~ Henry L Khawzawl

Aizawl, 02 Feb, 2015: January ni 11 Ć¢nthawka ni 28 sung Myanmar le Bangkok-ah sawrkar le helpawl 16 hai inkara palai sinthawa inzin Mizo National Front (MNF) President Pu. Zoramthanga chun Manipur-a Hmar, Kuki, Paite etc helpawl ha’n Delhi ah an inhmupui thu le thangpui dinga an ngen thu a hril. Hi thu hi vawisun Mizo Hnam Run (MNF office), Aizawl ah Myanmar inzina report a pek laiin a hrilang a nih.


Mipui hmaah inzina report a pekna ah Pu. Zoramthanga chun Myanmar inremna khelah Mizoram state thenum Manipur-a unau Hmar, Kuki, Paite etc ramhnuoimi ha’n Delhi ah an inhmupui thu le remna tak tak nei dinga India sawrkar leh inbiek an nuom thu le thangpui dinga an ngen thu a hrila. Hi thu hi India sawrkar thuneituhai kuomah anthlun pek thu le India sawrkar khawmin lo inbuotsaia, helpawlhai leh inremna lampui zawng a tum thu anlo hril niin Pu. Zorama chun a thuhrilna ah a hrilsa bawk.

Pu. Zorama chun “Tripura rama NLFT hai khawmin remna kan dit, India sawrkar leh kan inbiek dan ding mi ngaituopui rawh”, ti in thangpuina an hung ngen thu a hrila. Inbiek an nuom dan hai chu India sawrkarah inthlun nghal a ni a, Tripura sawrkar rem tinain inbiekna fepui dingin an kawprem tir thu a hril bawk a nih.

Helpawlhai fielna angin Pu. Zoramthanga hi Janaury ni 12 khan Kolkata anthawkin Yangon khawpui ah vuong lutin helpawl 16 le Myanmar sawkar hai inkarah palai sin a va thawa. Ni 18 January khan Bankok, Thailand ah vuonglut nawkin helpawl dang dang hieng- Karen National Liberation Army, Kachin Independence Army le Arakan Liberation Army thuoituhai an hmupui hnungin ni 28 khan New Delhi hung lut nawkin ni 31 khan Mizoram a hung tlung nawk nih.

Pu. Zoramthanga chun an phak chinah inbiekna khawm an fe tluong thu le helpawl thuoituhai chun hun remchang hmasatakah MNF le India sawrkar inremna la hung bi chieng dingin Mizoram an hung tum thu a hrila. Myanmar sawrkar le helpawl inhlawmkhawm 16 haiin United Nationality Federal Council (UNFC) an indin thu le inremna tluontling an dit thu a hril bawk.

Post a Comment

Powered by Blogger.