Responsive Ad Slot

Hmasawnna Thar I Feb 21, 2015

Sunday, February 22, 2015

/ Published by Ralsun Hmar
Zomi Namni-cum- Mithun Festival hlawtling taka hmang zo a nih
CCPur : Zanikhan Zomi Namni-cum-Mithun Festival, 2015 chu ropui taka hmang a nih. Flag Hoisting & Zomi Innpi Inaugural Ceremony 7:30AM in Zomi Innpi, ZC Veng, New Lamka ah nei a ni a, 10AM in YPA Hall, Hiangtam Lamka ah Zomi Namni hunpui tak hmang a ni a, hi huna hin khuollienin Rishang Keishing, Ex-CM, Manipur; Chief Host in Pu Thanglianpau, President, ZRO; Namni Pa in Pu P.S. Haokip, President, KNO; Functional President in Minister (Health & FW, GAD, CADA) hai an thang a, Guest of Honours in Pu Thangso Baite, MP; Vungzagin Valte, Parliamentary Secy.; T. Manga Vaiphei, Chairman, MTDC le hai an thang.

Hi huna Pu Rishang Keishing in thu a hrilnaa chun, kum 60 sung politics khela MP khawm term 2 chelin tuhin kum 96 a upa ka ni ta leiin politics a chawlsan ta a hril a. Thil liemta hai theinghila ei ingngaidamtuo a pawimaw thu, Kohran hotu hai chu inthuruolna \ha lem ei nei theina ding tiengpang thu hril dingin an fui. Tlangram le phairamah hmasawnna khuongruol taka a um a pawimaw thu a hril bawk. Pu Thanglianpau chun, Nang le kei inti lovin ei thangruol a pawimaw tiin a hril a. Pu Phungzathang Tonsing chun, hi hunser hmangnaa hnam lam inentirtu- hai chu lawmmanin Rs. 5000/- seng a pek ding thu le hlasak hai chu Rs. 1000/- seng a pek ding thu a hril a. KNO in Kuki State an ngen a, UPF in Autonomous Hill State an ngen hai chu Constitution dungzuia thil thei a ni leiin an ngen thei hrim a nih. Sienkhawm ei thangruol a, zaikhata ei um a pawimaw a, tu el hin zaikhatin la luongkhawm theinaw inla khawm ei thangruola zaikhata ei um hun a la hung um ngei ding a nih tiin a hril.

KNO President Pu PS Haokip chun, hnam tum tumin um inla khawm unau vawng ei nih. Nga’n an tam an thipui a, mihriem ruok chun ei tam ei dampui a nih. Hi lei hin ei damna ding chun ei thangruol a pawimaw tiin a hril.

Mitin Festival Football Final a chun Lamka SC in Lenlai FC an hne.


Jitan Ram Manjhi Bihar CM a ninaa inthawk an ban:
Nitish Kumar in Feb 22 ah Bihar CM dinga sesamna a nei ding
Patna : Bihar Chief Minister Jitan Ram Manjhi chun zanikhan Bihar Assembly-a Majority a command zo le zonaw an entir dinga ti a ni a. Amiruokchu, Mr Manjhni hin Assembly inthung tan
hma le majority a command zo le zonaw an entir hmain Governor Keshari Nath Tripathy kuomah Chief Minister a ninaa inthawka an banna a pek. Mr Manjhni inban lei hin zanita Bihar Assembly- a Governor in thuhrilna a nei ding ti khawm kansel le Assembly chu tiemchin um lova sukchawl (adjourned) a nih.

Mr Manjhni inban lei hin Governor K.N. Tripathi chun zani zantieng khan sawrkar thar siemna ding thuah Mr Nitish Kumar an hmupui a. Mr Nitish Kumar chu Feb. 22, 2015 (Pathienni) 5:00PM in Chief Minister dinga sesamna nei dingin an hriettir bakah Governor chun March 16, 2015 nia majority a command zo le zonaw Assembly-a inentir dingin an hriettir. Nitish Kumar in sesamna a nei huna hin MLA iemanizatin minister dinga sesamna nei bawk an tih.Mr Nitish Kumar inrawi JD(U) chun Bihar-a sawrkar thar siemna dinga hin RJD, Congress le CPI MLAs hai thlawpna an mamaw ding a nih. Mr Arvind Kejriwal thaw danin Mr Nitish Kumar chun nikuma Bihar CM a inthawk an banna thuah Bihar mipui chunga ngaidam an hni a, khang thil kha a thaw nawk ta ngainaw ding thu a hril.

Nikuma Lok Sabha election-a Bihar-a JD(U) party an tlakhnuoi leia Nitish Kumar hi Chief Minister a ninaa inthawk ama nuom thua inban niin Mr Manjhni khawm hi ama thlaktu ding (CM) dinga a ruot a nih. Amiruokchu, Mr Nitish Kumar hin Bihar CM chel a nuom nawk ta leiin Mr Manjhi chu CM a inthawk inban dinga ti a ni a, sienkhawm inban nuom lova a um leiin JD(U) chun an party a inthawk an hnawtdawk nghe nghe a, inban nuom naw sienkhawm majority a command zonaw dinga a hriet leiin Assembly-a an entir tawm ruoiin an ban tat ho tho a nih.


KSO le ANSAM in sawrkar ultimatum an pek
Imphal : Kuki Students’ Organisation (KSO) le All Naga Students’ Association Manipur (ANSAM) hai chun Indira Gandhi National Tribal University (IGNTU) a infrastructure pawimaw le tul hai ni 5 sunga suk bukim dingin Manipur sawrkar kuoma ltimatum an pek. IGNTU Students Union thil ngen hai lai IGNTU approach road km. 2.5 a sei siem ding bakah electric le tui connection hai hi university main campus-a pe dinga an ngenna hai a thang. An thil ngen hai ni 5 sunga sukpuitling pek an ninaw chun helna chi tum tum an thaw tan ding niin KSO Gen. Secy, Seiboi Haokip chun a hril.

Mizoram in Statehood Day an hmang
Aizawl : Mizoram chun zanikhan State puitling an hmu champha (statehood Day) an hmang. Statehood Day le inzawm hin official taka programme huoihawt ninaw sienkhawm state sawrkar in public Holiday-a a puong leiin Govt. Offices le inchuknain hai chu khar an nih. Mizo National Front (MNF) in kum 20 sung zet helna thawa ramhnuoia an um hnungin June 30, 1986 khan Accord ziek a ni a, kum 1987 khan kha hun laia Prime Minister fam tah Rajiv Gandhi chun Mizoram Statehood hi a hawng a nih.

Arunachal Pradesh khawmin zanikhan Statehood Day an hmang ve a, hi huna hin PM Narendra Modi khuollienin a thang. PM Narendra Modi chun zanita statehood Day Mizoram le Arunachal Pradesh hai chu a lawmpui thu, state hmasawn le changkang ni pei dinga a ditsakna an hlan.


Police han MU Hostel No. 1 an dap
Imphal : Imphal West Police-a Addl. SP Bikramjit inrawinain zani zingkar 9AM vel khan Police team chun Manipur University, Imphal West-a Hostel No. 1 an dap. Hi thil hi hostela um students hai chun nasa takin an dodal a, hostel tuolah tables, chairs le thingtum hai an dengbum. Hostel-a um Anthropologya Research Scholar Akhon Gangmei chun, Feb. 14, 2014 khawm khan Hostel hi Police han an lo dap ta niin a hril a, hienganga Police han hostel an dap rawp hin student hai nasa takin a suk chiai a nih tia hrilin iengleia Manipur University thuneitu han an nuom hun huna hostel hi Police an in daptir el am a nia? Tiin indawnna a siem bawk.


AAP National Executive Feb. 26-ah
New Delhi : February 26, 2015 khin Aam Aadmi Party (AAP) chun national executive meeting nei an tih. Delhi Assembly election nei zo hlima hratna an chang zo hnunga AAP in hiengang National Executive meeting an nei hmasatakna a ni ding a nih. Hi huna hin India ram hmun tum tuma AAP thuoitu hai an thang vawng beisei a nih. National Executive meeting nei hma hin Political Affairs Committee chun hi meetinga an rel ding hai induong an tih tiin AAP thusuok chun a hril. Hi meeting a hin States dang haia assembly election-ah AAP in candidate an nei ding le ding naw hai khawm an rel ding niin ei thu dawngna chun a hril.


IWMP Recruitment Result puong
CCPur: IWMP, Churachandpur district hnuoia Contract basis a thawk ding thawktu lakna result chu zanikhan puong a nih.Hi dungzuia
lakhai chu:-
S o c i o l o g y / W D T : Manenniang, Zomi Colony; Lenthanglun, Bijang; Lhingpichong, K Salbung; Jangngam Doungel, B. Vengnom; Zonunsiami, Thingkangphai; Letlalmuon Samte, D. Phailian; Paominlien Singson, Tuibuong; Lhingzachin, S. Nabil; L. Sonia Kom, Lalumbung; N. Thangkhonsiam, New Lamka; Lhilhling Lupheng, Tuinom;
Environmental Science: H. Thangmuanson, Zenhang Lamka; Zamzanem, Lanva;

Social Work: Suanlyan Tungnung, Hiangzou; T.Zamlunmang Zou, Kamdou Veng; Joseph L. Joute, Sielmat; Th. Thonglunthang Simte, Simveng; Lalchunghnung Khawbung, Rengkai; Mangkhohao Singson, Bijang Khopi; Kimthianhoih, Mualpi; T. Chingngaihkim, Bungmual;

Forestry/Agro-Forestry/ Agri: Rajkumar Tony Singh, Imphal West; H. Khupminthang
Simte, Salem Veng; Samual T. Biaklian Tonsing, Hiangtam Lamka; Mutum Roger Singh, Heirangoithong Makha, Keibung, IW;

Acountant- Thongkhohau Haokip, Tuibuong Account Asst. - Pausuanlian, New Lamka

Data Entry Operator- Kaisangthang, Zenhang Lamka; Priscilla Lalliensing, Muolvaiphei

Technical Expert- Oinam Robinson, Nambol hai an nih.


Swine Flu leia thi an pung pei
Ahmedabad : Gujarat a chun Swine Flu leia thi mi 9 an um belsa nawk leiin tukum sunga Gujarat statea Swine Flu leia thi chu mi 176 an tling ta bakah Gujarat state-a hi natna invawi khawm 2,371 an tling tah.

West Bengal a khawm B.C. Roy Hospital-a enkawl pasal naupang kum 8 mi chu Swine Flu leiin a thi a, tuchena West Bengal state-a Swine Flu leia thi mi 3 an ni a, mi 47 in an invawi mek bawk.


Total bandh khau taka thaw an tum
Aizawl : MNF President Pu Zoramthanga inrawinaa zani hmasaa Mizo Hnam Runa meeting chun, February 25, 2015 nia Mizo National Front (MNF) in Mizoram pumpui huopa bandh an thaw tum chu khau le hrat taka thaw dingin an rel. MNF meeting chun, VC inthlangna hung um ding Chakma Autonomous District Council huom sunga chun bandh hi thaw ni naw sien tiin an rel thung. Bandh hin medical, tui, electric, Police le venghimna tiengpang bakah MNF GHQ in permit a pek hai chu huom naw nih.


Don't Miss
© all rights reserved
made with by Simon L Infimate