Dist. Level Conslt. on Tribal Customary Law
-LRS Puruolte
CCPUR: March 2, 2015 11 AM a inthawk khan Rural Women Upliftment Society (RWUS) huoihawtnain RWUS Training Hall, Gospel Centenary Building, Sielmat, CCPur-ah District Level Consultation on Tribal Customary Law nei a nih. Hi huna hin Women Community Based Organisation tum tum CJWO, HWA, KWU, WWUCDA, IWO, TPWDP, Tuithaphai KTP, Priscilla Home le WinG(Women in Governance) hnuoia khuo tum tum 10- 15 a inthawk nuhmeihai an fekhawm.

Mrs. NissiLalrochan Prog.Coordinator, RWUS Moderator a thangin a keit huoi a, Ms. Mary Beth Sanate, Secreatary, RWUS chun Keynote address hrilin -“Impact of tribal customary laws for women” ti a hril a; Resource Person Dr. Immanuel Varte, Asst. Prof., Manipur Tribal University le Director CORE, Manipur chun “Tribal Customary Laws: Issues of Land and Property Rights” le “Tribal Customary Laws: Issues of Marriage,Divorce and Child Custody” le Ms.Lalsiamleni, Advocate in “Tribal Customary Laws and formal Legal system from Gender Perspective”ti thupuihai hmangin inhrilhrietna le hohlimna hun an hmang.

Hi hun a hin Tribal nuhmeihai ro chungchang le kawng tum tum haia an chanvo le an indikna, an hmasawn dan ding, an harsatna chi tum tum um hai hril le sukre dan dinghai hriltlang a nia. Chu ding chun Nuhmei han thiemna le varna, hrietna nei a pawimawzie, tribal nuhmei Lawyer iengzat rak an la um naw thu le thang lak nasat a tulzie hai ngaithlak a ni a. Dan hi mirethei han a hausa hai nekin ei mawmaw lem a, a tuortu khawm an ni rawp hlak leiin hriet hne a tulzie, ei rama thiltlung rawp hlak nupa inthe chungchang a nuhmeihai indikna le chanvo (Rights) chi tum tum um hai inhril a ni a. Nuhmeihai khawmin Sawrkar dan ang taka thiem changna dinga Court a ngir ding chun sawrkar hrietpuia innei uor a pawimaw thu, Kohran/Kristien dan a innei hi sawrkara in Registered a ni sinaw chun sawrkar-in a pawmnaw thu, SDO amani sawrkar hrietpuia innei le in Registered uor a thatzie hai inhril a nih. Hi hun a hin Nuhmeihai chawisangna hun a nitakzie le Women Society ang zawng a hmalak a ngaizie hai uor taka hril le ngaithlak a nih.

Nupa inthena leia Child Custody le Child Maintenance chungchang a chun Court in thu a pek chun a nau le a nuhmei a Pa a inthawkin chawmna (Pawisa) a dawng thei dan le sawrkar-in nuhmeihai ngirhmun a lo vawng that dan le a ngaipawimawzie hai chipchier taka ngaithlak a nih. Sawrkar danin mitin a huop hlak ang bawkin ei hnamdan hai khawm hin mitin huopin, thlierbik nei naw raw se, Nuhmeihai hi neka chawisang a, Tribal Customary Law khawm ennawn a siem that ngai tamtak a um ta thuhai, khawtlanga Pawl ei i nei haia khawm nuhmei hai hin an aiaw (Representatives) neirawn le mani hnam le khawtlang seng a hrildar hne a pawimawzie hai hihun a hin ngaithlak a nih. Hi hun a hinPu Joseph Joute Freelance Journalist le SocialActivist khawmin fiel a ni angin a thang ve. Program hmangzo in Pi Lalthiengzo in Pathien kuoma tawngtaina neiin hun suktawp a nih. Hiengang hun nei rawp chi a ni thu le an hlawkpui hle thu hi huna thang hai chun an hril. HmasawnnaThar Daily indawnna dawnin Ms. Mary Beth Sanate, Secreatary, RWUS chun Women in Governance (WinG) Annual Conference chu Mar.17 – 19, 2015 hin Imphal, Manipur ah a um ding niin a hril a. Member 3,000 ah mi 1,000 vel bek an thang beisei a ni thu a hril.

Staff Nurse applicant 447 an um
CCPUR: Medical Department, Govt. Of Manipur hnuoia Contract Basis a thawk ding Staff Nurse 90 lakna dinga chun Churachandpur District-a inthawk applicants 447 an um. CCPur Districta Sinzawl PHC le Senvawn PHC haia Post 1 ve ve lakna dingin applicants 18 an um a, Parbung CHC-a post 2 lakna dingin applicants 28 le District Hospital-a post 9 lakna dingin applicants 401 an um a, an rengin applicants 447 an tling. Vawisun hin CMO Office chun Imphal tieng thawn a tih.

ZEO inthla; ZEO thar dingin T. Goukhomang
CCPUR: ZEO Office staff hai chun an sina inthawka pension ZEO, CCPur Pu Lalsanglien; Niangsialching, LSEO/CCPur le Thangchinlam, Grade IV (ZEO Office) hai inthlana an office campus- ah an nei a, inthlanain Par le Belpui 1 seng an pek a, Rev. C.K. Thanga in Pension mi 3 hai tawngtaipekna a nei. Pu Lalsanglien chun, kum 1979-a Education department- a appointment hmu, a hun tamlem Pherzawl khuoa hmang a ni thu a hril a. DI of School le ZEO kum 1 ve ve a chel hman thu hrilin ZEO a chel sunga tawngbau mawilo hril le thaw suol a lo nei a ni khawmin Pathien hminga inngaidam tuo dingin a ngen. Office hi mimal enkawl thei a ninaw leiin staff han tha taka an thlawpna thuah lawmthu a hril. Hieng laizing hin tuta ZEO Office-a DDO sin chel mek le DI of School/Singngat sin chel mek T. Goukhomang Simte chu ZEO, CCPur thar dinga ruot a nina order insuo a nita a, March 3, 2015 a inthawk T. Goukhomang Simte in ZEO CCPur sin chel tan a tih.

Motor eksiden-ah hliem 3 hospital-ah
CCPUR: Zani zingkar 8:30AM khan passenger phura Jolzam a inthawk Lamka pana hung tlan Autorickshow chu Khengjang, prone accident area-ah Iris motor passenger phur pakhat leh an inhrut fuk leiin Diesel Auto a chuong mi 12 hai laia a tamlem student iemanizat an hliem. Hliem hai hi District Hospital panpui an ni a, student pathum- Kamthanlun (10) s/o Khailam of Jolzam village, Happly Heart school ah class V inchuklai; Joel (12) s/o Thanghao of Jolzam, Bethany school a class VII inchuklai le Seiminlal (11) s/ o Jangngam of Jolzam, Sielmat Christian Hr sec. School school a class V inchuklai hai chu Dist Hospital ah admit an nih.

Surgical Ward-a h rukru han mi bag an inruk
CCPUR: March 1, 2015, 10:20AM vel khan District Hospital-a Surgical Ward –a um damnaw hai Doctor le Nurses han round an thaw laiin pasal pahni hi room sungah an va lut a, Ms Niangneihoi of Zomi Colony bag an inruk bakah Activa ML05K-3691 chabi khawm an inrukhmang sa. Hi thil
tlung report a ni le inzawmin District Hospital-a Duty Police han hma an lak nghal a, gate bula anni lo nghaktu an ruolpa Hernet Naulak (25) s/o (L) Nengsong of Bungmual an man a a. Police chun , FIR No.14(3) 2015 CcP-PS u/s 379/34 IPC registered khumin rukru hai hi man tumin an zawng mek.

Form an dik le diknaw enfel dingin
CCPUR: Manipur State Illness Assistance Fund hni hai chun CMO Office-ah form an dik le diknaw enfel nawk seng dingin CMO CCPur chun an hriettir.

HYA GHQ meeting
CCPUR: Vawisun 1PM hin HYA Office, Rengkai-ah HYA General Headquarters Executive Meeting um a tih. Hi huna hin General Conference a resolution hai bawzui le hriltlang ning a tih.

Pension an inthla ding
CCPUR: District TB Office- a thawktu pension Mrs Zokhumi, Public Health Nurse le Mrs B. Nengzaching, ANM hai chu vawisun, 1:00PM hin District TB Centre- ah a thawktu chanpui han inthlana nei an tih.

SoO keisei nawk ding thuah Centre thu nghak a nih - Gaikhangam 
IMPHAL: Manipur Deputy Chief Minister le Home minister ni bawk Pu Gaikhangam chun, KNO le UPF, Manipur sawrkar le India sawrkar han Suspension of Operation (SoO) an ziek chu August 21, 2014 khan a tawp a, keisei a ni ta nawh. State sawrkar chun KNO le UPF hai le SoO keisei ding thua Ministry of Home Affairs thu a nghak mek a nih tiin Singngat A/C MLA Pu Ginsuanhau indawnna dawnin zanikhan Manpur Assembly-ah a hril. Manipur a Kuki helpawl helpawl tum tum pawl pahni - Kuki National Organisation (KNO) le United People’s Front (UPF) hnuoia um han sawrkar le SoO an nei chu a hunbi peia keisei pei a ni a. KNO hnuoia helpawl group 18 le UPF hnuoiah helpawl group 8 an um a, SoO hieng helpawl group pahni hai le SoO chu nikum August 21 a inthawk khan keisei a nita nawh. August 22, 2014 a SoO agreement tawp hnungah SoO suksei nawk dinga inbiekna a um thei nawna san chu SoO a thang han Imphal ni lova New Delhi-a inbiek dinga rawtna an siem lei a nih tiin Pu Gaikhangam chun a hril a, Tripartite agreement ziek a ni hnungin hieng group pahni a cadres hai chu an designated camp sawrkarin an din haiah fak le dawn a pek a.

State sawrkar chun inbiekna nei nawk vat a ni theina dingin sawrkar thlungpui khuoma intlunin hma a lak a, chu lai zing chun inbiekna a um theina dingin SoO group han boruok tha tak an nei a pawimaw tiin a hril a, state sawrkar chun SoO suksei nawk a ni theina dinga inbiekna nei nawk hun ding thuah Union Ministry of Home Affairs thu nghak mek a nih tiin a hril. Manipur-a helpawl group tum tum a cadres 2,731 hai chu Central Surrender policy hnuoia thangpuina pek an ni a, hienghai laia cadres 1122 hai chu KNO hnuoia hnuoia um le 1059 hai chu UPF hnuoia um niin Gaikhangam chun nikuma assembly session huna a hril.

JCILPS in Assembly session boycott
IMPHAL: Joint Committee on Inner Line Permit System (JCILPS) chun, Manipur Assembly budget session fe mekah Inner Line Permit System (ILPS) phar a ninaw dodalnain Assembly inthung tawpni vawisuna Assembly inthung chu an boycott ding thu zanikhan an puong. Hi baka hin March 5-9, 2015 inkar sunga nei ding Yaoshang festival zova inthawk Manipur (tuolsung mi) ni lo JCILPS in Identity Card a pek lo hai chu Manipur- a an um phal a nitanaw ding thu an puong bawk. Hieng laizing hin zanikhan Manipur Assembly Budget session fe mek sukbuoi a ni nawna dingin Chingmeirong-a Assembly lutna gates pathum Gate no. 1, 2 le 3 haia chun zani zingkar khan venghimna sukkhau zuol a ni a, BSF han gates hai hi an veng.

Railway Minister in Jiribam-Tupul
IMPHAL: BJP Manipur pradest Presideent Th. Chaoba le General Secretary Asnikumar hai hun zanikhan Union Railway Minister Suresh Prabhu an inhmupui a, Jiribam-Tupul Rel lampui siem mek chu a hmuna hung enfel dingin an ngen bakah thalai sin nei lo hai hmakhuo ngainain Imphal hmuna Railway sub-divisional head office hawng ding le Noney le Tupul inkarah ropeways siem dingin an ngen bawk. Union Minister chun BJP thuoitu hai chu March chawlkarkhatna annawleh chawlkarhnina vela Manipur hung inzin ding a lo tiem niin Ashnikumar chun a hril. BJP hotu hai chun Union Finance minister Arun Jaitley le Power and Renewable Energy minister Piyush Goyal hai khawm an inhmupui bawk.

Student han college thungna le table an raw
IMPHAL: All Manipur College Teachers Association (AMCTA) in sawrkara an thil ngen nawrnaa ceasework strike an thaw leia Manipur-a college tamlem hai class mumal nei thei lova an um leia nidang ang bawka class tan nawk dinga an ngennain Modern College student hai chun zani zantieng khan an college an suosam a, thungna le table hai an raw. College tum tuma student organisation chun AMCTA hai inbierempui dingin sawrkar an ngen zing a nih.

Old Age Pension Cheiraoba hmain
IMPHAL: Minister of Social Welfare Department and Cooperation A.K. Mirabai chun, Manipur-a Old Age Pension benificiaries hai kuomah Cheiraoba, New Year festival hmain an hlaw pek hman tum a nih tiin zanikhan MLA Kh. Joykishan (TC) indawnna dawnin Assembly-ah a hril. Manipur a chun MOAP beneficiaries 45,799 an um a, beneficiaries hai kuoma thlatin Rs. 200/- pei pek an ni a, kum 2012 a inthawk tuchen hin hi scheme hnuoia Rs. 11,80,60,200 release a nitah tiin Mirabai chun a hril bawk.

Head mistry thuoihmang; Rs. 50 lakh ngen
IMPHAL: February 26, 2015 zan dar 9:30 vel khan Kangpokpi Police station huop sunga Chawangkining hmuna Imphal-Tamenglong Road siemnaa Head Mistry Sanasam Ranjit Singh (50) s/o (L) S. Puren Singh of Thoubal Sabalthongba Awang Leikai chu Kuki helpawl ni dinga ringhla han an thuoihmang a, a thuoihmangtu hai chun Rs. 50 lakah a inthlansuok dingin an ngen niin ei thu dawngna chun a hril. Police chun sansuok tumin an zawng zing a, sienkhawm hi thu sut chena an la sansuok nawh. Kangpokpi Area Chief Association (KACA) chun hi thil tlung hi demin a thuoihmangtu hai chu hung insuo dingin an ngen. (UNA)

Diesel Auto hai Battery-in
IMPHAL: Manipur Transport Department chun, Imphal khawpui sung-a Diesel Auto-Richsaw service hai chu National Electric Mission Mode Project (NEMMP) hnuoiah Battery a inlettir vawng tum a ni thu, hi le inzawm hin department chun Department of Heavy Industry-a peklut dingin Detailed project report (DPR) a buoipui mek a nih tiin MLA L. Nandakumar indawnna dawnin Transport Minister Dr Kh. Ratankumar chun a hril.

Fack finding team in an sui ding
IMPHAL: Manipur-a CBSE school thenkhat, CBSE in a recognised naw leia student tam tak exam thei lova an umna chungthu chu member 5-umna Fact Finding team in an suizui ding a nih tiin Education Minister M. Okendro Singh in zanikhan Assembly-ah a hril. CBSE exam hi vawisuna tan ding a nih.

VDF han an hlaw sukpung dingin an ngen
IMPHAL: All Manipur VDF (Village Defence Force) Welfare Association chun zanikhan Tera Bazar, Imphal hmuna sarwkara an thil ngen hai sukpuitling dinga nawrnain protest an nei. VDF chun an hlaw sukpung dingin an ngen a nih. Placard an chawi haia chun ‘Increase VDF salaries’, ‘Don’t transform VDF into beggars’, ‘Provide separate Battalion for VDF’ ti hai an ziek. VDF hai chun an honorarium thla khatah Rs. 10,000 a sukpung ding, thla 13 hlaw pek ding, chuong a ninaw chun Pathienni le general holiday haia sin in duty tir lo ding, VDF hai ta dingin battalion hran indin ding ti hai a thang.

Mizoram CM inban dingin an ngen
AIZAWL: Mizoram sawrkarin School le College tum tuma student hai an scholarship a pek theinaw dodalnain zanikhan Aizawl-a chun student sang telin lampui hrawna an nei a, Chief Minister Lalthanhawla chu inban dingin an phut. Rally hi Mizo Students Union huoihawtna hnuoia nei a nih. Student thuoitu hai chun, a tul chun an thil ngen scholarship sum tuta kar sunga pek an ninaw chun strikes annawleh bandh chen khawm an la huoihawt ding thu an hril.

Maoist han MM le LR Hr. School an ban
IMPHAL: Maoist Communist Party, Manipur (MCPM) chun Modumangol Memorial Higher Secondary, MM Higher Secondary School tia hrietlar le Little Rose Higher Secondary Schol hai chu CBSE hnuoia Class X le XII exam ding candidate hai Admit card an pek theinaw leiin zanita inthawk khan tiemchin um lova an ban thu Comrade Nonglen Meitei, Secretary Publicity and Propaganda of Maoist Communist Party, chun a hril. Student hai khawm session nawka inthawk hieng school haia admission thaw lo dingin an infui.

Christian han ni 3 sung tawngtaina nei an tum
BHOPAL: Madhya Pradesh-a Kristien hai chun ni 3 sung March 4-6, 2015 inkar sung khin India rama Biekin suosam le Kristien hai theidana (hate campaign) dodalnain India ram pumpui hmun 100 haiah tawngtairuolna nei an tum. Tawngtairuolna hi ni 3 sung Biekin haia nei ni dingin Jabalpur- a English Methodist Church pastor FJ Valsalen chun a hril. Hieng laizing hin Rashtriya Isai Mahasabha (RIM) chun March 1, 2015 khan External Affairs Minister Sushma Swaraj kuoma memorandum pein India ram puma Kristien hai beina suktawp dingin an ngen.

Congress in PCC Chief thar 5
NEW DELHI: Congress President chun zanikhan PCC Chief thar ding 5 a ruot. Congress leader Ajay Maken chu Delhi Pradesh Congress Committee Chief dinga ruot a nih. Ashok Chavan chu Maharashtra PCC President dinga ruot a ni a, Ghulam Ahmed Mir chu Jammu and Kashimir; Bharatsinh Solanki chu Gujarat le Uttar Reddy chu Telangana PCC Chief dinga ruot a ni a, Sanjay Nirupam chu Mumbai Regional Congress Committee President dinga ruot a ni bawk.

Tripura in Women Police tamlem lak a tum
AGARTALA: Tripura sawrkar chun Women Police personnel tamlem lak a tum thu a hril. Tuhin Tripuraa a Police personnel um hai laia 13 % chu nuhmei an ni a, Police force po poa Women police chu 10% a nih tiin zanikhan Tripura CM Manik Sarkar chun a hril. Kum 15 liemtaa Police force-a nuhmei umzat percentage chu 2 chau a ni a, nuhmei chunga suolna hung pung pei le inzawmin women police lak belsa pei an ni a, tuhin Tripura sawrkar chun nuhmei chau umna Women Police station khawm an din ta a, hiengang women Police station hi 5 indin belsa tum a nih tiin Manik Sarkar chun a hril.

Dimapur-ah BSNL engineer kap hlum
DIMAPUR: Pathienni (March 1, 2015) zan dar 9 vel khan BSNL telecom engineer G.M. Rongmei
chu tu ti hrietlo mi pahni han Dimapur-a Signal Basti, Nagagaon colony hmuna a chengna inah an kap hlum. G.M. Rongmei hi Zunheboto hmuna BSNL-a subdivisional engineer sin thaw lai a nih. A kap hlumtu hai hi motorcycle-a chuong an ni a, an kap hlum zovin an tlanhmang nawk nghal. G.M. Rongmei hi hmun hnaitea inthawka kap niin a hmai-ah silaimu lutna hmu a ni a, kap a nina hmuna hin a thi nghal a nih.

Meghalaya-a bomb puokah mi 2 an hliem
SHILLONG: Zanikhan Meghalaya-a West Khasi Hills district-a Petrol pump pakhatah bomb an dengpuok leiin petrol pump-a thawktu mi pahni Amresh Kumar le Mejentis Sangma hai an hliem. Hi thil hi zani zingkar 6:15 AM-a kha tlung a nih. Hliem hai hi Hospital panpui an ni a, an ngirhmun a tha tiin Sylvester Nongtynger, West Khasi Hills SP chun a hril. Intelligence Agencies hai chun hi thil hi Garo National LIberatation Army annawleh A’ chik Matgrik Elite Force hai thilthaw ni dinga an ring thu an hril.

India Ambassador to US dignin Arun Singh
NEW DELHI: Paris khawpuia India ram palai (envoy) ni lai mek Arun Singh chu Indian Ambassador to US dinga ruot a nih. India ambassador to US ni lai mek S. Jaishankar chu January 28, 2015 khan Foreign Secretary dinga ruot a ni a, hi leia Arun Singh hi US a India ambassador sin chel dinga ruot a nih. Arun Singh hi 1979 batch IFS officer, Washington-a deputy Chief of Mission kum 5 lai lo chel ta a ni a. Israel-a India ambassador khawm lo chel ta a ni bawk.

Thla 2 sungin Assam-ah terrorist 167 man
GUWAHATI: Assam-a chun thla hni liemta sung khan terrorist 167 man an nih tiin Assam Governor Padmanabha Balakrishna Acharya in Assam Assembly budget session tan nia thu a hrilna huna a hril. Helpawl hai hotu pahni Security Forces han an kap hlum a, National Investigation Agency (NIA) chun terrorist 4 hai case suizuiin cases an siem bawk tiin Acharya chun zanikhan a hril.

Excise le AR han Zu bottles tam tak an man
DIMAPUR: Excise duty han zani hmasaa Chumukedima Excise check gate-a Maruti Alto NL-07 6093 sukchawla an dapnaah motor sunga inthawk Indian Made Foreign Liquor (IMFL) zu senchi bottles 300 dapdawkin pasal pakhat Theja Krome of Purana Bazaar, Dimapur leh an man. Chun, hi ni ma hin 37 Assam Rifles han Manipur hung pan MN-01 7343 motor sukchawla an dapnaah Beer bottles 352 dapdawkin a neitu Teresa Mao of Mao Gate, Senapati leh an man bawk.

ISIS han Kristien an hrentang 19 an insuo 
Islamic State (IS) helpawl han Assyrian Christians 220 an thuoihmang hai laia 19 hai chu pawisa pek an ni hnungin an hung inthlasuok niin Osma Edward, Director, Assyrian Network for Human Rights chun a hril. Hieng mi 19 hai hi Pathienni khan Church of Our Lady, Kasakeh hmun an hungtlung tiin Edward chun a hril a, mi 19 hai intlansuokna ding hin pawisa iengzat am an pek ti ruok chu a hrillang naw a, nikum November thlaa IS han an mi hrentang an hung insuo hai kha mi pakhatah US dollar 1,700 pei an pek a nih.

NDFB(S) cadre 2 man an nih
GUWAHATI: Assam-a Kokrajhar district a chun Pathienni- a Army le Police thangruol han dappui an thawnaah NDFB(S) cadre pahni Sumkwr Mushahary alias Sugum le Swmkwr Basumatary hai chu 7.65mm Pistol 2 le a mu 4 le thildang thenkhat leh an man niin Defence spokesman chun a hril. Anni pahni hi Myanmar-a training zo, December 23, 2014-a Asasm rama Addivasis hnam hai thatna le October thlaa Ecological battalion hai ralthuom lakpeknaa inrawlna nei an nih tiin ei thu dawngna chun a hril.

AAP in CS thua Ministry rawtna a hnawl
NEW DELHI: Union Home Ministry in Delhi Chief Secretary dinga a dit mi 3 hming a thlangsuok hai laia pakhat tak Delhi Chief Secretary ding thlang dinga a pek chu Delhi-a Aam Aadmi Party (AAP) sawrkarin a hnawl. AAP chun Delhi Chief Secretary thar dingin 1984 batch IAS Officer RS Negi an dit a nih.

Nitish in LA Bill thuah bungheia nuorna
PATNA: Bihar Chief Minister Nitish Kumar chun, Land Acquisition (Amendment) Bill hnukkir dinga nawrnain ni khat sung bungheia nuorna nei a tum thu a puong a, a ni ding ruok chu a la hrillang nawh. Mr Nitish Kumar chun hi bill hnukkir dinga Narendra sawrkar nawrpui dingin mipui hai a ngen bawk. Nitish Kumar chun Land Acquisition Bill hi ‘black law’ a nih tia hrilin loneitu hai ta dinga thalo a ni thu a hril.

Editorial
Union Budget

Mr Narendra Prime Minister nina hnuoia Centre-a National Democratic Alliance (NDA) sawrkar-a Budget puitling (full budget) hmasatak chu Union Finance Minister Pu Arun Jaitley in February 28, 2015 khan Parliament-ah a phar a. Budget a hin NDA sawrkara sum hmang ding le sector le ministry tum tum haia sawrkar sin thawna ding, schemes le hmasawnna thil chi tum tum thaw ding hai a thang a. Chu hai lai chun ‘Act East’ policy hnuoia India hmarsakbiel (NE) state haia NDA hmalakna ding hai khawm a thangsa.

Budget a hin sin tam lem siem, ramdanga India pawisa thupruka um hai lakkir dan ding, Sie pek nuomnaw leia ramdanga India pawisa thuprukna suktawp a, chuongang thawtu hai kum 10 chen jail intangtir an ni theina ding; middle-class hai ta dinga hamthatna tamlem siem. Ram venghimna ding tiengpangah kum 2015-16 a dingin Defence sector –a Rs. 2,46,727 crore hmang ding; ram venghimna ding kawnga hmang pawimaw le tul hai ramdanga inthawk laklut neka ‘Make in India’ Policy hnuoia ralthuom a tam thei ang tak siem ding ti hai an ni a, budget tlangpui chu- Mi hausa han sie an pek hlak suktawp; mi hausa kum khatah Rs. 1 crore le a chungtieng lalut hai sie pek hlak 2% a sukpung; Corporate tax kum 4 sunga dingin 25% a sukhnuoi, service tax 14% a sukpung, Swach Bharat-ah sie lak lo ding bakah Rail le Irrigation project haia sie lak lo ding, Infrastructure hmasawnna dingin PPP model hmang thar; MW 4000 seng pesuok thei ding ultra mega power projects 5 siem ding ti hai a thang.

Union Budget-a hin Manipur ta ding bik thil thar umnaw sienkhawm India hmarsakbiel a hmasawnna sin thaw ding iemanizat a thang ve a, chuonghai lai chun Arunachal Pradesh-ah Centre for Film Production, Animation and Gaming hawng ding, Assam-ah AIIMS indin ding, Nagaland-ah Indian Institute of Science and Education Research (IISER) hawng ding ti hai a thang. Mr Jaitley chun India hmarsak biela hmasawnna sin thawna dingin Development of North Eastern (DoNER) sum hmang ding khawm Rs 2,362.74 crores sie (29.43% a sukpung) le NEC hnuoia scheme chi tum tum thaw dinga remruotna siem a ni thu hrilin sawrkar thlungpui chun hmarsakbiel hmasawnna a ngaipawimaw a, India ram state dang le hmasawnna kalpen inruol taka a fe theina dinga DoNER sum hi sukpung a ni thu a hril. PM Narendra Modi chun India rama state dang hai ruola India hmarsakbiel state hai khawm hma insawntir a tum a nih tiin Jaitley chun a hril a. India hmarsak biela infepawna lampui siemthat le suk changkangna dingin Rs. 2,000 crore le Rel-a infepawna siemthatna dingin Rs. 1,000 crore sie a ni thu a hril bawk. Hieng laizing hin KAATC ta dinga sawrkar thlungpuiin Special package Rs. 15 crore a pek hlak chu tukum budget-a hin suktawp a nithung.

Budget a hin Manipur thanga India ram pum huopa thaw ding scheme thar tum tum a thang a, chuonghai lai chun- Micro Units Development Refinance Agency (MUDRA); Pradhan Mantri Suraksha Bima Yojana; Atal Pension Yojana; Pradhan Mantri Jeevan Jyoti Bima Yojana; Senior Citizen Welfare Fund; National Investment And Infrastructure Fund le a dang tam tak an thang. India hmarsakbiel- a a ram leilung hausakna hmang hlawk dan le sum le paia inrelbawl dan, mipui vantlang hriselna ngaipawimaw; nuhmei le thalai hai inchukna le sinthawna ngaipawimaw ding; agriculture hmanga thlai tam lem tharsuok sukpung ding, power hnienghnar tak le internet hmanga inthlungzawmna tha siem a, sawrkar inrelbawldan siemthat chu sawrkar thlungpuiin a ngaipawimaw dinga Jaitley in a hril hai lai a thangsa bawk.

Union Finance Minister chun India hmarsakbiel sukhmasawn le kawng iengkima state dang hai le hmasawnna inkhuongruol taka infetir a tum tia a hril hi thil lawmum takel a ni a, a taka a hung hlawtling ngei khawm nuom a um. Amiruokchu, tuta hma khawmin sawrkar thlungpui chun hmasawnna sin thaw ding tam tak induongin Scheme tha tak tak induongin a lo thaw ta a, chuong project le Scheme a thaw hai chu vairam le India ramril haia chun a tlangpuiin ei ni lai nekin an hmang indik a. Eini lai ruok chu ei hmang indiknaw tlangpui. Hi lei hi ni ngei a tih, India ram state dang hai nek chun ei hnufuolin hmasawnna kawnga mi hnung ei hnawt nasan khawm. Amiruokchu,
tuhin Centre-a sawrkarna cheltu chu BJP an ni a, a thar an ni bawk leiin an thothang khawm a la tha a, iemani kawng takin ei rama hmasawnna an hung intlun ngei chu mitin beisei a nih.

Post a Comment

Powered by Blogger.