Responsive Ad Slot

IT IS MY LIFE

Friday, March 13, 2015

/ Published by VIRTHLI
By H. Zosangber

Khawvel changkang peiin nun hai khawm a hung her danglam peia, zani lai ela hlu hle a ei ngai hai kha dairiel an chang zovin ei hung hmusit ta bek bek a. Khawvel fe pei a hin a tha lawr tak ti ding a um thei chuong naw hrima. Thawdan, nun dan chi tum tum, hi a tha tak ie, sawisel ruol lovin a tha a nih ti thei a um mang nawh. Thil chu a hun laia tha awm taka inlang hlak hun a hung inher danglama, a neka tha lem a suokpei ni in an lang. Incheina bik hang thlir inla, a hun laia mawi le inhme em ema ei hriet “kekawr zui le lubuk” kha vawisun hin a thing ta be bek ela. Awm ang lo le “a thing taluo” ti a hlaw vawng taa. A hun lai chu tlangvalin kekawr in zui tit tet a bun a, a lu a sukbuk thei chun “a tulai mi ngei” ti a hlaw theia. Tulai huna ruok chu “a thing” ti bak hlawsuok ding a neiin ka ring mawl nawh.

Kum 1960 bawr vel, upa tawng takin kan hang tleirawl suok ve huna khan fashion nasa takin a hung inthlak danglama. Nu le pa cho nilo, khawtlanga mi challang le kohran Upa le Pastor chen khawmin an fak theinaw tlangpui. Thuhrilna (Sermon) a chen thlakin fashion inthlak kha an fak theinaw hul huol. Hun a hung fe peia, umdan tha le inchei dan ding ti chu Upa le Pastor bauvah a suok ta met da’l hi ‘iem a san aw??’ ka ti vawng vawng hlak.

 “It is my life” ti tawngbau khawm hi tulai chu a lar hle. Sap hai (western) nun ei copy na ani pakhata. Sap hai an nu le pa hai enkawlna hnuoia um lo hai, an fak le dawn iengkim an ni in zawng chawp haiin, “imi sawisel ka tul nawh, ka khawsak dan ding imi hril ka tul reng lem” anti dan le ei enkawlna hnuoia la khawsa, an fak an dawn iengkim el ei thawpek vawng ha’n tawngna tak (tawng chang lakna) a an mi hmang khum el hi chu an in ngaituo naw lei cho a nih. Ei khawsak le an khawsak an angnaw ti chu an hriet na lawm. Thil hrim hrim hi a puopa vawng in ei thaw hlak ni awm tak anih. Ei hril le khawm an nun sungril tak tak zu paw phak lo chit ni awm eini a, a taka nuna neia, iengpo khawm mi’n an hril khawma inhning ngailo chu za a pakhat khawm ei tling phak nawh. An nun anga nun nei, nu le pa i buoipui ngailo, nun det neia tu i chawm lo, an hril ding le an buoina ding um ta der lova mani Independent chu ‘kaha se’ a ni’l. Nu le pa chawm naupang ha’n a uor hlei hleia anla hang thang nawk ta deu deu nghal, Khuo a var naw rapthlak. A lungsen le a tuorthiem naw naw ah an la thang nawk ta deu deu.

Ngun nawk zuolin hang thlir inla, ei tulai khawvel a hin intum intawn a ei thaw chun a sirbi inphet lem ni chu ei nuomnaw chit ding a hawia, “Aman amun” ti thei vawng eini in an langa, sirbi suota rem tha sau sau vawng eini in ka hriet. Naupa’n anu apa intumna ding inhmai nawni haia. Nule pa’n “nauhai in changkang ding an chak vea, an changkang naw zie inhre lovin mi changkang nun an copy a, changkangna um der silo” ti ve thung an tih “Changkang le hmasawn ei chak vea, umdan ding hre lovin ei intel vel ani ti ngaituo nuom der lo hai chu ei hmasawnna hlekte khat khawm hmu tum lo hai, a vangduoi thlak taluo tia kun tlawk tlawk an um ngei ding ti khawm an hrietsa’n hrietnaw tehlem an insira, a pawiin van a ur” tiin innawt innawt ngei an tih. A then thenah ei nauhai anni in zawng fawm dingin ei inthla phal ngam, thenkhata ruok chu ei strict hle si a, hilai tak hi sap ha’n “Generation gap” an lo ti hlak chu ani awm de aw!! Kati vawng vawng hlak.

Pilpawk (saihluma hruol ding) ei hmet chun a pawk lai chu sakawr lim a dam, vate lim a dam, sai lim a dam ei hmet per hlak. A pawk lai chu nuom nuoma hmet per thei ani hlak. Em tang ani hnung ruoka chu hmet elin umzie a nei ta ngai nawh. Chuongang bawkin naupang sawizawi theia an um lai hin ei ngaitha nuom vieua, sikul in kaitira, thil inchuk dinga tir na chang cho ei hrieta, an lungrila tu ding tu silo me’n, chunek chun ei rothil ding tangka le rangkachak ei lungkham lem hlak. A taksa an thang ang dungzuia an in thanglien pui ding (an thang nel ding) iengkhawm tu um lovin a ra thatak ei beisei si hlak. Ieng in khawk in am “it is my life” ti nawng anta. Ringtu eiin ti si chun in le lova ei thilnei ‘rohlu’ hai hi Isu ke bula sawm tlung thei an ni nawh. Isu ke bul chena ei sawm thei chu Pathien laka ei rochan hlu ei nau hai thlarau cho hi anih. Rila ra malsawmna hi Pathien laka ei rochan neisun chu anih. Tlawmna chikima ei tlawma, insira simna chang ei hriet seng a tul takzet. Ti takzeta tlawmna nun leh naw chu Isu ke bulah iem hril tang eita?

Khawvel a hin nu le pa’n ei mawphurna zo lovin dawizep takin ei tlansie. A maw phur ngam lovin intum ding dang zawngin ei in vel ruoi el rawi maw! Isu ke bula thawnaw suol thupha chawia ei bawkkhup a tul takzet naw maw? “I hril phak a um nawh. Ka nun chu ka nun a ni el” nu le pa le rawngbawltu kuomah lo ti ta ang hai sien, a titu khan za a za’n thiem a chang ka tina a ni nawh. A hun lai ei in thlada (thawnaw suol) in, ei maw ei phursuok nawh kati na ani lem. Ei nau hai sim dinga ei dit tak tak chun, a hnuoihnung lem ei inchu a tul tak meu ka ti na ani lem. Thanghmun rema, a thiem lema inlang ei tum sung chu an thatna ei dit tak tak nawh a, thiemchang lem eini chun ei dittawk a hawi. Saiip puon sila Isu ke bula ei bawkkhup takzet chun ei thlarau boralna rama um ta hnung la kir thei tu chun ieng inkhawk in am thaw nawng ata?
Don't Miss
© all rights reserved
made with by Simon L Infimate