Christian Movie
 Sielmat ICI Kristien Thalai Pawl Production 2015, Hmar Feature Film:
PUITLINGNA (Maturity)

“Krista thubul hril ta loin PUITLING tieng pan ei tiu” –Hebrai 6:1

Tuithaphai: April 21, 2015 Zan dar 7:30 PM IST khan Sielmat ICI Naupang Sunday School Hall ah releasing programme puithu taka buotsaiin Sielmat ICI Kristien Thalai Pawl Production 2015, Hmar Feature Film: “Puitlingna” (Maturity) ti chu Rev. Lalneikhup Hmar Secretary Finance, ICI in mipui en thei dingin, mipui fekhawmhai hmaah Tlangzarna le Pathien kuomah inhlanna a lo nei tah. Hi hun a hin Special Nos. Nk. Mariah Darngawn Hmar (Hi movie a OST ‘Puitlingna’ ti hla saktu),  Nk. Lawmnakim (Zomi Idol 2015 Runner Up), Nk. Gloria Khawlhring (Semikah Band) le Nk. Daisy Khawbung (T-Melody, Yangoon, Myanmar) haia inthawk Pathien inpakna hla mawi tak tak ngaithlak a ni a. Mipui fekhawmhai mit le na a tlaiin, an hlimin, inhawi an ti tlang hle. Chu el bakah mipui fekhawmhai chu thingpui le bei (cake) changkang le tuihnai taka buotsaiin hi hun huoihawtuhai hin an lo vai (khilai) a nih. Hi hun hi ICI General HQ tienga hotu lien, ministry inlar tak el For One Life tienga hotu le media tieng khawmin an uop a nih. Hi hun a hin hi movie DVD hi mi thahnemngai iemani zatin an inchawk nghal a. International Film Festival a hai chen a khawm insuo dingin insit a um naw a, hiengang rawngbawlna hi a tulai khawvel a ding chun a pawimaw hle.


Hi hun hi Rev. Alan L. Thiek in hnesaw takin a Host a, Rev. L. Joshua Chairman, Tuithaphai Presbytery KTP in Opening Prayer hun hmangin, Key-note Address Tv. John Lalmalsawm Hmar Movie Director in a nei zawm nghal a. Hi film hi August 3, 2014 a ICI Facebook group a a vision a share an KTP in Committee-naa an hung bawzui, Film Production Committee hai hung indin a umin a taka hung inchang thei tah a ni thuhai a hril a. Thlalak (Photography) chu a thil inhnikna zawng tak a ni thu le hi film hi tulai kohran le khawtlang a ei nun dan fe mek a ni thuhai hrilin, tulai kohran le khawtlang a danglamna nasatak um mek chu siemthat thei dan ding umsun chu hi film hi a ni thei thu, hi film a inlang inkhawm lai le a dang dang hai chu Programme fe lai mek (a tak tak) iemanizat suklang a ni thuhai a hrillangsa bawk.


Movie Preview-na hun Rev. HP Runremthang YCO, ICI chun a nei a. Hmar hai Film ah ei hausa naw a, Sielmat ICI KTP in Movie an buotsai a lo en hmasatu a ni chu vangnei le lawmum a ti hle thu hai hrilin, hi film hi phuokfawm nilo, vision a ni ngei zie, a tan dan ding le a tawp dan ding, John hin vision a lo nei that zie, a tawp chenin hi Vision neitu hin a lo hmufie vawng zie hai a hril. Hi film hi Naupang, Puitling tadinga en inhawi, Thalai lem chun en inhawi an ti ding, Replay nawk pei an nuom ding khawpa hi film hi um a ni thu hai a hrilsa baka a entuhai malsawmna dawng seng dingin a’nhlan bawk.


Rev. Lalneikhup Hmar in tlangzarna a nei huna thuhrilna a neina a chun hi film buotsaituhai chu inpakum le lawmum a ti tak zet thu, hi film tlangzartu dinga chanvo hlutak peka a umna chu lawmum a ti hle thu hrilin, hi film release ni, April 21 chu ama pieng champha phak zan, kum 59 a tlingna ni a ni bawk leh hiengang hun hmang thei a a umna chu Pathien le hi hun ditsak taka chanvo petuhai kuomah lawmthu a hril a. Film tha le tha naw laka fimkhur a ngai zie hai hrilin tulaia inlar Life OK (Savdhaan India/India’s Fight Back) chu en en lo ding. Nu-le-nau in ei en a. A thil tum chu Indian Society inzakum zie a ni thu a hrillagsa bakah hi hun a hin hi film buotsaituhai kuomah thilpek an hlan.

Hi film buotsaina le inzawma  Report chu Tv. Joshua Amo Secretary, Film Production Committee (FPC) a inthawk ngaithlak a ni a. Hi Movie DVD pakhat man INR 99.00 chu hrilfiein INR 1.00 chu an chawtuin rawngbawlna di’n a nuom chun pek thei a ni thu a hril a, hi movie hi KTP Committee in chipchier taka ngaituo a ni hnungin buoipui a ni thu, shooting hi Aug. 15, 2014 tan le Dec. 23, 2014 in shooting zo a ni thu, shooting tan le zo hun haia Pathien kuoma tawngtainaa iengkim inhlan hlak a ni thuhai a hril a, A vawr tawp chu April 21, 2015 (Releasing Programme) hin a hung tlung tah a nih, tiin mipui fekhawmhai hma ah a hril. Hi film siemna ding hin Nikhat Bazar (One Day Market), BP Check, Mimal thahnemngaihai pawisa tuok khawma inthawkin INR 32,470/- vel hmuin, an seng po chu 35,000/- niin hi hun a hin a hril bawk. Film Disc a tuhri hin Sub-Title English a siem ding a ti chu a la um naw a, a hnunga a la hung um ding thu le FPC le Thalai Committee hmingin lawm taka lo pawm di’n mipui hai a ngen.

Lawmthu hrilna Pu Ebenezar R. Sinate Convenor, FPC in a nei a. Closing Prayer Rev. Zothanghrim Chairman, Sielmat ICI KTP in a neizoin zan dar 9:00 PM velin hun suktawp a nih. Hi zo hin hi film a a changtuhai chu thlalakpuina hun hawng a ni a, mipui ngainat hlawin, Thlalakpui nuom an tam hle.

Hiengang kohran KTP in an buotsai movie hi tlangmi kristienhai lai khawm a la tam naw hle a. Ngainat a umin, tulai hun a ding chun rawngbawlna pawimaw le hmalakna tha tak pakhat a tling tak zet a. Hlawk taka ratha a hung insuo ngei beisei a um.

Hi movie puitlingna dinga chanvo pawimaw tak tak cheltuhai chu hi film inchawk a I en hun ah chieng nawk zuolin la hrie thei i tih. A then a zar hang hril inla; Music- Robert L. Keivom, Editor- Richard L. Sinate, Costumes- Daisy Varte, Sound- Jessai Ralsun, Supervisor- Paul Nathan, Videography- Richard L. Sinate & Chawnglienkung Sinate, Written & Directed by- John Lalmawlsawm Hmar hai an ni a. A changtu tak chu Tv. Ramtharlawm le Nk. Vasty Lalengvar hai an nih a. Anni lo thlawptuhai chu KTP le kohran member dang danghai an nih. Hi movie DVD hi a copy indik tak lo inchaw la, rawng i bawlna khawm ning a ta. Insir naw hleng i tih! Sielmat ICI KTP hai hmalakna hi tulai khawvel a ding chun a pawimaw hle a. Lalpa’n malsawm mawl raw seh. Amen!

Reported by: LRS Puruolte| Photo: Alan Famhoite





Post a Comment

Powered by Blogger.