Virthli (VT) le Dr Chaltonlien Amo (CA) Chairman, HAC le MLA, Tipaimukh A/C nilai zing hohlimna.

VT: Pu Chalton, hohlimna hun le thil a tlawm a zawng indawnna hun imi siem pek thei ding am?
CA: Thei e, a tha an nawm.

VT: Tulai i biel, Tipaimukh chau niloa i hmalakna riva a tha khawp el a, ieng anga hma lak pei am i tum a?
CA: Ka hma lakna chu tulai chau nilovin, MLA ka tling khawma, ka tling naw huna khawm ei ram le biel ta ding chun ka thei tawpin hma ka lak zing hlak an nawm.

VT: I ti chu an dik awm ie ! MLA tuta tuma i tling nawk hnunga i hma laknahai i mi hril thei ding am?
CA: Hril thei e, amiruokchu hmalaknahai popo hril ding chun a tam awm ema, hriet nuom bik deu dam i nei am?

VT: ADC Pherzawl kha Chief Minister rawia hawng a ni ta a, iengtikam office function in um thei a ta? ti le CM in a tiem - HSLC Exam Centre le Hr. Secondary ei biela hawng ding thuhai kha ei phak chin mi hril ta la.
CA: Additioanal Deputy Commissioner (ADC) Office CM in a hawng kha, ADC chu Shri Shyamchandra Sharma in a chel a. Tuhin a staff ding tul zat, Office hmangruo dinghai le sum hmang ding tul zat le a dang dang, ADC officea um dinga thil tulhai ziek le thua ngen le bawzui zing a ni a. Chun, HSLC Exam Centre chu CM le Education Minister haiin an mi phal pek ta ngei a chu a tul thaw ding - Exam Hall, Question papers le answer paperhai him tawka siena ding, Security le tul danghai hma lak sun zawm zing a nih. HSLC Exam Centre ding le Hr. Sec. School hawng nisiem students exam ding le a kai ding an um di’m ti khawm ei ngaituosa a tul bawk a.

VT: Anleh, ADC Pherzawla hawng a ni theina hi nang a hmalakna lei lieu lieua ka ngai lai zingin “Manmasi Digest” December, 2014-January,2015 issue, Editorial a khan a thawtu le hril dawktu chu mi dang dai angin a hung hril nawk el ta kha mak ka lo ti baka? UNLF pawlhaiin Hmar nunghak an sawisak leia Parbunga Governor a zun zin laia Dr L. Fimate in a hril lei le midang tukhawma hnina siemlo ang dam in a hril bawka, iem i ngaidan?
CA: I ngaidan chu khel ni naw nih. Editorial thu ziek chu indik vawng naw nih. Amiruokchu, thahnemngai Hmar Organizations dang dang khawma hma an lak ve a, mimal khawm an thei ang anga hma la um ve tho rawi nawnihai am! UNLF pawlhaiin Hmar nunghak an sawisak hma a inthawka ka lo nawr tan dai a ni tah. Governor kuomah ka hni ve nawh, mi pe thei tu a ni nawh ti ka hriet leiin. Mi pe theitu chu Chief Minister le a Cabinet hai an nih ti ka hriet leiin Chief Minister le Cabinet meeting hunah inzak-inphak dawn lovin ka hni ngawng ngawng hrim a nih. Delhi chen chena India sawrkar remtina zu hnawt ka ni hrim bawka. Helicopter a hin vawitam ka chuong ta a, a ri a sie taluo leiin hohlimna ruol an naw a, Imphal le Parbung kar darkar chanve sunga ADC hrilsuok el thei ding a ni bawk nawh. Pu Selkai lem chun, a ditnaw lei nilovin, thil awlai a ninaw zie a hriet leiin “Pherzawla ADC hawng a ni nek chun a hringa vana lawn awl lem a tih” a tih, an ti hiel a ni kha. Editorial ziektu hin a hriet nawlei am annawleh ka hming that ding ditnaw lei le midang hmingthat inlak tir a nuom lei khawm a ni el dim. Kei khawma Editorial thu hril hi ka pawm nawh. Awleh, hi thu hi ei hril sei taluo chun a hrenaw dinghaiin lo hre pal an ta thil pawi tlung rawi a tih. Document pawimaw le evident (Confidential) ka kawl, i en nuom leh in entir thei ka che. I hmu pha thil umzie hre chieng el i tih.

VT: Tuiruong leilak daw ding kha ? Hmasawnna a um am? Tum Contractor?
CA: A sawn khawp el, Tuiruong pang Taithu tieng le Patpuihmun tieng a foundation hmun an cho zo vang ta kha tuhin chu cho zo tang an tih. Thirhai khawm Truckin vawitam a hmunah a thak tlung tah.
Contractor chu Shri Megha Singh, Spl. Contractor a nih. Boruokin a zira tum anga thaw thei a ni chun tukum June thla bohma ngeia zo tum a nih.

VT: Anleh, thu dang, Churachandpur ah University indin ding ti thu le a bawlna ding hmun Site selection in hang sukfel tah ti thu ka lo hrieta, thudik a ni am?
CA: I hriet kim naw deu a ni chu. Churachandpura Private University indin tumna Bill Manipur Assembly House ah December 19, 2014 khan putlut a ni a. Siemthat tul, pei le belsa tul dam a um leiin Bill chu pass a la ni naw a. Select Committee ruothai kutah an sie tah a. India ram University thenkhathai thawdan kan zu en vel hnungah a bawlna ding hmun (Site) Select dingin Education Minister rawiin Churachandpurah February 20, 2015 khan Select Committee kan hang fe a, hmun 5/6 vel kan en a, final a la ni nawh. A hmun ding hi a tul lien khawp el a, 100 Acres neka chinlo, 200/300 Acres vel a tul ding a hawi. Lawi-len inhawi, Imphal (Airport) hnai, Main Road hnai tieng Committee hai lunglutna a hawi.

VT: Parbung, Pherzawl le Patpuihmun haia sawrkar hmun le office pawimaw le thildang dang thil kumhlun ding i hmalaknahai hi mi thenkhatin “ka proposal le ka nawr dawk” a ti nuom an tam ta a hawia, iengtin am i ngai a?
CA: Thiltha chu a thawtu ni nuom an tam hlak reng an nawm. Min an awi dim maw?

VT: “Chalton MLA a tling zawm ngai nawh” an ti hi ienglei am ning a ta?
CA: Ka tling zawm ngai naw hi ei ramin a ni ding a ni naw pha hrim a ni hi. Tling zawm nawna san ruok chu hril dal ka tih, election tawmlai biel ka lut thei dernaw tum khawm khan vote 5(nga) chaua tling naw ka nih. Ka chawlsan sungin hmabak sunzawm a um naw a, ka tling nawk hunah “Pamthul” thiek a ngai nawk hlak.

VT: Tuta i tling nawk hnung hin Tipaimukh biel vawi ieng zat am i zu sir ta a?
CA: Biel vawi sawm neka tam ka sir ta a, khawtin chu ka sir thei nawh. Tulai hnai a khawm Vangai biel chu vawi 4 (li) lai officerhai thuoiin ka zu sir kha tie.

VT: Anleh, Vangaitlanga chun iengtin am i zu fe hlak?
CA: Eh! Imphala inthawk motorin zing dar 7:00 AM ah ei suok chun Patpuihmun  SDO/BDO Hq. varlai ei tlung thei tah.


VT: A ni ngei chu tie, lawm a va um de. Tuta hma vote campaign hun lai khan “Vangaitlang dung Pucca Road (black top) le Tuiruong Leilak khawm zo saa record an tah, Chaltonin a fak ralsa vawng a nih” an ti luo ie ! I react nuom am?
CA: Parbung Pa pakhat chun an khel thu phuok a ngai peinaw luotin “tuta inhril hi Pu Chalton fak khawp chau a nia, mipui fak ding Tuiruong kawitinah Leilak kan daw ding a nih, Vangai road, temporarya siem le chalton tawlparit khawm chalton pucca road inchangtir vawng kan tih” a ti pek tawl kha tie. Ei dit le tumna a lo sawt tah a, tuhin programa thang dingin ei suol dawk chau a ni hi. Vangai tlangah Road black top, Electrict meivar le Tuiruong Leilak tuta inthawka sawt nawte ah nei vat tang ei tih. Hmarbiel tieng khawm NH-2 le Electrict hrui keina Pherzawl khuo khel tieng Damdiei, Tinsuong, Tuolbung, Taithu, Parbung, Senvon, Parvachawm le khuo dang khawm sunzawm pei ning a tih. Sin thawtuhai hnam dangmi dam an nileiin ei ram sunga sin an thaw sung chu mitinin thlamuonga harsatna siempek ngailo dingin mi popo ka ngen bawk.

VT: Election nawkah la tling nawk in zuom am? Ieng tin am vote zawng i tum a?
CA: Pathien le mipuihai zarin tling nawk kan zuom. Zawng tum nilovin thil tha thawa vote zawng zing ka ni lem.

VT: Tuhaiin am an hung khing che i ring a ?
CA: “Election ngir tum pawl” le “Politics khela ram le hnam ta dinga sin thaw tum pawl” kan um a. Kei chu “Politics khela, Ram le hnam ta dinga sin thaw dinga inpe”, a tul leia election ngir hlak ka nih a. Election hun hung hnai a ta, “Election ngir tum pawl” hai iengzat am? tuhai am? ti hre thei chau naw ma ni’m.

VT: I ti thiem baka.
CA: Ti thiem ni lo e, thu dik ka hril a ni lem.

VT: A tawpna taka dingin, MLA i tlinga inthawka vawisun hun chenah ei ram le Hmar hnam ta dinga i thil tha thawhai laia i suongbik hai 3 (pathum) bek hang hril ta? 
CA: 1. Hmar MIL (BA), Manipur Tribal hnamhai laia hmu hmasa tak, mu ar lak an ti ang ela ei lak.
        2. Vangai TD Block le Upgraded to Sub-divisional Office,   le
        3. ADC Pherzawl hai hi ning an tih.

VT: I thil thawtumhai laia i ngaipawimaw zuolbik 3(pathum) hang hril nawk tala ?
CA:       1. ADC/Pherzawl hi full-fledge District (H-District)a siem,
              2. Health le Education (Inchukna) tieng suk changkangna ding le
              3. Road-Communication tieng nasa takin hma ka lakzing. Hienghai suk puitlingna ding chun ei hnam sung Inremna le Inthuruolna leh thangtlang a tul.

VT: Hunsawt tak i mi pek thei leiin ka lawm ngawt el.
CA: Kei khawma ka lawm che.


Post a Comment

Powered by Blogger.