March 23 hi Rengkai (Rengkhawpui)-in Kum 77-na hmel a lo hmuna ni a nih. (23rd March 1938 – 23rd March 2015) * South District (Manipur)  sunga Bel sungna hmasatak chu Rengkai hi a lo nih! Sabon siemna hmasatak le Hnang le Plastic Lukhum tana hmunpuitak khawm Churachandpur District sung ah Rengkai hi a lo nih! Hi khuo hi Pathien thlaraumi tak tak le hlaphuoktu hmingthang Rev. S. Lienrum (Ni Tla Ngailo Zion Khawpui ti hla phuoktu), Pu Lama (Van Zaipawl ti hla phuoktu), Pastor Taisen,… Hlasakthiem tak tak Pi Lalruotmawi le Pi Monica Lalhlimpui (Zoram khawvel sukhningtu le Pathien hla a mi’n awi tlai hlaktu hai dam), Father of the Hmar Literature Dr. Thanglung le Hmar hranghlui tamtak hai lo chengna khuo a nih! Hrietchieng nawk zuol i nuom chun ‘Rengkhawpui Facts’ ti hi tiem rawh.


Rengkhawpui Facts   -LRS Puruolte

Kan tawn ah I sakhming a mawi,
Aw Rengkhawpui vul zing la;
Chinlai zalengtin lawm ah,
I sakhming in thangmawi pei sien…

Vankhuo tin ka fang vel a,
I sakhming singzo ding reng aw;
Um a naw e, kei ka tawn ah,
Sakhming chullo aw Rengkhawpui.

A khawtlang suk mawi zuoltu,
Nghaknu-Val tlawmngaina hlu reng;
Hril a bang nawh a mi nellai,
Zuol pei sien thang le thar chen in.

Khuoi ang kaina Rengkhawpui,
Chullo in par ang vul zing la;
I beisei hlak thiemna parmawi,
Hang hawn di’n tuon zai rel tang ie.

-Pu  Lalruotthang

Pathien hring thuoina le umpuina zar lei lieu lieuin, India ram a khawm Manipur ram, Tuitha phairuom, Tuithaphai khawpui suotieng pang, Tuithapui vadung kam a um, Khawvel pumpui huopa Hmar tawng hmangtuhai tading lem chun an bubitna hmun tak khuo le khawpui tak pakhat a ngai hlak le Chi-le-chi buoi lai hun haia khawma, mitin-chitin-hnamtin thlamuongna hmun le tlan lutna, Zoar Khawpui/Peace Zone a ko le lo puong ngat tah hlak, Rengkai (Rengkhawpui) Khuo chun Thlatau (March) 23, 2013 khan a Kum 75-na (Platinum  Jubilee) chu a lo hmang ve der tah a! Hi le inzawm hin Jubilee Lawmna ropui tak an lo nei tah a nih. Rengkai khuo Chanchin sinsie zing tlak- Rengkhawpui Facts tamtak um hai laia a then a zar hei suklang ei tih.

RENGKAI HMING HUNG PUT TAN DAN:
Thlatau (March) ni 23, 1938 ni a inthawk khan Rengkai khuo hi hluo tan a nih. Rengkai khuo hi hluo a ni hlim chun in 10 chau an nih.       
(1) Pu Kailien Chief Family    mi        10
                                                (2) Sanga Khawnbawl            ,,          6
                                                (3) Zuluoi                                ,,          6
                                                (4) Hleia                                  ,,          4
                                                (5) Luoia                                 ,,          5
                                                (6) Vela                                   ,,          6
                                                (7) Thorum (Kanga)                ,,          6
                                                (8) Khupte                               ,,          7
                                                (9) Thangsung                         ,,          4
                                                (10) Tawka (Tlangkhar)          ,,          5
An rengin – mi 59

Anni po hin buk sei deua bawlin inkhata hin an um senga Thuk hrana insuong ni hai sienkhawm an rengin iengkim intawm vawnga um an nih. Buk sei deua bawlin an hang um hnung chun, mihriem an hung pienga, hming nei a tul ang bawk hin khuo hang hluo an ni ta leiin a hming ding an ngaituo tah a.

Thenkhatin Salvation School (Tuta Children’s Training Hr., Sec. School um na) lai khin lung milim a um a, Meiteihaiin “Khomujamba” an ti khi hmingin put inla ti pawl an um a. Nisienlakhawm thenkhat chun a Meitei hming em leiin an dit nawh a. Thenkhatin a khuo hming hran a ngai lem ei kawl el ah Tuithapui a luong zinga, chu Tuithapui chu hmingin nei el ei tiu ti pawl an um bawk.

A khaw hming dinga Tuithapui zuk ti chu mi thenkhat an nuom nawk naw leiin a hming ding chu an la tlasam ta rawp a. Mi thenkhatin Muolhlum kai lai hin Meitei thenkhat an lo um a, anni ngeiin an hrillawk a hi kai Torabung lai hin nakie chu tlangmi “Hau” an ti hai hi an la hung um ding a nih, ti a an hrillawkna angin , a khuo hming ding chun “Torabung” ting ei tih dam an tih a, chu khawm chun khaw hming dingin an la dit nawk naw pei a.

A tawptaka khaw hming sak ding tum li naah an hang ngaituo nawk chun, Pu Kailien Lal chun, “Khaw hming sak hran hi a tulin ka hriet ta nawh., Manipur Rengin ei kai lai khun nga a mannain a hung hmanga, Rengpa kaina a ni leiin ei khaw hming ding hin, “Rengkai’ sak el ei tiu”, a ti phing leh an inthuruol tah a. Chutaka inthawkin “Rengkai” ti hi a hung put sawng tah a nih.

Hma hung sawn peiin a khuo a hung inthanglien lai zingin Indopui 2-na (II World War) a riva a hung inthang peia, ral hrieta inthang chau ni talovin a tak takin British sipaihai chu October 23, 1942 ni hin a hmasa pawl chu an hung tlung tan tah a nih. Mi a hunghai hi an la tam naw a chu, nitin hin tam tieng an pan pei a. An hriet naw kar zan lai dam hin an kawmkar dam an lo sip vawng hlak a nih an tih. Sipai chu an hung tam peia, ralin zuol tieng a hung pan pei ta phingin khuo chu suoksan dingin thu an pek tah a. Tarik 4.4.1944 ni chun Rengkai khuo chun an in le lo hai maksanin an suok tah a nih. Japan ral laia Rengkai an suoksan ni chen hin in 23 an tling hman tah a nih.

LAL INTHLAK THLENG PEI DAN LE AN CHANCHIN TAWI:
(1) Pu Kailien (Rengkai Lal hmasatak) a piengzie hrim a khawm mi vantlang tak, mi hawihawm, midanghai hin hma hung sawn hai sien, khuo hi hung burip sien ti ngaituo mi a nih. Ama kha hranghlui mi deu a la ni leiin, a samhai khawm feltaka intawm hlak mi le taima tak a nih. Ama kha taksa dan ah mifel le tlawmngaithei mitak ani ang hrim khan, dawithiemhai laia anlo zelsa ve hrim anih. Ama kawl a khawm hin tangka vanglai mitlingin nikhatah seki chau an hlaw lai hun khawm khan Rs. 40/- zetin a kawla hin dawi an inchawk ve ngat ani an tih. Pu Kailien dawithiema an ringna santak pakhat chu: Hmunlet (Mizoram) a a sielchal ngeng chu Thlanbung khuoa an um hnungin a zu keia mihai chun, “Khi chen chena keitlung thei chun dawi a thiem hle ning a tih,” an ti a. Ama vangneia siemin a sielchal chu Thlanbung khuo a kei tlung thei ti an hriet phing chun, mihaiin a let tamin an inza in an ti tah a. Ama kha khuo le tui hmangai thei mi tak anih. Favang tlanga dam hin an khuohai  bu neitalo dinga a ringhai kuomah lengin “Bu hung phur ro” a ti thei anih. Tulai hun a ding lem chun pot 1 ah cheng `.700/-  a inthawk a a chung tieng dam a man ta leiin inpek el chu a harsa ta hle.

A khuo le venghai buphunzo dam hin vawk thatin ruoi dam a siem pek hlakin a khuohai ta ding chun dangadap thei em em. Kum 1944 Japan ral tlan lai, an inhai an raw pek vawng hnung inkang vam a khan. Ngurte khuoa inthawka nakie dam taka lut nawk thei dam ani leh a lut hmasa hai lo hme dingin tiin Ngurte khuoa inthawka kir nawkin (Rengkai ah) mai alo vatu nghe nghe anih. 1945 kuma raltlan lut nawk hai chun a mai tu ra chu nasatakin an sawrin an thangkai pui pha em em.

Ama hi 1867 khan Mizoramah a pienga, 1910 kum khan Tuithaphai a luta, 1911 kuma inthawk hin ama chanpuol ding Thlanbung khuo a sat a. Chuchu, Tuta Lhingsiphai le Mata Muoltam sak tlang dung lai khi anih. Chun, hi khaw hming hi ei unau meiteihai chun “Kailien Ching” tiin an kova, Sawrkar record a khawm “Kailien Ching” ti a um le ko a ni ta zing a nih. A khuo an hluo tirin in 5 chau niin 1917 kum khan in 20 an tling hman tah a nih. Hi khuo an hang hluo a kum nawk 1918 chun Kristien khawm an um tah. Chu khuo a chun umsawt thei a ni naw phingin 1921 kum khan Runralah khuo a hang siem nawka. Chuchu, khaw hming chu, Chapi Kailien ti a nih (Runral/1920-1937) tuta Chandel District a Topokpi bul lai, ei unau Meitei hai ti dan chun Serou Lamjao (Phairuong Hmunlien) lai bawr khi anih a. Manipur President Pu Gimson-in Patta khawm a pek ngat a nih. Hi lai hmun a hin kum 18 sung zet an um a. In khawm 85 lai an tling hman tah. A khuo hai chu Hmar in 30, Zou in 20, Anal in 20, Oktong in 15, An rengin in 85 an nih. Kristienna tieng khawm a khuo an thang ang peiin  nasatakin a khuo an thang a, Biekin le School dam khawm an bawlin an nei hman a, Anni hi sakhuona tieng khawm thuoitu ngirhmun ah an ngir vawng a, ei Unau Anal-hai damin Hmar tawng le hla an thiem hman hle. Chuonglaia Mission innghatna tak chu “Independent Church of  Manipur State” a nih. Hi lai hmun hi hmun pawimaw tak Manipur, Burma (Myanmar), Tiddim hai lai thubuoi a tam pha pha saphai khan ‘Border Meeting’ an ko na hlak anih. Fak le dawn, kawng hran hran a hnienghnar tak a an hung um lai zing le an khuo hlim le lawm taka an hluo lai zing chun 1935 in Chakpi vadung kawina lai taka an tui lakna chu a hung suk siet tan tah a. Mi tamtak inpem an lungril tan hnung kum thum lai an la um hnung chun a sietna chu siem that el chi nia an lang tak naw leiin Tuithaphai tieng hin kum 1938 khan an hung inpem thla tah a nih.  Kum 35 lai ro arel hnungin tarik 3-10-1945 kum hin, hi khawvel hi hmu nawk ta lo ding le Kristien nita in a khuo siem pathumna Rengkai chu a lo maksan tah anih. Naupasal pahni a neia. Rotlungbut le Lunga (Sailienlung) an nih.

(2) Pu Sailienlung (Lunga) ama hin tlin le tlinlo thu hrillovin kum sul hung inherliemin Chiefship anina chu mani Custom dan taka khawm a hluo a tul ta leiin, tarik 4-10-1945 ni hin a pa khaw siemsa chunga chun a seat chu a hung lak ta a. Ama khawm hi apa ang bawka hmangaina hau mi anih. Tu le te hai, far le zuor hai hmangaina-le-lainatna nei mi ani lei hin, zingbu suongna hrim hrima hin mani zingbel liena suong zie ding anih. Sun vawntam hun in tu le te haiin bu hung zawnghai sien um naw rawi a ti, ti hi a thil ngai pawimawlaia pakhat chu a nih. Pu Lunga a thatna le mihaiin an inpakna tak chu: A khawsung popo hi Nagabari anga sawrkarin ama hminga patta an pek vawng hi ania. Khaw dang khawm chuongang tho chu an nih. Khuo thenkhat chun an patta sungah mi an in cheng tir nuom naw a, buoina chen tlung khawm an um hlak in an hril. Nisienlakhawm Rengkai Lal  Pu Lunga chun khaw mipui dit leia hienga um hi ei nih an nawm, chuleiin, “Ka patta huom sunga inneihai popo khawm zalentakin mani delna chin chin chu separate patta a hran hrana khawidar vawng ding a nih, kei khawm tuta kan delna chin po hi patta a hrana lak nisien”, a ti ta a. Hi taka inthawk hin a khaw mipui hai khawm chu an lawm em em anih. Mani tanghmasiel der lova hieng ang lungril dam hi a lo putna lei hin Pathien malsawmna hieng ang khawpa Rengkai-in a lo dawng pha nasan a ni ding a ni hih…, ti hi mi tamtak hai ngaidan a hung ni thei ta pei a lo nih. Pu Sailienlung hin kum 18  zet ro a rel hnungin, a khuo hai leh inthlakhla tak  pum zingin tarik 24-9-1963 khan a khawtlang le mipuihai chu, chatuon rama dingin a lo inlawisan tah. Ama hin Naupasal 2 a nei a, J.C. Chongkholien (Tuta Rengkai Lal) le Lalhmingmak Joute.

(3) Pu J.C. Chongkholien (Vawisunni a Rengkai Lal) hi Runral khuo (Thingkangphai) ah ni 3-8-1933 khan a pieng a, a nu le pa Sailienlung le Lalkhawl naupasal 2 hai laia a upa lem a nih. A hming hi a pu Lal Kailien in a phuok a nih. Kum 1938 in  Rengkai Lal Kailien le a khuohai an in pem lut in hi khuo a hin Lower  Primary inchuk theina a hung um a, khawsung a Class VI  chu (L) Pu Thuomte Headmaster hnuoia zovin High School chen an chuk a, Jorhat Christian High School ah 1955 khan  Class X a passed . Chun, 1955 vekin St. Anthony’s College, Shillong ah College a zawm a, B.A. hi College a inthawk  hin 1959 in tluong takin a passed. Kum 1959 vek khan Guwahaty University ah M.A. (Economics) an chuk a, course po a zo vawng hnungin Shillong boruok thatna hmuna lekha thla 2 vel tiem dinga a um lai natna maktakin a na a Robert Hospital, Shillong ah thla 1 le a chanve lai enkawl a ni hnungin a suok a M.A. exam thei talovin Rengkai tieng a hung kir pha hiel a. Kum 1963 in Vimala Raina Girls  High School  a Headmaster sin a thaw a, kum 13 zet a thawk hnungin District Education Officer (Tulaia ZEO) ah a promotion a. Kum 1970 khan  Manipur Government in New Delhi a Republic Day lawmna a thang dingin Manipur Lalhai aiaw mi 3 a ruot a. Chuhai laia pakhat a chun a thang ve ngat anih. India hmun hran hran a Tribal lalhai mi 30 lai Delhi a fekhawm Republic Day hmanghai Thuoitu damin a thang a . Mayor of Delhi, Defence Minister, Vice-President of India, Governor of Bombay, Social Welfare Minister of India le milien dang dang haiin Tea party  an nei puina  hun haiah lalhai aiaw a lawmthu hriltu tak a la hung ni pei anih. Churachandpur Small Town Committee indin phut hlim (1966) a member hmasatakhai lai a thang a. A hun lai hin Saptawng thiem khawm an la um mang naw leiin tawng inlettu tak a hmang hlak a nih. Kum 1974 in Guwahaty University hnuoiah B.T. a passed nawk a. Apa Sailienlung alo boral ta leiin tarik 25-9-1963 nia inthawk hin Rengkai Lal nina le Village Authority Ex-Officio Chairman-in sawrkarin a ruot angin, chu sin chu vawisunni chen hin a la chel. Lal a ni hlim khawm a, a pu le a pa mi bengvartak an lo nina zarah lekha tieng khawm B.A. alo passed hman ta bawka, chu chau chu nilovin Vimala Raina Girls H/S ah Headmaster alo ni ta bawk leiin; mithiem le rorela hang thung hmunkhat chu memberhai khawma inhawi an ti thei hle. Ama Chairman  na hnuoi a hin VA inthlang tum tam tak, vawisunni chen hin a la um. A khuo an pung ang peiin member khawm an pung peia, tulem hin chu member 12, a vawrtawp ani tah. VA Chairman ni zingin Headmaster a’nthawkin DEO (District Education Officer/Tulaia ZEO) a hung kaina lawmna khawm tarik 27-12-1976 ni khan a Cabinet haiin Bawng thata lawmna an nei nghe nghe. DEO sin a chelnaah transfer in Chandel District ah kum 2 vel a um hnungin Imphal ah Head Office ah Deputy Director of Education sin chel dingin ruot a ni nawk a. Hun sawt raklo hi taka a um hnungin Churachandpur bawk ah DEO sin chel dingin transfer a ni nawk. DEO sin a chel kum 10 sung hin eini mi Government sin mi 50 neka tam an hmu tir hman anih. Kum 1978 in Hmar mithiemhai lai Manmasi Club indin a ni a. Chutaka chun President hmasatak a nih.Hi Club hin hnam changkangna sin tamtak a thaw. Taksa hriselna thuah  Pu Chongkholien hi mi vangduoi tak a na, thi vangin vawi tam a na tah a, bawrsawmna ruk kawl tlat a nei leiin a lungril a thiltha thaw ding a hriet tam tak thawtheilo anina thu ah mi vangduoi a nih. Nisienlakhawm, fak le dawn, bu le bal thu ah malsawmna nasatak a dawng. Taksa le thlarau a Pathien malsawmna hai nasataka dawng peiin, eini tlangmi laia khawm mi hlawtling thei tak laia mi, hril kai a hung ni pei tah a nih. Kum 1964 in Dr. L. Kampu naunu upatak Pi Khawlpi chu nuhmeiin a nei a, ama le hin naupasal 2 le naunuhmei 5 annei a, Chuonghai chu-
1. Jimmy Kamhmingthang
2. Teresa Pari
3. Joufonlien
4. Margaret Lalnunkim
5. Grace Kimneiting
6. Dr. Debora Sang Lal Faki (J.C. Dental Clinic)
7. Linda Hoitinkim

RENGKAI HI THEMTHIEMNA HMUNPUI A LO NIH!:
Indo hi mitamtakin an thi pha a, thenkhat chun an ngirsuok pha hlak hrim a nih. 1945 kumin Japan ral chu a hung inveng tah a, mitamtak chun camp dam an dap a, insung tieng khawm an phuisui pha bawk. A mihai an la mawl ang pei bawkin an thil dithai khawm a la mawl pei bawk. Fakfawm ding le sil-le-bil ding dam hi an zawng tak a nih.

Indopui 2-na (2nd World War) chu a hung tawpa vuongna siehai dam chu a hmangna ding awm hrim hrim hre lovin hun iemani chen chu an um a. Hun iemani hnung chun Pu Thantluong-in Bel dam, Thlengbel dam, Haihaw dam le a dang danghai chu a hung sung thiem a, hmun dang, hi Churachandpur District sunga hin a sung thiem dang an la um naw leiin Rengkai chu a suk lun em emin Bel sungna Centre an ti hiel a nih. Bel khap 8 dam an hang sung hin mihaiin an dit em em a. a thenin an hung inchawk a, a thenin an hung in sung tir bawk a. A hung inchawhai khawm chun a man chu Cheng `.30/-chau a la ni a. a man a la tlawm em em. Mi a dit an hung tam deu deu a, Pu Thantluong chu ama khat chau an dai ta naw leiin 1939 kum a lo um ve tah Pu Laibung chun a sung ve a. Inchawtu tamtak a hmu leiin Nehru Marg, Lamka hmun hang suokna lai khi an chawk nghe nghe anih. South District (Manipur)  sunga Bel sungna hmasatak chu Rengkai hi a lo nih!

SABON SIEMNA: Sabon siemna khawm Churachandpur hmun a hin tukhawma an la siem hma daiin Pu Hautluanga Sialsuk, Mizoram a’nthawka hung inpem chun, puon sawpna Sabon hai siemna dingin bawngthau le thil dang danghai lakhawmin a lo siem hlak. Chuleiin hi District sung a Sabon siemna hmasatak chu Rengkai hi a lo nih!

HNANG LE PLASTIC LUKHUM TANA HMUNPUITAK A NIH: A tatuhai chu Pu Sawithang le Pu Challienthang hi an na, midang khawmin an ta ve tho a chu anni pahni hi an thiem bik bawk leiin mi khawmin an dit bik bawk a; chuleiin hnanglukhum dit po hai chun Rengkai a hin an hung zawng hlak a, khuo an suk mawi em em.

Plastic lukhum ta hi 1962 July hma khan tukhawmin an la ching nawh. Rengkai Carpenter in 1962 July thla a a ching suok, Pu Sawithang le Pu Challienthang an in tatir ana, Hiengang lukhum ching suokna khawm Rengkai hi a lo nih!

RENGKAI A THIL TLUNG SINSIE TLAK, A HMASATAK LE RENGKAI HLUTNA HAI:
** Manipur tlangmihai hmang dinga sawrkarin “The Manipur (Village Authorities In The Hill Areas) Act. 1956 an duong anga Rengkai Village Authority Inthlangna hmasatak inthlangpuitu chu Rengkai a um bawk le Head Clerk hmasatak Pu V.L. Siema a nih. VA hmasatakhai chu, Puhai- S. Rala, Ralleng, Tlangkhar, Thuoma, V. Rosang, Hleia, L.Taivel, Rosanglien, Tlangkham, J. Tusing, Changa, J. Sanghlun H.B. Duma an nih.

** Pathien hring malsawmna ropui tak el Hartharna (Revival) Vawi 1-na 1958, Speaker- Rev. Lalngaisang. Hartharna Vawi 2-na 1959, Speaker- Pu Biswas. Hartharna Vawi 3-na Speaker- Pu Mangthieu.  Hartharna Vawi 4-na 1975, Speaker- Pi Hmangnu. Hartharna Vawi 5-na 1979 Rev. Chungthang Thiek. Hienghai el lo khawm Evan. K. Lalhmingliana, El-Bethel Camp le a dang dang ropui tak tak hi khuo hin hril senglo Hartharna a dawng tah a, Taksa le thlarau tieng a Pathien hring thilthlawnpek hi khuo hin a dawng rawn ta em em.

** 1939 kum a’nthawkin Independent Church of Manipur State chun M.E. School an sie tan a. Headmaster hmasatak chu Pu S. Rala Class II passed a nih. Hi School um a’nthawk 1947 lai chen khawm khan Class VI passed khawm an la um nawh. Hi School hi Assam Education Board hnuoia um anih. Ama hnuoia lekhathiem hmasatak chu Pu R. Sawithang ana, Class IV a passed zovin Indopui 2-na khan sipai ah Pu J. Tusing le Pu Zothansei leh an thang a, R. Sawithang lem hi chu S.I.O. sinthawin a pension nghe nghe a nih. Rengkai khuo suok a sipaia thang hmasatak dawttu an nih. A hmasatak chu L. Taivel (Assam Rifles) a thang a nih. Hi Rengkai M.E. School ra suok Manipur a mi pawimaw chu Pu Jelshyam IAS le Pu Lienvel AO hai dam an nih.

** EFCI chun M.E. School/PMS School a hung nei ve nawk a, Naupang School kai theilo popohai chu chu School a chun an hung kai tah a nih. Chu hnung sawtnawte a chun Pandit Pant Standard High School (Rengkai H/S tuta Rengkai Govt., Hr., Sec. School) hi Tarik 20.10.1977 khan an hung neisa nawk a. Hi School hi tulem hin chu Manipur pumpui a khawm sawrkar school um hai laia a tha pawl tak a hril kai ani tah. VA hai khawmin bawng that meuvin an lawm hiel anih. Headmaster hmasatak chu Pu Z. Nghinglo anih. Kum 1967 khan AG Day School Mrs. L. Sina (Rini-nu) inrawinain naupang mi 30 leh hawng tan anih a, tulem hin chu AG High School ti a ko a ni tah a, CCpur a School inlar pawl ani phak tah a nih. Chun, Douglas Memorial H/S & Hostel, North Eastern Children Academy & Children’s Home, Hope Baptist Academy & Children’s Home, Vision Academy, HSA Campus ah Tribal Student’s Hostel, Evangelical College of Theology & Hostel, Nazareth Bible College & Hostel ti le inchukna dang danghai dam hi a hung um nawk ta pei a. Hienghai chau lo khawm hi Rengkai khawsung a School hieng- South Point H/S dam khawm a lo um ta hlak a. Hi haia lo seilien ram le hnam thuoitu, Kohran, Company lien tak tak  le Sawrkar a nina insang tak tak chel tam tak an suok pha tah a nih.

Rengkai khuo a hin SHALOM (Society for HIV/AIDS Lifeline Operation in Manipur) Office dam,  RPC NEI Project Vocational Educational Training Centre ropui tak a um bawk a. Hi taka inthawk hin mi harsa le thangpui ngai tamtak siem changkang le fak hmuna ding lampui ngaituo pek an ni hlak. Chu bakah, M/s Tribal Enterprises Pvt., Ltd. A Project of Bible Hill Youth Club chun Puonkhawng khawl hmangin design hran hran a khawng suokin, a thlawn damin mihai training pe in hma a lak bawk. Hi lai Bible Hill hmun a hin Missionary Rev. Solomon H. Wasker Principal nina hnuoiah 1965 khan Eastern Bible School (E.B.S) hawng a nih a, Chu leh inzawm pei chun, hi thu ziektupa ka chengna Rengkai-Bible Hill ti hi a hung suok a nih. (Hi ‘Bible Hill’ ti a vengbuk hming hi Child Evangelist (L) Hrangkapliend, Social Worker Pu H. Samson a piengna pa phuok a nih). Manipur Sawrkar enkawlna hnuoiah Fish Farmer Development Agency hai chen khawm a um bawk.  Rehab Centre tha le inlar em em pahni Alpha & Omega le Agape Care Centre dam khawm ngawlvei hai tadi’n a um bawk. Primary Health Sub-Centre khawm hawng a ni tah. Khawvel pumhuopa hmun pawimaw Hmar Inpui (HI), Hmar Student’s Association (HSA), Hmar Youth Association (HYA), Hmar Women Association (HWA), Hmar Art and Cultural Society (HACS) hai General Headquarters Office le Hall le hmun pawimaw tak tak innghatna hmun dam a ni a. Dawr le Bazar hai khawm a pui tiel tiel a, Technology tieng khawm an sang hrat hle, Gas Agency Kim-Joe Gas Service dam khawm a um bawk.

Hi khuo hi Pathien thlaraumi tak tak le hlaphuoktu hmingthang Rev. S. Lienrum (Ni Tla Ngailo Zion Khawpui ti hla phuoktu), Pu Lama (Van Zaipawl ti hla phuoktu), Pastor Taisen,… Hlasakthiem tak tak Pi Lalruotmawi le Pi Monica Lalhlimpui (Zoram khawvel sukhningtu le Pathien hla a min awi tlaitu hai dam), Father of the Hmar Literature Dr. Thanglung le Hmar hranghlui tamtak hai lo chengna khuo a nih. Tulai thangthar hun a khawm hin saihla, ramngaina hla, inpakna hla sakthiem Radio le TV a thlang hlaw khawp a talent nei tha tam tak an um mek! Inchûkna le thiemna tiengpang a khawm Central, State, Army, Company le sinthawna dang dang haia khawm hi khawsuok hi tienlai a’nthawka vawisunni hin an um ve teu tah a. Pastor, Reverend, Officer, Doctor (Medical/Vety/Secular/Theology/Literature/Philosophy), Engineer, Pilot, IAS, IFS, MCS, Mahajon, Ram le Hnam Thuoitu, milien-milal, District Level Officer Department hran hran a mi  tamtak chu Rengkai khaw mi an hung ni ta pei a nih! Ei Pathien hring thuoina hi khuo hin a dawng nasa em em a, inzawt el seng ding khawm an nawh! Rengkai khawsuok hmun tin, ramtin a sinthawna leia suok le inpem khawm an bobang naw ang bawkin Rengkai khuo le tui ni chak ve a in pemlut an um zing bawk. Kum hni liem tah laia intiempui dungzuiin In 1,447+ le Mihriem 7,600+ ni a hriet a nih. (Tu lem hin chu hi nek dai hin lo tam nawk tang a tih. Inpem lut an um zing. In 1,500+ khuo a hril a ni tah). Pathien hring nei khuo chu a lo nih!

** Manipur ram sunga Assembly of God (A.G.) Kohran indinna hmasatak chu Rengkai hi a nih a. 1962 kumbul lai khan Pu Thantluong Rengkai inah Committee nei hmasatak ani a. Rengkai khuo a inkhawmna an nei hranna hmasatak chu Rev. S. Lienrum (‘Ni Tla Ngai Naw Zion Khawpui’ ti hla phuoktupa) in a nih. Hi tum hin  Pastor Zosanglien (Saidan) Tirko ding a lak a ni nghe nghe.
** HYA General Conference hmasatak chu 6-7th March 1986 hin Rengkai khuo ah nei a nih.
** Hmar Inkhawmpui Seminar & Cultural Festival 25-27 October 1982 khan Rengkai khuo a hin nei anih.
** Rengkai Athletic & Cultural Club (RACC) 8.8.1977 khan in din tan anih. Registration of Society Act    XXI of 1860 dungzui a thaw ani a. Regd. No. 2273 of 1977 a nih. ( A hming phuoktu chu Pu L. Simte).
1982 khan khan CCpur Ground ah Junior Championship an lak a. Chuleiin Junior Club a hlangkai an ni nghal. South Dist. Sport Association in 1982 khan Army Commander Trophy Football Tournament, Aizawl (Mizoram) a neia a tir ngat a nih. 1987 khan Aizawl ah First Federation Cup Football Tournament le Laldenga Gold Cup inchu dingin an zu fe bawk. Thangthar pei a khawm AFC a hai dam khawm an khel phak. Hi khawsuok Football khel a State le National le tournament inlar tak tak a suok dawk an kat nuk zing bawk.
** Rengkai Golden Jubilee 23rd March 1938 – 23rd March 1988 khan ni thum sung zet ropui taka hmang a nih.
** Rengkai khuo a piengsuoka BA zo hmasatak chu Pu Vanlalnghak (V.F. Tusing) a nih.
** Rengkai khuo a pieng lieu lieu HSLC passed hmasatak le MBBS passed hmasatak chu Pu Dr. F. Thienkhogin (Dr. Ginte) hi a nih.
** Hi khuo hi Hmar khuo a chu Doctor mihriem le ran tiengpanga mi tamna pawl tak a nih! Chu ruol ruol chun District Level Officer tiengpang khawm an um nuk, CMO, ZEO…!

RENGKAI ROAD: 
Japan ralbuoi leia hmundanga zama, hungkir nawk hnung a kum 2-na 1947 lai khan Rengkai tia um hi in 20 le ti ding met chau an la nih. Chulai hun a chun tuta Rengkai Road ti le a khuo khawm hi phul-leng kara um tak meu an la nia. A khuo zuk panna khawm hi lam mumal ala um nawh. A khawmi tlawmte chauhai chu inrawn khawmin, lamlien tluon takin cho ei ta, nakie motor dam khawm ei thuoilut theina dingin an tia. Hi kum hin an thaw tal talna lei chun a hang cho suok vawnga. A hung hmu taphawt chun hi hi khawlai lampui am ana? An hung ti pei a. India milien hung inzin hai dam, Manipur ram sunga milien hunghai dam chu nasa deuvin a suk lawm anih.

Kum tlawmte hnung 1958 kum khan CCpur Block chu M. Tuizar B.D.O. na hnuoiah Pu L. Simte (Pu Lienhmingthang, Manager, Kim-Joe Gas Service a piengna pa) hai leh an hung um zui nawk nghal a. Hienganga lamlien thataka cho suok a a um an hang hmu hin nasatkin an lawm a. chu lamlien chu lung sungna, shingling dam khawm an pek a. Block sinthaw hmabak chu PWD in a hung lak nawk a. Pucca in a hung siem ta nghe nghe a. 1987 kum bul a’nthawk chun Pucca double in PWD in a hung siem zui nawk nghal anih. 1947 kumlai zuk ngaituo chun tuhin chu inlirthei chi tum tum awllovin an tlang kat nuk zing el tah. 1952 kum khan Rengkai khawsak dan chu enin Sawrkarin Community Centre Hall a pek nawk a. (Hi Hall umna lai tak chu tuta Rengkai hmeruo zawrna Bazar building umna hmun lai hi anih). A sunga news tiem ding khawm Assam Tribune an pek zing bawk. Chun, 1963 kum khan Publicity Department chun Radio an hung pek nawk a. Nupui le papui, Thalai le Naupang chen khawmin a hma a an la hriet ngailo le hmu ngailo a ni leiin mak an tiin an ngai nuom thei em em.

Chun, 1960 kum a inthawk khan Tuithapui leilak suspension bridge chu Churachandpur Block in a hung daw peka, 1965 kum in Pucca leilak an hung siem nawk nghal a, hma a sawnin a suk ropui em em tah. Hi leilak hi tuta Rengkai Leilak  ti a ko le hriet lar, Rengkai le Muolvaiphei inkar tieng a mi hi a ni a. CCPur-Sugnu Road (Indo-Myanmar Road) lun em em el a ni a. Tulem hin chu a upa ta bawk leiin a se tawp ta hle a, kum khat lo liemtah khan sawrkar thuneituhai hmalaknain cheibawl that a ni a, duthusam tak ruok chu a tling phak nawh. Kum 50 an ta chuh! Madras Engineer/British hai kutsuok ni a hril le hriet a nih.

Rengkhawpui hlutna i hriet nuom chun a khuo le tui a cheng ni la hrie zuol i tih. I hriet nuom hrim hrim a ni khawmin Rengkhawpui ah inzin la hrie el i tih. Hril ding a tam, hril seng an nawh. Rengkhawpui khawsuok hi Pathien zar chauh-inthanghlui le thangthar hun a hai hin mihai chungen thei an lo tam ve khawp el!


Post a Comment

Powered by Blogger.