawka hung le Inspector M.A. Salam chu Inspector MPTC dinga sawn a nih.

HYA Hall tia ko ta ding
CCPur: Hmar Inpui (HI) GHQ ngenna  angin  zanita Sielmat  Village Authority meeting chun  tuta hmaa Sielmat­a Community Hall ‘Zawlb<k’ tia ko hlak chu HYA Hall tia  inbuk le ko ta dingin an rel.

Bomb puokah mi 4 in hliemna an tuok
CCPur:  April 12, 2015, 8:30AM vel khan Tiddim Road, Light House Lane, CCPur­a Light house­a 54­Bn. BSF ‘G’ Company hai duty post bul lai  IED ni dinga ringhla bomb hrat takel a puok a, civil mi 4 in hliemna an tuok bakah bomb puokna bula um SBI ATM Booth a suksiet met bakah lamsak tienga Pu Albert Thang\hasiem, Advocate building sawng hnuoia  Vai dawr­a Showcase darthlalang  hai nasa takin a sukkawi. Hi bomb puoka hliem hai chu Md. Musta Kim (17) s/o Md. Abdulla of Mayang Imphal, tuta  Old bazar­a cheng mek;  Mrs  Shalima (41) w/o Iboya of  Shekmaijing, tuta Old Bazar a cheng;  Mafu hertu  Harinder Shab (35) s/o  Kanu Singh of Old Bazar le   Gopen (64) s/o (L) Gopal of Family Lane, CCPur hai an nih. Vangneithlak takin hliem hai hi a hliem inrik an umnaw leiin District Hospital­ah an hliemna hai dressing thawpek anni hnungin  an intieng infetir nawk seng an nih.
   
         

Bomb puok hi IED ni dinga an ringhla  thu Police chun an hril. Hi bomb puok hma deu hin  pasal pakhat bag pai kum 30 mi vel ding hi lai hmuna ATM hawng a ni ding le dingnaw enfelin a va fe a, chu zo sawtnawte hnunga bomb hi hung puok niin Police chun an hril. Tukum­a dingin CCPur dist. a bomb a puok vawihnina a ni tah. Tuta hma Jan. 22, 2015 6:30AM vel khawm khan  Tuibuonga 27­Sector AR HQ camp, Tiddim road lai IED bomb a lo puok ta bawk a nih.

YC lakna dinga interview nei
CCPur: Mr T.K. Simte,  Asst. Commissioner to DC/CCPur Office chamber­ah NYK/CCPur hnuoia National Youth Corps/Volunteer (NYC) 2015­16 post 22 lakna dinga personal interview nei a nih. Interview a hin candidates 90 an \hang. Nehru Yuva Sangathan (NYS) guidline dungzuiin zanita interview thawna result chu May, 2015 thla tawp (last week) vela  puong ni dingin ei thu dawngna chun a hril.

Headline:
Darkar 72 sunga Maoist hai chet vawithum­naah Police 5 an thi nawk
Naxals hai chetna leia thi hai Galantry award inhlan ning an tih: HM
Raipur: Chhatisgarh­a chun darkar 72 sunga Maoist hai chet vawithumnaah zanikhan Dantewada district­a Maoist hai bomb chang kam Chhatttisgarh Armed Force (CAF) motor in a chil puok leiin  Police 5 an thi nawk bakah CAF 8 in hliemna an tuok. Hi thil hi zanita CAF mi 12 hai chuongna Anti­Landmine Vehicle/ Mine Protected Vehicle (MPV) Kirandul pana tlan in Maoist hai bomb chang kam a chil puok leia tlung a nih. Tuta \um hi ni 3 liemta sunga Chhattisgarh­a Maoist hai chet vawithumna a nih. Hi thil tlung an hriet le inruolin Security force tamlem hai chun hi thil tlungna hmun hi pan nghalin dappui nasa takin an thaw a, sienkhawm  man ruok chu an nei nawh.
    
April 11, 2015 khan Maoist/Naxalites helpawl han Sukma district­a  Pidmel ramhnuoiah STF  hai an lambun naah  STF personnel 7 an kap hlum bakah midang 10 in hliemna an lo tuok ta ta a,  April 12, 2015 khan Kanker district­ah Naxalites helpawl han motor 17 zet  an raw a, sienkhawm hi huna hin thi le hliemna tuok ruok chu an um nawh. Hieng hai baka hin April 11, 2015 zan khan Maoist han  Kanker district­ah BSF pakhat an kap hlum bawk leiin ni 3 liemta sunga Chhattisgarh state­a Maoist hai chetna leia thi security personel thi chu 13 an tling tah.
    
Hieng laizing hin Union Home Minister Rajnath Singh chun tulai hnaia Chhattisgarh­a Maoist/naxals hai chetna leia thi sipai hai chu a sun thu a puongin ram venghima dinga an hringna inhlantu sipai hai chu inzana a pek a. Naxals hai chetna leia sipai thi hai chu sawrkarin chawimawina‘Gallantry Award’ inhlan ding le sipai thi  sunghai  kuoma ham\hatna  pek an ni ding thu a  hril a, sawtnawte hnungah hi thua hin mumal takin sawrkarin puonglangna nei a tih tiin zanikhan  Delhi­a reporter­hai kuoma a hril.

Imphal:
Army  Recruitment  Result puong
Imphal: March 15, 2015 nia Rangapahar (Dimapur) hmuna Indian Army lakna dinga Common Entrance Examination (CEE) result puong a ni ta bakah March 12, 2015 nia  Nagaland le Manipur mi hai ta dinga Narangi (Guwahati) a CEE neia um le CEBT of Soldier NA Shillong hmuna neia um result hai chu puong a ni ta thu  Lt. Col Ajay Kumar Sharma, PRO, PIB (Defence Wing) Imphal chun thusuok a siem.
    Result hi  PIB (Defence), M. Sector, Imphal Notice  Board­ah en thei dinga tar a nih. A tling hai chun April 14­23, 2015, 8AM011.45AM inkar sungin ARO Rangapahar hmuna joining letter la dinga inhriettir an nih.(MU)

JD(U) in Moreh district puitlinga dawmsang dingin
Imphal: Janata Dal (United) Manipur Unit chun Chandel district \hendara Moreh chu district puitling a dawmsang dingin an ngen. International highway in a hraw huna Moreh hi Manipur state khawpui pawimaw takel a la hung ni ding leiin state sawrkarin a ngaitha ding a ni nawh tiin zanita Babupara hmuna an office­a Press conference huna M. Tombi Singh chun a hril a, Jiribam le sadar Hills hai khawm district thara puong vat dingin sawrkar a ngen bawk.

Leprosy & TB Hospital bawlna ding siem fel
Imphal:  National Green Tribunal order dungzuiin zanikhan Lamlongei Langol reserve forest area­ah Leprosy and TB Hospital and  Rehabilitation Centre bawlna ding ramri officials han an siemfel. Hi lai hmun hi CM O.Ibobi  Singh chun tuta hma khan va sirin hi hospital in a huom ding ram neitu hai kuoma sawrkar thlungpuiin  compensation  apek ding thu a lo puong ta a nih. Hi hospital bawlna ding hi ram 0.96 acre a lien a nih.

Others:

Rangkachak Rs. 18.75 lakh manhu leh man
Ahmedabad: Custom department officials hai chun zanikhan Sardar Vallabhbhai Patel International Airport­ah pasal pakhat Salim Syed an tipa chu  Rangkachak tlang Rs. 18.75 lakh manhu leh an man. Rangkachak hi a mawngkuo sunga a thupruk niin custom officials hai chun an hril. Syed hi Mumbai mi a ni a, Delhi­a inthawk  Air India flight number AI­019 a hung chuong a nih. Vuongnaa inthawk a \um hnunga a lawn dana inthawk  ringhlana an nei leiin an hrentang a, chu huna an enfelnaa inthawk hieng rangkachak hai hi an dapdawk an nih. 

SSC ­a mi aia exam 1 man
Lucknow: April 12, 2015 nia  Staff Selection Commission (SSC) huoihawtna hnuoia  Combined Graduate Level­2015 (Tier II) Exam um a khan Uttar Pradesh­a Lucknow khawpuia Government Inter College centre­ah mi aia exam pakhat  man a nih.  Mi aia exam mana um hi Amit Kumar niin, Mohd Irfan Ansari  aia exam­a \hang niin JP Garg, Regional Director, Central Region chun a hril. Hi thua hin FIR registered a ni a, mi aia exam petu Amit Kumar le Mohd Irfan Ansari hai chu SSC huoihawtna hnuoia exam hrim hrima kum 3 sung \hang thei lo  dinga ti an nih.

Minorities hai venghim ning an tih:  Rajnath
New Delhi: Albert D’Zouza, Archbishop of Agra le Secretary General, Catholic Bishop Conference of India inrawinaa member 3 han zanikhan  New Delhi hmuna Home Minister Rajnath Singh an inhmupui. Hi huna hin Home Minister chun India rama minority hai venghim an ni ding thu a lo tiem. Minorities hai chunga thil \hanaw thawtu hai chunga sawrkarin action natak a lak ngei ding thu a lo tiem bawk.

UPSC Civil  Services (Mains) Result a suok
New Delhi: Union Public Service Commission (UPSC) hnuoia Civil Services Examination, 2014 (Mains) Result chu April 12, 2015 khan UPSC chun a puong. Mains exam­a hlawtlingna chang hai ta dinga personality test chu April 27, 2015 a inthawka \an beisei a nih tiin UPSC thusuok chun a hril. Mains result hi UPSC website:  www.upsc.gov.in ah hmu thei a nih.

HPC(D) Danpuoa hnawl dingin an rel
Aizawl:  Zanikhan Mizoram Home Minister  R. Lalzirliana inrawinain Mizoram All Political party meeting ko a ni a. Hi meeting a hin party tin hai chun  tulai hnaia Committee on Government Assurances­a MLA 3 hai  le a vengtu hai lambunna thu uluk taka an ngaituo hnungin hi inlambunnaa intum HPC(D) hai chu dan puo Unlawful Organisation­a puong dingin an remti niin ei thu dawngna chun a hril.

MZP in lekhabu an raw
Aizawl:  English Medium school­a General Knowledge subject­a ‘Fact Finder’ ti a chun an diknaw tam tak a u m tia hrilin MZP chun April 11, 2015 khan  MZP Office bul, District Education Officer  office tuolah textbook hi an raw. Lekhabu hi Trend Setters Book Ltd in an sut a ni a, english medium school Class V, VI le VII hai inchuk dinga siem GK Fact Finder­a chun thil indiklo tam tak a um a, data \henkhat chu kum 2001 a mi hmang niin MZP chun an hril. Fact Finder­a hin India President ni lai chu Pratibha Patil ti an ziek a, Prime Minister ni mekah Dr Manmohan Singh ti an ziek niin MZP  chun an hril a, hi baka hin Mizorama khawpui tum tum hming indiklo tam tak a um nia hrilin hienganga naupang inchuktir lo dingin  thuneituhai an ngen.

NGT Ban thuah Truck han service chawlsan an tum
New Delhi:  National Green Tribunal (NGT) in Delhi khawpui sung boruok thienghlimna dinga  Diesel hmang motor hai Delhi khawpui sunga tlan thei ta lo dinga thupek an suo dodalnain Delhi Truckers Association (All India Motor Transport Congress) chun, hi thupek hlip a ni hmakhata dingin zani zanrila inthawk khan an service chawlsan an tum. Hi thua hin Truck drivers association chun  zani hmasa khan Delhi CM Arvind Kejriwal inhmupuiin kut rawl ve dingin an ngen a,Union Transport Minister Nitin Gadkari khawm zanikhan inhmupui an tum.
            
Hieng laizing hin NGT chun hi thua Order an suo chu  chawlkar hni sunga dingin a la sukchawl hri thu a puong.

upa a thisaa hmu an nih
Dibrugar: Zani zingkar khan Mohanlal Agarwal (68) le a nuhmei Draupadi Devi (64) hai chu  NH­37 Khatkati bul laia an chengna in hnung tieng a thisaa hmu an nih. Hieng nupa hai hi nau 5 nei an ni a, hi thil tlung huna hin an nupa chauva um an nih. Hmangruo ngei le inzum tak hmanga that niin an inlang a, insunga thil hai an dar neng nung leiin rukrukna/ insuomna le inzawma thil tlung ni dingin an lang tiin ei thu dawngna chun a hril.

Ramdev  Cabinet minister status
Chandigarh:  Haryana sawrkar chun Baba Ramdev chu  Cabinet Minister  ngirhmun pek dingin zanikhan a rel. Ramdev hi  Yoga le Ayurveda hrilmawina kawnga Haryana sawrkarin brand ambassador­a a lo ruot ta a nih.

Governor hai khuokhirna
New Delhi: Sawrkar thlungpui chun India rama Govenor hai chu President phalna la hmasa lova an sinthawna hmun suoksan lo dinga khuokhirna dan thar a siem. Governor hai chu an thawkna hmunah kum khat sungin ni 292 bek an um ding ti a  nih.

Telangana le AP­ah ruosur leiin mi 10 an thi
Hyderabad: Darkar 24 liemta sung khan Telangana le Andhra Pradesh haia chun ruo sur nasat leia siet tlungah mi 10 velin thina an tuok tah.  Mi 5 hai chu Telangana state mi an ni a,  midang 5 hai chu Andhra Pradesh­a Kadapa le Kurnool district haia thi an nih. Mi 10 thi hai laia 5 hai chu bang chimin a del hlum an ni a, 3 hai chu electric in a man hlum an nih. Ruo sur hin thlai  tam tak a suksiet bawk.

Editor \hangin mi \huoihmangna thuah mi 14 man
Puducherry: Trade Union deader V. Udayakumar (42)of Puducherry factory­a inthawk \huoihmanga, an tlansuokna dinga Rs.2 crore ngenna le inzawmin Chennai based Tamil Monthly magazine Editor K. Palani (42) \hangin mi 14 hai chu Puducherry Police han an man. Mana um hai lai hin income tax department, Chennai­a casual employee khawm a \hangsa. K. Palani hi Custom officials nia inhril a nih. V. Udayakumar hi  factory­a inthawk a In pana a fe lai meka  \huoihmang a ni a, an tlansuokna ding hin a bul chun Rs. 2 crore ngen a ni a, sienkhawm a hnungin Rs. 25 lakh in an inrem nia hril a nih.

Nikita Gandhi in “MasterChef India 4
Mumbai:  Abu Dhabi based Nikita Gandhi (21) chun  April 12, 2015 nia  “MasterChef India 4”  Grand finale nei huna “MasterChef India 4” a lak a, lawmmanin Golden Chef coat le  Rs. 1 crore ( Rs. 10 million) a dawng. Nikita Gandhi hi  Ahmedabad hmuna pieng, Abu Dhabi hmuna khawsa mek a nih. Golden Chef coat le pawisa baka hin Nikita Gandhi chun mi 2 London trip ticket a hlaw, pahnina chu Hyderabad  mi Bhakti Arora niin lawmmanin  Rs. 500,000 a dawng. 
-----------------------------------------------------------------------------------------------
VAWISUN THUPUI
Tlangahai chanchin \ha intluna, inremna thu khekpuia, thil \ha chanchin \ha intluna, sandamna thu khekpuia, Zion kuomah, “I Pathien chu lalah a \hung,” tituhai ke chu a va mawi de!. ­ Isai 52:7

Editorial:
Ei fimkhur zuol a \ul
Manipur tlangram  district hai laia in\hang, hmasawn hrat tak le Manipur khawpui pahnina tia hriet, Kristien hai bubitna Churachandpur district a chun thil ditumlo inzing utin a tlung el ta a, thil pawi tak a nih. Manipur state  khawpui pahnina tia hriet a ni ang bawkin  suol le \ha tiengah ei in\hang hrat hle. A \ha tienga hma ei sawn hrat ang bawkin suolna khawm a pung pei a, nuhmei suolluina, inhlemna, rukrukna le thawluina hmanga sum inlakpekna bakah suma intlansuok dinga mi \huoihmangna hai bakah rapthlak tak taka inthatna hai  an khat tawkin a tlung hlak hi thil pawi tak a nih. 
    
Hmasawnna lampui ei hraw mek lai hin suol le \ha kara leng ei ni leiin ei nitin mamaw le \ul thawna haia a hma neka ei fimkhur zuol a pawimaw. KNO le UPF in Centre le State sawrkar hai le Suspension of Operation (SoO) an ziek china inthawk khan thaw pangpal lei ni lova chun khawpui sunga silai hmet puok le bomb ri hriet ding a um zen zen tanaw a, sienkhawm tu tieng tieng hin  hmun \henkhatah bomb a hung puok zeu zeu hlak leiin mitin ei fimkhur zuol a \ul. January 22, 2015, 6:30 vel khan Tuibuong­a 27­Sector Assam  Rifles HQ camp bul, Tiddim road sira duty post a inthawk feet 3 vel chaua hlaah IED bomb hrat takel sukpuok a ni bakah April 12, 2015, 8:30AM vel khan Sielmat le Tiddim Road junction Lighthouse Lane, CCPur­a  54­Bn. BSF ‘G’ Company duty post bul lai IED hrat takel a puok a, civil mi 4 zetin hliemna an tuok a, sienkhawm a vangneia siemin thina tuok an umnaw bakah  hliem hai khawm a hliem inrik an um nawh.
    
April 12, 2015 nia bomb puokna hmun hi CCPur district­a lam\huom (junction) pawimaw pakhat, nitina mi tam tak an inlawnna lampui a ni a. Bomb puok hun hi zing dar 8:30 vel  a ni a. Pathienni (sunday) ninaw sien chu  zingkar school fe ding le office kai ding hai  inlawn le fe hun tak a ni leiin thi na tuok  khawm an um ngei ring a ni bakah  hliem khawm an tam hle ring a nih. January 22, 2015 nia Tuibuong AR duty post bula bomb puok leh tuta mi hi Churachandpur district­a tukuma bomb puok vawihnina a ni el khelah a puokna hmun hi a hung insawn tung pei a ni a. A nawka khawlai hmun tak am a puok ding ti ei hriet nawh. Hi lei hin mitin ei fimkhur a \ul.
    
Mi tam tak chun sipai hi ei himna niin ei ngai a, kawngkhata chun a ni hrim a. Sienkhawm sipai bul hnaia um hi himna a ninawh ti ruok hi chu  hriea, sipai bul hnaia um rawn lo, le sawt tak um lo hi ei ta dinga himna a nih ti ei hriet a pawimaw. India hnampa Pu Mahatma Gandhi khan India in Independence (Zalenna) a hmu hnung khan venghimtu a dit nawh. A san ienglei dang ni lovin ralthuom \ha le sipai iengza khawmin veng hai sien a thina ding chu a pumpel chuong a ringnaw bakah sipai le ralthuom \ha leia him dingin an ring naw lei a nih.
    
Khawvel ei hang thlir a, sipai leia him ding ni hai sienla chu Afghanistan, Pakistan  le Middle east  rambung hai hi him ngei an tih. A san chu  ralthuom \ha le sipai tam takin an chenchil, a ram sipai chau ni lo khawvel rambung tum tum a inthawk fekhawm UN sipai hai chenin an chenchil an nih. Sienkhawm an him chuong naw a, nitina inbeituona tlung leiin sipai le helpawl chau ni lovin Civil mi khawm tam tak ak an thi zing a nih.
            
Tam tak chun ralthuom \ha le changkang  tak tak chawi sipai hai hi ei lo inhnempui khawm a ni thei,  kawngkhat ngaituo chun a awm hrim a. Sienkhawm a hun le hmuna naw chu sipai hai hi ei himna nekin  thina intlun thei an nih. Thil iemani lei annawleh tum bik neia an thaw a ni ngawt naw chun ralthuom mumal nei lo  Security hai nekin ralthuom \ha le changkang tak tak nei sipai hai hi an bei nuom bik. A san chu an ralthuom hai  an inhnar a, lakpek an nuom hlak leiin. Hi lei hin ei fimkhur a \ul. |henkhatin sipai hai biek thei le an bula um intitheina damin ei hmang rawp hlak. Inhmelhrietpui chu a \ha a, sienkhawm an bul hnaia umzing le inpawlpui zing hi a him nawh ti ei hriet tlat a \ul. Ralthuom \ha chawi  sipai hai hi helpawl han an bei nuom bik a nih ti hi ei hriet tlat a \ul bawk.  Hieng a ni lei hin helpawl hai chet nuomna ding hmun le sipai hmun haia hin lungmuong taka um rawn le um tam lo chu ei himna ding ning a ta, chu dinga  mitin ei fimkhur nuom a um.



Post a Comment

Powered by Blogger.