Manipur-ah Swine Flu cases 6 a um, cases 3 hai an vawi le case 3 hai ringhla an nih - Phungzathang Tonsing
IMPHAL: Zanita Trinamool Congress MLA I.Ibohalbi in Manipur Assembly-a Calling attention motion a putlut, Health & Family Welfare Minister Pu Phungzathang Tonsing in a dawnletnaa chun, March 5, 2015 a inthawk khan Manipur-ah Swine Flu (H1N1) natna hri invawi an um ti a fiena hmu tan a ni a, State Health Department in hi natna laka invenghimna dingin theitawp suoin hma a lak a, Swine Flu cases 6 um laia 3 hai chu hi natna invawi finfie an ni a, mi 3 hai laia nupui 2 an thi ta a, pakhat dang chu a dam ta leiin Hospital a inthawk insuoktir a ni tah. Chun, hi natna invawi ni dinga ringhla 3 hai laia 2 In tienga enkawl le pakhat RIMS a enkawl mek a nih tiin a hril.

Inkhul le hritlang nazawng hi Swine Flu hrik kai annawleh an vawi an ni chuong nawh. Hi natnain a kaizap awlsam bikhai chu a enkawltu para medics, nurses le doctors hai an ni a, mitinin bau le hnar tuom ngei ngei ding le a dangna damdawi fak le injection ngei ngei ding tina a ni nawh. District tina District Hospitals hai bakah RIMS le JNIMS haiah monitoring Cell hawng le nitina thil um dan enkai zing a ni a, harsatna neihai chun hieng hmun hai hi pan el ding a nih tiin Pu Phungzathang Tonsing chun a hril.

Swine Flu invawi le invawinaw hrietchiengna dinga test thawna hmun Ranbaxy SLR, Mumbai hi a hla bakah a test man a tam a, Rs. 5,000 pei lak a ni leiin a test hnaina ding le seng tlawm dan ngaituo nisienla tia I. Ibohalbi in rawtna a siem chu Pu Phungzathang Tonsing chun hiengang hin a hril: An dik khawp el, ei ram mipui hmakhuo ngainain ICMR, Dibrugarh, Assam a test thaw thei dan ding ngaituo ning a tih tiin a hril.

Dr I.Ibohalbi calling attention motion dungzuiin Pu Phungzathang Tonsing chun, ei state in ei suongtawlawi le medical Institution inlar em em el RIMS chun Ventilator 3 a nei a, sienkhawm hmangthlaklo an la ni nawk nghal. Amiruokchu, tulai hnai ela indin JNIMS chun Ventilators 7 a nei tiin Inpui an hriettir. Ventilator hi mihriem hringna chelna hmangruo pawimaw em em el a nih. Private Hospital hai laia Shija Hospital khawmin Ventilators hi a mamaw tawk an nei a, a rengin hmang thei an nih.

SBM le NRDWP thuah training nei
CCPUR: Zanikhan District Water and Sanitation Committee, CCPur District hmalaknain PHED Hall, HQ Veng-ah Swachh Bharat Mission (SBM) & National Rural Drinking Water Programme (NRDWP) thuah Village Water Sanitation Committee, member hai ta dingin ‘One Day Training programme’ nei a nih. Hi huna hin John Thanglienmang, AI-IV resource person in a thang. Training-a hin Sangaikot Block, Thanlon Block, Tipaimukh Block le Vangai block haia inthawk VWSC member 10 seng an thang. Junior Chemist Phalneichong chun water testing le inzawmin demonstration a neipui bawk. Hiengang training hi Feb. 27, 2015 khan CCPur Block, Saikot Block, Samulamlan Block le Henglep Block a VWSC member han training an lo nei ta bawk. Mani block tina VWSC member hai chu an block chita tui thienghlim nei dan ding le thing le ruo humhal a pawimawna hai hrilhrietna training huna hin nei a nih.

Bandh in nundan pangngai a sukbuoi
IMPHAL: All Manipur Muslim Students Union in darkar 48 bandh an thaw dan chun nundan pangngai a sukbuoi pha. Imphal khawpuia chun dawr, bazar le inchuknainhai khar an ni a, inlirthei inlawn hmu ding an tlawm hle. Imphal le district headquarters inkar haiah passenger bus an tlan naw a, Manipur a inthawka stae danga service motor hai khawm an tlan nawh. Imphal khawpui hmun hran hranah bandh thlawptu han lampui an dang a, Hatta Golapati a chun lampui dangtu hai hnawtdarna dingin Police han tear gas an kap khum.

Bomb sukpuoktuhai man tuma hmalak
IMPHAL: March 11, 2015 zana Kwakeithel a bomb sukpuoktuhai man ngei tumin Police han hma an lak mek. Hi thil tlung hi thil vangduoithlak takel a nih. Hi thil tlung le inzawm hin City Police station, Imphal in Suo moto case an siem tiin zanikhan Dy. CM le Home Minsiter Gaikhangam in Manipur Assembly an hriettir.

Nuhmei pakhat suollui hnunga that
IMPHAL: Zani zingkar khan Kongba Leikol, Imphal West District-ah nuhmei kum 35 mi, thluok buoi Th. Premila d/o Jateshwor of Mana Engkhol chu a thisaa hmu a nih. Suollui zo hnunga that niin an lang tiin ei thu dawngna chun a hril. Premila hi zani hmasa zantieng dar 5:30 vela Mana Engkhol a Laiharaoba en dinga fe, an in inlawi ta lo a nih. A luah hmawla vuok niin an lang a, a ruong bulah mi vuok theina rawbawng hmu a nih.

Inpuiah Ph. Parijad thi sunna
IMPHAL: CPI Manipur thuoitu le Manipur Cabinet minister lo ni ta hlak Ph. Parijad thi sunna zanikhan members han Manipur Assembly- ah an nei. CM O.Ibobi Singh chun Ph. Parijad thi hi ei state ta ding chau ni lovin India ram pumpui ta dinga inhmangna a nih tiin a hril. Members han totawkin minute 2 sung an member chanpui thi sunnain hunser an hmang.

CM in Bill inpuiah a putlut
IMPHAL: Zanikhan Manipur Assembly budget session March 3, 2015 a inthawka chawlsana um chu sunzawm nawk a nih. Chief Minister O.Ibobi Singh chun zanikhan Inpuiah “The Manipur Regulation of Visitors, Tenants and Migrant Workers Bill, 2015 a putlut. Hi Bill hriltlangna chu budget session tawpna ding ni, March 16, 2015 khin members han an hriltlang ding nia hril a nih.

Rifleman an kap hlum pal
IMPHAL: K. Ningthar (28) s/o John Louise of Hundung, Ukhrul district, 13 Assam Rifles, tuta Kaimai AR post Nungba PS, Tamenglong District a posting chu a Pistol a sukfai laiin a changsuol a, ama le ama an kap hlum pal niin Assam Rifles thusuok chun a hril. Hi thil hi March 11, 2015, 5:30PM vela tlung nia hril a nih. Mithiruong hi JNIMS ah postmortem thaw zo a ni hnungin March 12, 2015 khan a sung hai kutah pek a ni tah.

Manipur mi sukbuoitu pasal man
NEW DELHI: Zani hmasa zantieng dar 5 vel khan Lodhi Garden, South Delhi a Manipur mi vawng, nuhmei 5 tawngbau thanaw le mawi lo tak taka bie sisawtu le sukbuoitu pasal pakhat chu zanikhan Delhi Police han an man a, Tughlag Road Police station-ah an peklut.

Mizoramah Swine Flu invawi hmu belsa
AIZAWL: Mizoramah Swine Flu invawi mi pakhat hmu belsa nawk a ni leiin tuchena Mizorama Swine Flu natna invawi finfiea um ta chu mi pahni an ni tah. Swine Flu invawi hmu suok thar hi Vai, Delhi mi, Mizorama hung inzin a nih tiin Dr Pachuau Lalmalsawma, Nodal Officer, IDSP chun a hril. Tuta hmaa hi natna invawi hmusuoka um kha nuhmei a ni a, Delhi inzin, Mizorama a hung kir hnunga Swine Flu an vawi ti finfie a nih.

Mana um mi 50 an tling tah
DIMAPUR: March 5, 2015 a Dimapur a Naga nunghak suolluia intum leia mipuiin pasal pakhat an vuok hlumna thu le inzawm khan mi 2 man belsa nawk an ni leiin hi thubuoia mi mana um chu 50 an tling ta tiin Wabang Jamir, IPS, IGP(Range) chun SP’s Office, Dimapur a media persons hai an hmupui huna a hril.

Dzukou phairuomah ramkang nasa tak
DIMAPUR: March 10, 2015 a inthawk khan Dzukou phairuomah ramkang nasa tak a suok a, ram 10-15km vel a kang ta a, Nagaland State Disaster Management Authority (NSDMA); District Disaster Management, Kohima; Forest Department le tuolsung tlawmngai Pawl hai thangruolin ram kang hi an thel a, an la thelmit hne naw leiin zanikhan ram kang thangpuitu dingin IAF Helicopter pakhat Eastern Air Command a inthawkin Rangapahar a tlung a, kangmei thelna sin a thangpui.

Call of Brahmaputra CM in a vai liem
IMPHAL: Cycle Rally, Call of Brahmaputra ti chu zanikhan CM Bungalow, Imphal-a inthawk CM O.Ibobi Singh in a vai liem. Hi Cycle Rally hi NE biela states 8 um le a sunga chenghai laia inremna, muongna, inhmangaina le inunauna tha
lem a hung um theina dinga huoihawt a nih. Cycle Rally a hin mi 20 an thang a, NE biel sunga km. 750 an sir ding a nih.

Kangmei soukah dawr 1 a kang
IMPHAL: Zani 9:50AM vel khan Keishamthong Laishom Leirak ah kangmei a suok a, a hun takah thelmit hman a ni leiin thil kangsiet taluo a nei nawh. Kangmei suok intanna hi H. Devachandra Sharma of Keishamthong Lisom Leirak, Imphal In a ni a, petrol, tyre thalo le thil dang siekhawmna hmun a ni a, electric intek leiin petrol a kang a, chu taka inthawka kangmei hi hung intan a nih.

A nauhai 2 a that zovin an khai hlum
IMPHAL: March 12, 2015 zan dar 7:50 vel khan Haobam Marak a um papui pakhat chun a nau 3 hai laia pahni, kum 8 le kum 10 mihai chu a vuokhlum zovin an chengna in bula Pukhri-ah a pei a, ama khawm an chengna in bulah ama le ama an khai hlum. A nauhai laia a upa tak himin a tlansuok a, an thil tuok hin a lung a thawng nasa taluo leia a damnaw leiin RIMS ah enkawl mek a nih. A nauhai thattu papui hin an khawsakna a harsa taluo beidawnga hieng thil hi a thaw el ni dinga ring a nih.

EFCI 42nd Gen. Assembly nei mek
SHILLONG: Evangelical Free Church of India (EFCI) 42nd General Assembly, 2014 ni 7 sung aw ding chu March 9, 2015 a inthawk khan EFCI Centre, Demthring, Shillong, Meghalaya hmuna “Ka chunga a thilthaw that po po hi, LALPA kuomah ieng am pe ve thung ka ta aw? (Psalms 116:12) ti thupui hmangin tan a nih. Business Session zanikhan zo a ni a, hi huna hin mi thenkhat mawphurna pek le ruot an nih. Chuonghai chu-
1. Secretary, EFCI - Rev. Simon L Darngawn
2. Music Promoter - Mr. Bobby R. Songate
3. Accounts Manager - Mr. Lalremkung Pakhuongte
4. CCMI Promoter - Upa Buongneikung Buongpui
5. District Supdt, Aizawl District - Rev. Isaac Vohbika Ralte
6. District Supdt, Cachar District - Rev. J. Hminga Inbuon
7. District Supdent, NC Hills District - Rev. Lalrotluanga Darngawn

Hieng hai baka hin Mr. Gobin Reang chu Probationary
Pastor pek ani bawk. (Virthli)

BJP programme thul a nih
CCPUR: March 14, 2015 nia “One Day Political Awareness-cum-Mass Enrolment Campaign programme’ nei dinga ti chu All Manipur Minority Students’ Union in darkar 48 bandh an thaw leiin thul a nih ti hi thilin a huomsat le BJP ngainatuhai po po hriethiem dingin J. Haokip, President, BJP CCPur chun inhriettirna le ngenna a siem. One Day Political Awareness cum-enrolment campaign hi March 23, 2015 nia nei dinga dinga sawn a nih.

Ukhrul ah in pakhat a kang
IMPHAL: Zani 11:30AM vel khan Ukhrul ah kangmei a suok a, In pakhat a kang siet vawng. Kangmei hi electric a inthawka intan a ni a, Assam Rifles le mipui thangruol han kangmei hi an thelmit.

Vawk le Ar laklut lo phawt
UKHRUL: Manipur-ah Swine Flu natna invawi an um ti finfie a ni ta leiin hi natna hri laka invengna dingin Ukhrul district sungah Vawk le Ar, district le state dang haia mi laklut lo phawt ding tiin Tangkhul Naga Long (TNL) pawlin khapna thupek khau tak an insuo.

HSLC Exam zo
CCPUR: Board of Secondary Education (BSEM) huoihawtnaa Feb. 17, 2015 a inthawka HSLC Exam, 2015 neia um chu zanikhan zo fel a nitah. CCPur district Private centre-a Officer in-charge T. Hanglamthang inrawinain HSLC Exam, 2015 answer script hai chu zanikhan Security Escort in BSEM Office, Imphal-ah an va peklut.

Edn. Meeting nei
CCPUR: Zani zantieng khan Mr Lunminthang Haokip, IAS, DC, CCPur inrawinain a Office chamber-ah District Board of Education meeting nei a nih. Hi huna hin ZEO CCPur bakah DI of Schools, AI of School hai le Education Department officials hai an thang a, CCPur district-a Education department ngirhmun report ngaithlak le hmatienga sin thaw dan dinghai an hriltlang.

India le Sri Lanka han Agreements 4
COLOMBO: Zanikhan India le Sri Lanka han India PM, Narendra Modi le Sri Lanka President, Maithripala hai hmaah India le Sri Lanka palai han, Visa, Customs le Youth Developemnt haia thangruol ding le Sri Lanka ramah Rabindranath Tagor Memorial building bawl dingin inremna (agreements) an ziek. Mr. Modi chun zanikhan Sri Lanka Parliament-ah thu a hril.

EDITORIAL:
Ei khawsak dan le pawisa hmang dan an mil nawh
Zohnathlakhai hi inthununna tieng thaw thei lo le ngaisam tak, a fiena tak um le hriet hmasa tum lova hril punlun rak ching le kristien ni si fakruk pawisa der lo, ei ta dinga tha le hlawkna ding a ni phawt chun a thienghlim naw le an dik naw khawm thaw pawitina neilo, khel hril le mi hlem khawm pawiti der lo ei tam ta hle niin an lang. A khingtiengpanga chun siet le that thuah inhmangai a, inlengpui le inraltuo hnam ei ni nawk ang lawi si a. Amiruokchu, thil hriet tak tak si lova thil thaw hlak, mi tam lem chu mani nina tak inlangsuokpui ngam lo, thawsuok le hmang ral inmil der lova khawsa, tuta inthawka kum 10 hungtlung dinga thil um dan ding hmu thiem lo le thlir phak lo tam tak ei um niin an lang.

Mani ta dinga tha lo ei hriet chieng em em el hai khawm sim a bansan tum chuong lova mani nuom dan dana khawsa, nu le pa sukhmingsetu, sukmuolpho ngamtu, thil suol le a thanaw taphawt thaw ngamtu ei pung deu deu. Khawtlang thil, hnam thil le kohran thila puipung, hunpui le kut chi tum tum hmang ni khuo haia ei nun dan le khawsak dan hang thlir hin intichangkang hle ta inlakhawm hnam mawl ei nizie a hung inlang hlak. Hnam var le changkang niah inngai inla khawm mawlna rieu ei nei hlak hi chu a pawi hle a, ei hnam sukmuolphotu a nih.

Zu le drugs thaw hi a that nawzie chu in hril tul der lova ei mit ngeia ei hmu zing nisienlakhawm bansan ei tum der nawh. Fakruk, thamna le suol chi tum tum hai khawm a that nawzie ei hriet zing khawmin bansan ei tum chuong nawh. Zu dawn thiem nekin Zu dawn thiem lo ei tam lem.Zu inrui le drugs inrui hin lungril le ngaituona a sukpangngai naw a, phurna le lungril thalo a mi pek a, ei muolpho rawp a, a mawl deuhai lem chun mi sukbuoi an tum a, pawisak an nei ngai nawh. Sungkuo tlakramnain ei hmang mek a, broken family-ah naupang hung inthanglien pei an tam pha a, khawtlang, kohran, hnam, ram le sungkuo ta dinga hmangtlak ei vang ta tiel tiel a nih.

Ei chengna rama Zohnathlak a tam lem hi mi rethei takel, lo neia fakzawng annawleh kut sin thawa fak zawng, nitina inhlawfa chawp dam, private company, private institution le mimal dawr haia thawk ei ni tawl a; sawrkara thawkna nei chu a tlawm lem dai ei nih. Hieng sa khawm hin sungkuo tam lem hai hin mani thawsuok le inmila khawsak ei thiem naw a, ei fak le dawn ding, sungkuo mamaw chi hran hran, thla khata ei seng ding riruong annawleh siem ei tum nawh. Hi kawngah hin thangthar han thanghar a, hma ei lak a, family budget/management tiengpang ei inchuk a tul khawp el.

Ei baksam em em el pakhat chu ei taksa hriselna ding tiengpang ei ngaisak naw taluo hi a nih. Rethei hle inlakhawm ei phak tawk ang peia ei hriselna hi a that theina dinga Docor ei pan hlak nuom a um. Zu, Drugs, lekhaziel, kuva le a dang dang hai man dingin Rs. 100-500 seng hi pawi ei ti naw lem. Damdawi man ding le doctor panna ding ruok chun pawisa seng ei rin em em a, hi thil hi ei thaw suol nasa tak a nih. Hi thila hin Zohnathlakhai ei thanghar a hun.

Ei rama khawm media an thang hrat hle a, kum 15 chungtienghai chun mani sengin Mobile phone ei nei ta niin an lang. Hmasawnnain a mi chim mek a, Computer le TV hai khawm ei nei deu fur ta a, mamaw lei ni lova inlirthei nei khawm mi tam tak ei um ta niin an lang. Ei thil neihai hi ei mamaw leia ei nei am annawleh mi han an nei leia ei nei ve? Mani thawsuok le inmila khawsak ngam le thiem hai mi vangnei le mi inhnarum an nih. Ei thawsuok le inmila ei khawsak naw chun ei damsungin lungril sawlin ei um ding a nih.


Post a Comment

Powered by Blogger.