CCPUR: Hmar Inpui (HI) huoihawtnain Hmar Leaders’ Retreat 2015 chu Happy Heart School Auditorium, Bethel, Churachandpur (Manipur) hmun ah March 28, 2015 (Inrinni) zing dar 7:00 AM ainthawka 3 PM inkar sung hin nei ni dingin Hmar Inpui thusuok chun a hril. Hiengang program hi RR&TC Umran, Meghalaya hmun ah Oct. 22-24, 2013 khawm khan nei lo ni ta hlakin, kha hun a khan mi 120 chuong Hmar hnam sunga pawl tum tum a thuoituhai, Manipur, Mizoram, Assam, Meghalaya le hmun tum tum a inthawka fe khawmin an thang a nih.

Hmar Leaders’ Retreat 2015 hi Session 3 a the ning a ta. 1st Session chu zingbu fak hma’n Programme 7 AM a tan ning a ta, hi huna thanghai chun hi hmun a hin zingbu fa nghal an tih. 2nd Session  chu 11 AM a tan ning a ta, 1st Session  hun a chun Main Speaker-in Pu Joseph Lalrothang, Ex-President, HYA, GHQ thang a ta, “Strengthening of Hmar Civil Societies & Organisations” ti chu thupui a neiin hriltlang ning a ta, Moderator-in Pu Lalhmuok Famhoite, Ex-Gen. Secretary, HYA, GHQ thang a tih. 2nd Session hun a chun Speaker-in Pu Lalthalien, Ex-Gen. Secretary, Hmar Inpui thang a ta, “Manpower & Financial Resources for Hmar Civil Societies & Organisations” ti thupui a neiin hriltlang ning a ta, Moderator-in Upa Laldawnlien Varte, President, HYA GHQ thang a tih. 3rd Session chu general le group discussion hun a hmang ning a tih tiin huoihawttu HI thusuok chun a hril.

Hi hun a hin Hmar hnam sunga kohran le khawtlanga hnam pumhuop a pawl tum tum a thuoituhai, abikin Imphal le Tuithaphai laia mihai baka inhnikna nei hi huna thang ve dinga hming peluthai an  thang ding a nih. Pu Lalhossan, EM (CCPur ADC), Pu Lalhmangpui, Member, CCPur ADC, Pu Lalhrillien, Member, CCPur ADC, Pu Lalditsang, Member, CCPur ADC le Col. Anil Kumar NR, CO, 5 Madras Regt., Khuga Battalion, CCPur hai khawmin hi hun hi uop vein thuhrilna hun an nei ding niin thu ei dawng bawk.

– LRS Puruolte


Post a Comment

Powered by Blogger.