Responsive Ad Slot

Hmasawnna Thar | 25 March, 2015

Wednesday, March 25, 2015

/ Published by VIRTHLI
LOCAL NEWS
Headlines
Naupang rangkachak nabe lapek hlaktua intum nuhmei 1 man


CCPur:    Nuhmei naupang rangkachak (Gold)  nabe lapek hlaktua intum  Ms Chingthianmuang (24) d/o Thankhamlian of   Khominthang, New Lamka chu zani (March 24, 2015)  zantieng 2:30PM vel khan Donbosco  School Campus-ah   Donbosco  school staff han  Sakawrbakchep leh an man a, Police kuta an pek.

Ei thu dawngnain a hril danin amanu hin  ni iemanizat liemtaa inthawk khan nuhmei naupang   rangkachak nabe a lo  lakpek ta  hlak nia hril a nih.   Tuta hma khan naupang pakhat a rangkachak nabe a lo lakpek ta bakah zani hmasa lai khan  naupang dang pakhat  a nabe lakpek a tum nawk  a, sienkhawm lapek hman lovin naupang hi an taldawk a, chu naupang chun a nabe lapek tumtu hi a hmel an chik leiin   Donbosco School staff han an inchan a,  naupang pakhat rangkachak nabe chepthlak a tum lai taka an man niin ei thu dawngna chun a hril.  Ms Chingthianmuang hi Police han  kawlin an suizui mek.



ADC  in CCPur district hming  ‘Lamka’ a thlak dingin
CCPur: Autonomous District  Council (ADC), CCPur hnuoia  members hai chun zanikhan sitting neiin   ADC hnuoia Village recognition thuah pending case 7 um hai  hriltlangin  recommend dingin approved an thaw.   Chun case thar 15 hai laia khuo 14 hai khawm  approved an thaw a, khuo 1 chu pending in an sie.   ADC member hai chun  Churachandpur district hming Lamka tia thlak dingin an rel a, hi thua Gazetted Order insuo a ni theina dinga thuneitu (authority) hai  nawr pei dingin  thutlukna an siem bawk.


Churachandpur District hming hi Manipur Raja lo ni hlak  ‘Churachand Singh’ hmingchawia Churachandpur  tia ko le inbuk a lo nih.

SP hlui le thar han charge an inhlan
CCPur:  Senapati SP thar dinga ruot Mr K. Kabib, SP, CCPur chun zani 12:00 khan  Pu L Mangkhogin Haokip,  IPS kuomah SP, CCPur charge an hlan.  K. Kabib chun SP thar hi tha taka thlawp dingin mipui hai ngenin  SP thar hi ditsakna an hlan.  SP thar hi  Pastor Onkhomang, ECA HQ Pastorate Area in Pathien kuoma tawngtaipekna a nei. Pu Mangkhogin Haokip hi tuta hma khawma SP, CCPur lo ni tah, tuta tum hi SP, CCPur a chel vawihnina ding a ni tah.



HYA  President in SP thar lawmpuina
CCPur:  Upa Laldawnlien Varte, Gen.President, HYA GHQ chun Pu Mangkhogin Haokip, IPS, in SP, CCPur   Charge a lâkna le inzawmin zanikhan  S.P Office, Tuibuong, CCPur- ah lawmpuina le ditsakna chibai a va buk. HYA GHQ chun CCPur district mipui hai tawng le khawsak dan hretu  eini mi ngei  in SP a hung chel chu a lawmpui thu a puonga, Pathienin varna le remhrietnaa inthuom pei dingin ditsakna an hlan. - (Alan)

ADC Edn. Dept in Gypsy thar
CCPur:  ADC, CCPur-a  Education Department  in an hmang ding Gypsy thar chu zani sun dar 11:00 khan ADC office-ah  Rev. H. Lamkholian Simte, Principal, Biblical Baptist Church, Demmang Veng in Pathien     kuomah tawngtainain an hlan.  Gypsy thar  hi 13th Finance Commission sum hmanga, tax pek ding po pek hnunga  Rs. 6 lakh vel senga inchawk a ni a,  Gypsy hi GPRS  le inthuo a nih.



World TB Day
CCPur:  Zani zingkar khan  CMO Mini Conferene Hall, District Hospital-ah   World TB Day hmang a nih. Hi huna hin  Dr Thangchinkhup Guite, CMO/CCPur  chun thuhrilna neiin World TB Day hi a hawng a, Dr  T. Pumzathang, Dist. TB  Officer hun keynote address a hril.  Hi huna hin  MSF le  DAPCU  hai khawmin thuhrilna hun an hmang.

Imphal news
Headline:
Centrally sponsored Fund hai indik taka hmang dingin Thawar Chand Gehlot in Manipur sawrkar a ngen
Imphal:  Zanikhan Union Minsiter  of Social Justice and Empowerment,  Thaawar  Chand Gehlot le Manipur  CM O.Ibobi Singh han 1st Manipur  Rifles Ground, Imphal-ah ruolbanlohai  hmangruo ding chi tum tum an sem. Piengphunga ruolbanlo mi 955 hai kuoma hmangruo chi tum tu m, Rs. 50 lakh manhu zet an sem. Hi huna hin Union Minister of State for Social Justice & Empowerment, Krishanpal Gurjar khawm a thang. CM O.Ibobi Singh chun, Composite   Regional Centre (CRC) indin tum a ni a, hi thil hi a hung hlawtling ngei theina dinga thangpui dingin Union minister pahnihai chu a ngen. Manipur-a Composite Regional Centre  indinna dingin sawrkar thlungpui chun Rs. 1 crore a sanctioned  a ni thu  Mr Thaawar Chand  Gehlot chun a puong.

            Hi huna Thaawar Chand Gehlot in thu a hrilnaa chun, Manipur State sawrkarin  Centrally Sponsored  Fund indik taka a hmang phawt chun, sawrkar thlungpui chu Schemes tum tum haia dingin sum tam  lem hung pe dinga inpeisa a nih tiin a hril. Piengphunga ruolbanlo han Pre le Post Matric Scholarship an hmu theina dingin Manipur  a piengphunga ruolbanlo umzat list sawrkar thlungpui kuoma pelut dingin Gehlot chun Manipur sawrkar a ngen. Piengphunga ruolbanlohai ta ding bikin Hostels 8, Hospital, Sports  Centre, Old Age Home, Rehabilitation Centres le Schools hai khawm sawrkar thlungpui chun hung bawl a nuom a nih tiin Gehlot chun a hril bawk.

            Chun, Union Minister of state for Textiles (Independent Charge), Santosh Gangwar khawm zanikhan Imphal-ah a hung inzin a,  City Convention Centre, Palace Gate, Imphal-ah Manipur  CM O.Ibobi Singh leh Manipur Sericulture and Integrated  Sericulture Development Project (ISDP) an hawng. Manipur hi Handloom le Handicraft a powerhouse a ni a, Handloom le handicraft thil hai sukhmasawnna dingin Handloom & Handicraft thil haia dingin Division hran hawng a nuom a nih tiin  Santosh  Gangwar chun thu a hrilna huna a hril.

Army motor in mi 1 a baw hlum
Imphal:  Zani zingkar khan Keisampat a Churachandpur parking hmuna sin thaw lai pasal pakhat Army motor in a baw hlum. Army motor in a baw hlum hi Yumnam Surendro (50) s/o (L) Y. Ibomcha of Konjeng Hajari Leikai a nih.  Army motor hin a mi baw hi a tlan hmang san a, sienkhawm Police han an hnawt a,  G.M. Hall  tuolah  hnawt phakin an  sukchawllui a, a Driver Shantaveer Singh Yadav (27) s/o Shyamlal Yadav of Rajasthan chu an man a, Police Custody-ah sie a nih. Police han case an registered khum.  Mi baw hlumtu motor hi 5 Kumoan Regiment motor, Leimakhong pana tlan a nih.

Mi 3 thuoihmang an nih
Imphal:  March 18, 2015 khan Imphal-Tamenglong Road a  liemlien siemtu (labours) pathumhai chu Senapati district sunga inthawk tu ti hriet  ngailo han an thuoihmang a, insuo an ni theina dingin Rs. 100 crore an ngen nia hril a nih.  |huoihmanga um hai chu Aboi (30) s/o Ake of Mayangkhang Ningthoupham; Budha Meitei (70) of  Kyamgei le Samson Meitei (40) of Kongpal hai niin ei thu dawngna chun a hril. Maoist Communist Party Manipur chun hi thil hi an ngaimaw thu hrilin a thuoihmangtu le hrentangtuhai chu insuo dingin an ngen.

Truck eksidenah mi 3 an thi
Imphal:  March 23, 2015 zantieng dar 5:30 vel khan Patsoi a |eklei rawna hmuna inthawka Tupul, Tamenglong district pana fe, Truck pakhat, sip hmaka |eklei phur chu Kotlian a inthawka km. 15 vela hla, Nungdolan Area huop sung, NH-37 (Imphal-Jiribam Road) ah a eksiden a, Truck Driver le |eklei neitu hai thangsain mi 3 an thi a, mi 1 a hliem a,  midang 2 himin an suokdawk niin ei thu dawngna chun a hril. Mithiruonghai hi postmortem thaw dingin Imphal phurtlung an nih. Truck hi lamthlang tieng an letthla a nih.

Bomb sukpuoktu man a nih
Imphal:  March 11, 2015, 6PM vela Khwairamband Bazar a Temporary market a bomb sukpuoktuhai laia mawphurtu tak Md. Nazir Khan (36) s/o (L) Md. Abdul Helim of Phabakchao Heibung Lamkhai Maning, Mayang Imphal Police Station  huopsunga mi chu March 22, 2015 khan Police han a chengna ina inthawk an va man. Ieng helpawla mi am ti hrillang a ninaw a, URF (Lalheiba) pawla mi a ni el thei. Bomb puoka khan mi 3 an thi a, midang 23 an hliem a nih.


June thla bo hma ngeia ADC election zo
Imphal:  Zani hmasa a State Cabinet meeting chun Manipur tlangram district sunga Autonomous District Council (ADC) 6 um haia election chu June, 2015 thla bo hmaa zo fel dingin an rel. Tuta ADC fe mekhai hun (term) hi June, 2015 a tawp ta ding a nih.

T. Ao Memorial Football  Tournament
Imphal:  6th Dr T.Ao Memorial Football Tournament April 20, 2015 a inthawka Guwahati le Silchar haia tan dinga ti chu May 1, 2015 a inthawka tan ni lem dinga sawnhlat a nih. Manipur team a dinga 2nd phase coaching chu April 2, 2015 a inthawk tan ning a tih tiin L. Ranjit Roy, General Secretary, AMFA chun a hril.

Others
Loneitu kum 60 chungtieng hai  pension
Chandigarh:  Loneimi kum 60 le a chungtieng  han pension an hmu theina ding  Pension Scheme chu sawrkarin an duong mek a, zo fel a ni pha chu thla tin pension sum Rs. 5,000 an hmu ding a nih tiin zani hmasaa Punjab a vantlang inkhawmnaa thu a hrilna hunah  PM Narendra Modi chun a hril.  Kum 2022 ah India in Independence a hmu  kum 75 tlingna (Amrit Parv) lawm ning a ta, chu huna chun mitinin  chengna ding in nei tang an tih tiin Modi chun a hril.

Alu chingtu  inkhaihlum mi 7
Burdwan:  West Bengal state a chun March 23, 2015 khan  Alu chingtu pasal pakhat beidawngin an khai hlum nawk leiin  a state sunga  Alu chingtu beidawng leia inkhaihlum chu mi 7 an tling tah. Mrinal Kanti Sarkar (32) of  Nanoor, Birbhum district chu a loan lak a thung theinaw leia beidawngin Kumthuhlo dawnin ama le ama an that a nih. Loan a lak hi Rs. 3,00,000 niin a pate Biswajeet Sarkar chun a hril. Alu hi a tha a, sienkhawm a man a tlahnuoi leiin Alu chingtu han  an bat hai an ti angin an thung thei tawl naw nia hril a nih.

Bank-hai ni 6 sung khar an ni ding
New Delhi:  March 28, 2015 a inthawk April 5, 2015 inkar sungin Banks hran hran hai chu chawl leiin khar an ni ding niin Agencies thusuok chun a hril. March 28, 2015 (Ram Navami); March 29, 2015 (Sunday); March 30&31, 2015 nihai ah hawng ning an ta; April 1, 2015 (Annual Closing of Accounts); April 2, 2015 (Mahavir Jayanti); April 3, 2015 (Good Friday); April 4, 2015  half Day (Saturday) le April 5, 2015 (Sunday). Hi lei hin pawl tum tum hai chun Bank sin chu March 27, 2015 chena zo fel dingin an member-hai an inhriettir.

India rama nuhmei upa tak a thi
Thrissur:  India rama nuhmei hring dama la um hai laia a upa taka Limca Book of Records-a chuong Kunjannam chu kum 112 mi niin zani zingkar khan a thi. Kunjannam hi Kerala State-a  Thrissur district-a Choonda bula Parannur a thi a nih. Hungtlung ding May 20, 2015 a  kum 113 tling ding a nih. Kunjannam hi May 20, 1903 a Baptisma chang niin Archdiocase of Thrisur in  Baptisma Certificate a peka chun ziek a nih.

Mi 150 chuongna vuongna tuoksiet a tuok
Paris:  Zani zingkar dar 9.55 vela Barcelona a inthawka vuong suok, mi 150 chuongna Airbus A320 chu French Alps ah 10.45AM  hnunga signal a  pek zovin tuoksiet a tuok a, a sunga chuonghai an thi vawng ring a nih tiin French Interior Ministry spokesman chun a hril. Hi Vuongna hi Duesseldorf pana a fe laia tuoksiet  tuok a nih.

EC in Aadhar le EPIC Aug. chenah
Guwahati:  Election Commission of India (ECI) chun  India hmarsak biel (NE)  ti lovah  Aadhar number le Voter Identity Card (EPIC) thlungzawmna  chu August, 2015 chenah India ram pumpuia thaw zo ning a tih tiin Chief Election Commissioner, HS Brahma chun zanikhan reporters hai kuoma a hril.  May thlaa chun    Southern states Andhra Pradesh,  Tamil Nadu, Karnataka, Kerala le  Goa  haia zo ning a tih. Hi thila hin   India rama bogus voters/duplicate voters 85 crores  vel peihmang ning an tih tiin HS Brahma chun a hril.

PM sin chel tanaw ning: David Cameron
London:  General Election nawkah kan party  Conservative in hratna an chang nawk a lo ni khawmin a term thumna dingin UK PM chel ta nawng ka tih. Amiruokchu, Parliament member in kum 5 la thang ka ta, chu zova  10 Downing Street suoksan ka tih tiin UK PM, David Cameron chun  a hril. UK PM dinga a ditsak deuhai chu Home Secretary Theresa May, Chancellor George Osborne le London Mayor Boris Johnson hai niin David Cameron chun a hril.

Kum 2014 in Assam helpawl han civil mi 195 an that
Guwahati:  Kum 2014 sung khan Assam state-ah helpawl group tum tum han civil mi 195 le Police personnel 4 an that a, Police personnel hai hi an sunghai kuomah zangnadawmna Rs. 20 lakh seng pek an ni a, helpawl han civil mi an that sunghai kuomah state sawrkarin zangnadawmna Rs. 5 lakh seng le Central Govt. in  Rs. 3 lakh seng a pek tiin Senior Cabinet minister, Rockybul Hussein chun zani hmasa khan Assam Assembly an hriettir.

Assam-ah kum 9 sungin nuhmei 16,000 suollui
Guwahati:  Kum 2005 a inthawk 2014 inkar, kum 9 sungin Assam-ah nuhmei 16,000 suollui,  mo thil sawm leiin nuhmei 1,400 that le dawi le inzawmin nuhmei 120 that le nuhmei 68,329 sukrimsik an nih tiin zani hmasa khan  Assam Agriculture Minister Rockybul Hussain in Assam Assembly an hriettir.

Kum 1990 a inthawk Miz. ah AIDS a thi mi 1,038
Aizawl:  Mizoram sungah mi 4,57,678 hai thisen test a ni ta a, hi hai lai hin HIV pai mi 9,894 hmu le AIDS a thi mi 1,894 an tling tah tiin Mizoram Health Minister Lalthanzara chun zani hmasa khan Mizoram Assembly an hriettir. Mizorama HIV/AIDS dona dingin National AIDS Control Organisation (NACO) chun kum 2013-14 in Rs. 13.15 core le kum 2014-15 in Rs. 17.60 crore  a sanctioned tiin Lalthanzara chun a hril.

Helmet bo hai petrol peklo ding
Bhopal:  Madhya Pradesh sawrkar chun inlirthei ke pahni nei han Helmet khum an ngaipawimaw a, an khum ngei theina dingin Helmet khum lo hai chu petrol le diesel pe lo dingin Oil pump neituhai thu a pek. Hi thua hin Food, Civil Supplies  le Consumer Protection Department chun Order an suo. Hi Order bawsehai chu Essential Commodities Act dungzuia hrem thei an ni ding a nih.

Editorial
Ram thuoitu han an thuhril bawzui  hlak hai sienla
Ei Prime Minister rawtna angin  Union Minister-hai chu inzing utin India hmarsak  state tum tum 8 haiah an hung inzin tawl a, Manipur state a hung inzin hi an tam bik amani ding aw ti thei heilin a um. Union Minister-hai hung inzin tam leia India hmarsak bielin hma a sawn pha duok ding a ni chun  thil lawmum takel ning a tih. India hmarsak biela hung inzin Union Minister-hai  hin thaw ding tia an hril hi a tam thawkkhat ta hle a, a taka an hung sukpuitling a ni chun India hmarsak  states le a sunga cheng  han tangkaipui le hmasawnpui ei nei thei ngei ring a um. NE biel mipui han ei tangkaipui am, ei hlawkpui am, ei hmasawn duok pha am ti chu hunin a la hung hril ding a nih.
           
Union minister of Social Justice and Empowerment minister, Thawarchand Gehlot chun, Manipur sawrkarin a bawlna ding hmun le ram a mi pek phawt chun SC, OBC le piengphunga ruolbanlohai ta ding bikin Hospital bawl  a ni ding thu, Old Age Home bawl ding thu le piengphunga ruolbanlohai ta ding bikin Sports Centre bawl a ni ding thu hai a hril a, a thu chun lawm a um hri phawt el. Sawrkar thlungpui chun pek thei po po a pek nuom a, sienkhawm state sawrkarin a thaw dig a thaw thei naw chun iem a hung ang ding ka hriet nawh tiin a hril bawk.
            
Thawarchand Gehlot thu hril hai hi ei state sawrkarin iengtin am a dawn let ding ti hi hriet nuom a um khawp el. State sawrkar chu thiltha thaw dingin a cho et et a nih. A hrila hril hi an hawi a, a taka thaw le sukpuitling ruok hi chu thil mei mei a ni nawh. Sawrkar  thlungpuiin sum a hung pek phawt chun state sawrkar chun a sukpuitlingna tiengpang  chu a thaw thei ngei beisei a um.  Sawrkar thlungpui mawphurna a lien lem niin an lang.  Sum a hun taka a hung pek chun state sawrkarin thil  thaw dinga a tihai chu a thaw thei le a sukpuitling thei ngei centre in a ring ngam a tul a nih.
           
Sawrkar thar a pieng a, kum a thar zui bawk ding a na, ram thuoituhai an chanpuol department hotu le staff-hai inpawlpuiin infuina thu tha tak tak an pek a, thiltha a nih. Centre-a BJP  thuoina hnuoia NDA  sawrkarna khawm kum khat a tling tep a, hi hun sung hin hmasawnna le inthanglienna kawngah hmel danglam a put am? ti hi Union minister-hai hin ennawnin a tul le pawimaw ang pein hma la pei hai sienla nuom a um.
            
Ram thuoituhai (PM le a minister-hai) hin thu indik le thu tha tak tak an hril hlak. An thu hril hi zaah sawmnga bek sukpuiting ni hlak sienla  chu India ram hi tuta ang chau hin hnufuol zing ta nawng ei tih.  Tienlaia inthawk ta khan “file delay” ti hi hril rik rawn pawl tak a ni a. Tulai khawm hin “file delay’  hi a la zieum chuong naw niin an lang. Hi hi thawktuhai felnaw lei vawng a ninaw a, a lukhaitu le a system a fel tawknaw lei a ni thei.
            
Ram thuoituhai hin an thuhril hril liem mei mei lovin, an thu hrilin a ngaithlatuhaiah umzie a nei zui am ti dam hi enthla zui pei hlak hai sienla nuom a um.  Chuongang-khangang chu thaw ding tiin thaw ding tam tak an hril zut zut a, a takchang ruok  hi chu  a um bar ngai nawh.  Hi lei tak hin ram thuoitu han  an thuhril hai hlawtling ngei ngei dingin bawzui ngei ngei hlak hai sienla nuom a um. Chu chu hlawtlingna bul ning a tih.
            
NE bielah Union Minister hai inzing utin an inzin a, sienkhawm pawisa an peksuok si naw leiin a lo mikhuoltu state sawrkarhai chun harsatna an tuok pha a nih. Manipur sawrkar lem chu sum thuah harsatna lien tak a nei leiin Union Minister-hai lo mikhuolnaa hin, sum le pai thuah harsatna lien tak a tuok pha mek a, hi harsatna hi sawrkar thlungpuiin hrietpui mawl sienla nuom a um.



Don't Miss
© all rights reserved
made with by Simon L Infimate