Parbung-a Republic Day hmangna report;
Republic Day hmang huna Police pakhat khawm umlo mipuiin an hrietthiem nawh 
Reported by: Lalnunthang Songate
Parbung : January 26, 2015 khan India ram pumpuia Republic Day hmang a ni ang bawkin Parbung, hmuna khawm hi ni hi ursun taka hmang a nih. Hi huna hin Solomon L. Fimate, Jr. MCS, SDC/Tipaimukh khuollienin a thang. Solomon L. Fimate chun, India nipawimaw le nipui ngai pawimawa ursun taka ei inser hi India khuole- tui ei nina anga ei mawphurna hrim a ni laiin ei ngaipawimaw zie ei suklangna le ta neia ei nei sinsiena a ni bawk tiin a hril a, VA, Parbung le Parbung khaw a Phillanthropic Organisation tum tum hai inpekzona chunga lawmthu a hril. Hmatieng hun la hung um pei dinga khawm an tlawmngaina sunzawm pei dingin a ngen. Ei ram hi midanghai kutah innghat ding a ninaw a, ei hmazawn sengah hma dawm tlang lem ding ei nih, chu chu ei renga mawphurna a nih tiin Solomon Fimate chun a hril. Parbung-a Republic Day hmangna huna hin Parbung Siali Association (nunghak Pawl) han Hnam puon ngeia inthuomin National Anthem mawi le ngainuom um takin an sak bakah sin thaw tha mimal/ pawl/Org/ NGOs etc khawtlang le ram ta dinga mi tangkai hai chawimawina lekha le Lal puonsen dawng tlak hai kuoma Award hai Chief Guest in an hlan bawk. Chawimawina (Lal Puonsen) Dawnghai chu-Lungthulien, V/A Chairman; Taithu, V/A Chairman; Pu Lalthiemsang, V/A member Parbung le Pu Rithang Val-Upa Chairman,Parbung hai an ni a, Appreciation Certificate/ Diploma dawnghai chu -Pu Lalnunthang Songate (Social Worker), Area Manager, Development Dept. RPC-NEI le Development Dept. RPCNEI hai an nih. Hieng laizing hin Parbung Block Hq. ah 2014 IDay le 2015 Republic Day hai Police um lova hmang liem a ni el chu mipui han an hrietthiem naw hle a. India ni pawimaw em ema khawm mani posting-na hmun pan lo thawktu hai hi thuneitu han a awmtawk in disciplinary action la ngei sien ti chu Tipaimukh mipui hai ngenna a nih. Philanthropic Organisations thenkhat chun hi chungthua hin thuneina insanglem cheltuhai kuoma ngen le intlun nghal an tum thu an hril bawk. Parbung-a Republic Day hmangna 34 Assam Rifles, Parbung camp-a um thenkhat han an hung uopna thua lawmum a ti thu Pu Danielthang, VA Chairman, Parbung chun a hril a, Rev. Lalnghillo, D/S, Hmarbiel ICI in tawngtainain Republic Day hmangna hun hi a khar.

Town sunga Fair Price Shop hai an enfel
CCPur : SDO CCPur Joy Gangte le 58-CCPur A/C MLA Nominee Mangpu hai chun zani zingkar khan CCPur A/C-a khawpui sunga PDS- Fair Price Shop/Centre- tum tum Pearsonmun, Ngathal, College Veng(N. Lamka) le Rengkai hai kanin an enfel. Hi huna hin Bufai tha le indik taka mipui lai zawr a ni le ninaw, an khina indik taka thaw a ni le ninaw, an zawrna rate an ang le an angnaw bakah Fair Price Shop/Centre ti signboard tar a ni le ninaw hai an enfel. Centre/Signboard tar lo hai chu tar seng ta dingin SDO chun an hriettir.

Visiting Day/Non Visiting Days
CCPur : Mr Lunminthang, IAS, DC, CCPur chun staff le mipui hai ta dingin DC Office dawr thei ni ding le dawr phal lo ni hai bitukin a siem thar. Hi thil hi Feb. 1, 2015 a inthawk hmang ning a tih. Hi dungzui hin kartin Nilaini le Inrinni hai chu non-visiting Day ning a ta, Thawtanni, Thawleni, Ningani le Zirtawpni hai chu visiting days ning an ta, visiting days haia hin zantieng 2:00PM hnunga chun visitor lawmlut ni tanaw nihai tiin DC chun thusuok a siem. Chun, staff le officials hai chu office hour indik taka zui seng dinga inhriettirin zantieng 4:30 hmaa tukhawm tin lo dingin an hriettir bawk. Chun, DC Office-a documents le thil dang (Daks) hai hrim hrim Urgent/sensitive a ni ngawt naw chun proper channel-ah a lo dawngsawngtu hmasa ding clerks kuta lut a, chu taka inthawk fe pei a ta, DC Office a dawr ding hai hrim hrimin APS kuoma visiting slip la hmasa dingin DC CCPur chun an hriettir bawk.

Malaria Positive 4
CCPur : January, 2015 thl sung khan Malaria Department, CCPur chun damnaw mi 765 hai thisen lain an enfel a, hi laia mi 4 chu Positive an nih ti hmusuok a ni a, hi laia 3 chu PV le 1 chu PV an nih.

Farewell an hmangpui
CCPur : Thadou-Kuki Students Union (TKSU) Donbosco Unit chun zani 10:30AM khan KKL Complex, CCPurah an member Class XII exam ding mi 100 chuong-hai inthlana farewell programme an hmangpui a, Class XII exam ding hai Pastor M. Alun (ECA Cenral Church) in tawng-taipekna a nei.

ASHA han Leprosy Survey
CCPur : Anti-Leprosy Fortnight Celebration, 2015 le inzawmin CCPur district sunga Primary Health Sub- Centres (PHSCs) 6- Alpha PHSC, Khuangkhai PHSC, Khaukual PHJSC, Tuining PHSC, Geljang PHSC le Khuga Dam PHSC hnuoia ASHA members hai chun an biel sunga khuo 117 haiah Leprosy invawi an um le umnaw Survey thawng an tih.

Editorial
Inchuktir thei lo mi ei ni am?

A thiem sa, a hrie sa, a var le thaw thei nghal sa a pieng mihriem ei um nawh. Nautesen ei ni laia inthawkin ei nu le pa han ei mamaw le tul taphawt an min chuktir a. Chu taka inthawka mihriemhai hi hung puitling seng ei nih. Nu le pa han an nauhai suol le thu tha lo an inchuktir ngai nawh. Nu le pa inchuktirna zuia zawm taphawt misuol le mi hlawsam an um ngai nawh. Nu le pa thuawi a, an inchuktirna zuia zawmtuhai hrim hrim chu an phaktawk sengah mi hlawtling an ni ngei ngei hlak. Amiruokchu, nu le pa inchuktirna ngaisak lo, zui lo le zawm lo hai chu hi khawvela hin inhawi tiin an leng ngai nawh. Harsatna chi tum tum an tuok a, hi khawvel hi rinum takin an hmang a, thenkhat lem chu nun beidawngin an ni le anni an inthat hlak. Mihriem chau ni lovin Pathien thil siem chi tum tum, ran ina vai, ramsa, chungleng vate, Nga le thilhring chitinreng hai khawm hi inchuktir thei an nih. Vate thenkhat lem chu tawng chen inchuktir thei le mihriem hril thei ang iemanizat an hril thei bakah tir theiin an um. Ramsa huoi takel, kawl em em el Sakei, ram Sai le ramsa chi tum tum inchuktir thei an nih. Hi lei hin Circus thawtuhai chun ramsa le in a vai chi ran chi tum tum hai chu training an pek a, thaw thei le thiem chi tum tum inneitirin circus thawtuhai chun pawisa hmunain an hmang hlak.

Sunday School-a Beginner department-a ei um laia inthawka ei hriet bel em em el, “Zingkar Vate han Pathien an inpak a” ti hla phuoktu W.J. Kirkpatric (1838- 1921) chun hi hla chang khatna, tlar tawpah hieng hin a hril: “ Mihriem chau naw chun inchuktir an ngai nawh,” tiin. Mihriemhai lai Zohnathlakhai hi ei thang ve a ni chun inchuktir thei ei nih ti hi hriet tlat ding a nih. Inchuktir thei lo ei ni chun mi boral ei ni ding a nih. Pathien thil siem hai lai po pova a ropui le a chunghnung tak mihriemhai hi inchuktir ngai ei nizie hi hla thu le a phuoktuin a hrilchieng le a hrietchieng ang hin, inchuktirna hi mihriemhai po poin hriechiengin ngaipawimaw inla nuom a um ngei el. Inchuktirna hi ngaipawimaw seng inla chu khawvel hi inhawi hleng a tih. Ramsa, Vate, thing le ruo hai hman inchuktir thei an ni laiin ei rama hin mihriem inchuktir thei lo ei tam deu deu el chu a ni hi! Inchuktir thei lo, inchuktirna zui lo le iengmalo a ngai iengzat am ei um ding chu maw! Ngituo chet chet tham a tling. Hieng a ni lei hin inchuktir thei lo ka ni am ti le, ei ni am? ti hi mani seng ei inennawn nuom a um. Inchuktir thei lo nau, inchuktirna zawm nuom lo le ngaisak lo ei rama an tam talou ta leiin, nu le pa beidawng taka um, ruol le pai lai khawm inlang ngam ta lo, thu tha le ngaidan tha an neihai khawm hril ngam ta lo iengzat tak am um an ta? Inchuktir thei lo nau nei hi chu dam man a um naw ngei el! Enna tieng tieng a tawp hmak el a nih.

Inchuktir thei lo mi ni nek chun inchuktir thei mi ni tum hram hram ding a nih. Tulai hin zalen takin Condom sem a ni a. Mi thenkhat le Kohran thenkhatin an sawisel thu hriet a ni hlak. Amiruokchu, hi thil hi a hrie nawhai inchuktirna le hril hrietna a nih ti hi hrietthiem a tul. Condom semtu han zalen takin sex thaw ro an ti bik nawh. Sex in thaw tho tho chun AIDS/HIV hrik le natna hri kai nawna ding le invawi nawna dingin hmang ro an tina a nih. Hi inchuktirna zui lo le zawm nawhai chun natna tibaium takel le sukdam thei lo natna AIDS an invawi hlak. Inchuktirna zuia zawmtuhai ruok chu hi natna hri laka inthawk hin an him hlak.

Lulul insuo hun a ni ta naw a, inchuktirna ngaipawimaw a zawm hun a nih. Lulul insuo hai hrim hrim an hmabak ding chu bohmangna a nih. Lungril ngar le inchuktirna zawmnawtu hai chung a pik a, hi
khawvel damsung huna ngei khawm hin an chan ding chu harsatna, beidawngna le boralna a ni ding a nih. Hi lei hin thalaihai hin inchuktir theilo thalai ni lova inchuktir thei thalai ni tum ei tiu. Mihriem ni ve si a, inchuktir thei lo mi ni chu thil invetthlak tak a nih.

#HmasawnnaThar hi a renga tiem nuomhai chun a softcopy ang zawngin iengtiklai khawm subscribe thei zing a nih. A subscribe nuomhai chun email:hmasawnnatharnews@yahoo.com le Phone: 03874-236846 a hin contact thei zing a nih.


Post a Comment

Powered by Blogger.