Mizoram State Election Commission in khaw pakhata VC Member um thei zat ding a suk danglam

Aizawl, January 19,2015: Mizoram State Election Commission chun Village Council General Election 2015 a nei ding a hin Village Council seat um thei zat ding chungchangah The Lushai Hills District (Village Councils) Act, 1953 tuta hmang meka um chu a siemtha a. Hi dan siemthat, The Lushai Hills District (Village Councils) (Amendment) Act, 2014 hi tukuma Village council inthlang hung um dinga hmang a tan ani ding a nih.

The Lushai Hills District (Village Councils) (Amendment) Act, 2014 in a tarlang dan chu hieng ang hi a nih : -

1) Sungkuo 200 neka tam lo umna khuo chun Village Council member 3 (pathum) nei thei an  ta, member pakhat chu nuhmei ani ding a nih.
2) Sungkuo 201 le 500 inkar umna khuo hai chu Village Council member 5 (panga) nei thei an ta, member pakhat chu nuhmei ani ding anih.
3) Sungkuo 501 le 1000 inkar umna khuo hai chun member 7 (pasari) nei thei an ta, member pahni chu nuhmei anni ding a nih.
4) Sungkuo 1000 chuong umna khuo hai chun member 9 (pakuo) nei thei an ta, member 3 (pathum) hai chu nuhmei ning an tih.

Hieng nuhmei member hai hi thlang ding an ni leiin nomination khawm an file seng ding a ni a. Nuhmei le pasal Candidate hai hi Ballot Papers rawng dang siem pek ning an tih. Election Symbol khawm The Mizoram (Election to Village Councils) Rules, 2014 dungzuiin Party Affiliation nei hai chun Reserve Symbol tho hmang an tih. Ballot Box hran siem ni naw'ng ta, Ballot Box ah nuhmei vote khawm Ballot Paper rawng dang hmangin vote thlak vawng ning a tih. Nuhmei in nomination an file naw ani chun seat ruok a um ang ang State Election Commission in tul a ti huna inthlangna buotsai pek dinga ti anih.