Responsive Ad Slot

Hmasawnna Thar | 12 March, 2015

Thursday, March 12, 2015

/ Published by VIRTHLI
‘Vanram ropui tak Chanchin’ ti hla phuoktu Upa Zalawm(90) ei lo the tah
CCPUR: Muolvaiphei areaa Hmasawnna Thar Daily chanchinbu semtu W.R. Khumlien piengna pa
Upa Zalawm (90) chu zani zingkar 8:30AM vel khan Chatuonram a mi lo pansan tah. Upa Zalawm hi solfa thiem le hla mi takel a ni leiin hla khawm 100 chuong a lo phuok ta a. A hlaphuok hai laia inlar em em el pakhat chu, ei hang sak huna vanram inhawi ding zie min temlawk tir thei hiel khawpa mi lungril le ngaituona thuoi hiel thei, a lam naw hai khawm ei ke min tet hlau hlau tir thei “Vanram ropuitak Chanchin”....tu’n am hril thei an ta’ ti hla hi a nih. Upa Vanlawma hi Pathien thu a taka zawmtu, mi theida ding hril ngai lo, an tuokpui taphawt ‘zingkar tha (good morning)’, Pathienin malsawm raw sen che’ ti le zan hunah ‘mangtha parte chuoi theilo’ tia an tuokpui hai inthla vawng thei mi; Insung neka Pathien ram sin ngaipawimaw lem hlak mi a nih. Zanikhan Rengkai thlanmuolah ropui taka vuiliem a nih. Vanram inhawi le ropuia lo chawlhadam ta dinga a maksan a sung le kuo hai lusunna ei Chanchinbu chun a tuorpui hle. Upa Zalawm hi 1971 khan Parvachawm khuo, Manipur- ah EFCI kohran Upa dingin ordination a chang a, a nuhmei Pi Rosem leh nau 10 neiin tu 123 chuong a nei tah. (with inputs from LRS)

Ui se thar 4 an um
CCPUR: Dist. Hospital Dog Bite Cell a chun zanikhan Ui se thar mi 4 thangin Anti-rabies vaccines
mi 13 damdawi kap an nih. Hi laia 4 chu 1st dose, 7 hai chu 2nd dose le 2 hai chu 3rd dose an nih. October, 2014 a inthawk zani chen khan CCPur District-a chun Ui se record 581 a ni a, Anti Rabies damdawi kap po 5020 le Ui 5989 damdawi kap an nih. Chun, Ui se le inzawma mi thi record umzat chu 14 a ni bawk.

International Womens Day hmang a nih
CCPUR: Zanikhan Female Health Workers Training School, CCPur-ah International Womens Day hmang a nih. Hi huna hin CMO Dr Thangchinkhup Guite; Dr J. Songgoukham, Medical Superintendent; Dr V.C. Pau, DFWO; Seiboi Mate, DPM/ NRHM le Miss Margereth, Project Coordinator, Dept. Of Justice, Ministry of Law & Justice, Govt. Of India hai an thang a.

Miss Margereth chun ‘Legal Rights of Women” ti thupui hmangin thu a hril. Hi hun hmang huna hin ASHA sinthaw tha zuol Thanlon Block-ah Jamngai of Joutung village; Henglep Block-ah SR Athei of Choroi Khullen; Singngat block-ah Niangsangching of Singngat; Tipaimukh block-ah Bieki of Taithu village; Samulamlan block-ah Tinnu of T. Joujang village le Town areaah Chingngaihkim of Zomi Colony hai kuoma certificate inhlan an nih.

Rukru han Rs. 28,000 an inruk
CCPUR: March 6, 2015 khan Mr Lalpaul Gangte of Chiengkonpang In chu rukru han a kawtkhar suksein an rawk a, insung (ground floor) –a inthawk pawisa fai Rs. 28,000/- an inrukhmang. Hi thua hin Police-a report pek a ni angin CCPur Police chun FIR No. 18 (3) 2015 CCP-PS U/S 457/380/34 IPC an registered.

Diesel Auto Stand
CCPUR: All Churachandpur District Diesel Auto Owners Association (ACCDDAOA) chun zani zingkar a inthawk khan khawpui sunga hmun tum tuma Auto Stand tara um hai hmang dan ding thu an puongdar a. Auto stand haia chau Diesel Auto hai an ngir ta ding leiin mipui hai thlawp dingin an ngen. ACDDAOA chun Auto stand siema um hi a kar an hlat thei taluo leiin inzing lema tar dingin an ngen bakah a suk le tunga hmu thei dinga stand hai hi tar dingin an ngen bawk.

Education Board meeting
CCPUR: March 13, 2015, 2:00PM khin DC Officeah Mr Lunminthang DC/ Chairman, District Board of Education, SSA, CCPur inrawinain District Board of Education meeting um a tih.

Workshop nei
CCPUR: Zanikhan CMO Mini Conference Hall-ah IPPI thu le inzawmin District Orientation workshop on Mission Indradhanush nei a nih. Workshop hi Lunminthang, IAS, DC, CCPur in a hawng a, Dr L. Gujendro Singh, State Malaria Officer chu resource person in a thang.

Medical Unit Camp
CCPUR: March 12, 2015, hin Tuithapi village-ah One Day Mobile Medical Unit Camp um a tih. Hi huna hin Dr Robinson MO; Dr Donna Vungngaihching, MO; Dr Zenbiaklun MO; Chingbiaklun
Pharmacist; Sobita Devi ANM; Thianniang ANM le Manashe Office Assistant hai fein damnaw hai enin damdawi peng an tih.

Zanikhan Swine Flu leiin Manipur-ah mi 2 an thi ;Swine Flu leia thi sung han thangpuina sum an hni thei
IMPHAL: Zanikhan Manipur- ah Swine Flu leiin mi 2 an thi. Swine Flu a thihai hi Shija Hospital a enkawl an ni a, pakhat chu Swine Flu natna hri an vawi ngei a nih ti finfie ta sa a ni a, pakhat chu Swine Flu natna invawi ni dinga ringhla, a thisen test dinga thawn, a result la hungtlung lo a nih. Swine Flu natna leia thi hai hi Imphal East district mi ve ve an nih. Swine Flu a thi pahni hai laia pakhat chu nupui a ni a, Feb. 19, 2015 a kha RIMS-a admit, a hnunga Shija Hospital- a refer, admit le enkawla um a ni a, zani zingkar dar 6:10 vela thi a nih tiin Dr Palin Khundongbam, Chief Managing Director, Shija Hospital & Research Institute (SHRI) chun a hril. Swine Flu invawi ni dinga ringhla, zani zing dar 6:30 AM vela thi hi JNIMS a inthawka Shija Hospital-a refer, Admit le enkawl a nih. March 6, 2015 a Shija Hospital hung lut a nih tiin Dr Palin chun a hril. Swine Flu invawi ni dinga ringhla mi pakhat, Imphal West District mi chu Medical Directorate in a natna Swine Flu a ni nawh ti finfiena an nei ta leiin March 10, 2015 khan Hospital-a inthawk insuoktir a ni tah tiin Dr Palin chun a hril. Swine Flu natna leia thina tuok sunghai chun Manipur State Illness Assistance Fund hnuoiah suma thangpuina hni thei an tih. Hi Scheme hnuoia hin suma thangpuina Rs. 1,50,000 chen hmu thei a nih tiin Manipur Health Minister Pu Phungzathang Tonsing in zanita Imphal-a Chanchinbumihai an hmupui huna a hril. Swine lu invawi ngeia finfie mi pakhat a ni a, vawisun a thi ta a, hi natna invawi ringhla hi mi 5 lai an nih. Mi pakhat a thi a, mi pakhat Hospital-ah enkawl le pakhat Hospital a inthawk insuoktir a ni tah. Swine Flu a damnawhai chu a thlawna enkawl ning an tih tiin Pu Phungzathang Tonsing chun a hril.

Assam a khawm Swine Flu leiin mi 2 an thi taq a, mi 5 in hi natna hi an invawi mek a, hienghai laia pakhat chu MBBS Intern thaw lai a nih. India rama chun Swine Flu leiin mi 55 an thi belsa nawk leiin hi natna leia thi chu mi 1537 an tling ta a, an vawi chu mi 27,234 an tling tah tiin ei thu dawngna chun a hril.

Bomb puokah mi 3 an thi, mi 20 hliem
IMPHAL: Zani zan dar 6 vel khan Imphal khawpui laili tak Khwairamband Bazar- a temporary market shed, Allugali hmuna bomb hrat takel a puok a, mi 3 an thi a, nuhmei 7 thangsain mi 20 an hliem a, RIMS panpui an nih tiin Police thusuok chun a hril. Tu pawl khawmin bomb hi an sukpuok a ni thu an la puonglang nawh. Bomb hi Ar zawrna hmuna puok a ni a, hi bomb puoka thi mi 2 hai chu Mithu Yadav of Bihar le Md. Sarman s/o Md. Islam of Kshetri Bengoon, Imphal East hai an nih. Bomb puokna hmun hi top police officials han an hmuna panin thil umdan an va en fel.

Pasal pakhat rangkachak leh man
IMPHAL: Zani 1:30PM vel khan Tulihal Airport, Imphal a Indigo Airlines staff han Ravi Kumar (27) of Chennai thuomhnaw X-ray -a an en naah rangkachak an hmu a, sienkhawm iengzata rik am ti an hril naw a, rangkachak le hin Ravi Kumar hi an man. Ravi Kumar hi Indigo Airlines Flight No. 6E-362 a Imphal-Kolkata-Chennai pan tum a nih.

Meitei Mayek a Exam students 1300
IMPHAL: Board of Secondary Education Manipur hnuoia HSLC Exam ve mekah zanikhan students
13000 chuongin Meitei Mayek in an exam a, Class XI & XII Exam haia khawm Meitei Mayek a exam hi um pei tang a ta, HSLC exam naa Meitei Mayek a exam hai laia a thaw tha tak lawmmanin Rs. 20,000 pek ning a tih tiin MEELAL thusuok chun a hril.

MUSU in MU Gate an khar
IMPHAL: Manipur University hnuoia Manipuri Department hnuoia Pre- PhD Selection test ah thil indiknaw a um tia lungawinawin zani chawhnungtienga inthawk khan Manipur University Students’ Union (MUSU) pawlin Manipur University (MU) Gate pui tak an khar tan. MUSU chun Pre-PhD entrance test hi a thara nei ding le Prof. S. Sanatombi, Head of Department, Manipuri Department chu a sina inthawk suspend dingin an ngen a, sienkhawm thuneitu han an ngaisak naw leia nuorna hi an nei tan a nih.

Lochi Reang damsung lungin intang ding
AIZAWL: Kum 2013 a mi 5 thuoihmangnaa thang Lochiram Reang chu Additional District & Sessions Court, Aizawl district chun March 10, 2015 khan damsung lungin intang ding le Rs. 10,000 chawi dingin thiemnaw an changtir. Lochiram Reang hi Bru Democratic Front of Mizoram (BDFM) cadre, April 16, 2013 a Asapara Relief Camp, Tripura-a Police han an zu man a nih.

Police thihai zangnadawmna Rs. 7,50,000
SHILLONG: March 10, 2015 zingkara South Garo Hills district, Meghalaya huop sunga Garo National Liberation Army (GNLA) han Bagmara Police station huop sunga Rongara hmuna Meghalaya Police an lambunna leia Police 4 thi sunghai kuomah zangnadawmna Rs. 7,50,000 seng, inrik taka hliem hai thangpuina Rs. 1,00,000 seng le hliem na rak lo hai Rs. 50,000 seng pek ning an tih tiin Meghalaya sawrkarin a puong. Police 4 an hiem a, pahnihai chu an hliem inrik hle a hril a nih.

Mi 4 Drugs le pawisafai leh man
GUWAHATI: March 10, 2015 zingkar khan Guwahati khawpui sunga hmun pahniah mi 4 drugs le pawisafai leh Police han an man. Mana um hai hi Manipur le Mizoram mi an nih. Manipur mi pahni, Lalrinawma (35) le Sulomona (28) hai chu Fatasil Ambari hmuna Respified mum kg. 20 le man an nih. Chun, Inter State Bus Terminus, Guwahati huongsungah Mizoram mi pahni, Lalduhawmi (50) le Thangliana (35) hai man an nih. Anni pahni kuta inthawk hin Ephedrine mum kg. 40, India pawisa Rs. 80,000 le Myanmar pawisa Kyat Rs. 1,20,000 vel hu an man.

Mizoramah Swine Flu invawi ni dinga ring 5
AIZAWL: Mizorama chun Swine Flu natna hri invawi ni dinga ringhla mi 5 hmu belsa nawk an nih. Hieng mi 5 hai thisen hi test dingin National Institute of Cholera and Enteric Diseases, Kolkata ah thawn an ni tah tiin Dr Pachuau Lalmalsawma, Nodal Officer, State Integrated Disease Surveilance Programme chun a hril. Tuta hma khan Mizoramah Swine Flu natna invawi pakhat hmu a lo ni ta a, tuhin chu enkawl dam a ni tah.

Nitish Kumar in hnena a chang
PATNA: Zanikhan Bihar a Nitish Kumar sawrkar chu buk a ni a, hnena a chang. BJP in sawrkar buka a umna hi an boycott. MLAs 243 um laia MLAs 233 han an vote an thlak a, Nitish Kumar thlawp zawngin MLAs 140 han vote an pek.

Kejriwal Bungalow tharah an sawn ding
NEW DELHI: Delhi CM Arvind Kejriwal chu Civil Lines, Number 6, Flag Staff Road, North Delhi a Bungalow- ah haptakar thar tieng khin an sawn ta ding nia hril a nih. A bungalow thar dinga hin riekna pindan 4, Guest Room 1, Offices 2 le mi 300 inlengna Lawn a um. Delhi CM hi Type-VI Quarter hluo thei a nih. Tuhin Kaushambi, Ghaziabad, Delhi hmuna a nuhmei Sunita Quarter-ah a cheng mek a nih. Kejriwal hi damdawi panin Bengaluru ah a fe a, March 17, 2015 in New Delhi hungtlung a tih.

Kum 65 mi in Class VI an chuk
BONGAIGAON: Assam state a Bongaigaon district sunga No. 1 Basbari an ti hmuna cheng Mrs Amina Bewa (65), nau pasal 6 le nau nuhmei 3 nei ta chun Salabila Middle English School-ah admission thawin Class VI an chuk mek. Amina hin dawkan tlar hmasa takah a classmate, nuhmei naupang kum 13 mi Arjina Khatun an thungpui. Amina nau pasal 6 hai laia 3 loneitu, pakhat zirtirtu, pakhat sumdawng le a naupang takin Master degree an chuk a, a nau nuhmei 3 hai chun pasal
an nei vawng ta bawk. Ms Bewa chun, ‘sakhuo lekhabu ka insung ngeia tiem thiem ka nuom leia upat hnunga lekha inchuk ka nih’ tiin a hril.

Natna leia thi an tam lem
NEW DELHI: Chhattisgarh, Bihar le Jharkhand State haia chun Maoist helpawlhai kuta thi nekin natna hri leia CRPF thi an tam lem. Kum 2014 khan hieng states pahtum haia hin Maoist helpawlhai kutah CRPF 50 an thi a, natna hri chi tum tum leiin CRPF 95 an thi a, hienghai laia 27 hai chu Malaria leia thi le 35 hai chu lungphu chawla thi an nih tiin Union Home Ministry thusuok chun a hril. Tu kum hin natna hri leiin CRPF 9 an thi ta a, Maoist helpawlhai kutah CRPF 2 an thi ta niin Union Home Ministry thusuok chun a hril.

Global most-admired list-ah Sonia le Modi
LONDON: YouGov in world most admired list a puonglanga chun Congress President Sonia Gandhi le PM Narendra hai an thang ve. Ms Gandhi hi most admired women in 2015-a India mi nuhmei a thangphak umsun a ni a, list a hin Ms Sonia chu a 13-na a ni a, Hollywood actress Angelina Jolie chu pakhatna a ni a, Nobel laureate Malala Yousafzai, Hillary Clinton, Queen Elizabeth II le Michelle Obama han an dawt. Pasal a chun global list-a chun Bill Gates chu pakhatna (most admired man
in the world 2015) a ni a, PM Narendra Modi chu a 5-na in a thang. US President Barack Obama, Xi Zinpin le Jackie Chan hai chu 2-na, pathumna le palina in an thang.

Zu zawr um der nawna khuo hai Rs. 1,00,000
RANCHI: Jharkhand Chief Minister, Raghubar Das chun, an rama Zu zawrna um der nawna khuo hai chu lawmmanin Rs. 1,00,000 pek ning an tih tiin March 10, 2015 khan Jharkhand Assembly- ah a puong. Chun, Zu zawrna um der nawna khuo a grant khawm pek ni dinginn Das hin a puong a, Zu dona kawnga nuhmei pawl tum tum hai thangruola hma la dingin a ngen bawk.

Solar Power vuongna hmasa tak
AHMEDABAD: Khawvela Solar power hmanga siem Vuongna hmasatak Solar Impulse- 2 (Si-2) chu March 10, 2015 (zani hmasa) khan him takin Ahmedabad Airport a hung tum. Si-2 hi seat pakhat um, Switzerland siem a ni a, thla 5 sungin khawvel fangsuok vawng a tum a nih. Si-2 Pilot-hai chu Bertrand Piccard le Andre Borshbe of Switzerland hai an nih. Si-2 hi Abu Dhabi a inthawk Muscat ah a tum a, Muscat a inthawka Ahmedabad hung pan a nih.

Head Constable Almirah sungah drugs kg. 12
MUMBAI: Dharma Karokhe, Mumbai Police Head constable chengna In Satara hmuna drugs Mephedrone Kg. 110 dapdawk a ni zo nikhat liem hnungin Marine Drive Police Station a Karokhe mimal Almirah sungah drugs kg. 12 zet ding March 10, 2015 khan dapdawk nawk a nih. Karokhe hi man le a sina inthawk ban dinga hmalak mek a nih tiin Krishna Prakash, Additional Commissioner of Police chun a hril.

A sam vaw tiela khawlai fangpui dingin a ngen bawk.
BURDWAN: Pasal pakhat, kum 45 mi, Burdwan district, Satgram area huop sunga Raniganj a cheng chun a tunu, Class VIII inchuklai chu sex thila a sukbuoi hlak leiin an khaw mipui han an man a, a sam an vaw tiel neng zovin pheikawk iemanizat khitkhawmin an inawrtir a, khawlai an fangpui.

Iraq ramah IS han mi 3 lu an tanbawng
BAGHDAD: Tulai hnai el khan Islamic State helpawl han Iraq rama Nineveh Province ah pasal 3 lu an tanbawng lai thlalak an suklang. Mi 3 hai laia 2 hai chu mawngkuohur an nih tiin ei thu dawngna chun a hril.


Editorial
Swine Flu natna

Tulai taka India rama mihriem hringna suottu tak chu Swine Flu natna hi a nih. Sawrkar thlungpui le state sawrkara thuneitu han theitawp suoin hi natna thunun le sukre tumin hma nasa takin an lak a, sienkhawm tuhri hin chu an la hlawsam. Swine Flu natna leia thi an la um belsa pei a, mi 1,482 chuongin thina an tuok pha ta bakah mi 26,000 velin an damnaw pha ta a nih. Hi natna hri hin a min kiengsan naw leiin titthawng ding a ni nawh tiin sawrkarin a mipuihai thlamuon sienkhawm thlamuong taka um chi niin an lang nawh. Hi natna laka inveng chu ei thaw ding makmaw a nih. Thipui theina natna hri a ni tlat leiin titthawng chu a um a nih.

Manipur a khawm nupui pakhat hi natna hi an vawi ngei ti hrietchieng le damdawiinah enkawl mei a ni bakah hi natna invawi ni dinga ringhla mi pathum an um mek bawk. Hi lei hin ei state a khawm Swine Flu natna hri hi an leng mek a nih ti chu a chieng ta ti inla ei hril suol taluo ring a um nawh. Swine Flu hi invawi thei, damnaw pha thei le thipui thei natna hri a ni leiin ngaitha el chi chu a ni nawh. Dr Suresh Babu, Principal Secretary (Health), Govt. of Manipur in titthawng um ngirhmuna um ei la ni nawh ti sienkhawm ei ngirhmun enin titthawng um ngirhmuna um ei ni tain an lang.


Shija Hospital a enkawla um mek Swine Flu natna invawi nupui khawm a natna dam tieng nekin an rik zuol pei nia hril a nih. Hieng a ni lei hin State sawrkarin titthawng ngirhmuna ei la um nawh ti nekin inveng fimkhur dinga hma lak a hun ta takzet a nih ti zawngin a mipui hai mi hril lem sienla thiltha a ni lem ring a um. Mihriem han thil ei ngaikhawkna ding chun inhril tium deu a tul chang a um hlak. Chuong naw chun ei namnul a, a tawpah harsatna lien tak ei tuok pha hlak. Swine Flu hi natna tium ninaw sienla chu hieng zozai hi ei ramah thina tlung naw nih.


Dr Okram Ibomcha, Director, Health Services, Govt. of Manipur in Swine Flu damdawi ei mamaw tawk ei nei a ti laizingin Swine Flu a damnaw pasal chun RIMS le JNIMS Hospital haia khawm Swine Flu damdawi Tamiflu a um naw thu a hril. A tu thuhril am an dik lem ding chu ei hriet nawh. Amiruokchu, hi natnaa damnaw pasal meuin hienga a hril ngam hin chu Swine Flu damdawi hi ei mamaw tawk ei neinaw a ni el thei. Chuleiin, hi thu hi ei state sawrkarin a ngaiven a, thudik a zawngsuok nuom a um. Swine Flu chungchanga ei ngirhmun hiengang an ta laia a damdawi ei mamaw tawk ei neinaw a lo ni tak tak chun ei thawhla ding a ni leiin thudik tak ei zawngsuok nghal a tul a nih. District tina thuneituhai (DCs) khawma District Hospitals le Community Health Centres haia fein Swine Flu damdawi hi ei nei ngei am ti finfie hai sienla thiltha a ni ngei ring a um. Swine Flu natna hri invawi ei um ta zing bakah an vawi ni dinga ringhla pathum lai zet ei um ta laia a damdawi ei lo neinaw a ni chun ei ta dingin pul hri ni ve pal a tih ti hi inlau um takel a nih.

Thuvarin “sukdamna nekin inveng a tha lem” a lo ti a. Hi thu hi thudik a ni a, chuleiin Swine Flu natna hri ei invawi nawna dingin ei inveng fimkhur a tul. Swine Flu laka ei him theina ding chun insukfai a tul. Mani taksa chau ni lovin, fak le dawn, sil le bil, puonthuo, mani chengna in le a se vel hai sukfai zing ding a nih. Chun, mipui pungkhawmna hmuna fe lo le insunga um tam chu an vengna tha tak pakhat a nih. A tul tawn tawn a ninaw chun khuol inzin lo ding a nih. Natna hri laka invengna ding chun fai taka kut sawp zie a tha.
Don't Miss
© all rights reserved
made with by Simon L Infimate