Hmasawnna Thar | 15 March, 2015

Ei dikna le chanvo indik taka hmang le ei chang theina dingin Dân hriet a pawimaw: Justice Kh. Nobin Singh

CCPUR: Zani 10:30AM khan YPA GHQ Hall, Hiangtam Lamka-ah Manipur State Legal Services Authority le CCPur District Legal Services Authority thangruola huoihawtnain “One Day State Level Legal Awareness & Literacy Campaign” nei a nih. Hi huna hin Chief Guest in Justice Khwairakpam Nobin Singh, Judge, High Court of Manipur a thang a, Guest of Honour in Thangkhosuanmung Guite, Chief of Hiangtam Lamka a thang. Resource person in Siamzading Valte (Customary Law); W. Joykumar, former DFY Ombudsman, Imphal East (MGNREGA) le Miss Margareth, Avocate (Domestic Violene) hai an thang.

Mitinin dikna le mawphurna (rights & duties) ei nei seng a, chuong ei rights le duties hai tha taka ei hmang theina dingin ei hriet chieng a pawimaw tiin khuollien Justice Khwairakpam Nobin Singh chun a hril a. Sawrkar thlungpuiin mipui hamthatna dingin scheme tam tak an duong a, sienkhawm mipui han ei hrietchieng tawknaw a, hi thil hi ei rights le duties ei hriet tawknaw lei a ni a, inhrilhietna ei pawimaw a nih tiin a hril. Sawrkar ei intum chun, a siemtu mipui ei ni leiin maw ei phur ve ve a nih. Mipui han ei rights hrie a, a ni ding ang taka ei hmang a pawimaw tiin a hril.

Pu Thangkhosuanmung chun, Dân (law) chunga um tukhawm an um naw a, thaw ding le thaw lo ding chen hrietna dingin Dân hriet a pawimaw tiin a hril. Siamzading Valte chun, Customary Law a thatnaw thu hrilin sawrkar dan hmang a tha tak tiin a hril. Nupa inthe, ram inchawkna le thil dang ,dangah khawhnunga buoina a um nawna dingin sawrkar dan zui a him tiin a hril.

Sawrkar thlungpuiin India hmarsak biel brand ambassador dingin M.C. Mary Kom a ruot

NEW DELHI: Indian Chamber of Commerce huoihawtnain ni 2 sung aw ding 10th North East Business Summit zanikhan New Delhi-ah tan a nih. Hi Summit a hin Union Minister of state for Development of North East Region (DoNER) chu khuollienin a thang. Thla thar khin New Delhiah ni 4 sung aw ding Mega North East Festival nei ning a tih tiin Jitendra Singh chun a hril. Norh East Business Summit hi ASEAN le BIMTEC rambung hai fe thlenga hmasawnna sin hrat taka a fe thei ditna le tumna leia huoihawt a nih tiin Indian Chamber of Commerce thusuok chun a hril.

Zanita New Delhi-a 10^th North East Business Summit a hawngna huna Jitendra Singh in thu a hrilnaa chun, a zawna World Amateur Boxing Champion lo ni ta le Olympic Medal lo dawng tah M.C. Mary Kom chu sawrkar thlungpuiin India hmarsak biela dinga brand ambassador dingin a ruot a, hi chungthua official-a puonglangna nei vat ni tang a tih tiin a hril. M.C. Mary Kom hi tuhin New Delhi-ah a cham mek a, New Delhia a cham sung ngeiin North East Brand Ambassador-a ruot a nina hi puonglang ning a tih tiin a hril bawk.

Global Consultancy EY report dungzuiin India hmarsak biela cheng hai ta dingin Rs. 2.4 trillion a sumdawng theina remchang hung siem phang a ta, mi maktaduoi 45 velin an sawr tangkai thei ding a nih. Hi thil hi M.C. Mary Kom a zar a nih tiin hi Summit a hin a hril.

Monitoring Cell-ah report pek ding

IMPHAL: Manipur-ah Swine Flu natna invawi annawleh an vawi ni dinga ringhla an um chun monitoring Cell haiah report pek ding a nih. Hi thila ding hin Ambulance Service khawm a um. Swine Flu invawi annawleh ringhla an um chun JNIMS le RIMS haiah enkawl ning an a, hieng haia hin Ventilators a um a nih tiin Dr O. Ibomcha, Director, Health Services, Manipur chun a hril.

AHRC in an ngaimaw

IMPHAL: Local News Channel in hriltlangna hun an buotsaina a Naharolgi Thoudang Editor, Khoirom Loyalakpa in Corruption thu a hrillangna le inzawma that dinga vauna a hmuna chungthuah Hong Kong a innghat Asian Human Rights Commission (AHRC) chun an ngaimaw thu an hril.

Monitoring Cell-ah report pek ding

IMPHAL: Manipur-ah Swine Flu natna invawi annawleh an vawi ni dinga ringhla

an um chun monitoring Cell haiah report pek ding a nih. Hi thila ding hin Ambulance Service khawm a um. Swine Flu invawi annawleh ringhla an um chun JNIMS le RIMS haiah enkawl ning an a, hieng haia hin Ventilators a um a nih tiin Dr O. Ibomcha, Director, Health Services, Manipur chun a hril.

AHRC in an ngaimaw

IMPHAL: Local News Channel in hriltlangna hun an buotsaina a Naharolgi Thoudang Editor, Khoirom Loyalakpa in Corruption thu a hrillangna le inzawma that dinga vauna a hmuna chungthuah Hong Kong a innghat Asian Human Rights Commission (AHRC) chun an ngaimaw thu an hril.

KIC, CCPur Annual Assembly nei
CCPUR: Zani 10:00AM khan M. Songgel Community Hall-ah Kuki Inpi CCPur (KIC) Annual Assembly 2015 nei a nih. Hi huna hin Pu P.S. Haokip, President, KNO khawm thangin thuhrilna a nei. Assembly-a hin KIC; KSO/CCPur; KCA/CCPur; TKSU; KWHRO/CCPur; KCLF; KSCF; KWU; KMAA le SEDO haia inthawk report ngaithlak a ni bawk. Pu P.S. Haokip chun, Pathienin Manaseh hnam hai hi a hmangai leiin Hitler hun laia inthawk a humhim a, China rama iemanizat an lut a, Great Wall of China a inthawk Pathienin Mannaseh hnam hai thuoisuokin Burma le a se vela in\hedarin Manipur thangin India state tum tum haia ei indar a nih tiin a hril. Pathien ringtu ei ni leiin second coming nghaka um Juda (Israel/mainland) a um hai Pathien thu hril ei mawphurna a nih tiin Pu P.S. Haokip chun a hril. KIC Assembly a hin Agenda tum tum 12 vel hriltlang a nih.

KWOHR in Veteran Musical nite

CCPUR: Kuki Women Organisation for Human Right (KWOHR) thangpuina dingin March 17, 2015, 5:30PM khin SP Office bula Ngailut Inn Campus-ah Open Air Veteran Musical Nite nei tum a nih. Hi huna hin Calvin H. Secy. External Affairs, ZRO khuollienin thang a ta, Chief Hos in Grace Zamnu, MDC; Guest of honours in T.S. Haokip, Defence Secy. KNO; Balram Singh, Addl. SP/CCPur; Benny Touthang, Manager, KSC; Helen Kipgen, PRS/KNO le L. Sanga Hmar, Defence Secretary HPC(D) hai thang an tih.

Seminar on high yielding variety seeds

CCPUR: March 15, 2015, 12:45PM hin Jolzam hmunah Food & Nutrition Services (FNS), ICDP, Devpt. Department, RPC-NEI huoihawtnain Seminar on Empowering Community leaders to use high yielding Variety Seeds um a tih. Hi huna hin Pu N.K. Paite, Dist. Horti. Officer, CCPur khuollienin thang a ta, Resource person in Pu Paulienvung, FA, Dist. Agri Office, CCPur le S. Muana, FC-ENS/DD (ICDP)- RPC NEI thang an tih.

Ni khat sung Seminar

CCPUR: Hmar Kohran sunga Joint Sunday School Union chun March 19 & 20, 2015 khin Hmar biela Naupang Sunday School a hotuhai po mpo ko khawmin Parbung-ah “One Day Seminar for Children Sunday School Teachers” neipui a tih. Hi Seminar hi a hung hlawtling theina dingin Kohran pawl tum tuma member-hai tawngtaina le an thei ang anga lo thlawp dinga ngen an nih. Resource person ding hai chu, Pro Pastor Rorelfel (Child Evangelism), Rev. Lalsandam (Essential quality and life of sunday school teachers), Rev Lalngailien (Teaching method), Rev. Dr V. Lalnghakthang (Technology & christianity) le Rev. Lalkhumvel (Discussion & Interaction) hai ning an tih.

HWA Hmarbiel Region meeting nei

PARBUNG: March 12, 2015, 7:00PM khan Parbung khuo-ah Hmar Women Association (HWA) Hmarbiel region huop sunga khawtina mi hai fekhawmin meeting an nei. Hi huna hin, mipuiin inruithei char buoipuia an ngai chu thil indik a ninaw zie Unit tina hril uor ding, Hnam puonhai ngainat ding le a man inang lo nuola zawr hlak chu a rate siem that; Manipur-a Commerce & Industry a Director Pu B. John Tlangtinkhuma, IAS a umlai a ni bawk leiin ei puon a ni zie zieklut le sie dan ding ngaituo ding; Hnam puon Thangsuo puon hai hi hmang pawlawt lova a hming ang takin a dawngtu ding han dawng ta hlak hai sien an nuom thu; kum 2006 laia nuhmei pawitawklo suollui hai sawrkar thlungpuia inthawk zangnadawmna pawisa la hmu kim lo han an hmu kim theina dingin bawzui nawk nisien tiin an rel baka hmatienga hmalak pei dan ding an hril tlang a, HWA thilthaw hai thlawp dingin ngenna an siem bawk.

– Lalnunthang Songate, Parbung.

Public ground - DTO chen Peace Rally an nei

CCPUR: Diocesan Social Service Society (DSSS) hmalaknain zanikhan student thahnem tak han Public Ground, CCPur-a inthawk District Transport Office chen Peace Rally an nei. CCPur District-a inremna le muongna, inhmangaina le inunauna tha lem a um ditna leia peace really hi an nei a nih.

Written test le interview hun

CCPUR: Wesleyan Kohan chun Mission Field le Jesus Film Department a Missionary ding a dit a, March 20, 2015 chenin Regional Headquarters Office, Rengkai-ah hnina peklut thei ning a tih. Hi thila dinga written test le interview March 27, 2015 a nei dinga ti chu March 25, 2015 a nei dinga sawn hnai a nih. Written test le interview chu Regional Hqrts. Office, Rengkai-a nei ning a tih.

Orientation-cum-Fellowship

CCPUR: Vawisun 12PM a inthawk hin NSSU Phairam District RPCNEI han Lamka RPC NSSU Hall-ah NSSU Teacher’sOrientation-cum-Fellowship, 2015 nei an tih. Resource person in Rev. Dr Lalnghakthang, General Secretary, RPC-NEI; Mrs Lalroliani, Coordinator, VTC le Rev. Lalkhumvel, Dist. Superintendent, Phairam district, RPC-NEI hai thang an tih.

WMCEI thuoitu dinghai

CCPUR: Kum 2015-2018 inkar sunga WMCEI Kohrana thuoitu ding thlang hai chu, Rev. Tlanghmingthang (Regional Superintendent); Rev. Lalthakung (Assistant Regional Superintendent & Director, Evangelism & Church Growth); Rev. Lalsandam, Director (Mission) le Upa John Vanlalruot, Secretary (Regional Conference) hai an nih tiin WMCEI thusuok chun a hril.

ZYF in Vawk laklut an khap

IMPHAL: Zeliangrong Youth Front, Assam, Manipur & Nagaland chun hmun danga inthawk Vawk le Vawksa Tamenglong district a laklut an khap hmak thu an puonglang. Ukhrul District a khawm hiengang khapna thupek hi insuo a lo ni tah.

Dr Meinya in private member bill

IMPHAL: Manipur Inner Lok Sabha MP Dr Thokchom Meinya chun tuta Parliament Budget session neia um mekah hin Private member Bill “Constitution (Amendment) Bill, 2015 (Insertion of new article 371CA” a putlut nawk niin a private secretary thusuok chun a hril. Hi Bill hi Manipur inpumkhatna ding le Manipur thedar nawna ding tiengpang awn a nih.

Th. Manorama sunghai Rs. 10 lakh

IMPHAL: Kum 2004 a Ms Th. Manorama Devi ringhla um taka that a nina le inzawmin Supreme Court chun Union Defence Ministry chu Th. Manorama nu/sunghai kuoma zangnadawmna Rs. 10 lakh pe dingin thu a pek. Manorama hi Assam Rifles han an man, an suollui hnunga an that ni dinga ringhla a ni leiin hi thil tlung huna khan nuorna nasa tak an tlun a, Kangla AR Gate, Imphal-ah nuhmei ruol lungawilo han eselnain saruokin an va ngir tlar thup a nih.

Bihar CM in bungheia nuorna

PATNA: Land Acquisition Bill dodalnain zani zingkara inthawk khan Bihar CM Nitish Kumar chun bungheia nuorna a nei tan. Bungheia nuorna hi darkar 24 sung a nei ding niin Nitish Kumar chun a hril. Hi nuorna a hin Bihar Cabinet ministers, JD(U) MPs le MLA hai khawm an thang. Bihar State sawrkar chun hi Bill hi a dodal a, a state sungah hmang naw nih tiin Nitish Kumar chun a hril.

Nun nunrawng taka suol hrawn

NADIA: Mi 12 vel, hmai intuom le ralthuom chawihai

chu West Bengal a Nadia district sunga Ranaghat a Jesus and Mary Covnent sungah an va lut a, Nun (sakhuo rawngbawltu) pakhat an suol hrawn a, a hliem inrik leiin Hospital-ah admit le enkawl a nih. West Bengal CM Ms Mamata Banerjee chun hi thil tlung thua hin CID pawl suizui dingin an hriettir. West Bengal Urban Affairs Minister Firhad Hakim chun suol rapthlak tak a ni a, Nun suolhrawn tuhai chu thi dinga thiemnaw inchangtir nihai sienla a nuom thu a hril.

Nunghak sawisaktu vuok hlum

AGRA: March 5, 2015 a Dimapur, Nagaland-a mipui lungsenin Naga nunghak suolluitua intum an vuok hlum zo haptakar khat liem hnung, March 13, 2015 khan Agra, Uttar Pradesh-ah mipui lungsenin zurui puma nunghak sawisaktu Jeetu an ti chu an vuok hlum niin CNN-IBN thusuok chun a hril. Jeetu hi mipui han a chengna insunga inthawk keidawka an vuok hlum niin ei thu dawngna chun a hril.

Mizoram University Professor VC ah

AIZAWL: Mizoram University a Finance Officer sin chel lai mek, Prof. R.P. Tiwari chu Dr Harisingh Gour University (Central University), Sagar, Madhya Pradesh Vice Chancellor dinga ruot a nih. Mizoram University a thawk lai Vice Chancellor a ruot hmasa tak a la nih.

Ni 58 sungin loneitu 135 an inthat

NEW DELHI: Ni 58 liemta sung khan Maharashtra state a Aurangabad Division ah

loneitu 135 zet beidawngin anni le anni an inthat niin zani hmasa khan Union Minister of State for Agriculture, Mohanbhai Kundari chun Rajya Sabha an hriettir. Loneitu 135 hai hi January 1, 2015 a inthawka February 27, 2015 chena kha inthat an ni a. An lo neina hai an halwsam leia beidawnga inthat an nih. Kum 2012 khan hienganga inthat loneitu 13,754 le kum 2013 in 11,772 loneitu mani inthat an um tiin National Crime Records Bureau (NCRB) thusuok chun a hril. Hienganga inthat sunghai kuomah sawrkar chun mi pakhatah zangnadawmna Rs. 1,00,000 pei a pek hlak.

EDITORIAL:

Pathien thuawi harna ei mamaw

Kohran pawl tum tum hai hin harna (revival) ei mamaw ei ti vawng. Iengang harna am ei mamaw tak chu ning a ta? Ei dawnna an ang naw el thei. Mi tam tak hi chun Revival speaker-hai thangsain, Kohran chawkhar a, lam mup mup a, Hallelui le Amen tuor tuor, tawngtai ruol le hlasak khawm tawp hlei thei lo, a then lamna hmuna tho hlei thei lova zala inlet zing, inthin chiem chiem le a dang dang hai a um nuoi nuoi ta chun hlawtling hleah ei inngai niin an lang. Revival speaker han inring em emin an hang khek a, an uor zuol lem chun nakawr a khawk rum rum hlak. Chuongchun thiem taka, uor tak, inring taka thu an hang hril chun boruok khawm a hung danglam hlak. Kohran upa le thuoitu tieng an hang nek deu lem chun mihlim nuhai tieng chun an lo Amen tluor tluor hlak. Ka thlarau tho la, I sandamtu inpakin hla sak rawh’ ti hla hang sak chun nuhai le nuhmei tieng chu lam theina hmun panin an hung suok sung sung a, tukhawm inchuktir ngai lovin an lam duol duol a, a then an inthin a, a then an thung a, a then an tlan a, ennuom um tak a ni hlak.

Speaker a lungawi tawk naw a, thang a hang lak nawk tak ta a, chu taka zet chun nuhai chau ni lo, pahai laia a zangkhai deuhai an hung lam ve a, hla sak an hawi deu deu, khuong an ring tul tul, mike hmanga hla chang inzawttu an hung phur deu deu chun hla pakhat khawm hun sawt takel sak a ni hlak. An inpak tak khawm hre

lo hiel khawpin an inhnik hlak. Speaker in hlima lam an la tam tawk nawh ti niawm takin hla a hang thlang nawk a, Iem a tih i lam ve naw a? Pathien inzapui mani? Iem a ta tu chena i la thungmuong? Inzaknaw rawh tiin a hung tur chun Pa tieng an hung suok belsa a, mipui chu ei lam mup mup el hlak. Tuta hmaa inkhawm ngailo hai hmel a hung inlang nuol bawk si a, hlawtling hlea inngai lo thei a ni nawh.

Hiengang hun le boruok hang tawng hin chu Upa, Kohran thuoituhai le kohran member thenkhat hai lai tum ram tlung taa inngaiin hlim le lawm takin an um a, an lungrila ran thaw dinga phurna le nuomna a hung num a, Kohranin umni khamin ruoi the an rawt a, sun le zanin inkhawm le lengkhawm programme ei siem hiel chang khawm a bo bik nawh. Hiengang thil ei hang tawng meu hin chu tuolsung kohran thuoituhai an hlimin an lawm hle hlak. Revival ei chang a, ei hlim le ei lawm lai hin speaker in, chu pa le chu nu kan ruoi a, kan hlawtling a, kan hlim hle tiin Headquarters ah report ei pek hlak.

Hiengang hi khawtin le veng tinah ei tawng (experience) seng awm ie. Thil mak tak chu hun tawite hnungah “kan kohan kan ngui, revival speaker tu tak amani ruoi nawk a ngai” tia kohran committee nawr tawk an um nawk el hlak. Ei Kohran Upa le thuoitu han Kohran chawmna le inchuktirna hrisel le tha an hrilhai chu kohran members han an dittawk naw a, “ a tawl, a thing, an thuhril a hring nawh, nun a chawm nawh, kohran a sukhar nawh” etc hai tiin an inlusu san hlak. Harna hungtlung sienla ei ti hin mipui harna, phurna le a dang dang hai ei lungrilah a hung inlang hlak, a tulna tak khawm a um. Nisienlakhawm tulai huna harna ei mamaw tak nia inlang chu “Pathien thuawi harna” at nih. Ei hlim le ei lawm lai hun taka khawm hin thuawi nun chu ei tlasam tlat a, ze danglam ei uor a, ei nunah a tlung phak si nawh. Ei rama ringtu hmasahai kha chu mi han “Pathien thuawi” an ti hlak. An mawlin an hriet a tlawm, sienkhawm an hriet sun hai chu an awi hmak a, an zuiin an pawm thlap el a, harsatna le sukdudana khawm an tuor huom a, an tuok ngam bawk. Tuhin chu an hawi naw chun ei chier ei chier el.