Imphal, March 7, 2015 (HT) : Manipur a khawm Swine Flu invawi pakhat hmusuok a ni ta a, Shija Hospital-a Isolation Ward-ah enkawl mek a nih. Hi natna hri hi an dar nawna dingin fimkhur takin Isolation Ward-ah sie a nih tiin ei thu dawngna chun a hril.

Manipur-a Swine Flu invawi hmusuoka um hi nupui kum 35 mi, nau pahni neita a ni a, Advance hospitala inthawk Feb. 26, 2015 khan RIMS-a enkawl dinga refered a ni a, sienkhawm ventilator support an neinaw leiin Feb. 27, 2015 khan Shija Hospital-a sawn le hi hmuna enkawl a nih. Nupui nu hi Bamon Leikai, Imphal East District a cheng a ni a, a thisen sample Mumbai-a SRL Ranbaxy ( diagnostic centre) a thawn a ni hnunga Swine Flu an vawi ti hi zanita sukchieng (official-a confirmed) a nih. Imphal West Dist. CMO Dr S. Bimolakumari inrawinaa medical team chun hi thil hi suizuiin damnaw hi an va kan a, India rama hi natna invawi an um hma le hnunga Manipur state puotieng an zin suok nawh ti an va hriet chieng bawk.

Hi natna damdawi hi ei nei ta a, District tina CMOhai khawm fimkhur hle ding le hi natna hri an dar lien pei nawna dinga invengna tha taka thaw dinga inhriettir an ni tah. Health Department a thawktuhai khawm mani office tha taka kai dinga inhriettir an ni ta a, chawl la tum an um khawma Medical Board hmaah an inlang tul a tih. RIMS le JNIMS haia hi natnaa damnawhai ta dingin Isolation Ward hawng a nih tiin Dr O. Ibomcha, Director, Health Department hun a hril. Tuta Swine Flu a damnaw hi Manipur a dingin a pakhatna a nih.

Post a Comment

Powered by Blogger.