Responsive Ad Slot

Hmar Leaders Retreat a thanghai kuoma thucha

Sunday, March 29, 2015

/ Published by VIRTHLI
A hmasatakin, Hmar Leaders Retreat a hung thang popo le a huoihawttu Hmar Inpui thuoituhai in rengin ditsakna chibai ka buk cheu!

Awleh! Ei thuringbu Bible ah, “A nuhnungtak khawm a hmasatak a ni thei a, a hmasatak khawm a nuhnungtak a ni thei” ti a ni angin, ei vawi le chang, hnung le hma dilsut taka ei hei ngha meu chun, kawngtin renga hnungtawl ei ni zie, a bikin hi lai hmuna hunghai hi inhril hran ngai loa hretu ei ni deu fur ring a um. Amiruokchu ei hnam ngirhmun nina indiktak hre chiengtu ta ding chun, vawisunnia mihriem mithmua ei hnungtawlna le ruol hnung ei hnawtna hai hi, tumruna mipe zuol sau sautu bakah huoisenna le tuorselna mipe belsatu ani lem a nih. Asanchu, ei Pathien ring hin a mizie a thlak danglam naw ani chun, vawisunnia a min khawsak tir dan le a mi hung zawngsuok dan haia inthawk hin, Hmar hnam a khawm ‘Ie-ma-na” ti tawng hmangtuhai hi, a tha naw tieng nekin a tha tienga mi hmang tum a nih, ti chu hawrawp puia ziek anga chieng a nih.

Chuleiin, Ararat tlang insangtak sip-zawla olive hna ngeia inthawka lak suok, HNA ngei khawm chu, Hmar hnam ngirhmun le Hmar hnamin a idel ram thleng, mak le danglam bik rieuna neihai chu a ngirhmun indiktak hre chiengtu a ni leiin, India hmarsak biela hnam sipai (hel) popo laia pasie tak nisienkhawm, Hmathlir (vision) kawng ah ruok chu ngirhmun chunghnung tak hluotuah an sal ngam phana a nih. Chuongang bawkin, vawisuna hi lai hmuna thang dinga fiel bik, a hung thang thei le thei naw hai khawma, ei hnam ngirhmun indiktak hi a hre chieng naw dam ei um pal hlau khawma, hieng ang hun tha le ni lawmum, HI hmanga mi siem pektu ei Pathien chun, “Ka ta ding bik lieu lieua a ruot le a buotsai a nih” tia, ‘Hmar hnam Pentikos ni’ ang hiela hmang theitu ni dinga sungril ngaituona popo pe dingin ka ngen cheu a nih.

Hmar hnam goal chu phun a ni tah a; Sinlung suokhai goal khawm chu phun a ni ta bawk a nih. Hnam goal phun umzie inziekna, “Hringna cha’n ta loa hnam zalenna suolsuokna ding chun Intin nu le pa’n mawphurna an nei” ti thupui hmanga lekhabute siema um chu nakie leh hung sem ninga ta, chu lekhabute sunga thuziekhai chu, Hmar hnam le Sinlung suokhai damkhawsuokna dinga Pathiena inthawka thusuok nia i ngai a; a sunga Hmar Inpui thaw dinga mawphurna inzieka um hai sukpuitlingna ding kawngah, thu ringawt ni loa thilthawa suklang theitu le suklang ngam ve tu i ni bawk chun, nangma mimal, i sungkuo, i khuo-le-tui le i hnam ‘Hmar’ ngei chun hmasawnna lampui, tu hnam khawma an la hraw ngai lo, ramri hrim um lo lampui chu inhawi tak le petek der loin a hraw thei ta ding el bakah, hnam chanchin inzieknabuhaia i hming chuongnahai chu i thlahai ta dinga hmaimawkna siemtu ni loin, an hringnun ta dinga tlangchar tuihnar anga hlu a ni lem ngei ding a nih, ti hi Hmar Leaders Retreat a thanghai le Hmar Inpui thuoituhai kuoma ka thucha chu a nih.

Ka lawm e,

Hnam ta dinga inthahnemngaipui,

Sd/ Lalthangsang Intoate,
Dated: Hmar Runpui
March 28, 2015


Don't Miss
© all rights reserved
made with by Simon L Infimate