Responsive Ad Slot

KALCHAR LE KRISTIENNA

Friday, March 13, 2015

/ Published by VIRTHLI
~ Rev.Kh.Thang Dailo

Kalchar (Culture) umzie iem ning a ta? : Hmar Literature Society a ka ruolhai leh Culture ti thumal hi Hmar tronga inlet tumin nasa takin kan thawa chu kan hlawsam dera. ‘Kalchar’ ti ve el chu kan thutlûkna a nih a. Kalchar ti hi Hnamnun ti hin a hnai vieuin ka hriet.

Oxford Dictionary chun- the customs and beliefs, arts, way of life and social organization of a particular country or groups tiin a ziek a. Social Scientist-hai ruok chun cultural theories tia suiin kawng tamtak an inkawktir a.

Kum 1988 a Muolhoi, N.C.Hills a HSA General Assembly trumin seminar paper ziek dinga an mi ti leiin ‘Hmar Culture’ ti ka ziek a. Chutaka ka ziek threnkhat hei hril nawk ka nuom. Kalchar ti le ei chêngna hmun le hmang hi an inmat tlat a. Tienlai Civilization (culture) hieng – Indus valley civilization, Yang Tze valley civilization hai hi Gangga/Gangis le Yang Tze vadunghai thrang lo chun umthei lo an nih a. Hi vadunghai hi chuong civilizationhai zungkeina chu an ni tlat a. Hinduhai kalchar, sakhuo, thu le hlahai chu Gangga vadung thranglo chun a kim thei noh. Ei ni Hmarhai khoma Sinlung thrang naw chun ei kalchar a kimin ei hriet naw tlat.

“Aw kan Sinlung khawpui chul hnung;
Hung indinthar nawk la,
Thrangthar lênghai d’n pâr angin hung vulla;
Aw, kan Sinlung khawpui chul hnung,
I sunga hin lêng kan ta;
I sungah damlai nihai hi hmang kan nuom”
tiin ei inzawt kur ngei nguoi el an naw?. Ruonglevaisuo hi Hmarhai kalchara hmun poimaw êm êm a lo nih. Pastor Ramlien Pudaite(Famtah) chun hienghin a hril a. Tripura le Cachar a Pathienthu hril dinga a zuk fe hmasak tak chun ei unauhai Sakechep, Chawrei, Bawng le Hrangkholhai chun a Pathienthu hril chu an lo ngaisak nuom naw khop el a. A beidong hle hnungin pilepuhai chanchin le Ruonglevaisuo a inthoka hung a ni thu a hei hril chun an lungril chu a kak phut angin a thuhrilhai chu an ngaisak ta êm êm a. Ruonglevaisuo hi an tienami le pilepuhai lo khawsakna hmun nia an hriet leia an lo ngaisang êm êm chu a lo ni zing a. Chuphingchun Pathienthu a hril khom chu an ngaisakin Ringthar iemani zat zet hming a ziek thu a hril a. Chuleichun kalchar le ram le hnam hmangaina hi thre hrang thei a ni noh. Tuhkom hin pilepuhai a inthoka ei lunglotui le hringlang tlânghai chu Jordan vadung le nebo tlâng ah ei inchangtir a. Thlarau Jordan i kâi ta? Tihai ang hi kohran lai ei trongbau tam tak chu a hung nita hi.

Ram le hnam hmangaina nei nawtu chun kalchar umzie a hriet naw bâkah kalchar mumal a nei naw ni mei a tih.

Chuonga ram a poimaw a ni chun tulaia ei chêngna hmun le hmanghai hi ieng angin am ei ngai a? Tienlai Sinlung hlak kha kokîr le fekîrna thei a ni ta si nawh. Sinlung khopui thar chu iengtinam siem ei ta? Hi zawna hai hi mani sengin a donna siem ei tih.

Kalchar le sakhuona (Kristienna): Tulai Bible scholar hminginthang tak takhai khoma kalchar le Pathienthu inmatna hi an buoipui hle niin an lang. Prof. Richard Niebuhr, Yale University, USA chun lekhabu Christ and Culture(1951) a chun a hnuoia thupui hai hmangin a ziek.
1-Christ against culture
2-The Christ of culture
3-Christ above culture
4-Christ and culture in paradox
5-Christ,the transformer of culture.

Prof. Charles Kraft, Fuller Theological Seminary, USA chun lekhabu inlar takel ‘Christianity in Culture’ ti a ziek a. A thupui chu hieng ang hin a nih:
1-God against culture.
2-God in culture -God as merely cultural hero - God as contained within culture or at least endorsing one particular culture.
3- God above culture -follow the requirements of both Christ and culture, but each in its own place - culture is corrupted but convertible.
4-God above - but - through culture.

Hieng ang hi Bible scholarhai khoma an lo ziek dân ani leiin Hmar kalchar le Pathienthu hi thre hran top chu thil theilo a ni ding a nih. Eini Kohran lai khom hin kalchar tieng hrim hrim chu hmu setan vieu ei la um a. Sikpuilam le hnam lam hai hrim hrim hi thaw thienglo anga ngaitu ei la um a. Chuleichun voisuna ei thupui hi a poimawin lungril inhong taka ei ngaituo dingin a thra hle a nih.
Hmar kalchar le kristienna chu iengtin am fepui ei ta:

(1) Bible a ei hmu dânin Isu Krista khom hin a piengna Juda kalchar chu a palzût el naw niin ei hmu. Juda sakhuo le dân hai chu thawin a zawm a. Dân sukfamkimtu dinga hnuoia hung ani thu a ma trongbau ngeia inthok ei hriet. “Dân thu amanih, zawlneihai thu amanih sukbo dinga hung ka ni ring naw ro, sukbo dinga hung ka ni naw a, sukkim dinga hung ka ni lem”(Mathai 5:17). Hi hun laia Judahai kalchar chu an sakhuo dân le Roman sorkar dân dungzuia um chu ni tak a ta. Amiruokchu Juda kalchar le dân thranaw tamtak hai ruok chu a zawm chuong naw a. Sabath nia thil iengkhom thawlo ding kalchar chu bawsein damnaw hai sukdamin, a zirtirhai phingtram khom lova buhai zûtin a fâkpui a. Chuonghai chu Judahaiin an theida hle nghe nghe a. Siekhontu hai ina lûta bû a fak khom kha Juda kulmûthai kalchar kal zawng chu ni ngei a tih.

Chuleichun ei ni khawma ei pilepuhai a inthoka ei kalchar popo hi, ringnawtu an ni laia an thaw a ni leia dehawn vong chi ni naw ni. A thranaw ruok chu dehawna, a siemthrat theihai chu siemthra a, a thrahai chu vongthra lem ding ei nih.

(2) Kalchar le hnam: Kalchar le ram le hnam hmangaina hi an zom tlat thu ei hril tah a. Isu Krista khan a hnam chu a lo hmangai char char khop el. Kanan nuhmei naunuhmei khawhri man suk dam dinga an ngên khan, “Israel hnam laia beram inhmang kuoma naw chu tir ka ni nawh. Nauhai bei lâkpêka, uitêhai kuoma pêk chu a mawi nawh” (Mathai 15:24-26) a ti a ni kha. Chun Roman sipaizahotu pakhatin a siehlaw damnaw sukdam dinga ngên dinga Juda upahai Isu kuoma a va tir khan hienghin an va hril a ni kha. “Ama hi, hihi i thaw pêk tlâk a nih. Ei hnam dâm a hmangai a, kan inkhawmna in dâm a mi bawl pêk a nih”(Luke 7:4-5). Juda upahaiin Isu an va hne theina ding taka an ngai chu, ‘Ei hnam a hmangai a’ ti a nih. Isu hin a Juda hnam hi a lo hmangai hle chu niin an lang. Iengkhom hril lovin sipaizahotu in tieng chu a pan nghal a ni kha. Chuleichun ei kalchar ei hmangaia, Kristien thra ei ni chun ei hnam khom ei hmangai ding chu a lo nih.

(3) Music le hla: Kalchar le hnam hrim hrim hi music le hla thrang naw chun a kim nawh. Kakchar ta dingin hla le music hi a bawlhlo an nih. Bawlhlo bo chun hme khom an hnik thei nawh.
Music le hlahaiin kalchar a siemin a suk danglam nasat zie hi hril met ei tih. Sikpui hla le Butukhuong lawm le a dang danghai um naw sien Hmar kalchar hi a mawlin a chanchin hril ding khom tlawm hleng a tih. Cultural music critic ropui takel Roland Barthes chun, thilri(sounds), thillim(images), inchikna (symbols) le codes hai hin ngaituona(myth) a hung siema. Chu ‘myth’ chun music le cultural theories a hai nasa takin sin a thaw niin a hril a. Mi threnkhat ruok chun music hi mihriem ngaituona a suok ni lovin Pathien thilsiem niin an hril.

Dr. K.Ron Wells, Southern Baptist Church, USA a Music Minister inlar le ropui takel trongbau ngeia ka hriet chu hieng ang hi a nih. “Music hi Pathien siem a nih a. Simbâl(rainbow) hin rong chi tamtak, mita ei tiem thei nêka tam a nei a. Chu ang char chun Music hin kî(key) tam tak a nei a. Piano a key um haiin a man/hmang theilo key tam tak Pathien siem music key an um a. Kohranin Piano-a key umhai cho standard ah ei hmang leiin chuong ang key danghai chu ei ngaisak naw bâk ah ei pawm noh a. Africa rama inthokin music key danglam tak tak piano-a um lo a hung suoka. Chunghai chu kohranin ei ngaisak noh a. Tulai khawvel rock le pop music haiin an lo dongsong / lâk leiin kohranin ei chân ta lema. ‘Setan music’ ti damin ei hnawl ta lema” tiin poi a ti thu a mi hril. Dr.K.Ron Wells thuhril hi indik hlein ka hriet. Pathienin a mi pêk, ei kalchara um hai hi hnawl lova ei hmang trangkai hi poimaw êm êm a nih

Ei ram (Mizoram) ah Kristienna a hung lûtin Sâp missionary haiin ei culture an hriet thiem tak tak nawh a. Ei kalchar thil poimaw tak tak an mi’n bântir a. Chulaia thil pakhat poimaw êm êm, a bova Hmar/Mizo kalchar le music um theilo chu ‘khuong’ a nih. Trongupa ah, “Khuong bova châi / lâm ang el” ti a ni hrim a. Khuong hi pilepuhaia inthoka sakhuo biekna le zuhmuna, a bova um theilo a nih. Khuong chu Setan hmangruo angin Sâp missionary haiin an mi ngai pêk a. Kohran thilthawna le Biekina hai khuong hmang an khap a. Amiruokchu kum 1921 in harnarûnpui(revival) a hung tlung meu chun khap ruolloin khuong chu kohran mipuiin Biekin le lengkhawmna a hai a hung laklût nawk el a ni kha. Ei kalchar music le hla haia Pathien ei chawimawi hi inhoi ei ti bâkah thlarau tieng a mi chawm nasa êm êm lem a lo nih a.

“Hi harnarûnpui a hung tlung lai hin Khawvel tieng hla le musuc –Pûma zai le Tlânglâm zai hai a hung inlar ve hle el a. Amiruokchu Pathiena thlarau mitvarna nei haiin hnam hla le a thlûk hmanga Pathien hla phuok a trul zie an hung hriet suok a. Pastor Thangngur le hlaphuoktu dang dang haiin ei ni kalchar dungzui le thlûk hmangin hla an hung phuok trana. Ei hla thra tak tak hai hi a hung pieng a nih.”(L.Keivom)

Rimawi(music) thu a hin ka hriet ve phâk thil pakhat hei hril ve ka nuom. Tringtrang(guiter) hi hla lênglawng/lengzêmhla le rock hlahai sakna a hmang a hung ni hmasa a. Kohran hai chun tringtrang hi an hmu setan khop el. Biekina chawilût an phal ngai nawh. Biekina chawilûtna hmasa tak chu kum 1958 kuma HSA Assembly Rengkaia nei truma Pu Lalthlamuong Keivom rawia ICI Biekina Thralaipawl hlapawl sakna a an hmang kha a nih. Kha trum khom khan Kohran Upa threnkhat chu an lung a awinaw hle a. Amiruokchu tuhin Tringtrang chu ei Hmar kalchar laia thil poimaw le kong tinrenga ei hmang lâr a hung ni tah.

Pastor Thangngur hlahai ei kalchar besana a phuokhai hin Pathien hmangaina hriet le hmu a suk awlsam a. Lungril le thlarau taka Pathien inpâk theina a mi pêk hlak. Pilepuhai tienami mei mei le kalchar besana phuok a ni leia Kristien thuring(doctrine) a kal ti chi an ni nawh. A hnuoia Pastor Thangngur hlaphuok hi hei en chieng met ei tih.

Siâr chunga sîngin remtu,
Vân Lal ropuizie khi hril thiem lang aw!
Iengtiziea hnuoia a hung am,
A hmangaina hril thiem ka nuom nawk zuol.
Tiena phunchong kûr duom duom rawh nu,
Ka sang a dang a char;
An hril anga kûr duom duom Van Lal,
Ropui hmangaina chun;
Hringna tui a mi hung indawn.

Ei kalchar dungzuia hmangaina ei hril uor theipatawp hmanga Pathien hmangaina a hei hril hin, ei hriet thiem el chau ni loin lungril a tawk ngawi ngawi thei a. Phunchong thing, thing chin chi khom nilo, ama le ama hung kur duom duoma, a pârzu fawp/dawn thei dinga hung um chu mihriem ngaituona le nature thil umdâna chu thil theilo a nih. Pathien hmangaina ruok chu chuong ang chu a ni zie a tarlang chieng a. Vawisun ni chen hin hi hla hi ringtuhai ta dingin a la thlum êm êm zing a. Chuleichun hieng ang kalchar hlahai hi sawisel le hnawl chi an ni noh. Hnawl nêk hmanin hieng ang hla phuoktuhai hi infuiin an hlahai hi ei ngaihlut pêk hi thil trul tak a nih.

Tulai Mizoram a chun ei kalchar dungzuia hlahai ngaihlut le phuok hi nasa takin suklarin a um niin an langa. A hnuoia hla khom hi Review thawtu haiin hieng anga ziek thrat nisien an hung ti hiel el.
A hun lo thleng tur chu kan nghakhlel hle,
Lawmna Pialrâl min hruaikai ang;
Aw lawm takin kan HNAM ZAIIN,(Aw trhen lovin lungduhte nên)
Chatuan pâr tlânin Lalber kan awi ang

Pathien thu hin ei kalchar hi a siem thra theia. Chun, Pathien thu le ei kalchar ei thre hran leiin kalchar dit um lo tak, gun kalchar, hlemhlêt le depdêt kalchar ti hai ang hi ei hnam kalchar ah an hung inzêllut ni mei a tih. Chuleichun, ei kalchar hmangin Pathien ei biekin ei chawimawi ding a nih.
Thutawpna dingin tulaia Hmar kalchar dungzuia C.Lalthunglien phuok hi lungril takin sak seng ei tiu.

1.Sâppui nun ka ngaisang nawh, kan ram ah,
Lal thisena pieng thlân khêl ram mi hai;
Kan ram kan hnam le kan trawng,
Sukmawitu ding Lal ruothai kan nih.

Kan ram kan hnam sukmawitu,
Thlânkhêl ram mihai kan nih;
Kan trawng ngeiin Lalpa’n a mi biek,
Lawmman dang ka dit chuong nawh,
Ka rochan Krista ah ka lung a awi.

2.Khawvêlin varna, thiemna an zong a,
An tling vong nawh ie,hnuoi rongbawl dingin;
Kan ramthar chu a dang ngei’
Milien michîn angkhatin kan lêng za.

3.Nitina ka nundân ka sût châng hin,
Nuor thei le kîr thei ruolna rêng an nawh;
Chawngpu ni na’n sin kan thaw,
Hlawfa sinthawhai po lo chawl ta ro.


August 29, 2014
Don't Miss
© all rights reserved
made with by Simon L Infimate