By John H. Pulamte

(December 12&13, 2014 sunga Rengkai le Ngurte khuoa HSA GHQ indin, Platinum Jubilee Celebration Committee hmalaknaa Jubilee lawmna prokram kha HSA chauh ni loin Hmar hnam chanchin a mellung poimaw le inchikthlak ni ngei dingin ka ring a; zuk to bo pui el ka tuma chu ka lungrila mi turtu a um ten leiin vaihnu ramah ka la hung thlir kir ta khong khong a nih. Ka ngaidan le hmudan ka zieksuok hin tu pa/nu lungril khei ka tum naw a; a lo na pal le ngaimaw an um chun poi ka tia, a thawidam dan ding ruok chu ka hriet bik nawh)

Mani tawk tawka hnam thil le khawtlang thila kan hnamhnoina hi ka kum le enkhi chun a tlawm ta bek nawh niin ka ngai ve top. Kum 1988-a HSA Tuiṭhaphai Block hnuoia Lamka Unit indin ṭan a ni ṭumin ka um naw lai Vice President dinga thlang ka lo nia; President dinga thlang chun charge a lak naw leiin chop le chilin Unit President chu ka ni der el. Thei ang angin hma kan laka, Nehru Marg, CCpur epa HSA Hall a hin Freshers Meet kan huoihot chu kan puithu ṭei. Puithu ka zuk in tina san tak chu thildang bek an nawh; kan Chief Guest dingpa poisa mi pek zat ding awmtawk vel channel tum tum hmanga kan indon suok hnungin batin bawngchal tuoi kan lak ṭhuoi lei kha a nih. Kan hriet lawk vuot ang hrimin kan Chief Guest chun Rs. 1100/- a mi pek a; Grand Sale-a rawmol Rs. 200/- in a min chawk pek bawk. Khanglai hun a khan Rs. 1000/- in bawngchal a lo inchawk thei chu a ni kha tie!

1988 kum vek khan HSA GHQ hnuoia Inchuklai Nun Board Member dinga ruot ka nia; 1989 HSA Golden Jubilee Souvenir phek hnungtienga thlalak a chen chen ka lo ṭhang ve kek kha chu ka nina chun a la phak naw ṭhet chu a na; iengti le iengtia kha zan meeting a khan ka lo ṭhang am ti khom ka chieng ta nawh. Chutaka inthok chun, HSA GHQ a hin Executive Member, I&P Secretary, Gen. Secretary le Vice President ka hung ni tung peia; 2004 anthok 2011 chen a zawnin President sin ka chel bok. Chu karlaka chun 1991 le 1993 inkar sung khan HYA Tuiṭhaphai Block Secretary sin naupangtea chelin keini team inrawina hnuoia chun Oct. 1993 khan Muolvaipei khuo-ah Inkhawmpui kan huoihot a; Mizoram tienga ei boruok hung ṭang ṭhat lai tak le antuok a ‘kohran revival’ lai ang elin Hmar hnam hla sakin mipui an lam dup dup a; a tawp tieng lem chu ‘volunteer’ hotupa khawma a lukhum a siethlak vaka mi neka nasa hman hmanin an vaikuol el kha chu a nih. A Secretary takpa ruok chu Imphal-a TDC 2nd Year ka exam lai le antuok leiin rorelna le prokram a nikhatna ka ṭhang thei nawh.

HSA GHQ President ka ni sung khan inkhawmpui le prokram lien voi 5 ka huoihot puia; a tawpna tak, Sakawrdai-a HSA Inkhawmpui voi 53-na (2011) a lem khan chu a renga kan sum seng chu Rs. 12 lakh chuong hiel niin ka hriet. HSA GHQ prokram huoihot ka hriet le ka ṭhang ve na po po lai Dec. 12 & 13, 2014 sunga Platinum Jubilee (Grand Finale) prokram kha a la flop tak niin ka hriet. Poisa sum hmu le seng, bat intang le thung zo lo ti tiengpang kha chu ka ṭhang vena china HSA prokram huoihot hrim hrim le inkungkai a ni leiin thilmak-ah ka ruot nawh. Prokram-a chanvo neihai, President le Gen. Secy hlui le midang ṭhenkhat chawimawina pek dinga tihai, VIP le Hmar hnam sung le puoa fiel awmhai takngiel khoma formal taka inhriettirna hmasa, invitation card le prokram an hmu hman naw chu hrillo; a nikhuo haia sem ding khom siemfel hman a ni nawh. A flop seng seng lai, a ni khatni a la flop zuol a, conductor dinghai khom ṭan tawm chara ruot fawm, a mipui neka VIP hai tlungkim hmasa lem; a huoihottu tienga lukhaitu ṭhenkhat lem chu prokram chanve hmang hnunga hung inlang hman ṭawk an um. Nui anza nawh; Inzak a um lem!

A hming sie phur phak tawk char dingin Celebration Committee-ah HSA President/Speaker hlui ka nina le Hmar Inpui President ka nina zarin Honorary Chairman nina pek ka nia, HYA President le HWA President, Vice Chairman/Chairperson-a ruot ve tho hai neka fel le hrie lem niawm fahrana a kul-a-taia ka lo inhnamhnoi kha ka thawsuol am an ta aw, tiin tu chen hin ka ngaituo kir chang a tam. Sienkhom, HSA GHQ President ka nina kan thlasuok tawma ka hnungzuitu President le General Secretary hai kuoma ka thutiem kha ka hlen nuom ngei bok si!

Ka ruolṭha pahnihai kuoma ka thutiem chu, “HSA Platinum Jubilee Celebration le 2015-a in term a bo hmakhat chu thlathlam naw hrim hrim ka ti cheu,” ti a ni a; HSA 53rd General Assembly resolution pakhat a khom, ‘HSA Platinum Jubilee Celebration Committee Convenor’ pahni laia pakhat dinga ruot ka ni nghe nghe. A hnung meta Celebration Committee Chairman anga umin kum hni hma deuthaw anthok hma ka hung lakpui ṭan det det ding lai tak, February, 2013-in Hmar Inpui President dinga thlangtling ka hung ni ta hlauh leiin HSA tieng chu ka thlathlam deu a hung ngai tah a. A Hmar Inpui tieng ieng ul ka thaw thei naw ding zie lo hre lang chu mawphurna lo la ta lo lem ding kha!

Dec. 15, 2013-a HSA 54th General Assembly, HSA Campus, Rengkai-a nei a ni ṭumin Assembly Speaker ka nina anthok thlak ka ni a, Adviser dinga ruot ka ni ta lem baka Platinum Jubilee Celebration-a Honorary Chairman nina pek ka la ni ta hrama chu a khik kuol le thu pe theitu in ni ta nghal lo. Chu hma chun Jubilee lawmna huoihotna dinga poisa sum hmasak ding tiin Platinum Jubilee Calendar, Rs. 2.7 lakh hiel sengin ka buotsai pui a; Copy 5000 kan sut laia copy 3000 chauh khom mumal taka zor suokin a man inlawi sien chu Rs. 1 lakh chuong balance um thei dinga kan lo ngai chu a ni awzawng nawh; Joint Headquarters le Branch tum tuma a zatela kan thonsuok chu Delhi le Kollasib JHQ anthok charin indiktakin a hung inlawi a; a danghai anthok chu a pumpuia belkhawm 50% khom a a tling nawh. To ṭoka lo sieṭawl pawl an uma; ṭhataka intin deuthawa zorsuoka, a man khom dawlsuok, a hmunpui tieng ruok chu hung thon lo an um bok. Nasa chu ei nasa!

Calendar chu dittawk loin, sum hmuna ding boka ngaiin ‘Platinum Jubilee T-Shirt’ quality ṭha tawk piece 200 ka sut pui a, 1000 deuthaw kan order bok. Chu T-Shirt chu Oct. 25, 2013-a Shillong Council-ah palaihaiin mawitakin kan haka Calendar-a inchuon dingin thla khom kan lakpuia chu a ni khom chun payment nekin bat a tama; tu chen hin 50% khom hmu kir a ni naw a, a lo phursuoktu, Imphal HYA ṭhuoitu Pi Thangthatling lu a lan hai zing bok. Lakh 3 vel bek poisa sum hmuna dinga riruong dang Jubilee Raffle (Lottery) khom biel tinah a awm tawk thondar a nia; Tuiṭhaphai laia Hmar khuo in tin deuthaw-ah Rs. 100/- man pei semdar a ni bok. Chu khom chu a man inlawi nekin anlawi lo tu chen hin a la tam a; result chu puong (draw) thei hram hram a nia chu a bata lo latu ‘zaah sawmkuo pakuo’ chu an vangnei ta si naw leiin ticket man kim thlapa a hung inlawi dan a um tan aw hrim hrim.

2013 kumbul lai deia PJCC ṭhuoitu dinga ruota umhai chu Shillong Council (Oct) khan official takin approved a ni a; senior member ka nina anga mawphurtu bik deuhai kuoma ka thurawn pek hmasa tak chu, a team (mi 5/6 bek) inhawrkhawma Imphal hung thlaa, ei MLA Pu Chalton lien Amo bakah Hmar vote-a MLA/Minister tling – Puhai Phungzathang, Debendra, Vungzagin, TN Haokip, Ginsuanhau hai bakah ei Officer lien – PC Lawmkunga, JC Ramthanga, P. Vaiphei, B. John Tlangtinkhum, Dr. Saidokhum Joute le a dang danghai hung inhmupuia, Platinum Jubilee lawmna ding le inzomin poisa sumfai ni loin ‘works’ chite te hung hni a nih.

A vel a velin chu thurawn chu ka pek zom a chu umzie a nei naw a ni tak. Platinum Jubilee lawmna hi kumtluon (year-long) a ni naw chun prokram intongkhong a ta, a buorchuoi vong ding nia ka hriet tlat leiin inauguration (launching) prokram chu 2013 kum tawp tienga nei nghal dingin thurawn ka siem bakah 2014 kum bul tienga Platinum Jubilee Star Hunt zo fel dei ka rotpui bok. Chuong a ni chun, Platinum Star ‘top 10’ hai hla chu ‘Music Video Album’ siem thei ning a ta, poisa sum hlawk um ang ang le sponsorship tlawmte te intlingkhawm chun ama le ama prize antodel thei ka lo beisei a nih. A thu a um le zieka tlawmte umhai chun tak anchang thei thlawt nawh a; suonlam ding le intum ding tamtak um sienkhom ka ngaidan le hmu dan a chu mawphurna neitu dinga mi 5/6 hai an inthuruol nawin an thu fepui tum dan an awng thlawt nawa a ni tak. April thla chen a khom, HSA Platinum Jubilee thu le hla chu Hmar in tamtaka Calendar tar (khom chu a man hmulo) a ni bak chu hril le hriet a ni meu nawh a; official launching (inauguration) prokram lem chu a hnai nawh.

A tawp a tawpa chu Committee Chairman le Secretary haiin ‘support kan hmu nawh’ an ti lei mani ding an sin anthok an hung inban ta khong khong a. May 31, 2014 in Shillong anthok President a hung kaia, ama inrawina hnuoia chun Committee Chairman le Secretary dingin a hmaa Vice Chairman le Asst. Secretary hai chu kan ruot a; phurtaka hma la thar dingin an hung inbuotsai ṭan nawk det det tah a. Kei kan hmaw lei mani ding midang chu inawi ka ti khop el a; vaihnu ramah July 23, 2014 khan HSA Platinum Jubilee (year-long celebration program) hongna hunser (launching) le Tribal Hostel bawlna ding budget-a thangsa lo, hnam le HSA-in a mamaw nia ka hriet leia ṭhenkhat demsiet le soisel hlaw pha raka ‘Boys Hostel’ chungsawnga ka bawl pui ‘HL Daka Memorial Hall’ hongna hunser chu nei a ni ta ṭawk a. Chu ni chun, skul naupanghai ta ding bik deuin Essay, Drawing/Painting Competition-hai buotsai a nia; response a ṭha khop el a, mi a suk thafan hle. A hnung metah ‘One Day Career Conference’ hlawtling le phuisuitakin nei a ni nawk bok.

Poisa sum hmuna le hmangna ding budget mumal taka phar le entlangna hman a um ta nawa chu celebration item dang danghai lo theiloa nei ṭan a ṭul ta leiin kum bul tienga nei dinga ka rot, ‘Platinum Star Hunt’ (solo competition) chu September 6, 2014-a nei ṭan dinga thu sukthluk a ni a. Chu hma chun mipui abikin, ṭhangtharhai sukphurna ding le publicity pakhat nia ngaiin Tuiṭhaphai Hmar khuo a hai ‘street corner campaign/concert’ nei dinga rotna thar chu namdet a ni bok. Sienkhom, a hun a hung tlung tawm meu chu poisa sum um naw le khawmuol inṭumnaw suonlama la ṭhul hri dinga ngaidan nei pawl committee member lai an um nawk ta pei a. Kei hlak chun a hun an tepter el ta bakah voikhat thu sukthluksa sukpuitling lo pei a ni chun a huoihottuhai khom lunghnuol phanaa an hmang kan lau leiin ka mimal sum chen senga nei thleng ngei dingin ka phutlui tawl a; kan hang thaw hlak chun a hlawtling angreng nawk angreng si. Chu hnung sawtnawte a chun Celebration Committee Chairman le GHQ Vice President ni lai zing le, Secretary (GHQ Internal Secretary) hai chu an sin anthokin an hung inban ve chie nawk ta bok a; hmabak an kho ṭan nghal.

Oct 5, 2014 in HSA Executive Council, Shillong hmun-ah nei a nia; Council chun PJCC Chairman le Secretary hai inbanna chu a pom a; A hmun ngeia fea mi thar ruotpui dingin President dande a ni bok. Chu dungzui chun President chu Oct 10, 2014 in Tuiṭhaphai a hung kaia, PJCC Chairman le Secretary a pathumna ding a hung ruotpui a; anni bakah chun mawphurna dang dang latu ding, HSA-a nina le mawphurna la chel hman lo, mimal taka hnam le pawl ta dinga ṭhahnemngai tak tak, tonhriet ruok chu la nei mumal lo ruol chu remkhawm an hung remkhawm pui tah a nih. Member tharhai chu an inpekzona le taimakna hai inpak an um lai zingin ‘team’ anga sin hang thawtlang chu harsa an ti ṭhet a hoi. Meetinga ka ṭhang ve sun a hai an ngaidan le fepui nuom dan an hlat zie ka hmu sa peia; ka bei chu a dong thei hle. Voisun thu pakhat ei rela, a zinga bawzui a ni hma’n thu a dang nawk peia; a Chairman le a Secretary tak hai hlak chu committee na hmun ti nawa chu an inhmu in an in biekpaw tam nawa, inthuruola suok khawm lem chu an theinaw tieng a ni tak. An nina hmasaa Event/Program Coordinator (in-charge) an nina kha an la sunzom zinga a pumpuia mi an la uksak hman naw ti ding hlak chun a ni mang si nawh. A pumpui tieng in ‘concentrate’ ta lem dinga thurawn ka pek hlak chu vut laia voi ang chauh. Finance Secretary le Treasurer a hrana ruot an nia chu anni khata ‘fund drive’ hang nei chu thil theilo tieng a nia, sum lutna ding le suokna ding chieng takin an hriet phak meuh nawh. Member dinga laklut thar, ṭhangthar beisei um le talent inhnarum tak tak nei iemani zat lem chu ka hmu ngei a; an ni hai chun an mi ṭhuoihar ṭawk ṭawk a ni tak!

Committee hang nei chang chu an active tawl hlea; a biel neitu CCpur JHQ ṭhuoituhai hlak an ‘duties & responsibilities’ nekin an ‘rights, powers & jurisdiction’ an lak ursun lem niin anlang a. An hnuoia Unit 20 deuthaw um lai a pawlpuia inruolsiekna lai football tinaw a chu a ṭhang ding sukphura fiel dok zo an nei mumal nawh. Main celebration huna ‘transportation & accommodation’ mawphurna peka an um khom ka hmu dan le Mizoram, Barak Valley le NC Hills tieng anthoka mikhuol hung hai hrildan chun an phursuok zo naw chu a nih. Puo tieng anthok a pawlpuia mikhuol an hung ṭhang tamnaw kha a mikhuoltu bielhai buoi le hmingsiet ding a suk nep pha tia ngai nuom chun ngai thei a nih. A poi ṭhet!

Main celebration ṭan hma chawlkar khat vel anthok GHQ President le OB poimaw zuol ṭhenkhat Tuiṭhaphai hung kaiin an hung umchila chu kongro an suk thei ta naw ni deu takin anlang. A khawseng hri hri’n, HSA lukhaitu laia prokram hang huoihot le mi hang inrawi ding tienga ka suongtawloi le ringzo, Tv. L. Rothanglien Khawbung (Gen. Secy) hlak Civil Service (main exam) pe dinga an buotsai vortawp lai tak a ni leiin prokram a takngiel khom a hung ṭhang thei nawh. Amapa hi a kul-a-taiin hung ṭhang thei sien chu hieng bek beka buorchuoi hi chu a ni ka ring nawh.

Kum tamtak liem ta anthoka ka lo suongtuo lawk le ruolṭha hai kuoma thu ka lo tiem vena a ni leiin theitawp tak meu suo chu ka mawphurna a ni el a. Imphal laia ka ruolṭha le HSA CEC Member ni bok, Hrilsangmawi le thla 3 sung veng vong kha chu kan invetpui chu a ni deu tak. Ditsaktu le mi dang ṭhenkhat chun Hmar Inpui President meuh ni hnunga HSA ta dinga ṭhahnemngai lem ang ziezanga a kul-a-taia a hmatawnga ka um chu ṭha an mi ti pui nawa chu ‘upai’ a um ta nawh. Chawlkar tin deuthaw CCPur kai a ngai a, a chang chu voi 2/3 fe chang a um bok. Poisa sum hung tuok dinga beisei ruk le Prokram VIP ding a tam lemhai chu Imphal tienga um an nia, mi pakhat hmu dinga ni 2/3 nghak hnunga ei hlawsam nawk chang chu ngaituo a tawi nuom kher el. Buoipui kop kan hau taluo leiin Souvenir-a advertisement ding 2 lakh chuong bek hmu dinga kan bei chu DIPR anthok permission kan hnina ‘file’ a lo lut-in-le nawk khanglang bok le Rs. 50,000/- le a thuomhnaw zawnga thilpek, a suma inchangtir chun Rs. 40,000/- vel ding chu kan hmu phak ṭawk a. Mi ṭhangpui dinga intiem le kan biek pop hnung sorkar department 2/3 khom intuok remchangna hun a um ta naw leia chan song a um bok. Poi tops!
Platinum Jubilee lawm dinga inruohmanna um tir laia Budget dinga kan riruong hmasatak chu Rs. 27 lakhs a nia; hi taka hin Manipur sung a khom Tuiṭhaphai biela Hmar in tin (job card neihai) anthok Rs. 5 lakhs; mimal le sungkuo ditsaktu zuol bikhai anthok Rs. 2 lakhs le Main Sponsors le Co-Sponsors hai anthok Rs. 5 lakhs a ṭhangsa a. Chu baka hmuna dinga riruong a chun Jubilee Calendar (2014) le Jubilee Raffle (Lottery) anthok a tlawm taka Rs. 3 lakh ve ve a ṭhang a; Platinum Star Hunt khom ticket Sales le Sponsorship anthok ama le ama (prizes & expenditure) intodel dinga ngai le riruong kha a ni bok.

A hmaa hril ta ang chun Jubilee Calendar chu a flop el chauh khom ni loin a sumpui dinga NEREF Bank anthoka poisa Rs. 90,000/- puk khom thung zo lo a la nih. T-Shirt khom chuong tho. Manipur-a Hmar MLA le MDC pali hai anthawka sum hmu dinga inbeisei hmasatak chu Rs. 4 lakh a nia; MLA pu hin Star Hunt ṭan ding lai khan Rs. 75,000/- a sumfaiin a lo peka; a hnung met-ah Thanlon MLA-in Pherzawl-a Library Building bawlna dingin Rs. 2 lakh a hung peksuok a; hi poisa hmanga sin thaw zo a ni pha Rs. 1 lakh a sumfaia a pek ding thu a hril a; a hril ang tak chu a sukpuitling a. Hieng poisa hai hin Calendar le T-Shirt sut man bat intang ṭhenkhat inthiel a ni bakah prokram le inruolsiekna item hmasa – Launching Program, Star Hunt, etc hai huoihot thei an ni phaa; soisel nuom hrim hrimtu ṭhenkhat hmur-ah PJCC a chuong phaa chu ‘football pet khom hi a puo tieng anthok ei thiem seng’.

Pu Chalton chu a ‘works’ zawngin PJCC a ṭhangpui nawa chu Parbung SDO le Vangai BDO hai hmingin Rs. 50,000 le 30,000 a hung phursuok bakah a nipui ni a CM le a party-hai Lunch sengso Rs. 35,000 chuong a tum leiin a tira phut zat vel chu a seng hrim hrim a. Manipur CM, Cabinet Minister le MLA danghai fiel tluk khom kha ama um naw sien chu thil theilo a ni bok. Manipur-a Hmar MDC 4 hai hin poisa sum iengza chie in am an hung ṭhang ti ka hriet ta nawa chu seki pawng khom hung thawlawm lo bakah Manipur CM meuin Hmar-hai prokram a hung uop ni khoma hung dikindak ve lo chu an um niin ka hriet. Manipur MDC hai lai HSA Jubilee lawmna dinga thafan le lawm taka poisa sum thawlawm tamtak chu hnam dang a ni el thei, ka hriet suol naw chun. Anni hai chu thuhran, Hmar hming chawia pawl le khawtlang ṭhuoitu tamlem bakah HSA ṭhuoitu inti ve ngei ngei khom Jubilee lawmnaa hung inlang ve ṭhak lo an um bok. Mawihnai taka fielna lekha an hmu naw thu an suonlam chun thil ni thei a nia chu ka pom vong chie nawh!
Khawpui le inchukna hmunpuia HSA umna tamlema chu HSA hminga prokram le thil thawna hrim hrim-ah hnam le kohran ṭhuoitu nu-le-pa po po deuthawin an inhnik puiin an uopmawi hlak a; Tuiṭhaphai – Hmar bubitna le pawl tin deuthawhai headquarters lai ruok chu Inpui, HSA, HWA, HYA etc hai hi a ṭhuoitu hai ta chauh anga ngaina lientak a um a; rikrum thil le hnam hminga pensuokna ding a um chang hlak chun hnam ṭhuoituhai an zong vel nawk ruoi hlak a. Inringlawkna um loa buoina chite khom a suok pha hlak, ‘hnam ṭhuoituhai khawlam an um a?’ ti a ni nawk vong tho. Tlangval hoklak ruol insukbuoi chu hrillo, archal insuol takngiel khoma hnam le hnam kara buoina suok theina hmuna chenghai thil fepui dan le chun anmil naw ngei. Platinum Jubilee lawmna nipui ni tlung tawm ṭep lai khom motor accident leiin a hnam zawnga buoina lien tham a suok ṭep a; HSA hotuhai lu an hai hman hle a, a hrilsietu le tapte bula inhrosa ching mi ṭhenkhat anthok telephone anthok lungsen le inrum mangkhenga vauhna an tuok bok. Ei nasa pei!

NC Hills tienga ei MAC hai khom Grand Finale prokram a hin anni ngei hung dinga phut an ni bakah sum khom nuoi 2 bek beisei an ni leiin NC Hills & KA JHQ in anni puola Jubilee lawmna hunser an nei khom khan MAC hai chu a thei chinah sum-le-paia sawk/pur lo dingin PJCC ṭhuoituhai le GHQ ṭhuoituhaiin a vel a velin an ngen a. Prokram a ruok chu Council Chairman Pu Ngamrothang-in Member Pu Khawvelthang hung ṭhuoiin a hung hmangpuia; EM le Member danghai chun uve-ave an hung ti ta chuong nawh. HSA ta dinga poisa sum an thawlawm sunhai khom Pu Ngamrothang a pocket anthok chauh a nih. BVHTDC Chairman Pu Lalthawmlien anthok khom a ruk tak chun beisei nei a nia chu ama khom a harsat lai le a lo intuok ni ngei a ta, ansanpuom pui thei rak naw ni mei a tih. A hmaa HSA Education Fund tia inkhawla lo um, mimal ṭhenkhat kuta a pung um dinga sie hai hlak mamaw hunlai tak hmu kir theilo in a um a; hmu sunhai hlak mumal lo takin a thamral titi a.

Kum 75-na (Platinum Jubilee) meu a ni leiin lawmman hai khom lukhawng nei met nisien, a hmu le dongtuhai ta ding khoma inchikthlak le a hnung chen a khom an ṭangkaipui thei ding nisien ti nuomna leiin a pawlpuia inruolsiekna Football, Choir, Cultural Dance le Platinum Star Hunt haia a pakhatna chu Rs. 75,000/- hang thaw kher an nih. Chu bakah chun mimal inruolsiekna poimaw zuol hieng – Masthead design, Jubilee Theme Song phuok, Marathon, etc haia pakhatna khom Rs. 7,500/- pei dinga ti a ni bok. Hieng lawmman pek dinga riruong hi a renga belkhawm chun Rs. 7 lakh a chuong vor vor a nih. Sum ngirhmun a derthawng taluo ti hriet hnungin Choir le Cultural Dance lawmman pakhatna kha 50,000 ah ka ṭhumhnuoi thei pui hram a; rotna dang ka i siem, hlawthling ta lo chu ‘Platinum Star Hunt kha Main Celebration zo hnunga sunzom ding’ ti a nih; mi zawmpui hai sien chu tuta lawmman pek thlak loa la um hi Rs. 1.5 lakh chun a tlawm pha ngei ding a na tie. A dongtu hai ta dinga thil lawmum kha a petu ta dinga lungzingna a ni ta dei. A zienaw ṭhet!

Hmar in tin anthok Jubilee lawmna ding hin Rs. 100/- pei dawl phalna HSA in a hni anga Hmar Inpui khomin a remti pek hnung khomin bawzui el loin a um a; a tawp-ah Tuiṭhaphai khuo iemanizat-ah Rs. 100/- chu dawl ringot loin Lottery phek 2 (Rs. 100/- man pei) PJCC Finance Department haiin an sema chu tu chen khom hin a man inlawilo Rs. 1.2 lakh vel a la um ni awm a nih. Result hlak chu puong a ni tah a, ka hriet ta nawh. Hmar Officer le mi neinung bik, hnam ta dinga inphal deu deua hriet hai anthok Rs. 1000/- anthok Rs. 10,000/- chen dawla; cheng nuoi 2 bek hmu dinga beisei khom kha bawzui mumal a ni nawa; anni hai anthoka hmu hi Rs. 30,000/- khom a tling ka ring nawh. A tira beisei phak chie lo, Dr. Rochunga Pudaite anthok Souvenir sutna dingin Rs. 50,000/- le Star Hunt huoihotna dingin Rs. 20,000/- hung lut a; Tv. Roland Ralsun anthok Monolith man ding Rs. 60,000/- a hung khiet lem a, lawmum ka tih. Hnam ta dinga malsawmna ni zom pei dingin dam vong vong raw hai seh!

Ralkang anthoka lo thlir le ngaidan siemtu ṭhenkhat-in poisa sum lut le suok indik naw zie hril uora PJCC le GHQ ṭhuoitu hai poisa sum a sing-a-sing sukriral anga an intum ruok hi chu an hriet tlawm lei a ni naw khawma an chemkalna zawng a ni hrim hrim lei ni mei a tih. GHQ le PJCC ṭhuoituhai kha tlinnawna le tlaknawna tamtak neihai sienkhom an theitawp an suo vea, an thokpui ṭhenkhat haiin hrietnaw sak sak an thawa an hnung nghat laia sawl le beidong taka an um lai hmel kha chu en inhoi bek lo a nih. Mipui prokram huoihot le hang chalai vel hi ṭhuoitu ṭha le fel nazong thaw thei chi khom an nawh a; hun a la fe peia, hnam hminga pawl le kohran hai hin inkhawmpui le prokram lien ei la huoihot pei ding chun ‘event management firm’ dam ei la ruoi a ngai el awm, ti dam tulai chu ka ngaituo ta mek a nih.

PJCC a ding khan HSA ṭhuoitu nilai mekhai kher lo ruot loin hnam le khawtlang ṭhuoitu, HSA leaders hlui, MDC annaw khawma Officer hai lo hmang ta lem ding kha aw, ti damin ka ngaituo kir a chu a ni ding ding a ni zo tah. Eini ruol chara Platinum Jubilee lawm ve unau Zillai (Vaiphei) hai thil thaw dan ka hmua, eini tieng ka en pha inzakum ka ti letling. Pasie kum tiem deua ‘thaw nawk pha chu’ hang ti ding hlak chun, ‘centenary’ chu damsawt thil a ni tah bok si!

Ka mimal tieng taka chu tuta ṭum kha hnam thila prokram lienthama kan hnamhnoi tawpna tak ding niin ka ngai a, awm daw par deu ata zo ka tum em em vei leh, mihriem remruotna chu Pathien ṭhang lo chun iengma lo a ni zie ka hriet chieng zuol hle. Prokram hma le zo hnung zan iemani zat imu tuorem theiloa changtieng le voitieng kan let let kan let laia India ramin zalenna a suol ṭan hlim laia sulsutu poimaw Mahatma Gandhi meu khoma ‘ka guru’ a ti hiel GK Gokhale in khanglai huna ei ram rorelna khawlpui, Imperial Assembly-a a thuhril kha ka lungril-ah a hung inlang nawk vong vong hlak. Chu hi hi a nih:

“Keini tuta India rama ṭhuoituhai hin chu kan hlawsamna chauh-a kan hnam le ram rong bawl hi kan inhuom a nih. Ṭhangthar keini hnunga hlawtlingna le kan hnam le ram rong bawl ding mi vangnei an la hung suok ngei kan beisei a. Chuong mihai chun, kan mawphurna kan lo hlen ve zie hi la hung hrie ngei an ta; thawa hlawsam chu thaw lo nek chun a ṭha lem zie khom la hung hrie ngei bok an tih.”

Buorchuoi nuoia prokram hmang zo hnung sawtnawte-ah HSA GHQ Office Bearer-hai inhmukhawmin thil um le fe dan an ennon a; inruolsiekna lawmman la pek thlak zo lohai pekthlakna dingin ‘loan’ laka chu ‘loan’ chu HSA Marketing Complex hluo man anthoka thung phot dingin pa chan chang takin an rela; an thaw ding awm reng an thaw a ni lai zingin an rawihai hnung inthiel an ngamna hi ka ngaisang top. Tu hrilsiet le tu hrilmawina ni naw sien – Hmar hnam hming chawi pawl (organization) lai rau rau-ah chu HSA GHQ ṭhuoituhai chu iengkhom thaw naw hai sien khom thla khatah Rs. 10,000/- chuong ‘income’ an nei hrim hrim leiin rorel a olsamna chin um ngei a tih.

December 13, 2014-a Manipur Chief Minister thupuong, “Tuibuong BDO, Sangaikot BDO le Saikot BDO hai ‘Sub-Division’ level-a hlangkai le a headquarter dinga Saikot” kha HSA Jubilee lawmna Ngurte-a nei ninaw sien chu beisei um taluo a ni nawh. Kha hun maa, Ngurte khuoa dinga Health Centre, School le HSA Eco-Park hai kha a khuo, a biel le hnam ta dinga thil lawmum a ni lai zingin ṭhuoitu haiin theitawp tak meu suoa ei bawzui naw chun Jubilee nawk nghak a ngai el thei.

(Imphal; January 21, 2015

Post a Comment

Powered by Blogger.