LOCAL (CCPUR) NEWS
Kangvai ‘Model village’ a siem ding thuah  Awareness nei
CCPur:  Zani 10:00AM khan Kangvai Community hall-ah Saansad Adarsh Gram Yojana (SAGY)  thuah Awareness campaign program hmang a nih. Hi huna hin   Outer Manipur Lok Sabha MP Mr Thangso Baite chun SAGY guidelines  Vaiphei \awnga inlet chu mipui tiem thei dingin a hawng. Hi huna hin Soiminlian, SDO/BDO Henglep le Lunminthang Haokip, DC, CCPur han  welcome address le keynote address an hril. 


            Thangso Baite chun,  SAGY program hnuoiah Kangvai Model Village  a sie ding a ni le  inzawmin Kangvai mipui han vawisuna inthawk  District Administration office le Department tum tum a  development Scheme tum tum an ngen hai tawpsan ta dingin  a ngen a,  SAGY hnuoia sawrkarin scheme tha tawk  a pek ding  a ni thu a hril. Kangvai khuo Model Village-a  siem tum a nina thuah   khaw mi han Lal, VA le department hai ngansie el lova an thlawp a pawimaw a,  an ram le lo hai  an thawlawm a pawimaw   a nih. A san chu Model village siemna ding hin lampui keklien a \ul ding leiin  dodal lo dingin a ngen.

            Ama chengna khuo  khawm  Model village-a siem ding lai in\hangtir thei a ni lai zingin  Kangvai hi fe le hung hai lam\huom pawimaw a ni leia Model village-a siem dinga  a hung thlang a ni thu mipui hai a hril a, Model village  a chun Primary Health Centre, Schools, proper drinking water, electricity etc hai  sawrkarin a hung pek ding a ni a, sienkhawm chu ding chun mipui khawmin mawphurna ei nei a nih tiin a hril a, khaw le veng dang khawm model village dinga thlang an la hung ni pei ding thu a hril bawk.  Model village ding le inzawm hin Deparment heads hai chu project le proposal hai hun tiem sunga DC kuoma pelut dingin Mr Baite chun an hriettir. SAGY thil tum chu Mahatma Gandhi hmathlir (vision) sukpuitlingna dinga thienghlimna le inrelbawlna \ha  siem a nih.

Kwakta-ah motor inruksa  1 hmukir  nawk a nih
CCPur: District Police han motor inru ching  Nehkholien Haokip (29) s/o (L) Thenkhomang Haokip of HQ. Veng le Langlunmang Samte (40) s/o S. Dongzachin of V. Munhoi, N. Lamka hai  an man hnunga Activa  3, Honda Aviator 1 le Rickshaw 1 an hmukir hnungin zanikhan Kwakta hmuna inruksa Activa motor 1 an va hmukir nawk.  Hieng mi 2 mana um hai hi  Jail-a thun an nita a,  FIR No. 21 (3) 2015 CCP-PS US 379/34 IPC registered khum an nih.

Ramsa thatna dinga ram  raw bansan ei tiu:  DFO
CCPur: Southern Forest Division, CCPur huoihawtnain zani 1:00PM khan Rayburn College Auditorium-ah ‘Biodiversity Awareness Campaign’ nei a nih.  Hi huna DFO K.  Suanmung Tawmbing, IFS, DFO: SFD in thu a hrilnaa chun,   khawvela mihriem  chi  (species) tam tak ei um ang bawkin ramsa le rannung khawm chi tam tak an um a.  Ramsa/rannung le mihriem hai hi inter-dependent (in mamawtuo) ei ni a, U\awk  hai that vawng inla chu Leilei a thlai hai thilhringin  fasie vawng an ta,  bu sik ding nein aw manih. Ramsa  hai khawsakna le fak le dawn zawngna dingin  thing le ruo an pawimaw a, chuongang bawkin mihriem  hai khawm tui dawn ding le lo siemna dingin thing le ruo (forest) ei mamaw hle a nih. Thing le ruo hai hi mihriem ta dinga boruok thienghlim (oxygen) siemtu an ni leiin mihriem, ran le ramsa hai ta dingin thing le ruo hai hi an pawimaw hle a nih.  Ramsa  man le thatna dinga  rama thing le ruo   tam tak ei rawsiet hlak hi tawpsan ei tiu tiin DFO chun a hril.

            Technical Session hunah  P.V. Guite, MFS (retd)  le  Mrs Esther Gangte, Lecturer, CCPur  College hai resource person in an \hang.

HI le HLS Programme an kal nawh - HI
CCPur: March 28, 2015 nia Hmar Inpui huoihawt na hnuoia Hmar Leaders’ Retreat 2015 le HLS huoihawtna hnuoia YLS hmuna  Hmar MIL Orientation Course neia um ding chungchanga  inkawkalna a um nawh tiin Hmar Inpui chun a hrilfie.  HLS huoihawtna hnuoia mi hin MIL Teacher hai chau a huopa, Hmar Inpui huoihawt  na hnuoia mi hin Kohran le khawtlanga hnam sunga pawl tum tum hai tadinga huoihawt ani leiin iengkhawm in kawkawlna le hnam sunga inthuruolnawna thil aum nawh tiin Hmar Inpui thusuok chun a hril.

HSA CCPur Jt. HQ   in  SP, CCPur thar an lawmlut
CCPUR: March 27, 2015 zantieng dar 4 PM khan Hmar Students’ Association (HSA), CCPur Jt. Hqr chun Pu L. Mangkhogin Haokip IPS, SP, CCPur thar chu lawmlutna le hohlimpuina an nei a. Hi hun a hin SP thar chu Hmar Thangsuo Puon an inbat tir a. Minute 40 (Sawmli) sung an hohlimpui huna chun ama hi SP CCPur a lo ni hmasak hun a hai khawm a sinthaw \hat zie, a fel zie, inpakum le an suong ziehai an hril a, CCPur District sunga Traffic Rule chungchang thu, CCPur a school inlar tak el Young Learners’ School (YLS) le a kawl vel lampui \hangsain an hmatienga School naupanghai hmakhuo ngainaa Traffic Police pe vat dingin an ngen a. Tulaia VDF hai Strike leia harsatna leia la zuk sukfel el thei a ni naw ding thu hi hun a hin a lo hril. Hi thil hi a ngaipawimaw thu, an hmatienga a hung bawzui ding thu a hril. Hi huna hin dan le thu pek ngirhmun thu hai hriltlangin hmatienga \hangtlang a, ram hmasawnna dinga hmalaktlang dan dinghai an hriltlangsa bawk.
- LRS Puruolte | Photo: Alan Famhoite


Water  Supply Zone-II Intake Point an enfel
CCPur:  Lalsuong Gangte, Executive Member, CCPur; MA Salam, OC/CCPur PS; PHED Staff; ZMA Bungmual; Bungmual VA le YPA Bungmual  \huoitu hai chun zanikhan khawpui sunga tui lakna Water supply Zone-II intake point a hmuna enfelna an nei.  Bungmual khuoa  Lanva vadung intake point a inthawk  Reservoir inkarah phalna nei lova  tuilawng zawm an um ti  report um le inzawma an hang enfel a ni a.  Intake point  saktienga inthawk  phalna nei lova  tui lakna pipe hai chu  Police hmalaknain  lakdawk vawng a ni  baka Intake point-a inthawk mimal-a tui lakna pipe hai khawm  ladawkin Police Station-ah an kawl  mek.

AR han UKLA(MC) cadre 2 an man
CCPur: March 24, 2015, 5PM vel khan  7-Assam Rifles han  New Lamka-a Damkam Bazar le Zalenphai khuo haiah UKLA (MC) cadre  pahni DS Palal Singson (33) s/o (L)  Ninson Singson of K. Gamnom, Senapati Dist. le David Touthang Seigougin (27) s/o (L) Lunkhongam  Touthang of Zalenphai, CCPur hai an man a, an kuta inthawk 12 bore SBBL 1, a mu 5, Rs. 670, Mobile 1 SIM Card 5 le demand note 2 an man  sa bawk.  Imphal Police kuta an pek hnungin CCPur Police chun case lasawngin FIR No. 23(3) 2015 CCP-PS US 400 IPC & 25 (1-C) A. Act registered khumin Court hmaah an inlangtir a, Court chun  March 31, 2015 chen PS Custody-a la um phawt dingin a rel.


IMPHAL:
Headline:
Cabinet meeting in ADC Election May 30, 2015 a nei ding le Tribal dialects 5 a recognised
Imphal:  Zani chawhnung dar 3 a inthawk khan Chief Minister’s  Secretariat Conference Hall-ah Cabinet meeting nei \an a ni a, Cabinet meeting hi zani zan dar 7  khan zo a nih. Cabinet meeting chun, Manipur tlangram biela Autonomous District Councils (ADCs) 6  haia inthalngna chu  May 30, 2015 a nei dingin a rel. Chun, Cabinet meeting  hin  tribal dialects 4 hai chu an \awnga Class-VIII chen inchuk thei ta dingin a recognised. Chuong tribal \awnghai chu Maram, Anal, Maring le  Simte hai an nih.

            Cabinet meeting zova Manipur  Government Spokesperson le Education, CAF & PD Minister Moirangtem Okendro in Chanchinbumihai an pawlpuinaa chun, tlangram districts haia ADC Election chu May 30, 2015 a nei ning a ta, Election result  chu June 8, 2015 ah puong ning a tih tiin a hril. Chun, Vote thlak chu zing dar 7 a inthawk zantieng dar 4:30 chenin nei ning a ta, ADC  Election  ding le inzawma  Draft Electoral Roll chu May 30, 2015  in insuo ning a ta, sukdikna le sawiselna siem nuomhai ta dingin April 13, 2015 chenin siem thei ning a ta, Final Electoral Roll chu  April 20, 2015 in insuo ning a tih. ADC Election  Notification April 30, 2015  in insuo ning a ta, candidate nomination paper file nuom han May 6, 2015 chenin file thei an ta, Scrutiny May 7, 2015 ah nei ning a ta, Candidates inhnukdawk nuomhai  May 11, 2015 chenin inhnukdawk thei an tih. Repoll a \ul leh June 4, 2015 ah nei ning a tih. Votes tlahai June 8, 2015 a tiem le result puong nghal ning a ta, ADC election le inzawma thil \ul  hai June 15, 2015 chena zo fel ning a tih tin a hril.

            Chun, Maram, Anal, Maring le Simte \awnghai state sawkarin  recognised a remti a, an \awngin  Class VIII chen inchuk thei tang an tih. Manipur ah tribal dialects  39 a um a, hienghai laia 13 hai chu recognition pek an ni tah. Tribe a recognise ding  hin a tlawm takah mi 10,000 (population) an ni bakah lekhabu, magazines annawleh nitin  Chanchinbu an nei a \ul tiin M. Okendro  chun a hril. Maram population chu 45,255 an ni a, khuo 25 ah an chenga; Anal population 21,242 a ni a, khuo 21 ah an cheng a; Maring population 23,238 a ni a, khuo 23 ah an cheng. Simte Population 11,065 a ni a, khuo 21 ah an cheng tiin  Directorate of Language Planning and Implementation ah an lang tiin M. Okendro  chun a hril.
-Universal News Agencies

Darkar 24 General Strike thaw an tum
Imphal:  All Manipur  VDF Welfare Association (AMVDFWA) chun  March 27,  2015 zanril a inthawk March 28, 2015 zanril chen Manipur pumpui huopa General Strike  an thaw tum niin an hril. March 25, 2015 a rally an nei huna VDF personnel 16 mana um hai insuo ding le an motors 40 lai an man pek hai chu March 27, 2015 chena pekir dinga ngenna an siem state sawrkarin a sukpuitling peknaw leia General  Strike hi an thaw tum niin an hril.

Manipur-ah sinzawm mi 7,24,658
Imphal:  February, 2015 chen khan Manipur-a Employment  Exchange Offices haiah sawrkar sin dit leia inzieklut mi 7,24,6587 an tling ta a, hienghai laia 5,15,034 hai chu pasal le 2,09,624 hai chu nuhmei an nih tiin  Directorate of Employment, Manipur thusuok chun a hril.   District tum tuma sin zawng umzat chu, Imphal West 1,89,373  (pasal 1,23,323  le nuhmei 66,050). Imphal East 1,15,779 (81,901 pasal le 33,878 nuhmei ), Thoubal 1,21,929 (95,623 pasal  le   26,306 nuhmei), Bishnupur 69,776 (pasal 51799 nuhmei  17,977), Churachandpur 72,547 (pasal 53,241 nuhmei  19,306 ), Ukhrul 29,153 (pasal 20,325  nuhmei 8,828), Senapati 60,555 (pasal 43,664  nuhmei 16,891 ), Tamenglong 25,559 (pasal 19,301  nuhmei 6,258)  le Chandel 30,697 (pasal 20,986  nuhmei 9,711) an nih.

Admit  Card lak thei a nih
Imphal:  Manipur High Court hnuoia thawk ding Chowkidar lakna dinga Admit Card chu  Registry kuoma  inthawk April 15, 2015 chenin lak thei ning a tih tiin Manipur High Court thusuok chun a hril.

CAU Vice Chancellor dingin Dr Premjit
Imphal:  Dr Moirangthem Premjit  Singh of Moirang Phairembam Leikai, Bishnupur district chu   Vice  Chancellor, Central  Agricultural University (CAU), Eroishemba  sin chel dingin  Department of Agriculture Reasearch and  Education, Ministry of Agriculture chun zanikhan a ruot.


Others
Brig. T. Sailo (93) a thi
Aizawl:  Mizoram Chief Minister hlui le People’s Conference Party (PC) indintu  Brig. T. Sailo (|henphunga Sailo) chu zani 11:50AM  khan lungphu chawlin a thi. Brig. T. Sailo hi  Jan. 1, 1922 in a pieng a, Serkawn Middle School ah Class-VI a zo a, High School chu Shillong-ah a zo a, Intermetiate Science Calcuta University-ah a zo. Kum 1942 in Indian Army-ah a lut a, 1960 in Lt.  Colonel; 1963 in Colonel le 1966 in Brigadier ah kaisangin kum 1974 in a pension. April 17, 1975 in Mizoram Peoples  Conference party an din a, 1977 a Mizoram Assembly election-ah an party in hratna changin sawrkar an siem a, Chief Minister, Mizoram a hung ni a, 2008 in MLA a thlangtling nawk a ni a, kum 2014 in a term a tawp a, hi taka inthawk hin politics a chawlsan ta a nih. Mizoram sawrkar chun a sunnain zanikhan Half Holiday a puong bakah  a sunnain hnam puonzar a chanvein a khai. A pa chu Vancheuva a ni a, a nu chu Hrangvungi a ni a, a nuhmei chu Thansiami a nih.

Vajpayee kuomah Bharat Ratna
New Delhi:  India rama  Civil mihai kuoma pek hlak Award insang tak Bharat Ratna chu zani zantieng khan President Pranab Mukherjee  in India PM hlui Atal Behari Vajpayee kuoama an hlan President hi Vajpayee chengna  hmun Krishna Memon Mark-ah fein  Award hi a van hlan a nih. Hi huna hin PM Narendra Modi;  Senior Cabinet ministers; PM hlui Dr Manmohan Singh; BJP National Presdient Amit Shah le RSS Chief Mohan Bhawat  hai an \hang. Vajpayee hi Congress party ni lo hai laia a term tawp hena PM sin chel hmasatak a ni a, kum 1998-2004 inkar sung khan PM a chel a nih.

Inban nawng kan tih: Bhushan, Yadav
New Delhi:  Aam Aadmi Party (AAP) sunga buoina a la re thei chuong naw zing a.  Inremna dinga inbiekna zanikhan nei sunzawm nawk a ni a, sienkhawm  hi inbiekna hi a hlawsam. AAP  MLAs, Prashant  Bhushan le Yogendra Yadav hai chun MLA an ninaa inthawk an inban  naw ding thu zanikhan an hril nawn nawk.

Kolkata-Dimapur inkarah IndiGo
Dimapur:   April 15, 2015 a inthawk khin Kolkata le Dimapur inkarah nitin IndiGo Airlines a fe \an ta ding niin IndiGo  Airlines thusuok chun a hril. Delhi-Dimapur Flight via Kolkata service suklienna a nih. Kum 2013 a inthawk khan  haptakar khata thaw\anni zatin Air India chun Delhi le Dimapur inkarah  a vuongna a lo infetir ta bawk a nih.

April 1 ah SC in a ngaituo ding
New Delhi:  Coal  Block allocation (Hindalco) le inzawma Special Court in India PM hlui, Dr Manmohan Singh a taksa ngeia inlang dinga a kona thua  Dr Singh  in Court hmaa inlang lo dinga Supreme Court a ngenna a siem chu April 1, 2015 khin hearing nei ning a tih. Dr  Singh hi Congress \huoitu le workers han an thlawp tlat ding thu kha hma khan an lo puonglang ta a nih.

Mi hausa hai Subsidised LPG lak tawpsan dingin
New Delhi:  Zanita Prime Minister Narendra Modi in Urja Sangam hmuna thu a hrilnaa chun, mi hausa le khawsa deuhai chu Gas (LPG)  man tlawm (subsidised) lak tawpsan ta dingin a ngen. Gas man tlawm hi chu ei rama mi retheihai lai khawm a rethei zuolhai chan ding a nih. Mi 2.8 lakh in subsidised Gas lak ei tawpsan chun Rs. 100 crore ei hum (saving) ding a nih tiin a hril.

Bangladesh Intelligence officers 4 vuok
Agartala:   March 25, 2015  zan khan hriet suol leia Shipahijala District a  Rahimpur Sub-Division, Tripura sunga Boxanagar khoa va lut Bangladesh Intelligence Offiers 4 hai chu rukru le suomhmang sawnin a khaw mihai \hangruolin an man a, an vuok zek hnungin BSF kutah an pek. Hi zo hin BSF hai chun hieng officers 4 hai hi \ha takin Akhaura Checkpost hmuna Border Guard Bangladesh (BGB) kutah an inhlan.

Co-pilot ruong hmu a ni tah
New Delhi:  March 24, 2015 a Goa Coast a Indian Navy  Vuongna Doriner- 228 tuoksiet a tuok leia a ruong  la hmu lova um Co-Pilot Lt. Abhinay Nagori ruong chu zanikhan hmu  a ni tah. Pilot pahni   laia pakhat Captain/Commander Nikhil Kuldip Joshi chu sansuok  a ni a, Pilot dang pakhat  Lieutenant Kiran Shekhawat ruong chu March 26, 2015 khan hmu  ani tah. Indian  Navy  Vuongna hi training a nei laia tuoksiet tuok a nih.

Asaram  in bail a ngenna  Court in a hnawl
Ahmedabad:  Nuhmei suolluia intum leia man Self-styled godman  Asaram (73)  in  temporary bail a ngenna chu zanikhan  Gujrat High  Court in a hnawl pek.  Asaram hin a tupa ruong      rawnaa \hang dinga temporary bail a ngen a ni a, sienkhawm  Justice Paresh Upadhyay chun  hi thil hi temporary bail-a suokna khawp a ni nawh tiin a hnawl pek a nih.   Asaram hi  a Ashram-a nuhmei suolluina, thawluina hmanga hrentangna le case dang danga thubuoi siem khum a ni a,  Sept., 2013 a inthawka kha   Rajasthan jail-a khum a nih.

Damsung lungin intang dingin
New Delhi:  Court in thi dinga thiemnaw an changtir ta hnung Man Bahadur Dewan alias Tote Dewan; Dibrugarh district, Assam chu President kuoma lunginsietna a ngen leiin damsung lungin intang  dingin President in a thlakthleng pek. Dewan hin September, 2002 a a nuhmei Gauri le a naupasal pahni, Rajib le Kajib hai a that leia Court in damsung lungin intang dinga thiemnaw an changtir a nih.

Bangladesh-ah mi 10 chil hlum
Dhaka:  Bangladesh khawpui Dhaka a inthawka Km. 20 a hlaa um, “Ashtami Snan,” Langalbandh, Bangladesh hmuna pathien biea fe hai lai innekbuoina nasa tak a tlung a, nuhmei 7 \hangsain mi 10 chil hlum an nih. Hi lai hmun hi Hindu hai hmun thienghlim, Old Brahmaputra vadung kama  um a ni a, India, Bangladesh le Nepal  haia inthawk Hindu sakhuo zuitu mi sangtel fe khawmin Old Brahmaputra vadungah hin an insil hlak a nih.

VAWISUN THUPUI
Khuoletui le a Pathien le a Pa tienga thiempua mi siemtu kuomah, a nih, ama kuom ngeiah, ropuina le ror>lna  chu chatuonin um raw se! Amen.  ­ Thupuongsuo 1:6

Editorial
Ei khawlai a him ta nawh

Tuta hma deu khan chu khawlaia Zu rui invak vel han nu le nau an sukthlabar chang a um hlak tinaw chu ei khawlai a him a, mitin zalen takin Churachandpur town sunga hin sun le zana hai khawm zalen le muong takin ei inlawn vel hlak. Khang huna khan nuhmei le naupang khat chau khawmin zan huna khawm fe le hungna neiin an invak ngam hlak. Tulai ruok hin chu ei khawlai  a him ta nawh. Hi lei hin mani khat  chau a invak vel chu  ei ngam ta nawh. Zan  huna  lek lem chu khawlai leng le invak suok  khawm ei um ta meu nawh. Zan  dar 7/8  a hung ni chun khawlaidunga mi inlawn vel le dawr hawng khawm hmu ding an um mang ta nawh.

    Ei khawlaidung hi him nisienla chu zan huna khawm sin tam tak ei thaw thei ding a nih. Amiruokchu, ei khawlai a him naw a, ei hriet lei ni ngei a ta, zan huna sin thaw, dawr hawng le fena nei khawm ei  um nuom ta nawh. Mihai chun sun le zan hi sin thawnain an hmang ve ve thei a, ei ni ruok chun ei hmang  ve thei nawh. Hi thil hin ei ram   a him  naw a, ti ding le veng ding an tamzie a suklang. Ram buoi ni si lo, ram buoi ang elin ei  um a, hi tak hi ei vangduoina a nih.

    Misuol hlak an pung deu deu a, sun chang lai khawma suol thaw  ngam khawm ei um ta a nih. Mi rama tlung dinga ei ngaihai kha ei rama khawm a hungtlung ta a nih. naupang sie le tha la hrie lo, chithlum  le fak thei chi tum tum haia thlem lungawia an rangkachak nabe  dam lakpek  ching ei um tah a ni hi! Ei khawlai hi zana chau ni lovin sun huna khawm a him chuong ta nawh. Ei ramin muongna le inremna chau ni lovin himna  khawm a mamaw ngawi ngawi  ta a nih. Khawtin le vengtinin venghimtu ei mamaw a,   Civil Police an indai si naw chun  khawtin le vengtinin  venghimna  sin thawtu ding Volunteer ei indin el a hung tul ta ding niin an lang. Chuong a ninaw chun ei thil nei le ei naupang hai an him zo tanaw a nih.

    Zan huna hin rukru le misuol hai hi an che nuom bik leiin khawtlang thuoitu han ei khaw le veng seng rukru le misuol laka ei him theina ding lampu an dap a tul ta a nih. Ni dang khan chu Gate siem meuin ei duty hlak a, khangang bawk khawm khan khawtinin duty  nei thei nawk seng ta inla nuom a um. Ei khawlai a him tanaw leiin zan khawlai leng ei bansan pha a, khawlai  himnaw ei tangkaipuina a nih.

    Rukru  han thil an inruk hmaa man annawleh misuol han thil  suol an thaw hmaa man hi thil tha le lawmum a nih. Thil suol thawtuhai mana an um hi lawm a um ruolin, thil tha lo tak an  intlungtir  hnunga man hin chu a tuortu  an lo um hman ta hlak leiin a pawi sei hlak. Sukdamna nekin inveng a tha lem ti ang deuin, thilsuol thawtuhai man nek chun thil suol thaw tumtuhai man hi a thain lawm a um lem.

            Sun lai nekin zan hun a ralmuong nawin a him naw lem leiin Police hai hin zan patrolling hi uor thei  hai sienla nuom a um. Police ei tihai hi mipui le an thil neihai venghimna kawngah mawphurna an nei bakah buoina suok ding  vengna le dangna kawngah mawphurna lien tak an nei a nih ti hi an hriet thar le an ngaipawimaw zuol nuom a um. Chuleiin, mipui himna ding a ni phawt chun ei Police suongum tak tak hai hin zan duty khawm rin nawhai sienla mipui lawm hleng an tih.


Post a Comment

Powered by Blogger.