Hme ngeinaw leiin sungkhata mi 5 an damnaw pha
PARBUNG: March 3, 2015 khan Parbung khuoa cheng Mr Zothansang s/o Germanthang of Tinsuong hai sungkuo chun hme dinga an suong Aninpang le Dawlhro hme an suong an hme ngeinaw (food poisoning) leiin an sungkuo in an buoi vawng a, an damnaw leiin Parbung Hospital-ah admit vawng an nih. An thil hme hi an fak zo thleng khawm sawp hman lova buoisie an ni a, invet ang deu damin an um a. Dr Mary chun theitawp suoin a buoipui a, tuhin chu an hung har tawl met met tah. An sungkuo hi unau pasal pathum an ni a, an nu le pa leh mi 5 an nih. Thil hme suol leia hienganga um hi an la um zen zen naw a. Zani (March 4, 2015, 4:00PM) chen khan chu Hospital-a hin an la um zing a, Parbung mipui khawmin zani suna inthawk khan an thei ang angin an thangpui zing a, tlawmngai takin Hospital tuol lai an nghak tawl. An hung damvat theina dingin tawngtainain lo san seng ei tiu.
– ( Lalnunthang Songate, Parbung)

AAP PAC a inthawk Yogendra Yadav le Prashan Bhushan hai ban an nih
AAP National Executive meeting in Kejriwal inbanna an hnawl

NEW DELHI: Aam Aadmi Party (AAP) sunga buoina neu neu um chingfel dingin zanikhan AAP chun New Delhi hmuna member 21 umna National Executive meeting an nei a, hi huna hin AAP hotu pahni Yogendra

Yadav le Prashant Bhushan hai chu AAP Panel insang tak Political Affairs Committee (PAC) a inthawk an ban. PAC a inthawk ban a ni bakah Yogendra Yadav chu party spokesperson a ninaa inthawk ban a ni bawk. Mr Yadav le Prashant Bhushan han an party AAP chu mi pakhat rorel le thuneina hnuoia um a nih tia intuma Arvind Kejriwal an sawisel lei le Mr Yadav hin information thenkhat a lo hrilsuok a, chu chu a hnungah national daily-ah insuo a hung nia inthawk party leader hai chu Yadav chunga hin an lungawi naw leia party sunga inrem nawna hi hung um tan a ni a. Hi taka inthawk hin party leader thenkhat chun Yadav hi ban dingin hma an hung lak a, chu thu hung fe pei relfel dinga zanita National Executive meeting hi an nei a nih. Party leader Kumar Vishwas chun, Mr Bhushan le Mr Yadav hai chu AAP hnuoia mawphurna/sin dang pek ning an tih tiin a hril.

AAP founding member Shanti Bhushan chun Prashan Bhushan le Yogendra Yadav hai chu AAP convenor Arvind Kejriwal thlawp dingin a ngen a, party sunga inremnawna a um ding a ni nawh tiin a hril. Delhi Assembly election nei zo hlima AAP in hrat filawrna an chang khan clean politics hi mitinin an dit ti a suklang a, AAP chun India ram pumpuiah clean politics chi a thedar pei a tul a nih tiin Shanti Bhushan chun a hril.

AAP chief Arvind Kejriwal chun party sunga inremnawna um chun a lungril a sukna thu hrilin hi buoinaa thangve lova Delhi-a sawrkarna tha tak a um theina ding tiengpanga a lungril ngaituona le tha a seng ding thu hrilin mipuiin a party ringna an innghatna chu iengtikawng khawma suksiet a remti tanaw ding thu a hril. Prashant Bhushan chun Kejriwal le an inbiek thei mumal tanaw thu le high command culture a zawm theinaw khawm zani ta meeting hma hin a hril.

Hieng laizing hin Mr Arvind Kejriwal in Delhia sawrkar siemna kawnga a buoi leiin February 26, 2015, nia AAP National Executiveah AAP Convenor a inthawk an banna lekha chu National Executive meeting chun a hnawl pek.

Manipur-ah sawrkar thawktu tribal 3754
IMPHAL: Manipur-a chun sawrkar Police, Education le Health Department hai thangin department tum tum 31 haiah thawktu 17,831 an um a, hienghai lai hin tribal hnama mi thawktu 3754 an um tiin March 3, 2015 nia Manipur Assembly- a report chun a hril.

Kangla sungah loud speaker hmang khap
IMPHAL: Kangla Fort Complex, Imphal sungah loud speaker le microphone hai hmang khap a ni thu Superintendent of State Archeology dept. K. Dinamani Singh in zanikhan order an suo. Yaoshang sports festival, 2015 le inzawmin March 5, 6 le 7 haia chun 7AM-3PM inkar sungin Kangla main gate pathum haia inthawk candle insit dinga lut phal le gate hawng ning a tih tiin a hril.

Workshop on RKSK nei a nih
CCPUR: District Health Society (DHS), CCPur hmalaknain zani 11:30AM khan CMO Conference Hall-ah Workshop on Rashtriya Kishor Swasthya Karyakram (RKSK), Weekly Iron Folic Supplementation program nei a nih. Hi huna hin Dr F. Thienkhogin in keynote address a hril a, Seiboi Mate, Dist. Programt Manager, NRHM le Dr Robinson, MO hai resource person in an thang. Workshop a hin ZEO, CCPur hnuoia inthawk DI/Henglep; DI/ Singngat; DI/ Thanlon le DI/Tipaimukh hai an thang a, Social Welfare Deptt. a inthawk Singngat; Sangang; Saikot; Samulamlan; Henglep; Vangai le Thanlon haia CDPOs le Medical Deptt. a inthawk PHC/CHC haia MOs in-charge hai bakah Nurses le District hospital staff hai an thang.

State 3 Governor Acharya in INA Memorial a sir
IMPHAL: India hmarsak state pathum- Assam, Tripura le Nagaland hai awptu Governor ni mek Pu P.B. Acharya chun zanikhan Moiranga INA Memorial complex a sir. Governor hi Imphal-a inthawk Raj Bhavan officials hai bakah SP Bishnupur, N. Herojit le senior officials han an tawiawm. Governor Acharya hin Sendra tourist spot, Moirang le Bishnupura Bishnu Temple hai khawm a sir a. Nambol khawpui bula Maibam Lokpa Ching hmuna Imphal Peace Memorial (Japanese war memorial tia ko) khawm a sir a, sipai thi hai lungdawah inzanain par an hlan tawl. Governor hin INA Memorial Complex, Morang sunga um World War Museum khawm a fangkuol bawk.

NSUC in mi aia exam petu mi 2 an man
IMPHAL: Naga Students Union Chandel (NSUC) chun High School Leaving Certificate (HSLC) Examination, 2015 fe mekah zani hmasa khan Chandel districta Maha Union Higher Secondary School Private Centre an va enfel a, hi huna hin nuhmei pakhat thangin mi aia exam petu mi 2 an man. Mi aia exam pe hai hi an Admit Cards le Answer Sheets hai lapekin a mihriem hai leh hi Exam Centre-a Officerin- Charge le Flying Squad team kutah an inhlan. NSUC President, Joyningam chun, HSLC Exam, 2015 tan a nia inthawk tuchena hin mi aiat exam pe students 30 chuong an mandawk ta niin a hril.

Community Hall bawlna ding lung a phum
IMPHAL: Sagolband constituency MLA R.K. Imo Singh chun zanikhan Sagaolband Bijoygovinda Lairenjam Leirak, Keli Makhong, Imphal hmuna Community Hall bawlna ding lungphumna a nei. Hi huna hin Ch. Ibomcha, senior resident le Sagolband Lairenjam Leirak Akham Leikai Devpt. Comm. President L. Manichandra hai khawm an thang.

Interaction on Security Assessment nei
IMPHAL: Zanikhan Hotel Imphal-ah Interaction on Security Assessment nei a nih. Hi huna expert team hung thang hai chu - BL Vohara (IPS, Retd); AK Mago (IAS, Retd); BS Lamba (IAS, Retd); Kishalay Bhattacharjee, Journalist le Dr Moirangthem Amarjeet Singh, Associate Professor, Jamia Millia Islamia, New Delhi hai an ni a, DESAM, HERICON, Indigenous People, JCILPS (Women Wings), Women Association for Socio-Economic Development le Civil Society Organisation tum tuma palai hai an thang.

Kolkata-ah Pawisa lem siemna hmun
KOLKATA: February 27, 2015 khan Kolkata khawpuiah India pawisa lem Rs. 1000 notes 200 leh pasal pakhat Chandrasekhar Jaiswal chu Police-a Special task force han an man a. Thu indawnna nei a ni huna an puongnaa inthawk Howrah hmuna a godown a inthawk India pawisa lem Rs. 10 crores anghu ding dapdawk le man a nih. India pawisa lem el chau ni lovin US dollars, Turkish lira, Zimbabwe dollars le Yugoslav dinner lem khawm thahnemtawk tak dapdawk a ni bakah pawisa lem siemnaa hmang paper, ink le India pawisa lem siemna dices hai an mansa bawk. Hi chungthu hi Central agencies le Police hai chu thangpui dingin Kolkata Police chun an ngen a, Union Home Ministry le Reserve Bank of India hai khawm hi thu hi inhriettir an ni tah.

Class X exam-ah a ke in a ziek
CHHINDWARA: Madhya Pradesh-a HSLC (Class X) exam nei meka chun
1100KV high voltage power line a tawk leia a kut pahni chan Safi an ti chun a ke a lekha ziekin Class X examah a thang. Safi hin kum 6 liemta khan an In bula an hnel naah electric hrui a tawk leia a kut pahni hai hi a chan a a ni a, hi thil tlung huna hin Class IV an chuk chau a nih. A tumruna lei lieu lieua a ke hmanga lekha hi a ziek thei a ni thu a kaina Aaradhna Convent School-a Principal Madhu Rai chun a hril. Saifi pa chu Pheikawk dawr neitu a nih.

Naga helpawl han kum 1972 a inthawk mi 161 an that
GUWAHATI: AIUDF MLA Aminul Islam indawnna dawnin Assam Parliamentary Affairs Minister Rockybul Hussain chun, kum 1972 a inthawk tuchena hin Nagaland helpawl han Assam-a districts 4 haia mi 161 an that ta a, kum 1977 a inthawk Golaghat district-a vawi 9 an chetnaah mi 166 an inhliem ta bawk tiin a hril.

Trophy lawmna an nei
CCPUR: 67th Zomi Namni Open Football Tournament, 2015 a champion Lenlai Club chun zani 11AM khan Chiengkonpang-a Toms’ Villa annexe ah an trophy lawmna hun an hmang. Hi huna hin MC Chin Minthang, President, TP; Kamsuanlun, EM, ADCC le H. Jamkhanpau Simte, MDC hai khuollien, guest of honour le functional president in an thang.

AR han HNA cadre 1 an man CCPUR: 7-Assam Rifles chun March 2, 2015, 10:15PM vel khan Khawmawi khuoah HNA Cadre Robert Zara @ L.Z. Changsan (34) s/o Sata of Khawmawi chu 9mm Pistol 1, magazine 1 le a mu 5 bakah country made Pistol 1, magazine 1 le a mu leh an man a, Imphal Police kutah an peklut. Imphal Police kuta inthawk CCPur Police han case la sawngin FIR No. 15 (3) 2015 CCP-PS U/S 400 IPC & 25 (1-C) A. Act an registered bakah Chief Judicial Magistrate (CJM), CCPur hmaah an inlangtir a, Court chun March 11, 2015 chen Police Custody-a um phawt dingin a chungthu a rel.

Rengkai Lalnu Pi Kholpi Joute Video tlangzar
CCPUR: Dec. 13, 2014 a fam lo chang tah Hmar Women Association (HWA) Founder President Pi Kholpi Joute hrietzingna dinga a Pasal Pu JC Chongkholien Joute, Chief of Rengkai in a buotsai, The Journey of Kholpi Joute Video chu March 2, 2015 zan dar 7:22 PM khan Rengkai Lal In Compound, Rengkai, CCPur ah Tlangzarna Pu T. Dongzakai in a nei. Hi hun a hin Pi Kholpi ngainatuhai fekhawmin ICI Central Choir hai leh Pathien inpakin hun hmang a ni a. Pathien thlarauin sin thawin, Pathien chawimawia lam chau niloin tawng hrietlo hai leh tin zai hrim rel el theiloin hun hmang a nih.

Pu JC Chongkholien chun hi zan a ZRS le HCN (Hornbill) haiin a hmangaitak Pi Kholpi Video Tlangzar a ni hun a, Tlangzar a um Pi Kholpi Joute Video an Local Cable TV Channel haia mihai lo hmu ve thei dinga an lo insuo pekna chungthu ah lawmum a ti hle thu a hril. Pi Khawlpi hi Hmar Women Association (HWA) Founder President a ni bawk a nih. (–LRS Puruolte)

DLCC meeting nawk Singngat khuoah
CCPUR: Zanikhan Leimatak hmuna District Level Coordination Committee (DLCC) meeting nei a ni a, hi huna hin Forest Deaprtment chun Powerpoint presentation an pek. DLCC meeting nawk chu Singngat khuoah nei ning a ta, hi huna hin PHED in Total Sanitation thuah Power point presntation pe ve thung an tih.

RMSA hnuoia Dist. level Science exhibition le Debate Compett.
CCPUR: RMSA, CCPur district hnuoia March 20, 2015 khin Govt. School-a kai students Cass IX le X hai ta dingin DIET Centre, CCPur-ah District Level Science Exhibition, Quiz & Debate Competition um a tih. A thang nuom school hai chun March 14, 2015 chenin student list pelut thei an tih.

India ramah Swine Flu leia thi 1,198 an tling tah
NEW DELHI: India ram pumpuia chun Swine Flu leia thi mi 40 an um belsa nawk leiin tuchena hi natna leia thi chu 1,198 an tling tah tiin Health Ministry thusuok chun a hril a, March 3, 2015 chenah Swine Flu (H1N1) invawi hmusuoka um chu 22,240 an tling ta bawk tiin ministry thusuok chun a hril.

Health Ministry data dungzuiin India rama hi natna leia thi tamna tak chu Gujarat niin  mi 292 an thi ta a, mi 4,904 hi natna invawi an um. Rajasthan a chun mi 286 an thi ta a, mi 5,782 in an invawi a, Madhya Pradesh a chun mi 168 an thi ta a, mi 1,131 in an invawi a, Maharashtra-ah mi 170 an thi ta a, mi 2,005 in an invawi. Telangana a chun mi 59 an thi ta a, Punjab-ah mi 47 an thi ta bawk. Delhi-a chun 10 an thi ta a, mi 3,220 in an invawi a, Karnataka a chun mi 51 an thi ta a, Uttar Pradesh ah 16 an thi ta a, mi 689 in an invawi a, Haryana a chun mi 24 an thi ta a, Andhra Pradesh-ah mi 14 an thi ta bawk. Jammu & Kashmir a chun mi 10 an th ta a, Assam-ah mi 5, Tamil Nadua chun mi 3 an thi ta bawk.

Peren-a NSCN(IM) camp hlukhum
DIMAPUR: 18 Assam Rifles hai chun zani hmasa khan Peren district, Nagaland- a Bamsikilwa hmuna NSCN(IM) temporary camp chu tuolsung mi hai le thangruolin an hlukhum a, camp hi an raw. Chun, Feb. 24, 2015 khan 18 Assam Rifles le Nagaland Police thangruol han Peren district-a Old Chalkot village huop sungah ralthuom iemanizat dapdawkin an man. Ralthuom an dapdawk hai lai 7.65mm Pistol 2, magazines 3, .22 Pistol 1, magazine 1 le 7.65mm calibre mu 11 a thang. Hieng ralthuom hai hi polythene- a tha taka funa hnuoi ft. 1.5inch a inthuka phum a nih.

Pak. enthlatu a intum Ex-serviceman man
AMRITSAR: Punjab Police Intelligence Winga Special Operation Cell (SSOC) chun zani hmasa khan sipai pension (ex-servicemen) Sukhwinder Singh of Sangur chu Pakistan enthlatu-in a thang tia intumna leiin an man a, a kuta inthawk document/thuruk thenkhat man a nih tiin SSOC thusuok chun a hril. Sukhwinder hi kum 2005-a kha 21 Sikh Light Infantry a pension a nih. Mr Sukhwinder chun, pawisa hlaw dinga Pakistan Intelligence han an lak le a code hmingah ‘ Sharma ji’ ti inbuk pek a ni thu an puong.

UP sawrkarin an chungthu rel lai hai bullet proof
BAREILLY: Tulai hnaia misuol, an chungthu rel lai mek Court-a inlang dinga thuoi an ni laia kap hlum an nina le inzawmin Uttar Pradesh sawrkar chun an chungthu rel lai mek hai chu Court hmaa inlang dinga thuoi an ni huna bullet proof ( silaimu kap tlang thei lo) zakhuo inhak tir a tum tah. Hi thil hi an hmatienga thaw tum a nih tiin sawrkar thusuok chun a hril. Feb. 16, 2015 khan Muzaffarnagar district-ah misuol turu Vikky Tyagi chu Court-a inlang tir dinga thuo a ni lain lawyer anga inthuo pasal kum 17 mi in a kap hlum bakah Feb. 23, 2015 khawm khan Court-a a chungthu rel lai mek Yugender Singh @ Bhura chu court hmuna kap hlum a lo nita bawk a nih.

KK Sharma in Delhi CS a chel ding
CHANDIGARH: 1983 batch IAS Officer AGMUT cadre Kewal Kumar Sharma (KK Sharma) chun Delhi Chief Secretary sin a chel ding a nih. Hi thua hin order khawm a hmu tah. Delhi Chief Minister Arvind Kejriwal chun Delhi Chief Secretary dingin RS Negi a dit a, sienkhawm a la senior tawk nawh tiin Home Ministry chun a hnawl pek a nih. Negi neka senior lem UT cadre IAS tam tak an um leiin Delhi Chief Secretary dinga ruot chu a remchangnaw ding a nih tia Centre in a hnawl a nih.

Film/Documentary: Nirbhaya rape documentary banned
NEW DELHI: Leslee Udwin in kum 2012-a New Delhi hmuna Bus sunga nunghak pakhat kum 23 mi ‘Nirbhaya’ pasal iemanizatin an suolhrawnna le inzawma documentary ‘ India’s Daughter’ ti film a siem chu, a film-a tawngkam thenkhat buoina intlun thei dinga ring a ni leiin India rama chun insuo khap (banned) a nih. A film a hin a suolluitu laia thang Mukesh Singh le a ruol hai tawngbau khawm inchuon a ni a, Mukesh Singh chun, kha thil tlunga khan Nirbhaya chu thiemnaw an changtir a, suolluinaa hin pasal nekin a nuhmei han mawphurna an nei lien lem tiin a hril a nih.

Hi lei hin Court chun a thuthar um nawk hma po chu a film hi insuo a khap a nih tiin Delhi Police spokesman Rajan Bhagat chun a hril. Nirbhaya film hi March 8, 2015 nia International Women’s Day hmangna huna India le khawvel rambung tum tum Britain le Denmark haia insuo tuma hma lak a nih. Amiruokchu Court in insuo a hung khap ta a nih. A film siemtu Udwin chun hi thua hin pawi a ti thu a hril a, a film a Singh interviewna minute 9 a sei chu dehawn/peihmang a remti ngainaw ding thu a hril.

A film hi Nirbhaya nu le pa hai chun an thlawp thung. Udwin hin kum 1999-a British cult comedy “ East is East’ ti lo siem ta a ni a, Nirbhaya suolhrawn a ni leia India ram pumpuia protest nasa taka um a hmu le inzawma documentary hi a hung siem a nih. Nirbhaya suollutu Singh thangin mi 4 hai chu thi dinga thiemnaw inchangtir an ni a, sienkhawm a hnungin Supreme Court in a la cheltang nawk a ni a, anni laia pakhat chu tuta hma khan ama le ama jail sungah a lo inkhai hlum ta a nih.

Khawvela dama la um laia upa takin a kum 117 birthday
TOKYO: Khawvela hring le dama la um hai laia upa tak Japan mi Ms Misao Okawa chun zanikhan a piengchampha (birthday) vawi 117-na a hmang tah. Ms Okawa hi March 5, 1898-a kha Osaka hmuna pieng a ni a, Guiness World Records in kum 2013-a kha khawvela dama la um hai laia upa taka a record a nih. Ms Okawa hi tulai hnai khan a hrietna ( nakawr) a set zuol met a, sienkhawm fak le dawn a la fak tha leiin a hriselna a tha tiin enkawla a umna Nursing Home thusuok chun a hril. Ms Okawa hi kum 1919-a kha Mr Yukio le innei an ni a, a pasal chu 1931 khan a lo thi ta a, a pasal le hin nau pathum- nuhmei 2 le pasal pakhat an nei a. An nau haia inthawk tu 4 le tusawng 6 an nei tah.

Afghanistan-a bomb puokah mi 9 an thi
KABUL: Afghanistan-a Helmand province –a Sangin district a chun zani hmasa khan thichil bomb puok leiin civil mi 5 thangin mi 9 in thina an tuok. Taliban hai chun bomb hi an sukpuok a ni thu an puong. Bomb hi Sangin base lutna bula Kel (goats) hmanga sukpuok a nih.

EDITORIAL:
Pollution
Transport Minister Dr Ratankumar chun Imphal Municipal area-a motor khu in a phusuok boruok bal (pollution) suktlawmna dingin National Electric Mission Mode Project (NEMMP) hnuoiah Diesel Auto-rickshaw service chu Battery hmanga intlantir tum a ni thu zani hmasa khan Manipur Assembly-ah a hril a. Imphal khawpui sunga boruok sukpawrche (pollution) siemtu hai chu motor t awp le hlui, diesel generators, power back-up, meihawl le thing rawa um haia inthawk a ni thu Minister hin a hril.

Khawvel hmasawn ang peiin ei khawsakna le nundan khawm nasa takin a danglam hrat a, ei incheina le thuom hai khawm world class a ni tah ti inla ei hrilsuol taluo ring a um nawh. Hieng laizing hin kawng dang danga ram dang le hmun dang hai le ei ram fai le thienghlim dan ei thlir ruok chun hnuoi le van ang a ni nawk thung a, ei boruok hip fai dan chu an thlau hle thung. Chu lai zing khawm chun khawvel rambung tum tum le ramchangkang haia khawm an buoipui pakhat chu pollution hung pung le nasa pei hi a nih. India ram hi khawvela ram inthanglai mek hai laia an thang hrat pawl a ni a, technology le thil dang dang haia chun ei inthang hrat ve hle a, sienkhawm fai le thienghlimna kawnga le pollution control-na kawnga hin chu baksam ei la hau hle.

Ei khawsakna le nunphung nasa taka an dang hrat ang bawkin tulai khawvela hausa le changkang ei inkhina pakhat chu inlirthei (motor) nei hi a nih ti inla ei hrilsuol taluo ring a umnaw bawk. Motor nei hi fashion pakhata ei nei a ni bawk leiin ei rama motor a pung hrat hle a, inlirthei ke pahni le Cars hai ti tak lovah mihriem ei hung pung pei le inruolin passenger phurtu Auto-rickshaw a pung hrat em em a. Hienganga ei rama motor nasa taka hung pung hin ei chengna hmun le a sevel haia boruok pawrche (pollution) nasa takin a pung a a nih.

Ei rama pollution nasa taka hung pung le inzawm hin State sawrkar khawmin tuta hma kum iemanizat liemta khan pollution control-na dingin hma a lo lak ta a, Manipur Pollution Control Board (MPCB) hnuoiah inlirhei in boruok thalo a phusuok (emission) leia Pollution suk zieum na dingin Motor hai chu emission test thaw vawng ding le emission test certificate nei lo hai chu fine inchawitir dingin sawrkar chun thusuok a lo siem a. Emission testing centre pathum Manipur Pollution Control Board, Lamphelpat; District Transport Office, Imphal East le DTO, CCPur haia hawng a ni thu kum 2005 December thla khan Principal Secretary, Forest Department chun a hril a. Hieng Emission Test centre hai hi a re vang vang el khelah motor in boruok thalo a phusuok hai leia ei rama pollution suk zieumna ding kawnga Manipur Pollution Control Board (MPCB) khawm a re ta vang vang ngei el.

Zani hmasaa Manipur Transport Minister in Imphal khawpui sunga boruok suk thienghlimna dinga Diesel Autorickshaw hai Battery-a intlantir tum a ni thu a hril hi thil lawmum takel a ni a. Imphal khawpui sunga chau ni lovin Manipur state sunga district dang dang haia service Autorickshaw hai khawm battery a intlantir vawng an ni theina dingin sawrkarin hma hung la sien nuom a um takzet. Manipur-a chun Churachandpur District hi khawpui pahnina a ni ang bawkin mihriem cheng an tamin motor khawm a pung hrat hle a. Hi lei hin CCPur District- a Auto service hai khawm battery a intlantir vawng an ni theina dingin sawrkarin hma hung la sien nuom a um takzet.

Chun, motor in a phusuok pollution sukzieum a ni theina dingin ei rama motor hlui le tawp tam tak hai hi hnawl dan ngaituo sien; state dang le hmun danga hnawl (condemn) ta hnung motor hlui laklut hi khap le Transport Department khawmin hiengang motor hlui hai hi Registration thaw phal tanaw sien ei rama pollution nasa taka pung hrat hi a hung zie um ngei ring a um. Chu ding chun Motor Vehicles Act hrat le khau lemin sawrkarin fepui sien nuom a um.

Mihriem hriselna hi sawrkar thlungpui in a ngaipawimaw ang bawkin State sawrkar khawmin a ngaipawimaw ring a um a. Hriselna tiengpang ngaipawimawna leiin Hospitals, PHCs, PHSC annawleh CHCs indinin hawng teu inlakhawm ei chengna hmun le a se vel boruok a thienghlim sinaw chun a sunga cheng mihriem hai hi ei hrisel chuong naw ding a nih. Hi lei hin hriselna ei ngaipawimaw a ni chun a damdawi in tieng chau thlur lova ei mihriem hai hriselna dinga ei rama pollution nasa taka pung mek hi a dang dan ding a ngaituo chu thil tul makmaw a nih.



Rambung thenkhata chun thing le ruo satthluk ding khawmin phalna lak a ngai. Ei rama ruok chun ka ram, ka huon a ni ti ding nei taphawt chun thing le ruo ei nuom ang angin ei satthlukin ei raw a. Hi thil khawm hi ei ram le khawtlang inhawi le hriselna dingin sawrkarin a mi la khuokhir khawm thil tul le makmaw a la hung ni ding niin an lang.


Post a Comment

Powered by Blogger.