LOCAL NEWS
Central Schemes fedan thenkhat sukdanglam
CCPur:  Kum iemanizat liemtaa inthawka  DRDA hnuoia Development Scheme tum tum thawna dinga  fund hai Central sawrkarin direct-a a hung sanction hlak chu tuta financial year (March 31, 2015)  zo a inthawk chun  Backward Region Grant Fund (BRGF)  chu  Central sawrkarin State sawrkar kuoma  direct in a hung pek ta ding niin ei thu dawngna chun a hril.  Hi thil hi 14th  Finance in a remti dungzuia thaw ding a nih.

Hieng laizing hin  Scheme tum tum 24  haia chun a pattern(fedan) thleng ning a ta, Scheme 31 hai  Direct-in Centre in fund hung peng a ta, Schemes 9 hai chu Central in a delinked ding nia hril a ni a, chuonghai chu - National E-Goveance Plan; Backward Regions Grant Funds; Modernization of Police Forces; Rajiv Gandhi Panchayat Saskaktikaran Abhiyaan; Scheme for Central Assistance to the state for developing export infrastructure; scheme for setting up of 6000 Model schools; National Mission on Food processing le  Tourist Infrastructure  hai ning an tih.

MGNREGS  Scheme  chu Central sawrkarin a renga a tum (support) ding a ni a,   April, 2015 a inthawk chun  sawrkar thlungpui (Central) in  District tina DRDA account fethlengin fund a hung pek ta ding a nih.

An sina inthawk kaisang
CCPur/New Delhi: Additional Commandant, CRPF, Manipur & Nagaland Sector, Imphal  sin chel lai mek Pu Jacob Vungzabiek Tusing chu Commandant in a kaisang. Ama Pu Vungzabiek Tusing hi Hmar laia  CRPF-a  Commandant kai hmasa tak nia hriet a nih.

Chun, Pu VL Renga Hriler, tuta  Ministry of Defence, NCC Headquarters, New Delhi-a Associate Director sin chel mek chu  Director in a kaisang. (Virthli). An kaisangna hi ei  Chanchinbu chun a lawmpui hle.

Manipur team-ah Hmar tlangval pahni
CCPur:  April 20, 2015 a     Guwahati le Silchar, Assam haia tan ding 6th Dr  T Ao Memorial Football Tournament um dinga chun Manipur  squad mi 20  All Manipur  Football Association (AMFA) in a thlangsuok hai lai Hmar tlangval pahni  Immanuel L. Intoate (Defence) le Cleaven Hmar (Mid-field) hai an thang ve.  Anni pahni hi Hmar  FC le club dang dang haia khel hlak an nih.

NERCORM  in  Training hmun hniah
CCPur:  Zani zingkar khan North Eastern Region Community Resource Management (NERCOM), CCPur hmalaknain  Hmarveng-a Nazarene Conferene Hall-ah “Monitoring, Evaluation and Book Keeping Training” nei a ni a, mi 20 vel an thang. Hi huna hin Khaimang, Monitoring Asst., NERCORMP le  Thongkhenmung, Accoount Officer, NERCORMP  hai resource person in an thang a, vawisun hin zo an tih.

Chun, Zani 11:00AM khan M.  Songgel Community  Hall-ah NERCOM CCPur chun  One Day Training programme on  Piggery Farming programme an hmang. D. Khuala Vaiphei, Project Manger, NERCOM CCPur chun,  NERCOM 1st phase Feb. 1999 a tan a ni a, 2nd phase chu 2019 a tawp ding a ni thu a hril. Phase 1 hi kum 6 sung ding a ni a, evaluation leh kum 8 vel ning a ta, NERCOM phase 3 hnuoia CCPur le Chandel District  inthangsatir a ni a,  beneficiaries han sin an thaw tha chun phase 4-na khawm  a um pei ding thu a hril.  Training a hin  Partner NGO 8 haia inthawk member 3 seng an thang.

Gas  Cylinder 2 inruk hmang
CCPur: Zani hmasa zan khan rukruhai Light House Lane, CCPur-ah an che nawk a, Ar zawrna dawr an rawk a, Ar an lo neinaw lai a ni leiin an Gas (LPG) Cylinder pahni an inruk hmang.

 A khuo hming ZMA Road lem
CCPur: Zani hmasaa  nuhmei naupang hai rangkachak nabe lapek hlaktua intum mana um  Ms   Chingngaihvung (22) d/o  Ngaipi in a chengna khuo hming Khominthang, New Lamka tia  Police kuoma a hril kha ni lovin   ZMA Road, Vengnuam, New Lamka ti lem ding a nih tiin  ei thu dawngna chun a hril.

ASHA Convention
CCPur: March 30, 2015, 10:30AM khin Synod Hall, IB Road, CCPur-ah  NRHM hmalaknain ASHA Convention um a ta, hi huna hin Pu Lunminthang Haokip, IAS, DC, CCPur         khuollien in thang a ta, S. Hangshing, Post Master, CCPur MDG chu special guest in thang a tih. PHC le Town area-a ASHA  12 hai kuoma certificate inhlan ning a tih.

Imphal
Headlines:
Tharum insuona le buoina hungtlung huna harsatna tuor hmasa takhai chu nuhmei le naupang hai an nih - O.Ibobi Singh
Imphal:  Zanikhan Hotel Imphal-ah Control of Arms Foundation of India (CAFI) le  Manipur Gun Survivors Network and North East Women Initiative for Peace  hai hmalaknain ‘First North East Women Congregation” ti thupui hmangin function nei a nih. Hi function a hin Manipur CM O.Ibobi  Singh; PHED Minister I. Hemochandra;  Prayot Debbarman, Editor, North East Today;  Founder of the Manipur Women   Gun Survivors Network, Head of Political Affairs, Royal  Norwegian  Embassy, New Delhi Tharalf Stevold; Chairperson, State Women Commission Dr L. Ibetombi le Project Coordinator , Welthungerhilfe, Neha Naqvi hai khawm an thang.

HI function-a Manipur  CM O.Ibobi Singh in thu a hrilnaa chun, tharum insuona le buoina a hungtlung huna harsatna tuor hmasa takhai chu nuhmei le naupang hai an nih tiin a hril. Manipur chun helpawlhai chetna leiin hun sawt takel harsatna le buoina hai a lo tuok ta a,  chuong hun haia harsatna tuortu  tak chu nuhmeihai  an ni a, an pasal, an pa le an nauhai an chan a, fak le dawn thilah harsatna namenlo takel an tuok. Hi khela hin vau, inthi, vuok, sukmuolpho, suollui le that an tuok hlak. Nundan pangngai nasa takin a sukbuoiin a sukharsa pha a nih tiin a hril.

Chun, sawrkar thlungpuiin tuchena  India hmarsakbiel, a bikin Manipur a inthawka Armed Forces Special Powers Act, 1958 a la hlip thei nawna thuah Pu O.Ibobi Singh chun sawrkar thlungpui a dem hle. Nagaland ah Ceasefire agreements le peace talks hai nei a ni chen khawma sawrkar thlungpuiin iengleia AFSPA a la hlip naw ti chu Nagaland sawrkar  indawnna a nih tiin a hril.  O.Ibobi  Singh chun, kum 2004 a Thangjam Manorama Devi suollui zek a ni hnunga Assam Rifles han an that le harsatna nasa tak leia  Assembly segments 7 haia AFSPA hlipna dinga state sawrkar hmalakna le Centre in NE biela inthawk AFSPA  a hlip nuom naw a,  hi thil hi sawrkar thlungpui agenda inthup a nih tiin Chief Minister  O.Ibobi Singh chun a hril.

Postmaster sin post 31 a ruok
Imphal: Director of Postal Services, Manipur hnuoiah Postmaster (Gramin Dak Sevak Branch Postmaster-GDSBPM) sin  post 31 a ruok. Sin ruok dan chu, Churachandpur District-ah 12; Ukhrul district-ah 6;  Chandel District-ah 5 le  Tamenglong, Senapati, Bishnupur, Thoubal, Imphal West le  Imphal East district haiah  3 seng a nih. Thu chieng lem  Directorate of Postal Services, Manipur, Imphal-ah ngaiven thei ning a tih.

Police han Tear Gas an kap
Imphal: Zani 3:40PM vel khan VDF, Protest Rally nei, CM Office pan tuma fe hai chu Khoyathong Traffic junction, Imphal lai Police han  tear gas kap khumin an hnawtdar. Police chun hi rally a thang VDF hotu 7 an man bawk.

Sports Quota hnuoiah Auditor sin a hmu
Imphal: Manipur-a Club inlar ve takel  United Sporting  Assoiation (USA) Club-a Goalkeeper  Thangtinpao Khongsai chun   “Office of the Accountant General(Audit), Assam hnuoiah  Group C post- Auditor  sin a hmu.  Feb. 23-26, 2015 inkar sunga  Sportsperson hai ta dinga  Sports Quota-a  IA & AD,  Guwahati in  Auditor le Accountant lakna dinga recruitment an huoihawt naa Auditor sin hi a hmu a nih.   Mr   Thangtinpao Khongsai hi  Club tum tum, KSC, SU, PYA, Shillong Lajong FC, NEROCA haia khawm lo khel hlak a ni a, Dr T.Ao Memorial  Tournament um dinga khawm Manipur team squad-ah a thang a nih.
Others
Christian Institution-hai venghimna
Kolkata: Christian Institutions  le an Biekin hai suksiet le bei an ni hlak leiin West Bengal a Biekin pahnia thuoituhai chun silai chawi venghimtu ruoi (hire)  dingin rawtna an siem. Hi thil hi a hma khan chu thil tul a ninaw a, tuhin chu thil tul a hung ni tah a nih tiin  Father Dominic  Gomes chun a hril.

PM France,  German le Canada haiah
New Delhi: PM Narendra Modi  chun April 9, 2015 khin  New Delhi suoksanin  France, German le Canada haiah inzin a ta, ni 8  ramdang inzinain hun hmang a tih.  April 9 in  France pan a ta, April 12 in  France suoksanin German pan a ta,  April 14 in  German suoksanin  Canada pan a tih tiin  Syed Akbaruddin, Spokesperson, External Affairs Ministry chun a hril.

India in Yemen suoksan dingin a mihai an hriettir
New Delhi: Indai sawrkar chun  Yemen rama India mi um hai chu  Yemen suoksan dinga thurawn pein an hreittir nawk.   Tuta tum hi India sawrkarin a ram mi  Yemen-a um hai an hriettir a thawk thumna a nita a,  External Affairs Ministry chun  India mi hai chu an hma thei anga  Yemen suoksan dingin an hriettir a nih.

Allied army units in an thlawp Yemen  helpawl    hai chun Aden khawpuia inthawk km. 60 vel chauva hla  al-Anad military airbase an lak a, an hung hrat pei bakah    an hung hnai pei leiin an President Abdrahbu Mansour Hadi khawmin  a chengna Aden hmuna Presidential palace a suoksan tah niin ei thu dawngna chun a hril.

MP Governor naupa a thisaa hmu
New Delhi: Madhya Pradesh  Governor Ram Naresh Yadav naupa Shailesh Yadav chu zanikhan Lucknow-ah  a thisaa hmu a nih. Shailash Yadav hi  Multi-crore Madhya Pradesh Professional Examination Board (MPPED) Scam a inrawlna neia intum le FIR-a a hming chuong a nih. Chun, a pa Ram Naresh Yadav khawm hi Scam-a case registered khum ta a nih. Ram Naresh Yadav hi India rama  Governor hai laia inhlemna case a  case registered  khum hmasa tak a nih.

India le  Qatar han MoUs 6 an ziek
New Delhi: Emir of Qatar Sheikh Tamim Bin Hamad Al-Thani chu New Delhi a ni 2 sung cham dingin   a hung inzin a, zani zingkar khan Rashtrapati Bhavan-ah lawmlutna nei a nih. PM Narendra Modi  an  hmupui bakah President, Vice President le mi pawimaw dang danghai  inhmupui a tih. India le Qatar han zanikhan Memorandum of Understandings (MoUs) 6 an ziek. Chu lai chun, regular taka TV le Radio programmes hai inpektuo, Prasar Bharati le  Qatar Media Corporation hmangruoa inthangpuituo  ding, dankala che mana um le thiemnaw inchangtir tasahai inthlengtuo ding le Qatar a India mi thiemnaw inchangir tasa hai India rama lak thei ding tihai a thangsa.

PM hlui Vajpayee  Bharat Ratna inhlan ding
New Delhi: India rama Civil mihai kuoma Award pek  hlak laia an sang tak Bharat Ratna Award chu March 27, 2015 khin  India Prime Minister hlui Atal Behari Vajpayee kuoma inhlan ning a tih. Dec. 25, 2014 khan President Pranab Mukherjee chun hi Award hi Atal Behari Vajpayee kuoma inhlan dinga a lo puong ta a nih. Atal Behari Vajpayee hin 1996-2004  chen khan India PM sin a lo chel a nih.  Congress party ti lova a term pumpui, kum 5 sung PM chel hmasa tak a nih.

Delhi-ah NE Festival nei a ni ding
New Delhi: Meghalaya state sawrkar  hmalaknain hungtlung ding April 11, 2015 khin Indira Gandhi Indoor Stadium, New Delhi-ah  “Songs and Dances of the North East” ti thupuia hmangin  ni khat sung aw ding NE Festival nei ning a tih. Hi Festival a hin NE states 8 haia Governors le  Chief Ministers hai thang an tih. Hi Festival hi Culture sukhmasawnna ding le platform pakhata um tlang theina lampui dapnaa nei tum a nih.

Doctor hlaw Rs. 1,00,000-1,20,000
Aizawl: National Health Mission (NHM) hnuoia Doctor-hai hlaw a tlawm leiin NHM hnuoia thawk ding Doctor hmuzo an ninaw leiin an hlaw sukpung dinga ngenna  chu sukpuitling dingin NHM chun a mi tiem a. Hi dungzui hin NHM hnuoia thawk Doctor, thingtlang le hmun kilkhawra um hai thla khat hlaw dingin Rs. 1,00,000- Rs. 1,20,000/- riruong a nih tiin Lalthanzara, Health Minister, Mizoram chun Mizoram Assembly ah Congress MLA R.L. Pianmawia indawnna siem a dawn.

Navy vuongna tuoksiet a tuok, mi 2 an thi
Panaji: Zani hmasa zan sawt hnung khan Indian Navy Vuongna (Donnier Surveilance  Aircraft), INS Hansa,  Goa hmuna inthawka training a fesuok chu tuoksiet a tuok a, Arabian tuipui, Kanwar, Karnataka ah a tla thla a, Pilot Nikil Joshi sansuok a ni a, Pilot dang 2 hai ruok chu hmuzo an ni tanaw a, an thi  ring a ni a, zawngna sin thaw zing a la nih tiin Indian Navy thusuok chun a hril.

MLA pakhat Inpuia inthawk namdawk
Srinagar: Zanikhan Jammu & Kashmir Assembly-ah Independent MLA Abdul Rashid in Parliament runna leia thiemnaw inchangtir Afzal Guru  thu inpuiah a putlut a, Speaker in a hnawl leia lungawi lovin buoina a  siem a,  Speaker  Kevinder Gupta chun a buoina siem tawpsan dinga thu a pek hnung khawma a la sunzawm pei leiin Abdul Rashid chu Assembly Speaker thupekin Marshal han inpuia intahwk an namdawk.

Prasad in Sridevi a raw hlum
Hyderabad:  Shiva Prashad chun Rashi Concept School,  Boduppal-a a zirtirtu chanpui Mrs  Sridevi (30) w/o Satyanarayana chu March 24, 2015, 1:45PM vel khan an choka sungah khawnvartui buok khumin a raw hlum. Shiva Prashad   le Sridevi hai hin Boduppal hmuna private school hran indin an tum a, Sridevi  in Prashad kuomah Rs. 3.6 lakh a pek a, sienkhawm School indin thu a hril ri ta sinaw leiin Sridevi hin a pawisa  pekir dingin a thin a, chu lungsena  Prashad hin Sridevi hi a raw hlum a nih. Prashad hi Police han an man a, case an registered.

Rangkachak siemfawm hmangin Loan
Allahabad:  Uttar Pradesh a SBI, Bhadohi chun Agr-Gold Loan Scheme hnuoiah mi 27 hai kuomah Loan Rs. 1 crore a pek a, sienkhawm loan la han an loan lak an thungkir naw leiin loan lakna dinga rangkachak an siekham hai chu Sri Krishna Gold Bar Testing Lab, Varanasi  ah test a ni a,  an siekham rangkachak hi rangkachak siemfawm a nih ti hrietsuok a nih. SBI, Bhadohi Branch chun  Loan latu mi 27 hai chungah case a siem. Loan latuhai hi Kotwali le Bhadohi hmuna cheng an nih.

Kum 2 sungin cases 2565 rel fel
Agartala:  Kum 2 liemta sung khan Tripura High Court chun Cases 2,565 a rel fel a, hi lei hin pending cases 10% zetin a hung tla hnuoi pha tiin Chief Justice Deepak Gupta chun a hril. Tuhin Tripura High Court ah pending  cases 4,135 a la um tho niin Gupta hin a hril.

Rel passenger hai thil inrutu  pakhat man a nih
Surat:  Rel tlan lai sunga chuong passengers hai thil inrutu  kum 22 a upa pasal pakhat  Vikram Parmar of  Trikam Nagar chu zani hmasa khan Police han thilhlu chi tum tum Rs. 8.44 lakh manhu leh an man. Mr Vikram Parmar hin Rel-a chuong nuhmei hai a tum deu tak hlak a, an in kara an thil hai an ruk pek hlak nia hril a nih.  Parmar kuta inthawk hin Mobile phones  le thilhlu dang dang Rs. 48,200 manhu ding man a ni a, a chengna in Police han an dapnaah  thli hlu   Rs. 7.96 lakh manhu an man a,  Rangkachak incheina thil khawm Rs. 3.31 lakh manhu, tangkaruo (silver) Rs. 25,000 manhu le pawisa fai Rs. 1.07 lakh bakah Mobile phones 88, Rs. 2.79 lakh manhu, Laptop 1 Rs. 25,000 manhu, purse 19, Sana 14 Rs. 12,400 manhu ding dapdawkin an man a nih.  Rel ticket inchawa Rel-a chuongin  passenger-hai a bikin nuhmei hai chu an inkarin an thil hai an ruk pek hlak niin Police chun an hril.

Natl. Film Awards dawng ding hai lai Mary Kom film a thang
Guwahati: May 3, 2015 nia  62nd National Film Awards 2014  nei  huna  Awards  tum tum sem ding le inzawma award dawngtu ding hai zani hmasa zantieng khan  New Delhi hmuna puong a nih.  Award dawng ding hai lai hin  Manipur Boxer M.C.Mary Kom chanchin film-a siem ‘Mary Kom’  ti chu Best Popular Film providing Wholesome Entertainment award dawng dinga thlang a ni a. Chun,  Hemanta Das in a directed le  Manabendra Adhikary in  a produced ‘Othello’ ti   chu   Best Assamese   feature film a thlang a ni a, producer le director han Rs. 1,00,000 ve vein award hi an insem ding a nih.  Award hi  President Pranab Mukherjee in inhlan tawl a tih.

Chun, Rabha film hmasa tak   Suraj Kumar  Duwarah’s in a siem ‘Orong’ ti film chu  National award for best feature film  (in the )language dawng dinga thlang a ni bakah  Manipuri film siemtu Haobam Paban Kumar chu ‘Phum Shang’ ti film a siemna leiin  National Award for the best investigative film dawng dinga thlang a ni bawk.

Jaya  CM a ni nawk ding; Panneerselvan
Chennai:  Ms J. Jayalalitha chu tuta inthawka hun sawtnawte hnungah Tamil Nadu Chief Minister a hung ni nawk ding a nih. Ama hi  Tamil Nadu State le a mipuihai ta dinga a hringna inhlan ngamtu, kan “Puratchi Thallaivi Amma” a nih tiin   Tamil Nadu Chief Minister O. Panneerselvam chun zanikhan Tamil Nadu Assembly ah a hril.

UN Conference on Peacekeeping Operations
New York:  March 27, 2015 khin New York khawpuiah UN Conference on PEacekeeping Operations nei ning a tih. Hi Conference a hin  Indian  Army Chief General Dalbir Singh Suhag khawm zu thang a tih. Hi Converence hi  Departments of Peacekeeping Operations & Field Support in an huoihawt ding a nih. UN Secretary General Ban ki-Moon in hi Conference hi hawng a tih.

Pakistan-ah mi 4 khai hlum nawk
Islamabad: Pakistan Court in thi dinga thiemnaw an changtir ta sa mi 4 hai chu zani zingkar khan Pakistan  rama lungin hran hran pathum haiah khai hlum nawk an nih.  Tuhin Pakistan ah  khai hlum hmabak 8,000 lai zet lungin hran hran haiah an intang meka hril a nih. Dec. 11, 2014 a kha Pakistan PML sawrkarin helpawl  thil le inzawma thiemnaw changhai khai hlum phalna a lo pek ta a nih. UN, European Union, Amnesty International le Human  Rights Watch hai chun hi dan hlipa um hi  lakir nawk ta dingin Pakistan sawrkar an ngen.

Editorial
Thil inzakum le muolphona
Imphal khawpui sunga tui harsatna leiin Public Health Enineering Department (PHED) in Jawaharlal Nehru Institute of Medical Sciences (JNIMS) a an tui supply an tawpsan a. Hospital thuneitu han private tui  supply-tuhai kuoma inthawka tui lak an tum chu a hlawsam leiin thaw dan ding a um naw leiin JNIMS chun duthusamin damnawhai a enkawl thei tanaw a, tui harsatna a hung re pha leh damnaw enkawlna sin chu theitawp suoin (full healthcare services) thaw sunzawm nawk a tih. Hi chungthua hin pawi ka ti a, mipui han mi lo hriethiem hram ro tiin H. Lokendro Singh, Additional Medical Superintendent, JNIMS chun thusuok a siem. Thil inzak um tak a nih.

Imphal khawpu sungah private hospital tam tak an um a, tui harsatna leia hiengang thusuok siem hi an la um nawh. Hieng laizinga state puitling Hospital le Medical  Sciences Institute meuvin hienganga  thusuok a hang siem el ta hi chu Manipur sawrkar  le a sunga cheng mipuihai ta ding chun thil inzakum le muolphona  niin an lang. Private  Hospitals han tui vang le harsat lai huna khawm damnaw enkawlna tluong taka an sunzawm thei zing laia iengleia state sawrkar hospital in damnawhai enkawlna sin tui harsat leia a thaw thei naw el am ning a ta?

Private Hospitals hai hmana tui harsat suonlam lova an service a pangngaia an sunzawm thei laizinga iengleia state pakhat Hospital meuvin hiengang thusuok hi a siem el  am ning a ta? State sawrkar chau muolpho lovin a ram mihai khawm an muolpho sa ve a nih. Hi thil hi state sawrkar ta ding chun tosan el ding chi niin an lang nawh. State sawrkar pakhat  meu chun JNIMS in tui supply a hmu theina dinga thang a lak a tul a nih.

India rama khawlai state le khawlai Union Territory a khawm tui harsat leia Hospital pakhatin an damnaw enkawlna sin an thaw thei ta naw thu mipui hrieta an puonglang hi hriet a la ni ngai nawh. Private Hospitals han tui vang le harsat lai khawm   tui tlasam lova an inchawk zo thei laia iengleia State medical Institute pakhat meuvin a mamaw tawk tui an chawk zo naw?  Ei state  sawrkarin pawisa a nei der ta naw a ni?  Hienganga muolpho taka um el nek chun tlawmngai pawl han JNIMS a ding hi tui inchaw el ta hai sienla a thanaw ding maw?

Tui vang le harsat leia JNIMS in damnaw a enkawlna a sunzawm thei tanaw hi Health Minister le state pakhat  Chief Minister hai hin iengtin am ngai veng an ti aw? Mipui ta ding chun hriet chak a  um khawp el. State dang le UT dang haiah hiengang  thil hi tlung ve sienla chu an Health Minister le an Chief Minister hai totawka an um ring a um ta nawh. Hi thu a hin ei Health Minister, Chief Minister le PHED minister han iengtin am hma an hung lak ding chu maw?

Dil tui thienghlim em em hmang seng lo ei nei laizinga tui vang le tui harsatna  ei hril khawm hi thil inzakum a nih. Loktak Dilah tui hieng zozai a um laia tui harsatna Manipur mipui han ei  hang tuok  el hi chu sukdik naw ei nei ning a tih. Water Supply Scheme cheng vaibelsie  telin ei siem a, iengleia tui ei la tlasam rawp el?  Ei Water Supply scheme-hai hi a hlawsam an naw ding? Churachandpur  town a inthawka hnaiteah Khuga Dam tui hmang seng lovin a um a, sienkhawm CCPur town a cheng hai chun tuileiin an bei a dawng a, an pawisa seng tamna tak chu tui a nih. Hi Project hi a hlawsam leia  hiengang harsatna hi  an tuok an naw ding?


Post a Comment

Powered by Blogger.