Damlaipar tlân di’n hlasak thiem Mami Varte’n ‘TIEM TLAT E’ ti ve ta

Aizawl, 20 March, 2015: Hlasak a thiem lei el chau nilo a hmelṭhat lei le ngainobei leia Mizoram sim le hmar, sak le thlang bakah khawvela zo nauhai umna hmun po po nghawr hnîngtu hlasak thiem (Hmar nunghak ngat) Lalrinkimi Varte (Mami Varte) D/o Varneihchhunga, Kulikawn, Aizawl chun kumtluonga lengna tlang dang ta lo a damlai par hmang chul pui dingin Zoramchhana S/o Lalsangliana Sailo chu vawisun khan Kanan Veng Presbyterian Kohran Hall ah kohran le mipui hma ah ‘TIEM TLAT E’ a lo tipui tah. Zoramchhana hi Mizoram CM hlui Brig. T. Sailo a tupa a nih. Nupa tuokthar hai hi Presbyterian kohran dan hnina (dan thienghlim tho, sienkhawm Biekin pui hawnga innei ni lo) a innei an ni a, hlaksak thiem le Mizoram celebity hai bakah mipui ṭhahnem takin an inneina hi hriepuiin an lawmpui a nih.

April 19, 1988 a pieng Mami Varte hin kum 12 mi a ni a inthawkin hla a sak ṭana, kum 2004 khan a single ‘Ana E’ tlangzarin kum 2007 khan a album hmasatak ‘Damlai Par’ ti chu a tlangzar nawk a nih.

Mami Varte hi India le foreign hmun hran hran a hai hlasakin a lo inzin suok ta hlaka, Hmar Sikpui Ruoi le kin danga hai khawm a lo ṭhang ta hlak bawk.

'Our North-East, Our Star' hla le music video buotsai a ni lai khan Bhupen Hazarika, Sourabhee Debbarma, le Lou Majaw hai le khawm an lo inthlawp ta hlaka, Indian Idol, Indian television series Coke Studio @ MTV session-2, le Ink (Innovation and Knowledge) conference, Lavasa-a hai khawm thiemtakin hla a lo sak tah bawka. Hlasak thiem lawmman khawm ṭhahnemtak a lo dawng ta nghe nghe a nih.

An inneina hi Virthli chun lungril taka lawmpuiin ditsakna vochuom ei inhlan mawl mawl a nih.

A album le hla inlar zuolhai-
• Ana E (July, 2004)
• Tha Sensiar (September, 2004)
• Kum Sang Atan (April, 2005)
• Lenrual Hlui (July, 2005)
• Ka Lung Di (March, 2006)
• Suihlunglen (November, 2006)
• Mangtha (April, 2007)
• Dawn Tawi (May, 2007)
• Vawng Dun Zel Ang (June, 2007)
• Damlai Par (September, 2007)
• Hmangaihna Vanduai (March, 2009)
• I Kiang Ah (September 2011)