By Lalnunthang Songate

Parbung, January 28, 2015: Indian Republic Day lawman vawi 66-na chu Parbung khuo a khawm thei ang anga puisui takin Pu Solomon L Fimate, Jr. MCS chu khuolliena nina hnuoia hmang a nih.
SDC chun, “Hieng ang ni pawimaw ursun taka ei ngai pawimaw hi India ram mi ei nina, ei sin ei tarlangna le ta neia ei neina sinsiena a nih. Hmatieng peia khawm uluk nawk zuolin thaw pei ei tiu. Ei ram hi tu mi siem pek ding a ninaw a, eini mawphurna a nih,” ti a hrilin, thu ṭha dang dang mipui hma bula a hril.



Hi hun a hin Parbung Sieli Association (Nunghak pawl) hai chu Hmar hnampuona inthuomin “India National Anthem” an sak. Hi ni hin khuolliennin mimal, pawl, khawtlang, ram le hnam ta dinga ṭangkai le sinthaw ṭha bik hai ei hrietpui zie sinsiena’n chawimawina award dang dang ropui takin inhlanna a nei bawk.

Chawimawina (Lal Puon) dawngtuhai chu Senvon V/A Secy, Taithu V/A Chairman, Pu Lalthiemsang Parbung, Pu Rithang, Parbung le ram le hnam ta dinga ṭhahnemngaia mani thei tawk tawk a ram changkangna dinga hmalatu Pu Lalnunthang Songate – Social Worker (mimal) le Dev. Dept. RPCNEI – (Organisation) hai kuomah khawm inhlan an nih.

Hienglai zing hin Parbung Block Headquarter-ah 2014 Independence Day le 2015 Republic Day a hai meu Police kawm umlo a hmang liem a ni el hi mipuiin rapthlak le mak an ti hle. Nipui ni a mani Station panlo thawktuhai hi Sawrkar-in an chungah action la ngei sien tiin pawl ṭhenkhatin thuneituhai kuomah ngen nghal an tum thu an hril. Chun, hi ni hin Parbung Camp-a Assam Rifles sipai um hai chun an thei ang angin an ṭawmawm bawk a nih.

Parbung-a India 66th Republic Day lawmna hun chu Pu Danielthang (V/A Chairman)-in lawmthu hrilin hun a suktawp.

Post a Comment

Powered by Blogger.