Responsive Ad Slot

Hmasawnna Thar I 25 February, 2015

Wednesday, February 25, 2015

/ Published by Ralsun Hmar
Puonkhawng hi sum lamna le insung khawsak intodel theina a nih- John B. Tlangtinkhuma
CCPur : Zani Feb. 24, 2015, 11:00AM khan District Handloom & Textiles Office, CCPur le Manipur Apex Handloom Weavers & Handicraft Artisans CS LTd. hai huoihawtnain YPA Hall, Hiangtam Lamka, CCPur-ah “Buyer- Sellers Meet” (Between Handloom cluster & enterprises) nei a nih.

Hi huna hin Pu Govindas Konthoujam, Minister (Commerce & Industries, Manipur) khuollienin a thang a, Functional President in B. John Tlangtinkhuma, IAS, Director, Commerce & Industries, Manipur le Guest of Honour in Y. Shantikumar Singh, Officer in-Charge, National Handloom Devpt. Corporation Ltd. a thang.

Pu Govindas chun, Director Commerce & Industries Pu B. John Tlangtinkhuma hmalakna leiin Manipur-a District tinah Buyer-Seller meet nei theia um a ni thu a hril a, hi meet thiltum chu Handloom products hai a zawrna ding market siem a nih tiin a hril. Manipur-ah Entrepreneurs 22 an um a, hieng entrepreneurs hai hin Manipur-a hmun tum tum haia inthawk handloom product hai lakhawmin ramdang (foreign)-ah an zar dawk hlak a nih. CCPur district-a chun Cluster 7 an um a, hieng Cluster 7 hai kuoma hin puonkhawngtu (weavers) han in puonkhawng hai va pe inla, a zawrna (market) thuah harsatna nei nawng in tih. Hieng Clusters hai hin Entrepreneurs hai kuoma pesawngin Entrepreneurs hai chun ramdangah an zawr dawk hlak a nih. Puongkhawngtu/weavers tam tak chun market thua harsatna leiin an thil thaw an chawlsan a, hi lei hin state danga zawrdawk ding handloom product ei nei tlawm a nih. State dang le ram danga tam lem ei thawndawk theina dinga hma la dingin weavers hai a ngen.

B. John Tlangtinkhuma chun, Puonkhwngtu hai chu an kut themsuok hai state dang le ramdanga thawndawk a ni theina dingin Imphal thangsana um hai Entrepreneurs hai kuta pe dingin a ngen a. Churachandpur district-ah Real Eastate thawna dingin ram acres 10 a lien mamaw a ni a, tuta inthawk sawtnawte hnunga state sawrkarin hawng a tih. Puonkhawng hi sum hmuna tha takel le insung khawsak intodelna intlun theitu a ni leiin uor zuol ei tiu tiin ngenna a siem.

Hi meet-a hin Clusters 7 hai bakah Imphal-a inthawk Entreprenuer 22 um laia 8 an hung thang.


PDP le BJP in J&K –ah sawrkar an siem ding: Mufti in March 1-ah CM dinga sesamna nei a tih
New Delhi : Jammu & Kashmir-a chun PDP le BJP in thangruola sawrkarna siem dingin an sukthluk tah. PDP le BJP in sawrkarna an siem ding thu hi PDP Chief Mehbooba Mufti le BJP President Amit Shah han Common Minimum Programme (CMP) thua meeting an nei zo hnunga an puong a nih. Common Minimum Programme (CMP) sukfel tep a ni ta a, BJP-PDP thangruol (coalition) in sawrkarna an siem vat ta ding a nih tiin Mr Amit Shah chun a hril a, PM Narendra Modi le PDP leader Mufti Mohammad Sayed hai chu ni tlawmte hnunga inhmuin inbiekna nei an ta, hi zo hin sawrkar siem ding hun puong ning a tih tiin a hril.

PDP leader Mehbooba Mufti chun, BJP le PDP thangruol sawrkar chun J&K corruption free government an siem ding thu a hril.

Nikum December thlaa Jammu and Kashmir Assembly seats 87-a inthlangna uma khan party mala sawrkar siem thei khawpa hrat an umnaw leiin tuchena sawrkar thar um thei lova Jan. 8, 2915 a inthawka kha J&K chu Governor Rule-a um a ni a. J&K Assembly election nuhnung taka khan PDP in seats 28 lain party mala tling rawn tak an ni a, BJP chu pahnina niin seats 25 an lak a nih.

Hieng laizing hin ei thu dawngnain a hril danin People’s Democratic Party (PDP) patron Mufti Mohammad Sayeed chun March 1, 2015 khin Zorawar Singh memorial auditorium, Jammu University-ah Jammu & Kashmir Chief Minister dingin sesamna a nei ding niin a hril. Beisei anga thil a fetluong a ni chun PDP-BJP coalition sawrkar a hin Mufti chun full term in J&K Chief Minister a chel ding a nih.


Education minister lim an raw
Imphal : Joint Students’ Union, DM College chun zanikhan an college campusah Education Minister M. Okendro lim (effigy) meiin an raw. DM College of sciences, Arts le Commerce haia joint student union chun an college campus a lampui hai siem\ha dinga an ngenna sawrkarin a ngaisaknaw leia zani hmasaa inthawka kha class an boycott Tan ta a nih. Education Minister in Feb. 16, 2015 nia an inhmupui huna an thil ngen hai bawzui dinga a tiemna tuchena a la sukpuitling naw leia nuorna an nei Tan niin DM College of Science-a student union General Secretary Yambem Ranjan chun a hril a, helna nasa lem an la thaw pei ding thu a hril.

IGNTU Students Union khawmin zanikhan an college campus-a inthawk Khongnangkarak-a Legislative Assembly chen rally an nei. An thil ngen hai lai College panna lampui siemthat ding, full time director le permanent staff sie campus–ah electric le tui pek dinga an ngenna hai a thang.


Gas Cylinder a inthawk kangmei a suok
CCPur : Zani zantieng 3:50PM vel khan New Lamka, Hebron Veng-a Mr Kiamlo chengna ina inthawk a sung han thlai an suong laiin LPG Cylinder leaked a inthawk kangmei a suok a. Thenum khawveng mipui an tlankhawm a, Cylinder hi tuolah an keidawk thei leiin In chu a kang hman nawh. In hi a chung rangva, a bang thingphek a ni a, a bang thingphek kar hawka Gas Cylinder hi tuola an keidawk a nih. Gas Cylinder tuola an keidawk hnung hin tui buok khum a ni a, sienkhawm a thi el theinaw a, iemanichen an buoipui hnungin an thelmit thei hram a nih. Kangmei suok hi Fire Brigade khawmin a hang pan a, sienkhawm an tlung chun mipuiin an lo thelmit hman tah. In hi teklei in nisien chu thelmit thei lovin Cylinder hi puok a ta, kangmei nasa tak a suok ring a nih.


Free Medical camp
CCPur : February 28, 2015 khin District Health Society (DHS), CCPur hmalaknain Dumsau Village ah Free Mobile Medical Camp um a ta, hi huna hin Dr Zenbiaklun, MO; Dr Robinson MO; Dr Thethem Khongsai MO han damnaw hai en an ta, Ms Chingbiaklun Pharmacist, Tlanglawmkim ANM, Lalthawmkim ANM bakah SHALOM le DAPCU han thangpui an tih.


Sthree Shakti Award dawng dingin Sharmila
Imphal : Irom Chanu Sharmila chu KA Kunjila Smaraka Sthree Shakti Trust, Cochin (Kerala) chun “Sthree Shakti Award” dang dingin a thlang. AFSPA hlipna dinga kum 15 zet el bungheia nuorna a neina le inzawma Award hi inhlan dinga a thlang a nih. Award hin sumfai Rs. 25,000 le Citation a sawm.


Manipur Assembly Budget Session vawisun
Imphal : 10th Manipur Legislative Assembly 10th Session chu vawisun hin hin tan ning a ta, March 3, 2015 chen in\hung ning a tih. February 28 le March 1 haiah sitting um naw nih. Budget session shung hin budget estimate 2015-16 phar le voice vote-a passed a ni beisei a ni a, The Manipur regulation of visitors and tenants bill, 2015” khawm phar a ni beisei a nih.


KNO in 28 rising day an hmang
Imphal : Kuki National Organisation (KNO) chun zanikhan Senai designated camp, Sadar Hills, Senapati district- ah 28th Rising Day an hmang. KNO a hin helpawl hran hran 17 an um a nih. KLA/KNO C-in-C Stephen Kuki chun KNO flag keipherna a nei a, an cadre lo thei ta hai sunna minutes 2 sung hun hmang a nih.(UNA)


Lead Bank Chief Manager in a kaisang
CCPur : Mr Nengkhanpau Hauzel, Paona Bazar-a Auditor sin thaw lai mek chu Chief Manager, Lead Bank in a kaisang a, January 27, 2015 khan a sin thar hi a zawm. Mr Nengkhanpau Hauzel hin Chief manager Lead Bank sinthaw lai N. Nimai Singh a thlakthleng a nih. N. Nimai Singh hi Chief Manager, SBI Tula dinga sawn a nih. Chief Manager Lead Bank hin CCPur, Thoubal le Chandel District hai a phur khawm a nih.


School 5 a student hai an exam thei ring um lo
Imphal : CBSE hnuoia Class X le XII exam hung um dinga hin Manipur-a Schools 5 haia student hai chun admit card an la hmunaw leiin an exam thei ring a um nawh. Hieng school hai hin Manipur board hnuoia recognised school hai fethlenga CBSE ah exam form an peklut a ni a, sienkhawm CBSE in a recognised naw leia Admit card a hung pek naw an nih. Education minister chun hieng school 5-a student hai exam thei dinga siemna dingin hun a tawi ta leiin chance a tlawm hle niin a hril.


DRI han rangkachak kg. 5 leh an man
Ahmedabad : Directorate of Revenue Intelligence (DRI), Ahmedabad Unit chun zani zingkar khan Sardar Vallabhbhai Patel International Airport-ah Dubai-a inthawk Emirates EK-540 vuongnaa hung chuong pasal pakhat kum 30 vel mi chu rangkachak kg. 5, Rs. 1.4 crore manhu leh an man. January, 2014 a inthawk tuchena DRI le Custom han airport-a rangkachak an man chu kg. 62.455 kgh, Rs. 16.3 crore manhu a tling ta a, hieng hai le inzawma mi an man chu 68 an tling ta bawk. February thla bul khawm khan hi airport-a hin pasal pahni hai chu Rangkachak Rs. 9 lakh le Rs. 19 lakh manhu leh an lo man ta bawk.


BPL Card DSO in verify a thaw tul
CCPur : Rajiv Gandhi Gramin LPG Vitrak Yojana (RGGVY) hnuoia BPL sungkuo han LPG deposit free connection thawna dinga khan BPL Card neitu han DC Office-a District Supply Officer (DSO) verify an inthawtir hmasak a tul.


Financial Literacy Camp
CCPur : Vawisun, 2:00PM hin NABARD Regional Office, Manipur sponsorednain SDO Thanlon Camp office, Central Lamka-ah Financial Literacy and Credit Counselling Camp um a tih. Hi huna hin Chief Guest in Joel Haokip, MCS, SDO Thanlon thang a tih.


IS han Christians 90 an thuoihmang
London : Islamic state group helpawl hai chun northeastern Syria a inthawk Christians 90 an thuoihmang tiin London base-a um opposition activist group, Syrian Observatory for Human Rights chun an hril. Hieng Christians hai hi Hasaka khuo puotieng Tel Hmar a inthawka an thuoihmang an ni nia hril an nih. Tuta hma met khan IS chun Egyptian Coptic Christians 21 Libya a inthawka an thuoihmang hai an thatna video thlalak an lo insuo ta a nih.


Chakma ADC hnuoia VC Election vawisun
Aizawl : Chakma Autonomous District Council hnuoia Village Council General Election, 2015 chu vawisun hin nei ning a tih. Hi thila dinga inbuotsaina chu zo fel a ni tah. Eelction hi Feb. 25, 2015, 7:00AM a inthawk 4:00PM inkar sunga nei ning a ta, vote thlak zovah vote tla hai tiem nghal ning a tih. Village Council 81 haia chun nuhmei hai ta dingin seat 1 seng hau a nih. Village Council 81 haia seat umzat chu 481 a ni a, canditates 923 an um.


CBI in University VC hlui an man
Kanpur : Madhya Pradesh-a Hari Singh Gour Central University Vice Chancellor hlui NS Gajbhiye chu recruitment scam thuah CBI han zanikhan Kanpur hmuna an man. Gajbhiye hih UPA sawrkarin hi University central University status an peka inthawk Vice Chancellor hmasatak a nih. Gajbhiye le midang iemanizat hai chu hi university-a assistant professors lakna dinga thil indiklo taka thawtua intum an nih.


Parliament-ah Land Acquisition Bill phar
New Delhi : Lok Sabha a chun zanikhan Right to Fair Compensation and Transparency in Land Acquisition, Rehabilitation and Resettlement (Amendment) Bill, 2015 phar a nih. Hi bill dodalnain Lok Sabha a chun opposition member hai chu Lok Sabha-a inthawk an suoktau a. Member thenkhat chun hi bill hi anti-farmer a nih tiin an sawisel. Hi bill thua hi sawrkar chun party tin hai hriltlangpui dingin Finance Minister Arun Jaitly chun a siem.


Swine Flu leia thi 841 an tling tah
New Delhi : Swine Flu leia mihriem thina tuok an la um pei a, hi natna leia thi 841 an tling tah. Gujarat-a chun Swine Flu leia thi mi 12 an um belsa nawk leiin a state sunga hi natna leia thi
chu 219 an tling ta a, hi natna invawi chu 3337 an tling ta bawk. Mi naran hai chau ni lovin Gujarat Assembly speaker Ganpatsinh Vasava le Minister of state for Health Shankarbhai Chaudhary khawm Swine Flu an vawi ta a nih. Swine Flu natna indar ding vengnain Ahmedabad district Collector chun a thuneina huomsungah mipui fekhawma inkhawmna hrim hrim a khap.

Chun, Rajasthan a khawm Swine flu leiin mi 11 an thi belsa nawk leiin tuchena Rajasthan state-a hi natna leia thi chu 225 an tling tah.

Hieng laizing hin Sardar Vallabhai Patel National Police Training Academy (SVPNPA)
IPS training hai laia mi 8 hai chun Swine Flu an invawi ti hmu suok nawk an nih. SVPNA a Swine Flu invawi chu 18 an tling tah. SVPNA-a Swine Flu invawi laia pakhat chu naupang a ni a, a dang hai chu IPS training lai an nih. IPS trainee 9 hai chu hospital- a inthawk insuoktir an nit a a, tuhin 8 hai chu SVPNPA campus-a hospital-ah enkawl mek an nih. IPS trainees hai  hin iengtik am class an tan thei nawk ding ti hril thei a la ninaw a, sienkhawm online in class an nei zing tiin SVPNPA director Aruna Bahuguna nchun a hril.


EDITORIAL:
A lainat um khawp el
February 23, 2015 nia Pearsonmun-a Ar zawra sumdawng Laxman Thakur (52) s/o Jagru Thakur, tuta Nagamapal Kangjabi Leirak Kelimandop a cheng mek, rapthlak le ter nenga a ruong hmua um kha ei hriet seng ring a um a. An lang dan khan motor baw mannawleh motor chilhlum ni ngei dinga ring a ni a. Chun, a rawttu kha motor chin ni lovin motor lien ni ngei dingin a taksa siet dana inthawk khan hmu le hriet thei a nih. Tuolsung mi ni sien chu Bandh amani annawleh Police station tawng pawl khawm ei um rek ngei ring a um. Sienkhawm a tuolsungmi ni lo hnam dang a ni lei khan a tutu khawmin ei en liem el chu a ni kha!

Khangang khan ei unau, ei sang, ei u annawleh ei lainahai motorin chilter nengin ngaisak lovin tlansan el sienla iengang khiu in am ei lung a senin a mi thawng ding chu!. Hnam dang a ni a, Vai a ni am, ieng hnam khawm niraw seh, khangang thil rapthlak takel, mihriem inrawt hluma maksan el kha ringnawtu han an lo thaw a ni khawmin eini ringtu hai thaw ding chun an mawinaw hle. A bawhlumtu hai kha tu ham an nia ti hriet la ninaw sienkhawm a rawt hlumtu hai khan an damsungin an theinghil thei dim! ti khawm ngaituo tham tak a tling a nih. India ram ril le ringnawtu hai chengna rama thil tlung ding chauva ei ngai ei rama hiengang motor-a mi baw hluma, ngaisak lova tlansan el ching dam ei hang um el ta hi thil pawi takel a ni a, a nuhmei, a sung le kuo hai ta dingin tuornat a umin a lainat thlak hle a nih

A baw hlumtu kha eini Pathien hring bietu an lo ni thei a, an lo ninaw thei bawk. An hril danin an motor kha zan dar 11:30 vela a siet leia hmatieng pan thei ta lova an motor sunga riek an ni a. Kha huna khan khawsung mi hai chu khawlaia um lovin ina umin a tamlem chu zanmu an tuorem ta ngei ring a um bakah khawpui sung a ninaw leiin a rawt hlum lai mita hmutu chu a rawt hlumtu motora chuong hai bak an ni ring a um nawh. Mihriemin ei thil thawsuol mi hmunaw hai sienkhawm Pathienin a hmu zing a nih ti ruok hi chu eini ringtu han ei theinghil naw nuom a um.

Khangang thil kha ei rama tlung nawk ta ngainaw sien nuom a um takzet a. A tlung nawk ta ngainawna dingin mi rawt hlumtu hai kha thuneitu han zawngsuokin hremna na tak pe ngei hai sien nuom a um. Mi rawt hlumtu hai kha huoisen taka an zawng a ni phawt chun mandawk thei an ni ngei ring a um. A san chu, a rawttu kha motor lien a ni ngei ding a ni a, kha zana kha lampuia tlan motor lien popo an suidawk thei a ni phawt chun man thei ni ngei an tih. Chun, mi a rawthlum kha a ter nasa bawk leiin suidawk tuma an sui tak tak a ni phawt chun motor kha khawtieng pana tlan am a nia ti khawm hriet thei ni bawk a tih.

Tuolsung mi a ninaw lei ela hi thu hi ei ngaitha a, ei suidawknaw a ni chun, vawisun le zing, annawleh iengtik huna khawm eini a tuolsung mi hai chunga tlung thei a nih ti ei hriet nuom a um.



Don't Miss
© all rights reserved
made with by Simon L Infimate