-Tv. LRS Puruolte

“Tuklo rampui thing tin kim hnuoi fangvelin, Vaha’n lunglawmin zaitin an lo vawr; Tlangzam pheiduoi chuona ka zukthlir velin, Fiertui thieng luong virthli’n a lo lawma.” “Amaah (Pathiena) mize hmu theilohai, a chatuon thilthawtheina le a Pathien nizie chu, leihnuoi siem tira inthawkin chiengtaka hmuin a uma, thilsiema chun anlang anih; chuleichun suonlam ding hrim an nei nawh,” (Rom 1:20).

Thilsiemhai hin Pathien Pathienzie an tarlang chau ni lovin a ropuizie le a thilthawthei ziehai khawm an tarlang sa a. Thilsiem chidang dang hriet senglo, hmu senglo hai chu hrillo, ei leihnuoi hman hin Pathien ropuizie a tarlang a; fang theina taphawta hin thilsiemhai chun, “Pathien a ropui ie,” ti hi an puong a nih. Hi hi a hrechiengtuhaia inthawka Pathien ropuizie hmu thei lohai khawma sawrthlapui a’nthawk beka an hmu theina dingin sawrthlapui khawvelah inzin ei tiu le.

APOLLO 8:
Thla ram enthla dingin Mimtuk thla ni 21, 1968 khan Cape Kennedy (U.S.A.) ainthawkin Apollo 8 chu kapsuok anih. Chutaka chuonghai chu:-
Frank Borman (40), James A. Lovell (40) le William A. Anders (35) an nih. Chu kum (1968) Krismas ni khan, thlaa inthawka mel 70 chauah thla an hel vut vut el anih! Chuonghai chun Andres-in, “A tirin Pathienin hnuoi le van a siem a. Chun hnuoi hi a sie le a ruok ngawt a na, tui inthuktak chung chu an thim mup a. Pathien thlarau chun tui chunghai chu a awp zing a.” (Genesis 1:1-2) chen a tiema, Lovell-in a zawm chang li dang a hang tiem ve a, Borman-in a zawm chang hni dang a tiem
nawk anih.

Leihnuoia inthawka lo thlira, an Bible thu tiem lo ngai vetu Rabbi pakhat chun, “An rawl chun Pathienin khawvel a siem laia A rawl hung suok ang hle dingin ka ring,” a ti hiel anih. Sawrthlapui boruoka Krismas an hmang zo hnung, Mimtuk thla ni 27, 1968 khan hnuoi an hung tlung nawk tah.

APOLLO 11:
Hi zet hi chu thla ram enthla chau ni lovin a luta lutna dinga buotsai a lo ni tah. A chuonghai chu:- Neil Alden Armstrong (38), Edward Edwin Aldrin (39) le Michael Collins an nih. Michael Collins hi thla a lut ve lova a lo heltu anih. Armstrong chu, a hotu lem ani leiin thlaa chun a lut hmasa lema; khawvel mihriem thla ram sir hmasataktu a lo ni tah. Minit 15 hnungin Aldrin khan a zui ve a. Aldrin chun Pathien ropuizie a hmusuok thar em em a, “I van, I kutsuokhai, thla le arasi I ruothai khi ka ngaituo chang chun, mihriem hi ieng am anih a I hrietzing hlak ana? Mihriem Naupa khawm hi iengam anih a I kan hlak ana? Ka ti hlak,…” ti hi a hril mawl mawla (Sam 8:3-6). Russia mi, vansanga hnuoi heltuhaiin, “Pathien umna hrim kan hmu nawh; vantirkohai khawm kan hmu nawh,” an ti le chu avan thlau veng veng de!

APOLLO 15:
Hi zet hi chu Moon Rover chawia fena a lo ni tah. Moon Rover chu thla a tlanvelna ding hrim hrima motor buotsai anih. Apollo 15-naa chuonghai chu:- James Irwin, David Scott le Alfred Warden an nih. Thlahmurh ni 26,1971 (Thawtanni) zantieng dar 6 le minit 4 charah an inkap suoka, Thlahmurh ni 30,1971 (Zirtawpni) zing dar 6 le minit 44 in thla chu an tlung anih. Alfred Warden-in, Kilometre 109-a insanga thla a lo vuong hel lain Irwin le Scott chu thla leilungah Moon Rover-in an tlankuol zan zan ela; kilometer 27 zet an tlankuol anih. Thlazing ni 8 (Pathienni) zing dar 2 hnungin, an thaw ding po an thaw zo hnungin, Pacific tuipuiah an hung tum tah. James Irwin chun, “Kristien hai khawm hi, Lalpa sin an thaw zo hnunga, Lalpa’n an chatuon khawpuia a thuoi pha chu ava ropui awm de!” ti hi thlah a hang hriet suoka. Houston khawpuia damlai pielral chen ringawt nek chun, a bula umpuitu Lalpa Isu tadingin, khawvel bung tum tumah, A chachin hrilin an zin suok lem ta anih. A ropui tak zet.

Tiemtu ditumtak, Nang teh; Pathien thilsiemhaiin Pathien ropuizie an hril ve ta hlak che am? An lo hril hlak ta che ani chun iengti’nam I puong suok ve ta hlak a? Rom 1:25- Pathien thutak chu khela inchangtirin, a siemtu biek nekin a siemhai chu biein a rawng an bawl ta lem si a. A siemtu chu kumkhuo a inpak tlak a nih.
Amen.
I ropuina popo hmu dingin,
Ka mit mi hung sukvar pek la;
Tangka le rangkachak nek khawmin,
Ka tadingin a thalem ie;
Khawvel le sum popo bo a tih,
Ka Pathien thu hi bo naw ni;

Chatuon hringna a min hriettir a Pathien le Mihriem Lal Isu. Pathienin America mihai (Saphai) hi khawvela hnam popo hai laia hnam tamtak ni bik naw hai sienlakhawm hnam ropui tak ah a sie anih. Lalpa Pathien a an nei tlat leiin, hi khawvela hin Pathien ropui zie puong suoktu kawng hran hran ah anni rawp hlak… (Lalpa Pathiena nei hnam chu an ham a tha...-Sam 33:12). Pathien in a ensan ngai nawh! Eini hai khawm thiemna, varna a mi pekhai hi a ropuina dingin hmang ve hlak ei tiu. Ei nitin sinthawna le fakzawngna hmun hai a khawm Pathien hi ringin, a ditdan le lawm zawng a umin, ti inla chuongchun mani chau nilovin mihai tadinga taksa le thlarau el bakah ram le hnam damna ei intlun hlak ding a lo nih. “God bless America…”, “ For God And His Country” ti hi an ram thuoitu le mipui, a chintak a’nthawka a lientak chenin an thupui em em el a nih.
Aw Lal Pathien,
I thilsiemhai ka ngaituon,
Maktina in ka lungril a sip hlak;
Arsi ka hmu, van inrum ropui ka hriet,
I thilthaw theizie khawvela an puong.
Chun ka thlan ka Sandamtu an pak che,
I ropui ie, I ropui ie!
Chun ka thlan ka Sandamtu an pak che,
I ropui ie, I ropui ie!...

Post a Comment

Powered by Blogger.