Responsive Ad Slot

New Zoar, Mahur ah Seminar on Transformation nei

Friday, March 6, 2015

/ Published by VIRTHLI
Muolhoi, 5 March 2015:  Hmar Women Association (HWA) NC Hills & KA hmalaknain vawisun New Zoar, Mahur a ‘Transformation’ ti thupui hmangin nuhmei hai lai Seminar nei a nih. Hi Seminar hi ei ram le hnam ngirhmun enin inthlakthleng tulna kawng tamtak um lai a nu hai mawphurna bik deu inhrilhriet beiseina nei a rawt a nih. Insung nu mi 100 bawrvel fekhawm a nih.



Pi Hnemi Tuolor Gen. Secretary’n Seminar a keihruoi a, Pi Ruth Zovi Pulamte’n Exeutive Member, “Hriselna dinga Invawngfai le Thienghlimna- Mimal le Khawtlangah” ti thupui hmangin nu hai mawphurna le thienghlimna hi hriselna ta dinga a pawimaw zie hai hnesaw takin a hril a, Pi Niangi Hrangchal, President in Pahnam a indaidanna umlo ding le rathei le hausa kar sukhlat ninaw sien ti a hril bawk. Pi Ropui Hmar, Vice President in “Transformation (Inthlakthleng- Mimal, Khawtlang le Hnamah)” ti thupui hmangin intlakthlengna dinga nu hai pawimaw zie le mawphurna bik hai a hril a, mi pakhat that zarin hnam a tha a, mi pakhat thatnaw leiin hnam a sie hlaka, mimal tin hi hnam eini ti a hril sa bawk.  Chun Nk. Lalramhnem Buongpui (Elbee) Asst. Gen. Secy. in “Leader - Thuoitu ngirhmun” ti thupui hmangin thuoitu tha chun ama neka tha thuoitu a siem hlak ding ani ti hai le thuoitu tha ni dingin iem a pawimaw a ti hai a hril bawk.


Thupui hriltu haiin hnesawtaka an hril zo zatin thupui tinah hin hriltlangna hun hmang pei ani a, fekhawmtuhai khawm nasatakin an hlawkpui thu hai an hril. Hieng ang seminar hi tuta tum hi a hmasatakna ana, NC Hills le Karbi Anglong hmun hran hran hai a nei sunzawmpei tum a nih tiin HWA thuoitu hai chun an hril. (Virthli News Service)
Don't Miss
© all rights reserved
made with by Simon L Infimate