Responsive Ad Slot

Lakhipur Municipal Election ah Hmar candidate pahni

Wednesday, January 28, 2015

/ Published by VIRTHLI
Hmarkhawlien, January 28, 2015: Hung tlung ding February 9, 2015 a Lakhipur Sub – Division Municipal Election a ngir ding candidate hai chun Thawtanni khan Election Officer T T Daulagupu kuoma nomination an file tan taa, hi nomination file ve hai lai hin Pi Rothanpui Hmar of Hmarkhawlen le Pi Jenish Laltanpui Hmar of Hmarkhawlien hai chu Independent Candidate a ngir veve dingin nomination an filed.

Lakhipur Sub – Division Municipal Election a hin member 10 thlang ding a ni a, voters 8545 an um a nih. Election campaign hi nasatakin an nei tawl meka, national party - Congress (INC) le BJP haiin thang nasatakin an lak meka, hratna chang ngei dinga in hril veve an nih. Congress hi ruling party nilai mek an nih.

Hmarkhawlien hi sawrkar in hmun 2 in a the a, hmunkhat chu a hmun lien lem chu GP ah a kawpa, a hmun chin lem, a laili eiti na chu hi Lakhipur Municipal Sub Division suonga um a nih. Kum 2010 khan sawrkarin Hmarkhawlien hi municipal huomsung ah a lo lak lut ta a, a laklut le in ruol hin municipal election chu nei ve nghal a nih. Lakhipur Municipal Sub Division hi Ward 10 a the a ni a, eini mi tamna hmun hi ward 2 a um a, chuong hai chu Ward 5 le Ward 6 hai hi an nih.



Hi ward 2 a hai khawm hin eini Hmar mi election hmasak a khan an lo ngir ta a chu hlawsam a nih.Tukum 2015 election ah Hmar mi in hratna chang ngei nuomna leiin hi Ward pahni hai a hin Hmar mi in candidate nuom pali zet a ngir nuom umhai sienkhawm, Hmar hnam sunga a hranin a ngir ding hai thlangna Primary eletcion lo thaw lawk a ni a, hi primary election a hin Pi Rothanpui le Pi Jenish Latanpui Hmar hai hi Hmar hminga ngir dinga mipui i lo thlangsuok an nih.


Pi Jenish Laltanpui hi Ward 5 a ngir dingin nomination a lo filed tah a nih. Pi Jenish Laltanpui hi kum 2010 khawm khan AGP ticket in alo ngir taa chu vangduoithlak takin a tling naw nih.

Ward 6 a hin 2010 khan Pi Lalthienghlim AGP ticket in alo ngir ve taa, sienkhawm hnena a chang nawa, tukum Ward 6 a hin a vawikhatna dingin Pi Rothanpui Hmar chu Independent candidate in a ngir ding a nih. Hmar area a Ward pahni hai hi INC inlalna hmun veve a nih.

Don't Miss
© all rights reserved
made with by Simon L Infimate