IEM Guwahati Area Level Golden Jubilee Celebration

Guwahati, 07/03/2015: Vawisun 10:00 AM-1:00 PM inkar sung khan Indian Evangelical Mission (IEM) Guwahati Area chun “Celebrating 50 Glorious Years of Making Christ Known” ti thupuia hmangin an kum 50 tlingna (Golden Jubilee) puithu takin LM Hall, Mission Compound, Pan Bazar ah hmangna an nei. Hi programme hi Guwahati Hmar Christian Fellowship (GHCF) a hostu an nih a; Guwahati Area a IEM rawngbawltu hai, Hnam chi hrang hranga inthawka rawngbawltu le kohran member hai, Organization hrang hranga inthawka representatives hai le GHCF member hai mi thahnem tawk tak programme hmang ding hin an fe khawm.

Jubilee lawmna inkhawm  hi Mrs. Lienkhawtling Thiek in a keithuoi a, mipui hlasak GHCF KTP haiin inrawina an nei a, Rev. Akhai Haokip, Secretary, North East Field a inthawk Greetings le Short Report ngaithlakna nei a nih. Rev. Lalchawlthang Thiek in IEM rawngbawlna hung intan dan, rawngbawlna an fepui dan le tu ngirhmuna an rawngbawlna hai tawite a reportna a nei bakah, “5 Decades of God’s Faithfullness in IEM Ministry” ti thupui hmanga siem video mipui hai inentirna a nei nghal bawk. GHCF Choir haia inthawk inpakna hla pahni – Lalpa Ropuina le Halleluiah Chorus hai ngaithlakna nei a nih a, an thiemin mipui fekhawm hai a sukhlim hle. Rev. Dr. HM Songate, Director, International Ministries, PFWM in “God Shall Reign” Ps. 146:10 ti thupuia hmangin Jubilee Message hrilna a nei a, programme a thang haiin Pathien malsawmna tamtak an dawng bawk a nih. Programme hmang zo ani hin Jubilee ruoi inhnik tak kil tlangna nei ani bawk.

IEM hi kum 1965 January thla khan Theodore Williams, EFI a Executive Member ni lai zingin rawngbawlna hmathlir thatak a lo nei leia indin a nih a, ama hi a founder chu a nih. A Vision chu “Gospel to Everyone” ti hi a nih. Chanchintha la hrielo haiin sandamna an chang theina dingin India ram hmun hrang hranga hai kum 50 sung hin rawngbawlna an lo nei tah a nih. Chanchintha hril darna ding hin Evangelism, Literacy Works, Medical Ministries, Socio-Economic Community Development, Bible Translation le a dang dang hai hmangin hma an lak hlak. Tu ngirhmuna hin IEM hin Missionary 840 a nei a, India ram state 26 sunga hnam 96 hai laia rawngbawlna an nei mek a, kum tin hin Missionary 30 vel an lak belsa zing bawk a nih. Hieng chen ngirhmun thuoi tlungtu Pathien le rawngbawlna tluong taka a fe theina dinga tha le zung, tawngtaina le sum le pai thawtu hai po po chungah Rev. Lalchawlthang Thiek, Secretary, Church Ministry, NE Region chun lawmthu hrilna a nei.